翻译百家Dangq Boux Dangq Hoiz

来源：广西民族报网

发布时间：2026-08-18

第十九期

原文：

蔼蔼堂前林，中夏贮清阴。

凯风因时来，回飙开我襟。

息交游闲业，卧起弄书琴。

园蔬有余滋，旧谷犹储今。

营己良有极，过足非所钦。

舂秫作美酒，酒熟吾自斟。

弱子戏我侧，学语未成音。

此事真复乐，聊用忘华簪。

遥遥望白云，怀古一何深。

——陶渊明《和郭主簿二首·其一》

译文：

Naj ranz ndoengfaex raemh,

Haethaemh liengzsisi,

Saekseiz rumz haenq di,

Limqbuh ci fanluenh.

Gag caux aen seiqgyaiq.

Doegsaw caiq danzginz,

Ndaw suen byaek maj mwn,

Canghaeux gwn mbouj liux.

Yaek hag rox rimhoz,

Gaej damdoz gvaqbouh,

Haeuxnah moq guh laeuj,

Gag caem daeuj gag gwn.

Lwgsaeq henzndang caemz,

Vah caengz gangj ndaej cingq.

Ngoenz gou nyaenx gauhingq,

Cingqcaen lumz guenciengz.

Saekseiz baez ngiengx gyaeuj,

Gaeuj fwjhau mbinfouz,

Gag ngeix ndaw simdaeuz,

Caen swyouz cwxcaih.

(南宁市邕宁区：钟自鸣/Cungh Swmingz )

Gofaex baihnaj ranz maj ndaej mwnnoengq, mwh haeujfug cw ok bienq raemh caemx ndeu. Rumznamz raeujrub swnh seizciet baed daeuj, rap dem rap rumzlieng dangjnaj ci hai aekbuh gou. Gou mbouj caiq caeuq doenghgij vunz youq guenciengz doxgyau, ngoenzngoenz soengswtswt gvaq ngoenz, ninz ndiu le couh yawj saw danz gimz. Byaekheu ndaem youq ndaw suen haenx gwn mbouj duenj, doengh haeuxgok binaengz lij lw lai dem. Vunz gvaq ndwenngoenz aeu gij doxgaiq bonjlaiz couh mizhanh, gou mbouj hozhaenz cienzcaiz caeuq doenghyiengh baenz bo. Gou daem di haeux daeuj oemqlaeuj, baenz le couh gag siujyaep. Daeglwg iq youq bangxhenz gou guhcaemz, ndaw bak de yiyi yaya, vah lij gangj mbouj baenz. Gij saedceij bingzciengz an’onj yienghneix saekrim vuenyungz, hawj gou lumz gij goengmingz guhhak. Gou ngiengx gyaeuj muengh fwjhau gizgyae, ndaw sim miz bungq, gig siengjniemh vunzndoj cwxcaih seizgonq.

(贵港市覃塘区：邓巧/Dwng Gyauj)

Bakranz faex mwncup，haeuj hwngq cwk raemh liengz. Rumz ci gvaq bangxciengz，buhbangjbienz cungj sangj. Gek biengz gag raen yinx，ndaekgimz rox（naeuz）yawjsaw. Byaek ndaw suen miz yawz，haeux ndaw cang cix gaeuq. Saedceij mbouj yungzheih，ca mbouj geij couh baenz. Gag ngauz di laeujgaen，yaek gwn cix gag raix. Lwg iq duengh henzndang，damzyangyang caengz bienh, yiengh saeh baenzlai siengq，byawz lij siengj guenciengz. Muengh hwnj mbwn bae naemj，haenh goengndumj doenghbaez.

(南宁市武鸣区：李炳群/Lij Bingjginz)

Faex raemh dou dangj cueng,

Seizhah comz liengzsangj.

Rumznamz daeujfangfang,

Dauq ci hai buh gou.

Ngoenzngoenz haengj ninzringz,

Lumh gimz dem yawjsaw.

Suenbyaek maj rim mbaw,

Ndaw mbung haeux gaeuq rim.

Miz gwn youh vuenheij,

Ngaenzcienz raeuz gaej dam.

