“Mbouj Rox Mingzcoh Gyoengqde, Hoeng Ciengxlwenx Ndaejgeiq Gyoengqde”——Cenzcouh Yen Ranz Ciengj Haj Daih Vunz Goujcib Ngeih Bi Souj Moh Hungzginh Mbouj Miz mingzcoh

来源:广西民族报网

发布时间:2026-09-04

▲Bouxgeq Ciengj Sizlinz youq henz moh lezsw gvej nywj.

▲Bouxgeq Ciengj Sizlinz lwnh gij lizsij beimoh lezsw.

Seizhah, rum faex mwncupcup, aen moh Hungzginh lezsw caemrwdrwd daengj youq gwnz Bya- mijvah, aen moh neix, Gveilinz Si Cenzcouh Yen Caizvanh Cin Caizvanh Cunh vunzmbanj ranz singq Ciengj gaenq souj le goujcib ngeih bi.

Gwnz beimoh mbouj miz mingzcoh, mbouj miz diegseng, cijmiz “Moh Hungzginh Lezsw” geij aen cih, aen sing hoengz ndeu deng byaheu daengh  dwk lwenqda     raixcaix. “Yienznaeuz mbouj rox mingzcoh gyoengqde, hoeng dou ciengxlwenx ndaejgeiq gyoengqde, dawz gyoengqde dangguh  vunzcaen daeuj   saxcaeq.” Bouxgeq betcib ngeih bi Ciengj Sizlinz itmienh gangj, itmienh aeu fagliemz bae beuj faex caeuq rum henz moh. Youq dieg hoenxciengq gaxgonq ciengz ciengq Gyozsanhbu laengz- hoenx vunzdig, Ciengj Sizlinz lwnh gicej gij gojgaeq ranz de caeuq Hungzginh.

Sien Caeq Lezsw, Caiq Caeq Cojcoeng

Gojgaeq aeu daj seizdoeng 1934 nienz daeuj gangj hwnj.

Bide ndwenit, Sienghgyangh Canyiz dajyiengj, youq rangh dieg Gyozsanhbu、  Bya’mijvah,   gij   sing cungq  yiengj mbouj daengx, laebdaeb yiengj le sam ngoenz sam hwnz. Cajdaengz hoenx satliux, Ciengj Cunghdai, daxgoeng Ciengj Sizlinz daiq daeglwg Ciengj Souyij hwnj bya bae dwkfwnz, yawjraen aen ciengz- gingj hawj vunz doeksaet——Seihaiz caet boux Hungzginh baij youq gwnz bya.

“Doeklaeng daxboh lwnh gou, doengh gij Hungzginh de cungj lij coz, cienzbouh lwedyaengyaeng, caen mbouj nyaenxsim yawj ha.” Ciengj Sizlinz gangj, seizhaenx daxgoeng couh naeuz, gij vunz neix dwg duivuj beksingq, dwg vih vunzgungz bae hoenxciengq, mbouj ndaej hawj gyoengqde dai youq byafwz liux lij mbouj ndaej haeuj namh. Song bohlwg couh bae ranz dawz fiengz dem  fagcanj daeuj, moek seihaiz caet boux Hungzginh youq dieg neix, yungh namh dongcwk baenz aen bo ndeu.

Ciengj Sizlinz lij dingq daxboh gangj gvaq, seiz Hungzginh daeuj, ndaw mbanj ranzvunz miz lwgmaenz、lwggva、haeuxyangz, hoeng gyoengqde mboujdanh mbouj aeu saek yiengh doxgaiq beksingq, lij coengh beksingq rap raemx. “Daxgoeng gou gyoengqde bonjlaiz ndoj youq ndaw bya, raen gyoengq Hungzginh mbouj aeu doxgaiq beksingq, mbouj guh gijmaz yak, cij roengz bya dauq ranz, bang Hungzginh muh haeux, bingj maenz hawj gyoengqde gwn.”

Gvaqlaeng, Ciengj Cunghdai deng dicuj gauq, riengz daeglwg Ciengj Souyij caemh deng gaemh haeuj lauz bae. Ndaw lauz cumxcwdcwd laepsaengsaeng, mbouj geijlai nanz Ciengj Cunghdai baenz bingh naek lo. Yaek goenqcaw gaxgonq de ngamq ndaej 34 bi, Ciengj Cunghdai fanfoek gyaudaih lwg naeuz: Miz caet boux Hungzginh haem youq gwnz   Bya’mijvah,   daengzcog     bibi cingmingz、cietcieng bietdingh aeu bae sauqmoh hwnjyieng.

Bide Ciengj Souyij ngamq ndaej cibngeih bi. Buz Ciengj Sizlinz dauq- cawq couz cienz ciq cienz, cij ndaej cueg de ok lauz.

