翻译百家Dangq Boux Dangq Hoiz

来源：广西民族报网

发布时间：2026-08-18

第十九期

原文：

永日不可暮，炎蒸毒我肠。安得万里风，飘飖吹我裳？昊天出华月，茂林延疏光。仲夏苦夜短，开轩纳微凉。虚明见纤毫，羽虫亦飞扬。物情无巨细，自适固其常。念彼荷戈士，穷年守边疆。何由一洗濯，执热互相望。竟夕击刁斗，喧声连万方。青紫虽被体，不如早还乡。北城悲笳发，鹳鹤号且翔。况复烦促倦，激烈思时康。

——杜甫《夏夜叹》

译文：

Doengxngoenz raezramram,

Rumzndat ci lumj dang,

Baenzlawz ndaej rumzsangj,

Ci daengx ndang gou liengz.

Gwnzmbwn ndaundeiq seuq,

Ingj rongh liux ndoengfaex,

Seizhah haemh mbouj raez,

Hai cueng daeuj souh liengz.

Banhaemh ronghndwen seuq,

Non heuh bek fwed mbin,

Sengmingh raez naeuz dinj,

Ciengz gag log couh liux.

Siengj hwnj bing bien’gyaiq,

Seiqgeiq souj guekgya,

Haethaemh cij swiq naj,

Seizhah ndi ndaej caemx.

Gyoengqde hix rox ndat,

Fouzfap dan doxmuengh,

Baenzhwnz roq daeuj cuenh,

Sing swenj riengj seiq mienh.

Niemh gyoengqde bouxbing,

Doengxbi souj henzguek,

Mbouj ndaej dajcaemx cuk,

Riugoekgoek doxngonz.

Buhguen daenj gwnz ndang,

Mboujyawx dangq ma ranz,

Singzvazcouh baihbaek,

Sing dig gaek siliengz.

Biengz luenh vunz youheiq,

Mbwnheiq ndatyauyau,

Ndang naiq hanh doek liux,

Muengh seiqgyaiq daihbingz.

(来宾市兴宾区潘玉珍/Banh Yicinh)

Gyangngoenz mbwn nanz laep, nditndat iengj dungx saej. Baenzlawz ndaej rumz gyae, dawz caemx boq buh finh? Ronghndwen venj gwnz mbwn, ndoengfaex doek ngaeuz rongh. Haeujfug gyanghaemh dinj, hai cueng caj rumzliengz. Ronghndwen ciuq daengx biengz, duznengz goj raen mbin. Doenghyiengh gwnzbiengz neix, gouz ndei dwg baeznaengz. Naemj daengz bing souj guek, daengx bi dawz henz gyaiq. Baenzlawz swiq hanhndang, dingj ndat dox yawj saengx. Daengx hwnz roq cauqluengz, singyaem rwenz dohdih. Yienznaeuz daenj buhndei, mboujbeij dauq ranz caeux. Singzbaek cienz sing dig, roeghag mbin gvaengxgvax. Simnyap ndang youh naiq, engq muengh biengz onj nauq.

(北京市海淀区:王秋娜/Vangz Ciuhnaz)

Ngoenz deq cungj mbouj haemh,

Lumj ndaw caengq oemam,

Cam mehmbwn mbouj han,

Yawz ndaej fan rumz laux?

Ronghndwen ciuq ndoengmwn,

Rongh daj gwnz geh ndingq,

Cawzhah doengxhaemh dinj,

Hai cueng cimh heiq liengz.

Mbaj hau rox mbaj nding,

Baengh rongh mbinriri,

Duz hung naeuz duz iq,

Cix gag ndaej soengyungz.

Gou ngeix daengz bouxbing,

Laemxsim hen dieggyaiq,

Cawzhwngq coh mbwn baiq,

Muengh daiq daeuj rumzliengz.

Diuhdouj roq daengx hwnz,

Baenz gyoengq cunzvagvag,

Ndaej dauq ranz cij ak,

Daenj buhhak baenz maz.

Huzgyah yiengj mbouj dingz,

Roeg swenj mbin gvaengxgvax,

Gou nyapnyuk saemxsax,

Nyienh baenaj biengz ndei.

