翻译百家 Dangq Boux Dangq Hoiz

来源：广西民族报网

发布时间：2026-08-20

（第十九期）原文：

晚风吹雨，战新荷声乱，明珠苍璧。谁把香奁收宝镜，云锦周遭红碧。飞鸟翻空，游鱼吹浪，惯趁笙歌席。坐中豪气，看君一饮千石。

遥想处士风流，鹤随人去，已作飞仙伯。茅舍疏篱今在否，松竹已非畴昔。欲说当年，望湖楼下，水与云宽窄。醉中休问，断肠桃叶消息。

——辛弃疾《念奴娇·西湖和人韵》

译文：

Rumzhaemh mbinfubfub gvaq najraemx aenhuz，naed fwn sanqloenq youq gwnz mbaw go’ngaeux ngamqseng de，biu hwnj naed lwgrou ronghsaw neix，gij sing lumj cawndongq ingjok naed nyawh，ronghlwenq riuzcienj. Ronghndwen daujingj youq gyang raemxhuz，lumj byawz aeu gingqrongh yoyaeuq hab dajcang bae，sawcingh caemrwgrwg，va’ngaeux hoengzmaeq ngamq hai，duj dem duj，youq gyang langhheu seuqcingh mbehai，lumj mbaw dozveh siuq gij manfwj nei，noengz cit cungj dwg souj sei. Duzroeg youq gyangmbwn gvaengxgvax mbin hwnj mbin roengz，duzbya youz youq gyangraemx，raemxlangh fubfeb mbaeumbengmbeng，gyoengqde lumj senq sugrox cungj yinhlwd nei，swnh youq gwnz daizlaeuj boqdig ciengqgo，couh diuqfoux guh’angq. Dou vad ruz youq gwnz raemxlangh，yaengx cenj caenhcingz ndoet laeuj，sawqmwh lwgda comz yawj gwnz ndang boux baengzyoux ndoet ndaej lailang.

Dauqngeix bihaenx，Linz Buh ndojyouq Byadog Sihhuz，mbouj guhhak mbouj baenzranz，cij aeu go vamoiz guhbuenx、aeu roegbeghag guhyoux，yienghlawz siuhsaj cwxcaih. Seizneix roegbeghag riengz vunz bae dieggyae，sienseng vaqbaenz bouxsien，mbaeumbeng bae gyae lo. Dangqnaj ranzhaz gaeuq humx gyaengx led ndeu，mbouj rox youq mbouj youq？Gocoengz caeuq gocuk gyang dingz de，liuhsiengj hix nanz ndaej hoizfuk doenghbaez yienghgyaeu. Siengj daengz hawj vunz danqheiq！Bihaenx muengh laj aenhuz，ngiengx da yawjraen gij gingjsaek mbwn raemx doengz saek、diendeih gvangqlangh. Mwh maezlienh gaej faekcam：Bide，Vangz Yencih youq gizneix muengh dwk da yaek doek，dwg mbouj dwg caj daengz gij siusik gyaez yahnoix lumj mbaw godauz nei.

（西林县：黄锋克/Vangz Funghgwz）

Haemhlwenz rumz boq fwndoek，fwn daj gij ngamq ok moq mbawngaeux, hongz bilibala, lumj naedcaw ityiengh doek roengz gwnz go’ngaeux bae. Daengngoenz doek roengz bo, lumj dahsau dawz aen gingq sou haeuj ndaw habroi bae, ndaw huz gij va’ngaeux hoengz loeg doxciuq，seiqhenz lumj beiq rim naj baengzman ityiengh. Gwnzmbwn roeg gvaengxgvax baedauq, ndaw raemx bya guhcaemz youzlangh, gij gingj neix, soqlaiz couh dwg hawj boux youq henzhuz gwn laeuj diuq foux yawj. Youq gyoengqvunz ndawde, bouxboux hauzheiq cibcuk，bouxboux gwn laeuj doek mbouj gvaq cien boi.

Siengj daengz miz boux vunz heuhguh Linz Buh, de mbouj ok rog, hoeng de siuhsaj miz funghcaij, de ciengx duz roegbeghag gaenq riengz bouxcawj de bae, de hix caeuxcaeux baenz sien lo. Bihaenx de youq aen ranzhaz haenx, gij byauh daemq lij youq mbouj youq? Gocoengz caeuq go’ndoek, caeuq gaxgonq mbouj lumj lai lo. Caen siengj gangj gij gojgaeuq Vanghuzlouz, seizhaenx raemxhuz gvangqlangh, lumj caeuq fwj caeuq mbwn lienz baenz biengh ndeu. Gwn laeuj fiz lo couh gaej bae damqdingq gij siusik baengzyoux gaeuq, dingq le rox hawj vunz siengsim saej gat.（西林县：黄志伟/Vangz Civeij）

Gij rumzhaemh ci daeuj, gaendwk doek raq fwn iq he, gij raemxfwn doek roengz gwnz mbawngaeux oiq ngamq maj ok haenx, gij sing byoiqbywdbywd, lumj naedcaw doek youq gwnz banznyawh heu yienghhaenx, ndeidingq dangqmaz. Aen daengngoenz yaek doek bya ingj youq ndaw huz, lumj aen gingq nei ronghsagsag, aen huz couh lumj aen hab coux faenj catnaj nei, cuengq gingq rongh youq ndawde. Gij fwjhaemh lumj gaiq baengzman nei rongh wenq gyaeundei, ndaw huz gij raemx heunaunau. Gyoengq duzroeg youq gyangmbwn mbin doxhwnj youh foek doxroengz, gyoengq duzbya youq ndaw raemxlangh doxgyaep guh’angq, gyoengqde lumjbaenz caeux couh sibgvenq gij vunz gwnz ruzyouz ciengqgo gwn ndoet goenjoo, gag guhcaemz faenh gyoengqde, vaiqvued angqyangz. Ndaw ruzyouz gij vunz haenx bouxboux cingsaenz gvaekgvaek, sou yawj bouxvunz haenx, fwngz gaemh cenj laeuj, gaemz hung ndoet laeuj, yawj yiengh gig ak, lumjbaenz ndoet baenz cien cenj laeuj cungj ndaej.

