Youq Henz Hawsingz - 广西民族报网

Youq Henz Hawsingz

来源：广西民族报网

作者：□ Hoz Hwngzcingh raiz Cau Dwzfeih hoiz

发布时间：2026-07-08

Couh yienghneix, ciengz souciengx unqswnh ndeu, ciengz nyinh caen diegwnq ndeu, hainduj dwg aenvih gwn haeux, satbyai hix aenvih gwn haeux. Neix wnggai dwg aen satbyai gyoengqvunz cungj liuh mbouj daengz ndeu. Aen satbyai baenzneix hawj vunz danqheiq.

Buen liz aen ranz souciengx de gvaq le, naemj mbouj daengz, lungzngeih mbouj liz aen cin iq bae. Mbouj rox dwg gyaez aen cin iq neix, lijdwg mbouj miz dieg bae. Doeklaeng, lungzngeih youq cin iq aeubawx seng lwg, doeklaeng youq neix youqdingh, aeu mbanjwnq bienqbaenz mbanjranz. Mwh lungzngeih baenzgya mbouj miz ranz, ranz baenzgya yungh dwg aen ranz coq huqcab boux vunzsimndei ndeu ciq hawj. Lungzngeih youq aen ranz coq huqcab haenx youq ca mbouj geijlai song bi. Lwg daeuz lungzngeih caeuq bajngeih couhdwg youq gizhaenx seng. Lwg doekfag, hawj lungzngeih laemxsim aeu gag hwnq aen ranz ndeu. De maqmuengh lwg laeng dwg youq ranz bonjfaenh seng. De youq lajroq bouxwnq gvaq ngoenz ndaej, hoeng de mbouj ei yawjraen daihlwg lijdwg youq lajroq bouxwnq gvaq ngoenz.

Song bi le, lungzngeih rom ngaenz cawx ndaej gaiq diegranz ndeu, caemhcaiq youq gwnz neix hainduj hwnq aen ranz duh bonjfaenh. Lungzngeih caencingq dwg fwngzbyouq hwnq ranz. Aen ranz haenx dwg de baenz canj baenz canj namh、baenz gaiq baenz gaiq cien、baenz gep baenz gep vax caenfwngz guh hwnjdaeuj. De mbaq rap sa rap dem rap daj haenz dah liz cin iq gyae- gyang haenx dauq, vat namhhenj hab guh ciennamh rap dem rap daj ndoi henz cin iq dauq, gwed faex hab guh loz gaiq dem gaiq daj gwnz bya dauq. Ranz hwnq daengz buenq, dwg mwh ceiq hojnanz, de mbouj ndaej mbouj bae bohda mehdaiq bonjfaenh gizhaenx ra bang, seiz mbouj seiz aeu rap haeux roxnaeuz bingz youz ndeu. Mwh de rap doenghgij doxgaiq haeux roxnaeuz youz byaij youq gwnz gai, diuzgai mbangj boux mehmbwk youqndwi cungj iet gyaeuj okdaeuj daengxda yawj de. Gyoengq mehmbwk cungj dox damqdingq, neix dauqdaej dwg lwggwiz ranz byawz, mbouj soengq gaiqgwn daeuj ranz bohda, dauqfanj rap doxgaiq ranz bohda dauq ranz dem. Mwh mehmbwk iet gyaeuj okdaeuj yawj yied daeuj yied lai, mwh gyoengq mehmbwk lwnhyaengyaeng, lungzngeih guh ndaej couhdwg ngaem gyaeuj daemqdaemq ndwi, daemq daengz dan yawj ndaej raen lwgdin bonjfaenh. Lungzngeih gaenbonj mbouj gamj yo gyaeuj, doenghgij mehmbwk haenx lwgda lumj cax nei raeh. Lungzngeih cijndaej mbaqmbingh buetdeuz, caih doenghgij lwgda lumj cax haenx coeg ndoksaen bonjfaenh.

Lungzngeih hwnq ranz baenz le, hix mbouj ndaej youq aen ranz bonjfaenh soengsetset gvaq ngoenz. Hwnq ranz hawj de dawzneij lai, aenvih neix doeklaeng haujlai bi, de cungj aeu okrog bae gairengz boizneij. De guh hong buenyinh、hong suijniz, youq lajmbanj bang vunz hwnq ranz, youq hawsingz bang vunz dajcang, dingzlai seiz de youq bungzhong、aen cang, youq dieghong lij caengz hwnq baenz dajcang baenz, youq gak cungj dieg ndaej laemzseiz youq seizbienh guh hwnjdaeuj haenx. Seiz de youq ndaw ranz bonjfaenh hwnq ndei haenx noix raixcaix, cijmiz dauq ranz gvaq cieng cib lai ngoenz haenx. Lumjbaenz vihliux guhcingq aen ranz neix caen mbouj dwg hwnq hawj bonjfaenh, cix dwg hwnq hawj lwgnyez.