（南宁市良庆区:宋君烈/Sung Ginhlez）

Banngoenz raezrangrang mbouj rox seizlawz mbwn cij laep, hoengheiq hwngqfwgfwg hawj aen sim gou lumj deng raemxndat rwed, mbouj onj mbouj an. Baenzlawz cijndaej ci daeuj raq rumz ndeu, yaengyaeng ci doengh geu buh gou, hawj aenndang liengz di ni? Aen ronghndwen sawlili swng daengz gyangmbwn, gij rongh ronghndwen mbang- begbeg ciuq youq gwnz mbawfaex. Aen hwnz seiz- hah dinj lai, gou hai conghcueng, hawj rumzliengz ci yaep he. Ronghndwen ronghsagsag, gij doxgaiq gyangdoengh yienghyiengh yawjraen liux, duzdaek duznengz youq ndaw mokhaemh mbin bae mbin dauq.Gwnzbiengz fanh yiengh mbouj faen hung’iq, cij aeu swhgeij gamjsouh daengz vaiqvued, neix dwg gij dauhleix mbwn cawq namh caux. Yienghneix gou couh naemj daengz gyoengq bouxbing gaem mid gaem cungq haenx, bi daengz haemh hensouj henzguek. Gyoengqde baenzlawz ndaej swiq saek baez ndang soengswd he ni? Cijndaej youq ndaw ndit ndaw ndat doxcim dwk, nyaenx haemz gwn hoj mboujrox gangjvah. Ndaw ginhyingz baenzhwnz cungj roq ok gij sing doxhoenx gingjgai, gij sing cauzhoho haenx cienz bae coh lajmbwn gak giz. Geu buhbing saekheu yienznaeuz roemj youq gwnz ndang gyoengqde, hix mboujyawz dauqbae diegcoj vaiqdi. Singzbaek Vazcouh ci hwnj gij singhauh siengsim haenx, duzroeg guenhwz daejaa seiqcawq gvaengxgvax. Seng youq mwh biengzluenh, caiq gyahwnj gou simnyap、 ndang baeg fouz rengz, simcingz mbouj rox mbouj nyinh fanfoek hwnjdaeuj, gig muengh gwnzbiengz ciengxlwenx bingzbingz an’an.

（平果市:刘秋勤/ Liuz Ciuhginz）

Doengxngoenz raezrangrang seizlawz cij ndaej daengz doengxhaemh? Hwngqhwngq oemoem hawj gou roxnaeuz simnyap simfanz. Baenzlawz cij ndaej ci daeuj raq rumz raezrangrang, ci hwnj vengqbuh gou? Gwnzmbwn swnghwnj ronghndwen cingxdikdik, ndoengfaex mwncupcup laeuh roengz ronghndwen mbangbyagbyag. Hojsik doengxhaemh seizhah dinjdetdet, hai cueng ci di rumz yietliengz. Doengxhaemh ronghcingx ndaej yawjraen gij doxgaiq iqsaeq, duznengz cix mbe fwed gvaengx mbin. Doengh gij miz sengmingh haenx mboujlwnh hung’iq, baenzbaenz cungj dwg gag guh gag angq. Siengj daengz gyoengqbing dawz cungq haenx, baenz bi baenz nienz henyawj henzguek. Baenzlawz cij ndaej hawj gyoengqbing ndaej swiq ndang ne? Gyoengqde nyapmbwq hwngqoem cix mbouj miz banhfap cijndaej mwngz yawj gou gou yawj mwngz. Baenzhwnz roqndaek cungqnaq nyaengq fuengzre, hemqoo yiengjdoh seiq mienh bet fueng. Buhguen saekaeujheu yienznaeuz daenj youq gwnz ndang gyoengqde, cungj mboujyawx vaiqdi dauqma diegcoj. Singz baihbaek yiengj hwnj sing dig siliengz, roegbeghag swenjaa mbinbyu’byu. Biengz luenh gaenq sawj vunz simnyap, mbwn hwngq ndang nyieg, engq hawj vunz siengjniemh mwh an’onj.

(南宁市武鸣区：黄锦艳/Vangz Ginjyen)

Gyangngoenz raezrangh lij caengz laep, heiq ndatfofo hanh dumz ndang. Gij rumz liengz youq gizlawz, ndaej biufifi boq haeuj buh gou ne? Gyanghwnz ronghndwen hausagsag, ingj youq gwnz ndoengfaex mwncup. Seizhah gyanghwnz dinjdetdet, gou hai conghcueng rumz boq daeuj fifi. Ronghndwen rongh ndaej sawlitlit, gij doenghyiengh iq haenx hix yawj ndaej raen cingcuj, duznengz hix mbin bae mbin dauq. Lajmbwn gij doenghyiengh mbouj faen laux iq, youzcaih de baenzlawz youq lawz, youq ndei couh ndaej, neix dwg lajmbwn cingqciengz cangdai. Hoeng gou youh siengj daengz gyoengqbing gwed cungq haenx, bibi dawz youq henzguek de fwzrwkrwk. Mbwn ndat hawj gyoengqde hojsouh, boux yawj boux, baenzlawz cij ndaej hawj caemxndang ne? Gyoengqde baenzhwnz cunzbyaij roq laz, seiq fueng bet baih cauzhuhu. Gwnz ndang gyoengqde yienznaeuz ndaej daenj gij buhbing ndeiyawj haenx, cungj mbouj ndaej vaiqdi dauqma ranz. Gij sing laz siliengz haenx daj singzbaek dieg boux bing youq de cienz okdaeuj, roegbeghag youq gwnzmbwn laezheu baedauq. Seizneix gou simfanz ndang naet, ndaw sim diuqbubbub, cij muengh lajmbwn bingzan vuenyungz.

(西林县:韦海健/Veiz Haijgen）

编辑：实习生廖小凤复审：黄慧华终审：蒙树起