Mboujnyaenx naemj bae gyae’gyanggyang, naemj daengz bouxcujsw haenx, de dwg yienghhaenx cwxcaih youh mbauqndei, hoeng de gaenq biek bae lo, bienqbaenz gwnzmbwn boux sien he mbinyebyeb. Aen ranzhaz bouxcujsw caeuq gij diuz led caxcumcum haenx mbouj rox lij youq lwi, seiqhenz gij gocoengz caeuq gij gosei haenx, lauheiq gaenq mbouj lumj gaxgonq yienghhaenx heusausau, mwncupcup lo. Siengj yaek gangj hwnj gij saeh gaxgonq haenx, soengz youq baihlaj aen Laeuzvanghuz, cijraen raemxhuz caeuq gij fwj gwnzmbwn doxgyaux doxgap, gwnz huz mumjmumj gyumqgyumq, yawj mbouj ok aenhuz gvangq gaeb laeg feuh geijlai. Seizneix gaenq ndoet laeuj fizfwdfwd, couh gaej bae vaekcam gij saehgaeuq siengsim sawj vunz dungxsaej yaek goenq haenx lo.

（平果市：谭喜花/Danz Hijvah）

Rumzhaemh gab fwn ci mbouj dingz, naedfwn loenq daengz gwnz mbawngaeux yiengj doegdoeg dakdak, lumj naedcaw nei ronghriri. Dwg byawz dawz aen huz lumj aengingq ndaw hab haenx sou hwnjdaeuj? Raemx huz heusau, ngaeuxhoengz mbe hai, lumj fan man nei. Roeg youq gwnzmbwn gvax hwnj gvax roengz, bya youq ndaw raemx youz bae youz dauq, gyoengqde lumjnaeuz gaenq sibgvenq gij sing boq naeuz sing eu fwen sing yet laeuj bien huz. Boux naengh yet laeuj ak lai, yawj gij yiengh mwngz, cien boi laeujndei hix ndaej gaemz ndeu ndoet liux.

Ngeixhwnj bihaenx boux seuqsak funglouz Linz Buh yinjsw, duzhag de ciengx haenx gaenq gaen bouxcawj dai bae, de hix gaenq bienqbaenz bouxsien gwnzmbwn. Aen ranzhaziq de ndojndang caeuq gij led mbang bihaenx, mbouj rox seizneix lij youq mbouj youq dem? Gij faexcuk caeuq gij go- nya ndaw lueg bien rij gaenq mbouj doengz gij yiengh gaxgonq. Yaek dauqngeix gij saeh gaxgonq, ndwn daengz laj aen Laeuzmuenghhuz yawj baecoh gizgyae, couh raen aenhuz mokcwtcwt、aenmbwn gvangqlieglieg, raemx caeuq mbwn doxrangh hwnjdaeuj fouz bien fouz haenz. Laeujfiz le couh gaej bae dauqngeix saehgaeuq lo, baez bae damqdingq mbawdauz byag go gij saehgaeuq hawj vunz siengjniemh haenx, cij rox hawj vunz siengsim、hawj vunz daep in saej goenq.

（平果市:陆耀/Luz Yau）

Banhaemh rumzfwn ci ndoiq dwk mbawmbu oiq, fwnceh doek youq gwnz mbawmbu heu, lumj cehcaw nyawhheu bungqdongj yiengjdengdeng. Dwg bouxlawz dawz hab dajcang sou hwnjdaeuj lumj aengingq ne? Huzmienh vahoengz dauqdingq ingj raemxheu, lumj mbawboiq gyaeundei mbe hai. Duzroeg gwnzmbwn gvaengxgvax, duzbya ndaw raemx fanhwnj raemxlangh, ciengzseiz buenx vunz youq henzhuz ciengq go diuq foux gwn laeuj. Baengzyoux haeujdaiz gwnlaeuj gangjak damz mbwn, yawj mwngz byoengq aek gwn laeuj gaeuqyinx daengz fiz.

Ngeixdaengz binaengz goeng ndojndang Linz Buh funglouz cingxyax, gaenq doxbuenx roegbeghag mbin bae gyae, de lumjnaeuz mbin hwnj mbwn baenz sien lo. Bihaenx aen ranzhaz、cah bya Guhsanh lij youq law? Go faexcoengz heu、faexcuk heu gaenq mbouj caiq miz gij yiengh doenghbaez. Siengj byoqnaeuz gij saeh gaxgonq, yawj ndaw huz laj laeuz, raemx caeuq mbwn doxlienz fwj nanwtnwt mbouj raen hamq. Laeujfiz le gaej bae ceihcam danghnaeuz doxniemh gij saeh、 vunz gaxgonq, cij roxnyinh hawj vunz gag dem siengsim saej mih.

（南宁市武鸣区：黄美菊/Vangz Meijgiz）

（3）

编辑：实习生廖小凤复审：黄慧华终审：蒙树起