Hag Gwih Danci - 广西民族报网

Hag Gwih Danci

来源：广西民族报

作者：Sangswh Yen Daihsam Siujyoz haj (2) ban Liengz Yinzlingz /梁芸菱

发布时间：2024-08-28

　　Ngoenzneix, daxmeh naeuz daiq gou bae gvangjcangz hag gwih danci, gou angq dwk diuq hwnjdaeuj gikdoengh dangqmaz, aenvih bineix hag rox bonjsaeh neix dwg maqmuengh youqgaenj gou.

　　Gaxgonq bae ranz dahnax guhcaemz, gou raen nuengxbiuj iqetet cungj gamj gwih danci cunghoho, vaiqvet youh soengsat, gou hozhaenz dangqmaz. Yienghneix, gou couh nyaenx mbouj ndaej heuh nuengxbiuj son gou gwih danci. Hoeng de caenh rox guhyiengh gwih hawj gou yawj, gangj mbouj ok gij fuengfap baenzlawz cij hag ndaej rox gwih danci. Cam de haujlai baez, de hix dan rox gaeu gyaeuj, mbouj rox baenzlawz gangj cij ndei.

　　Ngoenzneix, nanzndaej daxmeh ndaej hoengq daeuj son gou hag gwih danci, gou itdingh aeu caenhsim hag, vaiq di bae caeuq nuengxbiuj doxdax mbat ndeu cijndaej.

　　Haidaeuz, daxmeh itcig youq baihlaeng danci rex gou, gou couh cuengqsim ciuq gij fuengfap daxmeh gangj haenx, dawz gyaeuj ci maenh, caij hwnj diebdin danci le, song da yawj baihnaj, haenqrengz baez caij, song loekci couh menhmenh coh naj baenq bae lo. Gou naengh youq gwnz danci, ndawsim angqvauvau. Yaep ndeu, miz daxmeh bang rex dawz, gou gingqyienz yied caij yied vaiq, couh lumj boux sug gwih nei cungfefe.

　　Mbouj rox dwg gou caij vaiq lai, roxnaeuz dwg daxmeh baeg lo, de gingqyienz laeglemx cuengq fwngz caih gou gag gwih lo.

　　Mwh gou yaek van gyaeujci gwih dauqma, cij raen daxmeh youq gizgyae riunyumnyum yawj gou. Sim gou baez anj, vueng dwk song fwngz fwt unq liux. Song din mbouj gamj yungh rengz caij, gyaeujci hix bibuengq hwnjdaeuj, mbouj geij gyae danci couh “dingz goeng” caij mbouj bae, gou caeuq danci cungj laemx lo.

　　Daxmeh youq gizgyae riuhaha, naeuz gou mbeiiq. Gou simfanz yaek daej, daxmeh cix nai gou, gujli gou yungh gij fuengfap haxbaenh, caiq gwih lai geij baez.

　　Yienghneix, gou youh cengqmbei yamq hwnj danci laebdaeb hag gwih. Hoeng, aen danci rwix neix lumj daegdaengq hangz gou nei, mbouj dwg laemx baihswix, couh dwg ngeng baihgvaz, sawj gou gwih ndaej dwgrengz dangqmaz. Hoeng, mwh gou siengj daengz nuengxbiuj, couh fwt miz saenqsim lo, youq ndaw sim gag naeuz——Hw, gou aeu roengzrengz hag, itdingh mbouj yaez gvaq nuengxbiuj.

　　Yienghneix gou couh hwnj ci, roengz ci le, caiq hwnj ci……Baez dem baez gwih mbouj dingz, lienh baenz song diemj lai cung cij gwih ndaej swnh.

　　Mwh gou dingq daengz daxmeh haenh gou, ndawsim lumj gwn dangz nei diemzsisi. Gij rumz cifefe gvaq naj gemj henz rwz gou, gou roxnyinh vuenheij raixcaix.

　　Gou dauqdaej hag rox gwih danci lo! Ngoenz- neix caen dwg ngoenz daegbied youh miz eiqsei ndeu ha!

　　(lauxsae son raiz： Lij Sinbingz/指导老师：李信平)

编辑：黄誉琦复审：黄慧华终审：蒙树起