Aen Seizcin Gou, Yawj Gou Guh - 广西民族报网

Aen Seizcin Gou, Yawj Gou Guh

来源：广西民族报

发布时间：2024-08-28

　　Bi gveizmauj（bi 2023）, seizcin, gofaex go’nywj heuswdswd.

　　Ndit ciuq youq gwnz ngafaex, lumj fuk dozyouzva noengznwd ndeu.

　　Baihlaeng siujgih, benq dieg namh henjgywg ndeu, youh hawq youh genx, lumj mbaw yiebsaw gaeuqgeq ndeu, caemrikrik, mbouj miz bouxlawz fan yawj.

　　“Gaiq reih geijlai ndei ha, ce ndwi vaih dieg lai lo.” Gou yawj benq reih neix, dawz haeuj sim haeuj dungx, simgip dangqmaz…… Youq seizciet neix gofaenx did nyez go’nywj heuseu, baenzlawz cix ce gaiq dieg gaeuq neix gag youq caemrikrik、fwzrwdrwd ne?

　　Gij ndwenngoenz gvaqlaeng, mbouj dwg youq hagdangz, cix dwg youq gwnz roen bae hagdangz.

　　Yaepyet, seizcin bi duzlungz gyazcinz daengz lo.

　　3 nyied 12 hauh, cietndaemfaex, cingq bungz ngoenz diuzcingj yietnaiq.

　　Gou couh dawz dinfaex caeuq cehva daj gwnz haw cawx ma haenx youh daeuj daengz benq dieg namhliengj baihlaeng siujgih, youh raen benq dieg namhliengj lij ndoqndatndat neix baez ndeu.

　　Baenzneix, gou gig miz saenqsim hainduj guh gij hong gou.

　　“Ga!” Fag dezcanj roq youq gwnz namh, sing yiengjbatbat gig coegrwz, gij dieg namh neix senq cix ro lo. Baenzneix cijndaej rwed raemx gonq, caiq aeu canj vat gij namh mbaeq unq haenx. Guh liux doengh gij hong neix, hix ngamq vat ndaej congh gumz iq dan ndaej moek ceh, hoeng gou gaenq baegnaiq yaek dai lo.

　　Gvaq diemj cung ndeu, gumz namh yied daeuj yied hung, namh hix yied daeuj yied mboeng lo.

　　Gou soeng gaemz heiq ndeu, vanq cehva roengz ndaw gumznamh bae, caiq aeu namh soiq goemq, aeu fagcanj menhmenh dan bingz, cij suenq ngamq ndaem ndaej nyup va moq ndeu, hix suenq raen mizmuengh lo.

　　Congh gumz aeu daeuj ndaem faex haenx, lij lai hoj vat dem, aenvih couhcinj cungj dwg ndaem dinfaex, go dinfaex muengh dokrag maj sang hix mbouj beij doengh go faex hung sangvidvid haenx noix. Gofaex gyaeu- ndei, mbouj dwg aenvih mbawfaex heuseuseu, cix dwg gij goekrag sanj doh lajnamh haenx.

　　Gou mbouj geiq ngoenzhaenx youq gizde geijlai nanz, hoeng gij ginglig ngoenzhaenx gou rox, naed ceh didnyez yaek aeu, mbouj dandan dwg nditrongh raeujrub、dohraeuj hab- ngamj, lij yaek aeu doek raemxhanh caeuq miz muzbyauh dingjmaenh.

　　Gvaqlaeng mboengq ndeu, aen- vih hagsib nyaengq lai, gou saekseiz bae yawj gaiq dieg haenx baez ndeu, caih gofaex、dujva haenx dingh youq gizde mbouj miz boux leixlangh.

　　Go faex dog haenx hix dingh- dingh daengj youq, mbawfaex caxcad ngaemngiengngieng, yaek dai yaek mbouj, doengh naed ceh haenx cix lumj dahsau maeuq youq ndaw rug, mbouj raen lohnaj saek baez.

　　Sawqmwh, miz ngoenz ndeu, gou fwt ngeix daengz benq reih de, gou couh buet bae yawj. Gij yienghsiengq dangqnaj hawj gou doeksaet yat: Haenx caen dwg benq dieg faex mwn nywj heu ndeu dahraix.

　　Gij saekheu oiqnem、gova gofaex gyaeundei maezvunz haenx, youq ndaw ndit seizcin ronghgywg, ngauz- nged, mbinmiegmieg.

　　Rumz ci ngafaex mwncup haenx yiengjcaca, ndit ciuq limqva gyaeu- ndei rangfwt ok raemhngaeuz.

　　Gou yawjraen, doengh gij nyez faex heuswdswd, doengh duj valup singjsien oiqnem haenx…… Baenz di baenz di nyezheu, baenz dup baenz dup valup hawj benq dieg neix mizok yiengh moq.

　　Doenghbaez, benq namhliengj mbouj miz vunz rox neix, gizdieg mbouj miz vunz haeujsim neix, seizneix, hix miz maqmuengh, gofaex heuswd dujva gyaeundei.

　　Haenx, dwg raemxhanh, engq dwg majhung. Mboujdan dwg duh dujva, duh gofaex, hix dwg duh gou; mboujdan dwg gvihaeuj aen seizcin neix, lij gvihaeuj aen seizcin gou.

　　Seizcin, dauqcawq dwg va moq angj hai. Aen seizcin gou, yawj gou guh, cix mboujcij dwg doengh duj va hoengzhoengz aeujaeuj neix.

　　(Gauh Yiswh raiz

　　Vangz Gyanghmyauz hoiz)

编辑：黄誉琦复审：黄慧华终审：蒙树起