Lungzngeih ceiq habhoz mbouj dwg hwnq ndaej aen ranz ndeu hawj lwgnyez. Ciuq de naeuz, de ceiq habhoz dwg daiq lwg daj aen mbanj iq gwn mbouj imq ndeu daengz aen cin iq ndaej gwn imq ndeu. Mwh lungzngeih gwn laeuj miz di fiz, cungj dwg doiq lwg de hix couhdwg godangz cejdangz gou naeuz, danghnaeuz mbouj dwg gou daj lajmbanj daengz gwnz haw, sou seizneix cingq youq lajmbanj hwet coh mbwn hanh lae hanh conh guh reihnaz ne. Danghnaeuz sou ndaej roengzrengz ceng’aeu bae yienhsingz guhhong, yienghhaenx daihlaeng sou baez doekfag couhdwg vunz ndaw singz lo. Lungzngeih yawj daeuj, vunz ndaw singz, haenx couhdwg vunz ndaw singz caencingq lo. Gyoengqde daenj buhvaq caezcingj seuqsag, naengh youq ranzbanhgoeng guh hong soengset, mbouj yawj mbwn gwn haeux, hix mbouj yawj naj vunz gwn haeux, ndwen ndaej ngaenzhong onjdingh, mbouj you donq laeng, mbouj you ndwen laeng miz mbouj miz ngaenz roengz daeh. Lungzngeih yawj daeuj, ndwenngoenz ndaw singz couhdwg ndwenngoenz vuenyungz. Ndaw gvaengx lungzngeih roxyiuj neix, baenz boux vunz ndaw singz ndeu couh mbouj lumj de dauqcawq bae ra ngaenz gvaq ngoenz. Baenz boux vunz ndaw singz caencingq ndeu, doiq lungzngeih daeuj gangj de naemj cungj mbouj gamj naemj, de caen mbouj gojnaengz ra ndaej diuzloh doeng ndaw singz nauq. De ciuhvunz neix nyinh mingh lo. De cijmiz maqmuengh daihlwg, hawj daihlwg, caiqlij daihlan, lawh de guhsat aen siengjmuengh caengz sat bonjfaenh.（8）

就这样，一场温情的收养，一场他乡的认亲，始于吃饭问题，最后也终于吃饭问题。这应该是所有的人都没有想到的一种结局。这样的结局令人不胜唏嘘。

搬离了那个曾经收养他的家后，出乎意料的是，二伯并没有离开小镇。不知道他是喜欢上了这个小镇，还是也没其他地方去。后来，二伯在小镇娶妻生子，最终定居于此，把他乡变为故乡。

二伯结婚时没有房子，婚房就是一位好心人借的杂物房。二伯在那间杂物房住了差不多两年。二伯和二伯母的第一个孩子就是在那出生的。孩子的出生，让二伯下定决心要建一间属于自己的房屋。他希望下一个孩子是在自己的家里出生的。他可以在别人的屋檐下生活，但是他不愿意看到自己的下一代还是在别人的屋檐下生活。

两年后，二伯用积攒下来的钱买下一块宅基地，并且在上面开始建起属于自己的房屋。二伯是真正意义上的白手起家。那房屋是他一锹土一锹土、一块砖一块砖、一片瓦一片瓦亲手建起来的。他用扁担从远离小镇的河床挑回一担担沙子，从小镇周边的土岭挖回一担担适合做泥砖的黏土，从山上扛回一根根适合做横梁的木头。在房子建到一半，在最艰难的时候，他不得不从自己的岳父母那里寻求帮助，时不时挑回一小担米或者一壶油。当他挑着这些米或者油走在街上，一条街空闲的妇人都探出头瞪大了眼睛盯着他。妇人们都在相互打听，这究竟是谁家的女婿，没往老丈人家送吃的喝的，反而从老丈人家用一根扁担挑走东西。当探出头来围观的妇人越来越多，当长舌头到处飞舞唾液横飞，二伯能做的只有把头放得低低的，低到只看得到自己的脚趾。二伯根本不敢抬头，那些妇人的目光像刀片一样锋利。二伯只能大步往前落荒而逃，任那些目光的刀片刺向自己的后脊梁。

二伯把房子建好后，并没有能安闲地住在自己的房子里享受清福。建房子让他欠下一屁股外债，以致后来的很多年里，他都要外出打工还债。他做搬运工、泥水工，在农村帮人建房，在城市帮人装修，大部分时间他住工棚、仓库，住还没有建好装修好的工地，住各种简易搭建起来的能暂时安身的地方。他住在自己建好的房子里的时间非常短，只有回家过春节那十来天。好像为了证明这房子真的不是为了自己，而是为了孩子而建似的。

二伯最满意的并不是为孩子建起了一处房子。按照他的说法，他最满意的是把孩子从一个吃不饱饭的小村庄带到了一个能吃饱饭的富裕小镇。二伯在喝酒有几分醉意时，总是对他的孩子也就是我的堂哥堂姐说，如果不是我从农村来到镇上，你们现在就在农村的地里一脚深一脚浅汗流浃背干农活呢。如果你们能努力争取到县城工作，那你们的下一代一出生就是城里人了。在二伯的眼里，县城的人，那就是真正的城里人了。他们穿着干净整洁的衣服，坐在办公室干着轻松的活，不用看天吃饭，也不用看人脸色吃饭，每个月拿着稳定的薪水，不用为下一顿饭，为下一个月的收入发愁。在二伯淳朴的眼里，城里的生活就是幸福的生活。在二伯有限的认知里，成为一名城里人就不会像他这样为了生活而四处奔波颠沛流离了。成为一名真正的城里人，对二伯来说那是遥远而无法企及的，他几乎不可能找到通达城里的路径。他这一辈子认命了。他只有把希望寄托于下一代，让下一代，甚至再下一代，代替他完成他自己未竟的理想。

编辑：实习生冯慧琴复审：黄慧华终审：蒙树起