翻译百家Dangq Boux Dangq Hoiz

来源：广西民族报网

发布时间：2026-08-20

第十九期

原文：

永日不可暮，炎蒸毒我肠。安得万里风，飘飖吹我裳？昊天出华月，茂林延疏光。仲夏苦夜短，开轩纳微凉。虚明见纤毫，羽虫亦飞扬。物情无巨细，自适固其常。念彼荷戈士，穷年守边疆。何由一洗濯，执热互相望。竟夕击刁斗，喧声连万方。青紫虽被体，不如早还乡。北城悲笳发，鹳鹤号且翔。况复烦促倦，激烈思时康。

——杜甫《夏夜叹》

译文：

Gyangngoenz nanz mbouj laep, mbwn hwngq in saejdaep.

Gizlawz rumz boq daeuj, mbaeumbeng baet buh raeuz.

Gyangmbwn venj ronghndwen, ndoeng mwn roh ronghndwen.

Haeujfug yiemz haemh dinj, hai dangq ma langh liengz.

Ndwen rongh raen gaiq saeq, non nengz mbin baedauq.

Fanhfaed laux rox iq, cungj gag youq gag lix.

Naemj daengz bing dawz lem, daengx bi hen henzguek.

Guhlawz siu mbwn ndat, doq ndat doq doxmuengh.

Daengx haemh roq aenluengz, sing ndwet rwenz seiqfueng.

Gwnz ndang longz guenbauz, mboujdaemx caeux dauq ranz.

Baeksingz ndaeng huzgyah, beghag raez gvaengxgvax.

Nyapnyuk youh simnaiq, muengh lajmbwn daihbingz.

（贵港市港北区：卢奋长/Luz Fwncangj）

Ngoenz raez mbwn nanz haemh, ndit yaek remj bwn’gyaeuj,

Baenzlawz miz rumz daeuj, baeuh（ci） dwk buh gou biu?

Haemhhah ronghndwen ndongq, faex deih rongh cix cax,

Ndaenq hwnzhah vaiq gvaq, hai cueng caj rumz liengz.

Ndwen rongh raen iqnyaeq, ronghrib mbin baedauq,

Mboujlwnh iq rox laux, cungj rox gag caux angq.

Siengj bouxbing gaem yangj, daengx bi souj bienfuengz,

Baenzlawz ndaej caemxliengz, hanh rwi muengh doxcoh.

Baenzhwnz roq gimdaeuj, singdaeuj seiqcawq cuenz,

Yienz ndang daenj buhguen, mboujyawx buenx ma mbanj.

Singzbaek singdig liengz, roeghag gvaengxgvax haen,

Mbwn hwngq fuengx youh fanz, muengh bingzan caeux daengz.

（平果市: 李雄章/Lij Yungzcangh）

Gyangngoenz raezrangh mbwn ndi laep,

Hwngq ndat remj saej gou simgaenj.

Baenzlawz cijndaej rumzliengz daeuj,

Biengj hwnj buh gou doenghyubyub.

Doengxhaemh seizhah ronghndwen ronghsag,

Ndoengfaex mwncup ingj ronghndwen caxcang.

Gyanghwnz ndwenngux saedcaih gaed,

Hai cueng yiengjsouh rumzliengz ci.

Byonghhwnz mbwn seuq cungj yawjraen,

Doenghduz bek fwed mbinfoenfoen.

Sengmingh mbouj faen hung rox iq,

Roxnyinh angqyangz dwg bingzciengz.

Ngeix daengz boux bing gaem cungq haenx,

Daengx bi cungj capsouj henzguek.

Baenzlawz ndaej hawj gyoengqde caemxndang?

Cik hwngq dwgrengz cix doxmuengh!

Baenzhwnz lienh dwkcungq fuengzre,

Gyuk cauz singyiengj doh betfueng.

Yienznaeuz buhhak daenj gwnz ndang,

Mboujyawx caeuxcaeux dauq ranzmbanj.

Singzbaek sing huzgyah gig siliengz,

Gvancoz daejaa seiqcawq mbin.

Sim you luenh seiq vunz engq fanz,

Maqmuengh gwnzbiengz daihbingz dangqmaz.

(上林县: 覃悦/ Cinz Yez )

