Baez Daih’it Ndaemnaz - 广西民族报网

Baez Daih’it Ndaemnaz

来源：广西民族报

作者：上林县大丰镇皇周小学六（2）班 Banz Cezsiuh/盘哲霄

发布时间：2020-09-04

　　Aen sujgyaj neix gou ma ranzdaiq, cingq bungzdaengz seiz- nyaengq —— ndaemnaz. Maj baenz- neix hung, baez daih’it ndaemnaz, roxnyinh geizheih dangqmaz、angq- fwngfwng youh deq mbouj gib.

　　Gou caeuq daxdaiq daxmeh youq gwnz loh bae ndaw naz, dingqnyi sing dohlahgih yiengj“hunghunghung” rauq naz, gou engqgya angq lo. Gou rap song aen gei，loh din byaij youq gwnz haenznaz ngutngeuj youh gaeb haenx, ca di laemx roengz naz boengzbut bae, gou cuengq aen gei, ienqhoij raixcaix .

　　“Hainduj bau gyaj lo!” Daxmeh hemq gou. Gou yaengyaeng yamq roengz naz bae, song ga sikhaek mboet roengz ndaw boengz bae, beng cungj beng mbouj hwnjdaeuj. Gou haenq- rengz diem song ga, hoeng gij namhboengz neix lumj raemxgyau 502 ityiengh, nem maenh song ga gou, hawj gou ning hix ning mbouj ndaej. Gou raen daxdaiq baenzneix geq hoeng byaij youq ndaw naz gig maenh, gou hix mbouj fug saw, “di boengz neix baenzlawz nanz ndaej gou ne?” Yienghneix siengj, gou yungh rengz baez beng ga couh ning ndaej lo.

　　Daxdaiq caeuq daxmeh ndwn youq ndaw naz, fwngz riengjret daj buenzgyaj mbek ok go’gyaj, yungh rengz bau coh ndaw naz. Go’gyaj veh ok baenz diuz baenz diuz sienqbau gyaeundei, doeklaeng onjmaenh cap youq ndaw naz. Yawj gyoengqde guh ndaej baenzneix ndei, yienghneix gou hag gij yiengh daxmeh dawz gyaj bau coh ndaw naz. Ngamq dingqnyi sing “bu” ndeu, raemx boengz couh sinz hwnj lwgda gou, baihnaj gou myox liux lo, gou couh yungh fwngz uet lwgda, caiq yawj geij go gyaj gou bau haenx, ngeng bae ngeng dauq, lumj caeuq gou doxdingj nei ninz youq ndaw naz, lij comz doxcaez dem.

　　Daxdaiq riu lo, gvaqdaeuj son gou:“Gaej yungh rengz lai, baez go bau, genfwngz yungh rengz aeu yinz, gyaj cij ndaej ‘ndwn’ maenh.” Lij daegdingh daengq gou, go’gyaj doxliz gaiq din ndeu ceiq habngamj. Gou rox aen fuengfap neix, angq raixcaix, go ciep go bau bae, hoeng youh lumz daenq ga, ndigah song ga mboet roengz boengz bae gig laeg, boengz dumh gvaq gyaeujhoq lo, ga beng mbouj okdaeuj, gou cijndaej heuh daxdaiq caeuq daxmeh bang gou. Hoeng gyoengqde cij goq bau gyaj mbouj leix gou, gou mboujguenj sam caet ngeihcib’it couh yungh rengz beng ga, siengj mbouj daengz yungh rengz gvaqbouh, “ba”sing ndeu, caekhaex naengh roengz boengz bae. Caj gou cengq dwk ndwn hwnjdaeuj seiz, daengx ndang gaenq baenz duz lingzboengz iq ndeu lo. Daxdaiq caeuq daxmeh raen le cungj riuhaha.

　　Daengngoenz lumj feiz nei cik dou, mbouj miz saek di rumz, “naengj” dwk gou hanh lae hanh roenx, hanh daj najbyak ndik haeuj ndaw da bae, da yawj mbouj raen baihnaj, gou bibi gyaeuj, fid hanh bae, yaep ndeu, hanh youh ndik haeuj ndaw da, gou mbouj goq fwngz uq boengz, song fwngz cigsoh bae uet hanh, mbouj rox seizlawz, naj gou cungj uq boengz liux lo.

　　Gig mbouj yungzheih bau ndaej buenz gyaj ndeu, “baeg lai lo, gou yaek baeg dai lo.” Gou gag gangj gag naeuz, gou hojlienz dwk muengh daxmeh, daxmeh da daengx gou bat ndeu, gou cijndei youh laebdaeb bau gyaj. “Byawz rox haeux ndaw buenz, naednaed cungj sinhoj.” Coenz vah neix mbouj loek ha! Doeklaeng, daxdaiq gangj ndaej ma ranz lo, gou lumj ndaej gejcuengq nei diem ga couh buet .

　　Banhaemh, gou ninz youq gwnz congz, din fwngz in youh maz. Ndaemnaz —— gienh saeh baez yawj gig soeng gig yungzheih ndeu, cix aeu ok baenzlaiz rengz caeuq hanh. Gou roxdaengz le nungzminz baengh rengz ndaemnaz gwn haeux dwgrengz lai, daj neix hwnj gou caiq hix mbouj gamj luenh saisaengq haeuxgwn lo.

　　(boux lauxsae son’gyauq： Vangz Gveiyangh)

编辑：韦亦玮