Haeuxcid siu laeujvan,

Ngoenz sam can gag ndoet.

Lwgbyai caemz henzndang,

Gangjvah caengz baenz coenz.

Fukgveiq mbin lumj oenq，

Ngoenzngoenz aeu gvaq ndei,

Fwjhau mbinfeifei,

Dauqngeix ciuh bouxgeq.

（德保县：陆杉/Luz Sanh)

Naj ranz faexndoeng hoengh，haeujfug raemh liengzsi.

Rumz raeuj riengz seiz daeuj，dauq baed bwenj swjaem.

Mbouj guhhak youqndwi， hwnq congz caemz saw gimz.

Suenbyaek miz lw lai，haeux gaeuq neix lij daenz.

Gaeuq gwn cix ngamq hob，daihsai gou mbouj naemj.

Daem haeux ngauzlaeuj ndei，cauhbaenz cix gag nyaemq.

Lwgnyez youq henz boenz，yiya caengz baenz coenz.

Saedceij caen vaiqvued，cuk lumz dang gawjsaenz.

Gyae’gyang muengh fwjhau，niemh ciuhgonq gig lai.

(马山县：韦肖纯/Veiz Siuhcunz)

Naj dangz faex mwncumq,

Ndwenhaj ndei sauqliengz.

Rumznamz ci gvaqdaeuj,

Haeuj aek geijlai soeng.

Mbouj guhhak ndaejhoengq,

Ngoenznaengz loengh sawmaeg.

Suenbyaek doenghyiengh lai,

Caih gwn mbouj rox liux.

Ciuhvunz aeu rox cuk,

Fukheiq gag rox daeuj.

Daem haeux ma oemqlaeuj,

Ndaejhoengq nyaemq song boi.

Lwgnoix heux gyangrungj,

Haising gangj caengz seuq.

Nyeux gyaeuj gij saeh neix,

Mbouj caiq ngeix guhhak.

Muengh fanh leix fwjhau,

Dauqngeix vunz ciuhgeq.

(宾阳县：凌少华/Lingz Sauvaz)

Gij faex baihnaj ranz hwnj ndaej mwncupcup、raemhrwdwd, byonghgyang cawzhah mbwn gig cik,youq laj raemhfaex liengzsubsub.

Rumz daj baihnamz ci daeuj fafa, dawz gij daeuxbuh gou coi mbin fogfog.

Lizhai guenciengz, swzhong dauq ranz youq, daengxngoenz cungj ndaej doeg saw danz gimz, siengj guh maz couh guh maz, caiq mbouj yungh souh vunz baijbouh.

Gou gag ndaem gij byaek youq ndaw suen mwnfuemfuem, gwn duj gwn mbouj gib; gij haeux binaengz lw roengzdaeuj, daengz seizneix lij gwn mbouj caez.

Gij gwndaenj swhgeij, youz swhgeij gag ngeix gag ra gag guh, gaeuq gwn gaeuq yungh cix baenz(rimhoz), gou mbouj hozhaenz vunzrog baenzlawz fouqcuk.

Gou gyaez daem haeuxbuengz gag ngauzlaeuj, ngauz ndaej laeuj le, swhgeij gag daek gag ndoet.

Lwgnyez youq henzndang gou guh’angq buet bae buet dauq, de ngamq hainduj hag gangjvah riu- gekgek, lij caengz rox gangj baenz coenz.

Cungj swnghhoz cwxcaih neix, cinghseuq caensim youh angqyangz soengswt; seizneix gij goengmingz fouqgviq gaxgonq doiq gou daeuj gangj couh lumj fwj nei, gou di he hix mbouj louzlienh.

Gou ngiengx gyaeuj cimmyaumyau gij fwjhau gwnzmbwn menhmenh lae bae gyae, ndaw sim mbouj rox vihmaz, dauq gag siengj hwnj gyoengq swngyinz caeuq boux miz daek miz caiz ciuhgonq lo.

(平果市：Vangz Siubiz/黄秀碧)

编辑：实习生石喜丹复审：黄慧华终审：蒙树起