翻译百家Dangq Boux Dangq Hoiz

来源：广西民族报网

发布时间：2026-08-24

原文：

晚风吹雨，战新荷声乱，明珠苍璧。谁把香奁收宝镜，云锦周遭红碧。飞鸟翻空，游鱼吹浪，惯趁笙歌席。坐中豪气，看君一饮千石。

遥想处士风流，鹤随人去，已作飞仙伯。茅舍疏篱今在否，松竹已非畴昔。欲说当年，望湖楼下，水与云宽窄。醉中休问，断肠桃叶消息。

——辛弃疾《念奴娇·西湖和人韵》

译文：

Rumz banhaemh boq doengh fwn, raemx- fwn bongx mbawngaeux moq，naed cawraemx ronghsaw sinz hwnj, sing cabceb miz yinx, couh lumj cawndongq doek youq gwnz nyawh heuloeg. Dwg bouxlawz dawz aen gingqbauj ndaw aen hab cang sou hwnjdaeuj? Sawj ndaej gwnz huz yienh’ok gij saekhoengz gyaeundei, lumj fwjman yienghhaenx ronghsag, raemx huz hix deng daengh dwk engq heusausau. Roeg mbin youq gwnzmbwn boek mbin gvaq, bya youz youq ndaw raemx boq raemxlangh, gyoengqde lumjbaenz sibgvenq le, ciengqgo daizlaeuj bae gyaep gwnz ruz youz, guh’angq ra gwn. Gyoengqvunz gwnz daiz neix cungj gig miz heiq hung, daih ndoet haujlai laeujndei.

Dauqngeix dangbi gij funghliuz cusw（dwg ceij Linz Buh） haenx siusaj, de gaen duz- beghag riengz bouxsien bae, de daihgaiq gaenq bienqbaenz bouxdaeuz ndaw sien mbin haenx luba. Gij byauh cax baihnaj ranzhaz de seizneix lij youq lwi? Gij faexcoengz seiqhenz caeuq gocuk hix senq mbouj dwg gij yienghceij dangnienz lo. Siengj aeu gangj gij cingzgingj bihaenx, ndwn youq laj Laeuzvanghuz, cuengqda muengh bae, mbwn raemx doxciep, fwj raemx doxyungz, faen mbouj cing dwg gvangq dwg gaeb. Youq ndaw yiengh maez neix, youh hozbiet bae bakcam, gij siusik baengzyoux sawj vunz saej goenq haenx ne.

（凤山县：韩辉/Hanz Veih）

Banhaemh fwn doek rumz youh ci daeuj, fwn ndoiq coh mbawngaeux moq sing yiengjbyopbyop. Gij raemxfwn sinz hwnj youh rongh youh nyinh, lumj doi caw ronghsagsag bungq deng baujnyawh. Huzmienh ronghrikrik bienqbaenz mbaw gingq ndeu, hoeng raemxmok sanq bae, gingqbauj neix hix deng yaeuq hwnjdaeuj lo. Ndaw huz heusausau, seiqhenz va’ngaeux hai dwk maeqswgswg, caeuq couzduenh ityiengh caen giengh lailai. Gwnzmbwn miz duz roeg mbinruxrux, ndaw huz duz bya gvaengz ruz vunzguhcaemz youz. Gwnz daiz gij lauxdoengz naengh youq neix cungj daegbied daihheiq, doxcaemh ndoetgyatgyat, cien gang cien cenj cungj gwn mbouj gaeuq.

Dauqsiengj daengz bouxgonq gag youq goengq bya youq, ngoenzngoenz cingxyax youh cwxcaih, seizneix de senq mbouj youq lo, duzhag de hix riengz doengz bae le, wnggai senq mbin bae baenz sien gvaq. Ranzhaz led mbang de lij youq lwi? Go’ndoek wnggai mbouj doengz lo. Gyaez gaq gaxgonq cungj gingjsaek saehuz lai, youq Laeuzngonzhuz baihlaj yawj bae, mbwn youq ndaw huz, raemxhuz caeuq fwj doxrangh. Gwn fiz le couh gaej bae cam siusik lauxyoux, mbat gangj daengz couh cawcieg saej goenq bae.