“Boh gou hoj lai ha.” Sing Ciengj Sizlinz ciemhciemh bienq iq, “daxgoeng dai gvaq, ndaw ranz hoj dwk doq mbouj miz haeux gwn, daxgux gou ngamq ndaej caet bi, deng soengq hawj vunz guh bawxdauh, daxau ngamq gouj bi,  bae coengh ranz caizcawj langh vaiz. Hoeng daxboh gou itcig geiqmaenh gij vah daxgoeng, moix bi cungj bae dwkmoh.”

Doeklaeng, Ciengj Souyij cienz gienh saeh neix hawj Ciengj Sizlinz. Ciengj Sizlinz caiq cienz hawj lwglan……Caetneix, lwglan de youq Namzningz hwnjban, moix bi daengz cingmingz caeuq gvaq cieng cungj caemh dauqma, caemh hwnj bya bae dwkmoh Hungzginh.

“Hwnjyieng moh Hungzginh gonq, caiq dwkmoh cojcoeng swhgeij, neix dwg gvigawj ranz dou.” Ciengj Sizlinz naeuz.

“Dou Guh Di Neix, Suenq Gijmaz ”

Ciengj Sizlinz ndaejgeiq, mwh de caet bet bi, daxboh baez daih’it daiq de hwnj bya sauqmoh. Seizhaenx gwnz bya rum mwnnoengq, aeu fagliemz bae gvej ok diuz loh ndeu cij ndaej haeujbae. “Gou lij yawjraen gvaq mbangj  ndok gyaeuj, lij miz byuk- max.” Bouxgeq ngeixdauq.

Daengzlaeng, hai fwz guh reihnaz aeu cingj bingz deihnamh, miz vunz yaek canj bingz aen bo haenx. Ciengj Sizlinz hozhwnj lo, buet bae naeuz: “Gizneix miz moh Hungzginh, sou mbouj ndaej loengh!” Baihde dingq le, louz moh roengzdaeuj. Ciengj Sizlinz mbouj cuengqsim, gag rag cien daeuj coih moh.

Bi 2019, cwngfuj vih aen moh Hungzginh neix laeb bei, coih loh byaij, ndaem gobek. “Seizneix ndei lai lo, mbouj yungh aeu fagliemz hai loh lo, couh dwg baetbaet   mbawfaex loenq, madmad bei, dienzdienz   hoeng.” Bouxgeq naeuz.

Ciengj Sizlinz gangj daengz Hungzginh、gangj daengz Cangzcwngh, gangj daengz gij lizsij Cunghgoz Gungcanjdangj, cungj rox lai gvaq haujlai vunz.

“Haujlai vunz cam gou, dwg gijmaz hawj gyoengqsou haj daih vunz dingj roengzdaeuj?” Bouxgeq gangj, “Hungzginh vihliux saenqngiengx, vihliux gyoengq beksingq ndaej gvaq ndwenngoenz vuenyungz, mingh cungj vut lo, gyoengqde mbouj ndaej raen Cungguek  moq laebbaenz, mbouj ndaej raen ndwenngoenz  vuenyungz ngoenzneix. Dou guh di neix, suenq gijmaz ne?”

Geij bi neix, Ciengj Sizlinz baenz bouxgangjgej mbouj aeu cienz. Moix bi hanzgyaj、 sujgyaj, haujlai  hagseng  Gvangjsih, couhlienz daihhagseng daj Swconh、Gveicouh、Cezgyangh daengj dieg daeuj haenx, cungj daeuj daengz ranz de, roxnaeuz Siengh- gyangh Canyiz Gijnen’gvanj, dingq de gangj goj Hungzginh Cangzcwngh.

“Bouxcoz mbouj gwn gvaq gijmaz hoj, mbouj rox ndwenngoenz ngoenz- neix baenzlawz daeuj, gou aeu gangj ndei gij goj Hungzginh, hawj gyoengqde ndaej rox gij dauhleix neix, ndaej haenqrengz  doegsaw, daengz- cog  bauqyauq  guekcoj, hwnqguh mbanjranz, vih Cunghvaz Minzcuz fukhwng hungmbwk guh ok goeng- rengz engq hung.” Ciengj Sizlinz naeuz.

Sienghgyangh Canyiz gvaqlaeng, Cunghyangh Hungzginh daj seiz haidin bet fanh roek cien lai vunz gemjnoix daengz sam fanh lai vunz. Haujlai yinghlez aeu bya guh  moh, vutmingh youq gizdieg baih- baek  Gvangjsih. Hoeng bingzciengz  beksingq lumjbaenz Ciengj Sizlinz, yungh  yiengh  fuengsik  ceiq   laux- saed haenx, souj gyoengq yinghyungz mbouj miz mingzcoh neix——Haj daih vunz, goujcib ngeih bi, mbouj duenh mbouj dingz.

(Dahyingj Daegfeih Dahyiz raiz Veiz Veisangj Mungz Ningz- sangh hoiz)


编辑:实习生 石喜丹  复审:黄慧华  终审:蒙树起