Bohgeiq - 广西民族报网

Bohgeiq

来源：广西民族报网

作者：□ Lanz Siujgvangh raiz Vangz Gyanghmyauz hoiz

发布时间：2026-07-08

Bihaenx seizgyajhwngq gvaqlaeng, gouj nyied haggeiz moq haihag, Lanz Dung youh aemq aen daehsaw ma daengz hagdangz. Daj seizhaenx hainduj, Lanz Dung caeuq bohgeiq de engq doxndei lo, bohgeiq ciengzseiz roengz lajbya daeuj yawj Lanz Dung, Lanz Dung hix ciengzseiz hwnj bya bae ra bohgeiq. Ngoenzsinghgiz, bohgeiq ciengzseiz daiq Lanz Dung hwnj bya, bae ra vagimngaenz、makcengzndoeng、lwg’itbya doengh gij ywdoj caeuq makndoeng neix, dawz hwnj gwnz haw bae gai daeuj gaijndei gwndaenj. Miz baez ndeu, Lanz Dung lwnh gou nyi, de youq gwnz bya ciengx duz noucoengz ndeu, diuzrieng mboengmbwt lumj gungjcoz mberieng nei, gou angqfwngfwng riengz de hwnj bya bae.

Ngoenzhaenx, bohgeiq Lanz Dung youq baihnaj hai roen, aeu cax raemj fwnz bued deuz nga oen, naenx gvaq song mbiengj henz bae, doengh caz oen gogaeu haenx swnh cax de faen okbae, hai diuz roen hawj dou. Lanz Dung caeuq gou gaenj riengz baihlaeng de, ngamq caenx gvaqbae, gogaeu youh sikhaek danz dauq, saek red diuz geh haenx, lumjnaeuz dou caengz byaij gvaq nei.

Dou bin gvaq geij aen gemhbya, daeuj daengz giz bolingq ndeu, bolingq caeuq bangxdat doxhab haenx guhbaenz diuz “roen” ndeu, youq giz mbouj gyae cungqgyang “roen” dwg congh gumz hung ndeu. Lanz Dung vix dwk congh gumz haenx lwnh gou, daxboh de couhdwg youq gizneix oksaeh, de cix mbouj dwg lumj vunzmbanj gangj yienghhaenx, doek roengz laj dat bae deng rin gat dungx byoengq le cix gvaqseiq, de dwg mbouj siujsim caij roengz conghhongx canghdwknyaen nda daeuj gaemh nyaen haenx, deng byai cuk raehrwd camx haeuj dungx bae. Lanz Dung naeuz, doengh gijneix dwg bohgeiq de lwnh de nyi. Gou siujsim riri byaij gvaqbae yawj, bak conghgumz mbouj cingq, lumj luenz youh lumjnaeuz baenz gak, laeg daengz hwet, lajdaej conghgumz dwg mbawfaex naeuh, nanwtnwt, gaenq yawj mbouj raen gij yienghceij conghhongx. Lanz Dung mbouj gangjvah, yaepyaep lwgda geij baez, mbouj rih raemxda. Ngeix daengz daxboh hojlienz de, bonjlaiz angqfwngfwng naeuz yaek nda conghhongx daeuj gaemh nyaenbya, liuh mbouj daengz swhgeij cix doek roengz conghhongx bouxwnq ndalaeb haenx. Nyaenbya lauheiq dwg mouduenh, lauheiq dwg meuzndoeng, youh lauheiq dwg duz nyaenmak, yienznaeuz siujsim hoeng nyinh mbouj ok conghhongx vunzloih. Gig yienhda, raen rizdin nyaenbya mbouj cij daxboh Lanz Dung boux ndeu.

Bohgeiq Lanz Dung youq gizgyae heuh dou gvaqbae, de cingq ndwn youq baihnaj geij gofaex daegbied, doengh go faex neix ngafaex sanq gvaq seiqcawq bae, hunggvangq lumj duj lwgraet nei. Laj mbawfaex heu luenzgyaeq miz gooen saeq, gwnz ngafaex baenz roix baenz roix aenmak daengjciuciu hung lumj naed duhnaz, singjsien rangfwt. Lanz Dung mbaet roix ndeu, lwnh gou nyi, doengh aen mak neix singjsien dangqmaz, gwn le daengx ndang rengzrwd. Baenz aen baenz aen mak deihyaenyaen haenx caen maezvunz lai lo, gou nyaenx mbouj ndaej dwk haeuj bak bae nyaij, daengx bak manhsaengsaeng, heiq manhget con haeuj conghndaeng bae, gou sikhaek haiz okdaeuj. Rox dwg Lanz Dung yaeuh gou, hozndat dwk nyoengx de baez ndeu. Lanz Dung loenghgvaiq yaeuh gou le, riuhaha. Raen Lanz Dung mbouj lumj haxbaenh siengsim, de angq le, gou hix sikhaek gaenriengz sim’angq lo.

“Neix dwg vaceu, beij haeuxgok haeuxyangz lij dijcienz!” Bohgeiq Lanz Dung youh beng geij aen makheu, song fajfwngz founu, dawz daengz dangqnaj ndaeng nyouq, “caj ndwen lai dem, vaceu baenz le, raeuz daeuj mbaet, dawz bae gwnz haw gai, gai ndaej ngaenz le hawj sou boux gwn vanj faenj ndeu.”

