Youq Henz Hawsingz - 广西民族报网

Youq Henz Hawsingz

来源：广西民族报网

作者：□ Hoz Hwngzcingh raiz Cau Dwzfeih hoiz

发布时间：2026-07-08

Gou baez doekbyai raen lungzngeih, dwg ngeihcib bi gaxgonq seiz yaek gvaq cieng. Bihaenx lungzngeih youq baihrog dajgoeng swnhloh gvaqdaeuj yawj gou. Naeuz swnhloh gvaqdaeuj yawj gou, gizsaed dwg cienmonz goz heux daeuj ra gou. Bihaenx de bungz daengz mbangj di mazfanz, dajgoeng buenq lai bi ngaenzhong aeu mbouj ndaej, lienz ngaenz dauq ranz gvaq cieng cungj mbouj miz dieg dawz, daengz ndaw singz ra gou bang naemj di banhfap. De caeuq doihhong gaenq mbouj miz banhfap lo, daeuzbauhong iq、daeuzbauhong hung caeuq aen danhvei hwnqguh doxdoi, aeu gyoengqde vut bae vut dauq lumj vut giuznaeng nei. Daeuzbauhong iq naeuz aen danhvei hwnqguh caengz hawj ngaenzhong, aen danhvei hwnqguh naeuz ngaenzhong vunzhong caeux couh hawj lo. Lungzngeih caeuq gyoengq doihhong de deng gyoengqde naeuz bae naeuz dauq naeuz ngunh lo, doeklaeng dauqdaej yaek daengz cieng cungj aeu mbouj ndaej saek faen ngaenz. Ngaenzhong deng ngengh yiemq, ciuhvunz dajgoeng lungzngeih miz haujlai baez. Aen hong ndeu, daeuzbauhong hunghung iqiq boux cienj bau hawj boux, daengz doeklaeng, gaenbonj mbouj rox vwndiz youq gizlawz. Hoeng baezneix, deng yiemq lailai lo, de lienz ngaenz dauq ranz gvaq cieng cungj mbouj miz dieg dawz. Mwh lungzngeih daengz aen hawsingz gou youq gvaiz gvaq ngoenz ndeu, de yienzlaiz dwg dap aen ciswnhloh boux laujyieng ndeu daeuj, hoeng ngamq hai ci yaep ndeu, boux laujyieng haenx couh gyaijbak byongh loh hawj lungzngeih roengz ci. Mbouj rox de yiemz song daeh buhvaq lungzngeih ciemq dieg lai, roxnaeuz yiemz lungzngeih guh hongnaek daengx ndang hanh haeucwdcwd, lauheiq mwh ngamq hainduj bouxsug gaisau lungzngeih naengh ciswnhloh hix mbouj gangj cingcuj lungzngeih dwg boux haeuj singz dajgoeng ndeu. Lungzngeih dwg boux vunz yahcienh ndeu, hoeng de engq dwg boux vunz bonjfaenh caiqlij aeu danaj ndeu, de mbouj gangj lai coenz, couh roengz ci lo. Ci dwg aen bouxwnq, bouxwnq hawj roengz ci couh roengz ci lo. Lungzngeih raek song aen daehnaengngwz baenqcienq geij loh cigoenggyau cij ra daengz gou. Hoeng gou hix bang mbouj ndaej lungzngeih gijmaz. Gou mbouj miz rengz bang de caeuq doihhong de aeu dauq saek faen ngaenz. Mbouj dwg bouxboux vunz youq ndaw singz hwnjban cungj miz rengz. Seizhaenx gou daihhag ngamq bizyez geij bi, camhseiz co youq aen ranz gaebgeb ndeu, gou lienz bonjfaenh cungj goq caengz ndei.