Gyangngoenz raezlangh nanznanz hix mbouj laep, heiqndat mbin hwnjyagyag, cung dwk bouxvunz simnyap caen youq mbouj cwxcaih. Gizlawz miz raq rumzliengz boq gvaqdaeuj, hawj geubuh gou biufefe, bouxvunz ndangcaemx youq soeng ne? Gyanghaemh ronghndwen youq gwnzmbwn ronghsagsag, gofaex baenz bien daengjbyoengbyoeng, roh roengz guengh mbawfaex baenz di baenz di rongh. Mwh hah gyanghaemh hojsik gvaq ndaej vaiq lai, gou mbat hai conghcueng, ciep gij rumz liengzseuseu baihrog, ronghndwen seuqsingj, yawj ndaej raen gij doxgaiq reg, duznon iq hix swnh rumz doengxhaemh seiqcawq mbinfoux. Gwnzbiengz fanhfaed mboujlwnh hung iq, gag miz gag lix couhdwg aen dauhleix cingsoq. Siengj daengz bouxbing gyoengqde capsouj youq giz gyae’gyae haenx, bi gyaeuj daengz rieng souj youq giz nden fwz, gyoengqde aeu baenzlawz cij ndaej sab daengx ndang ndatsauj, cij ndaej youq mwh ndat doxmuengh gyae’gyae, haemzhoj gangj mbouj ok bak. Aen ranzbing cungj roq aendox dwk cunzhaemh baenzhwnz, gij sing goenjhoho, gizgiz cungj yiengjning daengz caez. Couh dwg gwnz ndang aemq geubuh bouxguen biu goengmingz, hix beij mbouj ndaej bouxwnq caeuxcaeux ma ranzcoj gvaqngoenz an’onj. Aen singzbaek gyaeujsingz roq hwnj gij sing naeuz siliengz, duz roeghag youq gwnzmbwn gvaengxgvax baedauq sing daeuhnaek raixcaix. Gou aen ndang bonjdaeng couh ndatoem bauhcauq, simnyap ndangbaeg dangqmaz, gij ciengzgingj neix hawj gou aen sim gikdoengh raixcaix, cibfaen muengh lajbiengz cungj ndaej bingzdingh an’onj.

(田东县：黄秋琪/Vangz Ciuhgiz)

Cawzhah daengngoenz raez nanz laep， ndat oem dangqmaz, hawj gou nanzyouq. Guhlawz miz rumz ci daeuj，mbaeumbaeu ci genbuh gou, rumzliengz fizfiz. Gyanghaemh ndaundeiq ronghsasa, gyangndoeng faex ronghndwen ciuq roengzdaeuj. Cawzhah ndaw haemh dinj, gou bae hai conghcueng, couh miz rumz ci haeuj ndang sangj raixcaix. Haemhneix ronghndwen rongh sawcakcak, dieg rum go’nya iq goj yawjraen liux, lienz duznon iq mbin gvaq goj yawjraen liux, saehcingz lajmbwn mboujlwnh laux roxnaeuz iq, de miz gag youqfat de, couhdwg ceiq ndei. Sawqmwh ngeix daengz gaxgonq gyoengq bouxbing fwngz dawz cungq dawz cax, daengx bi moix haemh youq henzguek hensouj, gig haemzhoj lai lo. Gyoengqde baelawz ndaej yietnaiq ne! Ciengzseiz soemh nditndat soemh fwndoek. Daengx hwnz dingqnyi gyoengqde lienhguh doxdwk, singyaem cienz bae haemq gyae. Yienznaeuz ndang daenj buh bouxbing, hwnzngoenz ngeix daengz ndaw ranz lwg baz ne. Ndaw singzbaek miz vunz boq naeuz ndaej doenghsim, roegguenhwz heuh ndaej sim’in raixcaix. Seizneix, gyoengq bouxbing gig naiqbaeg lo, gou cungj maqmuengh lajmbwn vaiqdi ndaej bingzbingz an’an ne!

（西林县：梁锋 / Liengz Fungh）

Doengxngoenz raezrangrang cungj ngauz mbouj daeng laep, hwngqfwdfwd oem dwk simfanz hoj souh raixcaix. Gizlawz ndaej ci daeuj rumz hung maenjsasa, menhmenh ci baet diuz buh gou. Doengxhaemh gwnzmbwn swng hwnj ronghndwen, ndoengfaex mwncup loenqgeh siksoiq ronghndwen. Haeujfug nyap naeuz doengxhaemh daiq dinj, nyeng hai cueng sup di heiq liengzseuseu he. Ronghndwen cingxdikdik ciuq dwk yawj cingx doxgaiq saeqsip, mbajdaeng seiqlengq mbinbyoegbyoeng. Seiqgyaiq fanhfaed mboujlwnh hung iq, swnh de swhyienz、gag rox yinxdaeuz cix dwg bingzciengz. Hoeng gou siengj daengz gyoengq gaem lem soujhen henzguek ciengqbing, baenz bi hen ndei fwzfat henzguek. Gyoengqde daengx ndang ndatyanyan souh coegcamz, mbouj miz saekmwh siu hwngq, cij ndaej song mbiengj doxmuengh. Baenz hwnz ndaw bingyingz sing roq geng ndaek mbouj dingz, cauzndwet goksadsad cienzdoh seiqfueng. Yienznaeuz gwnz ndang daenj guenbauz gyaeundei mingzgviq, hoeng cungj beij mbouj ndaej vaiqdi ma ranz. Baih baeksingz cienz daeuj sing huzgyah siliengz veuveu, roegvaek、roegbeghag daeuhheuh gvaengxgvax ww. Gou bonjlaiz cungj simfanz naet raixcaix, ndaw sim gikdoengh yubyeb fwdfwd, muengh lajmbwn bingzdingh an’onj dangqmaz.

（南宁市武鸣区: 潘晓荷/Banh Yaujhoz）

编辑：实习生廖小凤复审：黄慧华终审：蒙树起