Ngoenzhaenx, gou mbouj raen duz noucoengz diuzrieng hung lumj gungjcoz mberieng Lanz Dung naeuz haenx, hoeng cix ndaej geij duz noundoeng deng gebdiet geb dawz ganaj roxnaeuz galaeng haenx. Dauqma seiz, dou youh mbaet haujlai ywdoj dwg dujva roxnaeuz mbawfaex haenx. Youq gwnz roen, bohgeiq Lanz Dung mbouj dingz gaisau gak cungj ywdoj hawj dou: Roix makaeuj mbouj rox mingz ndeu, geij gep ywdoj geizheih yiengh lumj bwnroeg haenx……Yienznaeuz conghhongx bohgeiq Lanz Dung gaeb mbouj dawz duznyaen, gou caeuq Lanz Dung lij gig angq, daegbied dwg gou, roxnyinh sojmiz doxgaiq gwnz bya cungj gig geizheih. Haujlai bi gvaqlaeng gou cij roxdaengz, bohgeiq Lanz Dung ciengzseiz daiq Lanz Dung hwnj bya bae ra ywdoj、gaeb duznyaen, dwg son Lanz Dung bonjsaeh ciengx bak. Lanz Dung majhung le, caen baenz canghdwknyaen dahraix, nyinhrox gak cungj ywdoj, youq aen nienzdaih dwgrengz haenx, de gaenq miz mboengq ndeu baengh gai huqbya ciengx gyaranz. Doeklaeng gaenriengz seizdaih bienqvaq, duznyaen ndaw bya baenz doenghduz baujhoh, mbouj ndaej luenh gaeb, Lanz Dung hix gaenriengz vunzlai dajgoeng, bae Gvangjdungh dajgoeng.(4)

那年暑假过后，9月新学期开学，兰动又背上书包回到了学校。从那时候开始，兰动和他寄父的关系变得更亲密了，寄父常下山来看兰动，兰动也常上山去找寄父。周末，寄父常带兰动上山，找金银花、野柠檬、山葡萄等药材和野果，拿到市场换些钱改善生活。有一次，兰动告诉我，他在山上养了一只大松鼠，尾巴蓬松得像孔雀开屏，我兴奋地跟着他上山去。

那天，兰动寄父在前面开路，用柴刀拨开带刺的枝条，往两边按压，那些荆棘藤蔓在他刀下顺从地分开，为我们让开条道。兰动和我紧随其后，刚挤过去，那藤蔓立刻弹回，将那条缝隙缝合，仿佛我们从未曾经过。

我们翻过几个山坳，来到一处斜坡，斜坡与崖壁交会处形成一条“路”，不远处的“路”中间有个大坑。兰动指着那个坑告诉我，他父亲就是在这里出事的，他并不是像村里人说的那样，是摔下悬崖被石头割破肚皮才去世的，他是不小心踩进猎人为山兽设置的陷阱里，被锋利的竹尖刺进肚子。兰动说，这些都是他寄父告诉他的。我小心翼翼地走过去看，坑口不规则，似圆似方，齐腰深，坑底是腐烂的叶子，厚厚的一层，已看不到陷阱的模样。兰动没有说话，眼睛眨了好几下，没有流泪。想他那可怜的父亲，本来兴致勃勃地想要给山兽设陷阱，不承想自己却踏进了别人的陷阱里。那山兽或许是野猪，或许是野猫，又或许是一只虽谨慎却不能识破人类机关的果子狸。显然，发现山兽行踪的不止兰动父亲一人。

兰动寄父在远处叫我们过去，他正站在几棵奇特的树前，这些树的枝条四处展开，膨胀得像个蘑菇。椭圆形的绿叶下埋伏着小刺，枝头竖起一串串绿色的黄豆般大小的果实，气味清香无比。兰动摘下一串，告诉我，这果实味道鲜美无比，吃了能马上满血复活。那星星点点的果子实在诱人，我忍不住放进嘴里咀嚼，一股辛辣味灌满嘴巴，窜进鼻腔，我立刻吐了出来。知道是兰动骗了我，气得推了他一把。兰动恶作剧得逞，哈哈大笑。看见兰动一改刚才的悲伤变得开心起来，我的心情也立马跟着晴朗起来。

“这是花椒，比稻谷玉米还值钱！”兰动寄父又扯下几颗绿果，双掌搓揉，拿到鼻子前嗅了嗅，“再等个把月，花椒熟透了，咱们摘下来，拿到市场卖，换了钱给你们每人吃一碗米粉。”

那天，我没有看到兰动说的尾巴大如孔雀开屏的松鼠，却收获几只被铁夹子咬住前腿或后腿的山老鼠。返程时，我们又摘了许多或花或叶的药材。一路上，兰动寄父不停地跟我们介绍各种药材：一串不知名的紫果，几片羽毛状的奇异草药……虽然兰动寄父的陷阱没捉到野兽，我和兰动仍然很高兴，特别是我，感觉山上所有的事物都很新奇。多年后我才知道，兰动寄父频频带兰动上山找草药、捕野兽，是在教兰动生活的本事。长大后的兰动，果真成了猎手，识得各种草药，在那个艰苦的年代，他曾一度通过售卖山货养家。后来随着时代的变迁，山里的野兽成了保护动物，不能再随意捕捉了，兰动也跟着打工浪潮，去了广东打工。

编辑：实习生冯慧琴复审：黄慧华终审：蒙树起