Doengh bi neix gou ciengzseiz baenzneix naemj, danghnaeuz seizneix lungzngeih daeuj yawj gou, yienghhaenx gou couh ndaej hawj de youq aen rug gvangqlangh ronghsag ndeu, mbouj hawj de ninz aen bakcanz iq dak buhvaq haenx lo. Haeuj singz haujlai bi le, gou buen haeuj aen ranz hung ndeu, doiqnaj dwg gunghyenz, cin raeuj va hai. Gou cungj mbouj gvaqeiq bihaenx hawj lungzngeih youq aen bakcanz iq ranzco ninz. Aen bakcanz haenx doi rim doxgaiq, mokfaenx lai raixcaix, gaebgeb dan coq ndaej aen mbonqsahfaz iqet ndeu. Bakcanz iq hawsingz, couhlumj lajroq ranz lajmbanj. Doiq lajroq, lungzngeih caeux gvenq lo. De ciuhvunz neix, mbouj daengx daj aen dieg moq ndeu bae lingh aen dieg moq, youq lajroq youq lij noix lwi? Gou hix dan naemjnaemj ndwi lo, lungzngeih caeux bae lingh aen seiqgyaiq lo. Couhsuenq gou miz maz ienqhoij, hix bouj mbouj ndaej lo. Caiqlij gou bouj ndaej aen ndeu, bouj mbouj ndaej song aen, bouj ndaej song aen, bouj mbouj ndaej sam aen. Lungzngeih ciuhvunz bungz hoj baenzneix lai, gou youh bang ndaej gijmaz ne? Doenghgij riz cax nienzgeij heh youq gwnz ndang de haenx, mbat dem mbat, byawz cungj lawh mbouj ndaej.

Maqmuengh lungzngeih youq lingh aen seiqgyaiq, daihdeih gvangqlangh, boux fueng namhhenj, gizhaenx mbouj faen diegwnq caeuq mbanjranz, mbouj faen hawsingz caeuq lajmbanj, mbouj faen ciq youq lajroq.

Auciengj doeklaeng youh daeuj ra gvaq gou song baez, lijdwg aenvih raemx dumh diegyouq. Gaiq dieg daemzbya haenx dieg daemq lai lo, caemhcaiq baiz raemx mbouj ndaej, baez lienzdaemh doek geij ngoenz fwnhung, couh yungzheih raemx dumh, lauxbanj daemzbya lijdwg mbouj hawj Auciengj lizbae. Auciengj cijndaej lijdwg youq lajroq ranz gou guh aen mbonqbenj genjdanh ndeu. Gou baeznaengz cingj de haeuj ranz, de cungj riuhehe naeuz lajroq miz dieg youq gaenq ndei lai lo.

Doeklaeng baez haenx, Auciengj lij daiq duzma hen daemzbya daeuj dem. Duz haenx dwg duz ma miz lingzsing ndeu, bingzseiz raen vunznajseng haeujgyawj couh raeuqvouvou, gaxgonq lengqseiz byaij daengz henz daemzbya, baeznaengz mbouj caj gou haeujgyawj, lij liz de geij cib yamq couh raeuq coh gou. Daeuj daengz gou gizneix le de caemdingh haujlai lo. Boemz youq gwnz dieg raen gou, dan yo gyaeuj yawj mbat ndeu couh ngaem gyaeuj, mbouj hai bak raeuq, de wnggai hix rox neix mbouj dwg dieg de. Mbouj youq dieg bonjfaenh couh aeu ngaem gyaeuj. Ma lumjbaenz hix rox aen dauhleix neix.

Gou baeznaengz raen Auciengj, couh ngeix daengz lungzngeih. Lumjbaenz, Auciengj couhdwg lungzngeih, lungzngeih hix dwg Auciengj. Gyoengqde youq henz lajmbanj caeuq hawsingz, youq henz bang vunz yungz mbouj haeuj bae caeuq lingh bang vunz ndeu. Lengqseiz gou ndaej faenhai gyoengqde, lengqseiz gyoengqde youh mumjgyumq caez youq, guhlawz faen cungj faen mbouj hai. (sat)