（都安瑶族自治县：韦慧爽/Veiz Veisangj）

Banhaemh hwnj rumz youh doek fwn, ndikfwn doek youq gwnz mbaw go’mbu ngamq maj haenx yiengjbyopbyop, gij sing lumj ciq doek youq gwnz buenz nei. Bouxlawz sou aen gingq ndaw hab cang hwnjdaeuj lwi? Va’mbu hoengzmaeq raemxhuz loeg, lumj man nei ronghsien gyaeundei. Duzroeg youq gwnzmbwn mbin bae mbin dauq, duzbya youq ndaw raemx doxgyaep guhcaemz, lumjnaeuz gyoengqde hix gvenq le gij nauhyied daizlaeuj caeuq gij nauhyied ciengqgo lo. Gwnz daiz bouxboux gig sangj, yawj mwngz gwn laeuj ak raixcaix, cien cenj cungj mbouj ngveiz.

Ngeixdaengz Linz Buh, de gvaq ndaej cwxcaih, ngoenzngoenz caeuq duzbeghag guhdoih, seizneix de dai le, wngdang gaenq baenz saenzsien lo. Ranzhaz caeuq byauh lij youq lwi, gocoengz caeuq faexndoek hix mbouj dwg gij yiengh bihaenx lo. Yaek gangj goj bihaenx, laj Laeuzmuenghhuz, raemx caeuq mbwn doxciep, mbouj rox dwg raemx engq gvangq roxnaeuz fwj engq gvangq. Gwn laeuj ngveiz le couh gaej cam gij siusik boux ndaw sim lo, baez ngeix daengz couh siengsim dangqmaz.

（马山县：蒙宁霜/Mungz Ningzsangh）

Banhaemh rumz cihuhu, fwn doeksasa, yawj gwnz huz mbawngaeux soemset ngamq ok, raemxfwn doek gwnz mbaw yiengj sisi soso, raemx gwnz mbaw baenz naed ronghrikrik, mbawngaeux heuoiq, gyaeu lumj cenjnyawh coux caw nei. Ronghndwen luenzlulu ingj ndaw huz, dwg byawz dawz gingqbauj yo ndaw sieng ne. Va’ngaeux duj lup duj hai daengj gwnz mbaw, caen gyaeu lumj fuk man ngamq daemj baenz nei. Roeg mbin gyang mbwn, bya youz ndaw raemx. Doengh duzroeg duzbya neix gaenq sibgvenq bouxyouz daeuj gueng lo. Baenz bang hujgeiq caemh daiz simlangh gwn laeuj, caez haenh laeujvuengz ndoet laeuj mbouj rox fiz.

Dauqngeix goeng ndupyouq duenh ndwenngoenz cwxcaih haenx, hojsik seizneix vunz riengz beghag bae, baenz sien bae gwnz- mbwn lo. Fungh ranzhaz humx led cazred haenx lij youq dem lwi? Hojsik faexcoengz caeuq faexcuk gaenq mbouj lumj doenghbaez nei mwncup heuswd lo. Hojsik lai lo, doengh bi youq gwnz Laeuzmuenghhuz yawj ndaw huz, cungj gingj fwj raemx doxlienz gyaeu lumj man haenx, ngoenzneix caiq yawj mbouj raen lo. Ngoenzneix laeuj fiz lo, gaej cam bouxyoux bae gyawz, gou hix deq bae deq dauq cungj deq mbouj daengz cingq siengsim yaek dai.

（南宁市西乡塘区：滕昱森/Dwngz Yuzswngh）

Gyanghaemh rumz suek fwn, doek gwnz mbawngaeux moq, rongh lumj lwgcaw lumj ciengzheu. Bouxlawz dawz gingq roengz hab, seiqhenz fwj oq lumj man rongh. Roeg mbin biengj gwnzmbwn, bya bongh gwnz langh angq, dingq gvenq gangjgoj caeuq ciengq fwen. Yawj mwngz naengh cingqgyang daengjswdswd, ndoet cien cenj laeuj ndoet mbouj fiz.

Niemh de funghliuz seiz, doj riengz roeglaux vaq sien bae. Seizneix ranzhaz caxduk lij youq mbouj, dieg faexcoengz faexndoek hix mbouj lumj seizgonq. Yaek naeuz bi seizde, ndwn laj Laeuzmuenghhuz, gangj raemx fwj gvangq caeuq gaeb. Laeuj meih seiz gaej cam, gij siusik bouxyoux mbouj raen haenx.

（田阳县：梁淑秀/ Liengz Suzsiu）

编辑：实习生石喜丹复审：黄慧华终审：蒙树起