翻译百家Dangq Boux Dangq Hoiz

来源：广西民族报网

发布时间：2026-08-18

第十九期

原文：

蔼蔼堂前林，中夏贮清阴。

凯风因时来，回飙开我襟。

息交游闲业，卧起弄书琴。

园蔬有余滋，旧谷犹储今。

营己良有极，过足非所钦。

舂秫作美酒，酒熟吾自斟。

弱子戏我侧，学语未成音。

此事真复乐，聊用忘华簪。

遥遥望白云，怀古一何深。

——陶渊明《和郭主簿二首·其一》

译文：

Najranz faex hung mwncupcup,

Seizhah raemhrwd ndei langhliengz;

Baenz raq rumznamz cifiengfieng,

Yaepyaep biengjhai cimqbuh gou.

Mbouj gwn haeuxvuengz dauq ndaem reih,

Ndaejhoengq doegsei caeuq danzginz;

Ndaw suen ndaem byaek youh ndaem hing,

Haeuxgaeuq bi’gvaq rim ndaw gvih.

Miz gwn miz daenj couh gaej fanz,

Guh vunz dam lai vaih mingzdangz;

Gou gag cawjhaeux oemqlaeuj rang,

Gag raix gag gwn daengx ndang fiz.

Lwg’iq guhcaemz youq bienndang,

Ngamq hag gangjvah dingq mbouj rox;

Saedceij ngoenzngoenz angqfofo,

Mbouj goq fouqgviq caeuq mingzdaeuz.

Ngiengx gyaeuj hwnjdaeuj yawj gwnzmbwn,

Fwjhau gaemfwngz daeqniuniu;

Ndaw sim yo miz gienh saeh ndeu,

Caegcaeg ngeixdauq saeh ciuhgonq.

（平果市:余执/Yiz Ciz）

Faex najranz maj raengh, seizndat raemh baenz laengx.

Rumzraeuj aenqseiz daengz, baenqbeq biengj aekbuh.

Duenh laeujnoh dakdaih, ninz ndiu raiz sawsa.

Haeuxlw bi’gvaq miz, byaek gyang suen van feih.

Ciengx ndang doh cix baenz, mij haenz bengz gvaq fwx.

Daem haeuxyangz ngauz laeuj, baenz laeuj gou gag ndoet.

Lwgndek youq henz caemz, gangj mbouj baenz saek coenz.

Lawq lumz seiz dang saeq, gvaq ngoenz lai vaiqvued.

Ngiengx gyaeuj yawj mbwnndaen, hozhaenz vunz ciuhgeq.

（云南广南县：李顺芬/ Lij Sunfwnh）

Najding ndoeng mwnnoengq，

Roeggyoengq mbin angq heuh；

Ndit hah lumj feiz byaeu，

Mbawfaex raemh liengzseu.

Ciet neix gij rumznamz，

Menhmenh ci gvaqdaeuj；

Rumz baenq dawz ndang heux，

Biengj daeuxbuh mbinmiengj.

Vunz youz ndoi caemh noix,

Baez hoengq dawz saw ngonz;

Mbouj baen hwnz rox ngoenz,

Gyaez doegsaw loengh gimz.

Ndaw suen gij byaek ndaem,

Baenz buenq heuyauyau;

Ndaw cang baenzlai haeux,

Lij youq daengz ngoenzneix.

Swhgeij gij saedceij,

Ginghyingz ndaej hanhdoh;

Siengj gvaqbouh fatfox,

Hoz gou mbouj baiqfug.

Megmax daem buepseuq,

Cawjcug aeu ndo ndong;

Gvaq liux dawz ma oemq,

Donq raix song boi get.

Lwg’oiq youq henzndang,

Guh’angq diuqgeggeg;

Ok vah caengz mingzbeg,

Nyaijnyet ceiq dwggyaez.

Yienghneix buenx gou faengz,

Ndaenggon youh vaiqlangh;

Caih vunz mingzdaeuz angj,

Guen cam gou mbouj faengz.

Ngiengx gyaeuj muengh byaimbwn,

Vunz ciuhgonq hakguen;

Naemj vih minz dajsuenq,

Ngeix dungxluenh sim caem.

（都安瑶族自治县：蓝国武/Lanz Gozvuj）

Najding faex mwncup, ndwenngux raemh liengzyauj.

Rumznamz cifefe, dauq cuenh biengj buh gou.

Dingz goeng guh henzsaeh, doegsaw caeuq danzgimz.

Byaek suen gwn mbouj liux, haeux gaeuq lij lw dem.

Gwndaenj ndei miz hanh, boux miz gou mbouj hoengz.

Daem haeux oemq laeuj ndei, oemq ndei gou gag ndoet.

Lwg’iq lauh henzndang, hag gangj yaem caengz cingq.

Yienghneix caen angqyangz, lumzlangh gij goengmingz.

Muengh fwjhau bae gyae, gig niemh bouxciuhgeq.

（上林县：白彩兰/Bwz Caijlanz）

Ndoengfaex rogding baihnaj mwncupcup, haeujfug cwklouz gaiq raemhfaex liengzseuseu he. Rumznamz raeujrub ciuqseiz ci dwk, rumz seuqset gvaengxgvax byaengq aekbuh gou. Gou duenh guenciengz dakdaih, geiqcingz ndaekgimz; suenmbaek byaekgwn mak feihdiemz cungcuk, binaengz haeuxgwn cwklouz daengz ngoenzneix. Veizciz bonjfaenh gwndaenj bonjlaiz cungj mbouj yungh geijlai, cix mbouj dwg gou muengh lai aeu ciengcaix. Daem ndaej megmax oemq laeuj ndei, ngauzlaeuj baenz le gag gwndepdep. Lwgnyez iq youq henzndang guh’angq, “nyi’nyi yaya” gangj mbouj baenz coenz. Yiengh bingzciengz caencingz haengjheiq neix, cukgaeuq hawj gou lumz le guenciengz yungzdaeuz liux. Ngiengx gyaeuj muengh fwjhau byaimbwn, ndaw sim niemh miz gij cingzeiq ciuhgeq gyaeraez laemlaeg.

（南宁市武鸣区：潘邦汉/Banh Banghhan）

Faex heu dangqnaj ranz,

Vanzlij ndaej ndoj raemh;

Rumzliengz boq gvaq daemq,

Naemj biengj geu buh gou.

Gou mbouj bae dakdaih,

Caih gou bae guhcaemz;

Ndaw suen byaek lai ndaem,

Haeux caemh gwn mbouj liux.

Gwndaenj cungj rimhoz,

Aeu rox mbouj saiyaix;

Laeuj haeuxbuengz ceiq maij,

Caih gou gwn daengz fiz.

Lwgnyez ngamq rox gangj,

Angq daeuj henzndang gou;

Gangj mbouj rox cix youq,

Dou cungj raen dwgcoh.

Lajbiengz saeh angq lai,

Gou dai cungj mbouj yienq;

Lumz guenciengz baenqcienq,

Bienq guh vunz itbuen.

Ngiengx gyaeuj yawj gwnzmbwn,

Fwj dwn bae dwn dauq;

Ciuhvunz fanh coenz hauq,

Siengj dauqlaeng raezraez.

（西林县：黄玉梅/Vangz Yimeiz）

（1）

编辑：实习生廖小凤复审：黄慧华终审：蒙树起