我最后一次见到二伯，是在二十年前的春节前。那年二伯在外地打工顺道过来看我。说顺道过来看我，其实是拐个弯专程来找我。那年他遇到了一些麻烦，打工半年工钱被恶意拖欠，连回家过年的钱都没有着落，到城里来找我帮想点办法。他和工友已经没有办法了，小包工头、大包工头和建设单位互相推诿，把他们推来推去像推皮球一样。小包工头说建设单位没付工钱，建设单位说该给工人的工钱早就给了。二伯和工友们被他们绕来绕去绕晕了，最后愣是没能在年前拿到一分钱。被恶意拖欠工钱，在二伯的打工生涯里并不少见。一个项目，大大小小的包工头一个转包给一个，到最后，根本不知道问题出在哪。但是这一次，被拖欠的太多了，他连回家过年的钱都没有着落。二伯到达我所在的城市的时间比说好的晚了一天，他原本是乘坐一位老乡的顺风车来的，只是刚出发没多久，那位老乡便找了个借口途中就把二伯给请下车。不知道是他嫌二伯的两个蛇皮口袋行李太占地方，还是嫌干重活的二伯一身汗味，也许一开始熟人介绍二伯坐顺风车时也没讲清楚二伯是个进城务工的。二伯是个卑微的人，但他更是一个本分且有尊严的人，他半句话都没多说，就默默地下了车。车是别人的，别人让下车那就下车吧。二伯拖着两个蛇皮袋的行李辗转了几趟公交车才找到我。但是我也帮不了二伯什么忙。我没有能力替他和他的工友讨回哪怕一分钱。不是每一个在城里上班的人都是有能耐的。当时我大学刚毕业没几年，暂时租住在一套狭小逼仄的出租房里。我连自己都没有安顿好。

这些年我时常会冒出这样一个念头，假想现在二伯来看我，那我就可以安排他住在一间宽敞明亮的客房里，而不用委屈他睡在晾晒衣服的小阳台了。进城多年后，我搬进了一间大房子，面对公园，春暖花开。我总是耿耿于怀当年把二伯安置在出租房那锈迹斑斑的小阳台。那个小阳台堆满了杂物，布满了灰尘，逼仄得只能放下一张小小的沙发床。城市的小阳台，大致相当于乡下民房的屋檐。对于屋檐，二伯早已习惯了。他这辈子，不停地从一个陌生的地方到另一个陌生的地方，在屋檐下住得还少吗？我也只是想想而已了，二伯早已去了另外一个世界。就算我有什么遗憾，也无法弥补了。况且我弥补得一个，弥补不了两个，弥补得两个，弥补不了三个。二伯一辈子那么多的遭逢，我又能帮得上什么呢？岁月刻在他身上的那些刀痕，一刀一刀的，谁都替代不了。

唯愿二伯在另一个世界，苍茫大地，一人一方黄土，那里没有所谓的异乡和故乡，没有所谓的城市和乡下，没有所谓屋檐下的寄住。

蒋叔后来又来找过我两次，还是因为住的地方被水淹。鱼塘那块地地势太低了，且排不了水，一旦连着下几天暴雨，就容易被水淹。每次被水淹，鱼塘老板也还是不让蒋叔离开。蒋叔只能依旧在我屋檐下搭张简易木板床。我每次请他住进屋里，他总是咧着嘴笑着说屋檐下有个地方落脚已经很好了。

最后那一次，蒋叔把他那只看守鱼塘的狗也带来了。那是一只有灵性的狗，平日里见到陌生人靠近就狂叫。之前我偶尔散步到鱼塘附近，每次不等我接近，还有几十步的距离它就朝我狂叫。来到我这里后它安静了许多。趴在地上见到我，只是抬头看一眼就低下头，并没有开口叫，它应该也知道这不是它的地盘。不是在自己的地盘就得低下头。狗似乎也明白这个理。

我每次见到蒋叔，就会想起二伯。恍惚中，蒋叔就是二伯，二伯也是蒋叔。他们在乡村与城市的边缘，在融入不进去的一群人与另一群人的边缘。有时候我能够将他们分开，有时候他们又模糊在一起，怎么分都分不开。

（完。原标题《在城市的边缘》，原载《广西文学》，汉文作者：何恒清，壮文翻译：赵德飞）

编辑：实习生冯慧琴复审：黄慧华终审：蒙树起