Youq Henz Hawsingz - 广西民族报网

Youq Henz Hawsingz

来源：广西民族报网

作者：□ Hoz Hwngzcingh raiz Cau Dwzfeih hoiz

发布时间：2026-07-08

Hawj gou engq naemj mbouj daengz dwg, mwh ginggvaq gyanghongh gou raen doenghgij byaek ndaem caxcadcad haenx, Laujcinz daengx roengzdaeuj, sawqmwh gangj coenz ndeu：Gou hix yaek lumj mwngz nei！

Lumj gou guhlawz? Lumj gou baenzlawz?Raen gou geizgeih, Laujcinz muengz naeuz, gvaq geij bi de hix naemj dauq ranzlaux lumj gou nei youq gyanghongh ndaem byaek. Laujcinz fwngz vixvix go’gva gyanghongh gou ngamq ndaem mbouj geijlai nanz caeuq va lwggve ngamq banh hwnj gyaq haenx, vixvix aen daengqgyanx gou daegdaengq daj ndaw singz buen daeuj haenx.

Gvaq song bi caj gou ra ndaej di ngaenz le, gou couh dauq ranzlaux. Laujcinz lumjbaenz cingq caeuq gou naeuz, youh lumjbaenz gag gangj.

Youq ndaw singz mbouj baenz lwi? Lij dauqbae guhmaz?

Ndaw singz baenz dwg baenz, hoeng gou lijdwg naemj dauqbae. Gou hix wnggai dauqbae lo, gou liz ranz miz haujlai bi lo.

Ranzlaux mwngz lij miz ranz lwi?

Ranzgaeuq lij miz, coihcoih lij youq baenz.

Ranzlaux Laujcinz, gou dingqnyi gvaq. Gizhaenx dwg aen mbanj iq ndeu gyawj yienhsingz henznden aen hawsingz neix, gizhaenx ndaem haeuxnaz lai. Binaengz seizcou dajsou, bonjdieg mbangj conzdungj meizdij caeuq swmeizdij, lijmiz gienbaengzyoux, cungj cienjfat gij gingj gyaeu haeuxnaz gizhaenx. Giyez dangdieg roxnaeuz mizgven bouhmonz youq doenghnaz dajveh ndaem baenz yiengh cih saw lumjbaenz “haeuxliengz fungsou” caeuq aendoz mbawgeiz mbinyagyag, naeuz de baenz “yisuz doenghnaz”.

Gangj daengz haeux rauzlaux, Laujcinz miz di vuenheij：Daeglwg gou mwh lij iq bae ranz daxdaiq youq buenq ndwen, dauqma le itloh hemq naeuz haeux ranz daxdaiq gwn yaez gvaq haeux ranz bonjfaenh lai.

Laujcinz lumjbaenz gaenq gietdingh, de naeuz, gvaq song bi gou couh dauqbae ndaem moux naz gou. Gou gaenq haujlai bi mbouj ndaej gwn haeuxhau bonjfaenh ndaem lo.

Gangj sat Laujcinz couh hai aen cisamloek gaijcang gvaq, de yaek ganj bae gizwnq soengq mbonq.

Laujcinz doq doenq laeng ci, doq yawj raeblaeng. Loh haeuj gyanghongh gou mbouj gaeuq gvangq, de cienq gyaeujci mbouj ndaej, cijndaej ei loh menhmenh doenq laeng ci okbae. Haeujdaeuj yungzheih, dauq okbae hoj, neix miz di lumj gij gvanhaeh Laujcinz caeuq aen hawsingz neix. Mbangj boux haeuj daengz aen hawsingz neix, dwg vihliux haeujdaeuj; mbangj boux haeuj daengz aen hawsingz neix, dwg vihliux dauqbae. Gou mbouj rox Laujcinz dauqdaej dwg guhlawz naemj, gou hix mbouj rox Laujcinz dauqbae ndaej mbouj ndaej. Gou mbouj rox Laujcinz dauqbae le gvenq mbouj gvenq aen mbanj seizneix. Danghnaeuz seizgan hix ndaej itloh doenq laeng, couh lumj aen luzsienggih gaeuqgeq dauqdaiq nei, gou mbouj rox de yaek doenq dauq daengz gizlawz. Doenq dauq daengz aen mbanj de liz ranz gaxgonq, youq ndaw mbanj bonjfaenh, ndaem gva ndaem duh, seizcin dajndaem seizcou dajsou, song din uq naez? Doenq dauq daengz dieghong guh hong, lwgda deng sieng gaxgonq couh hwnq ndang lizbae? Doenq dauq daengz laj giuzlaebgyau caj bouxgoq ndeu senjsenj lehleh?

Lwgda gou itloh gaen Laujcinz baenq, yawj aen’gyaeuj byoem hausagsag caeuq seiz daeuj ityiengh mbinyigyig, dwkdaengz youq byai loh mbouj raen.

Mwh gou caen yawj mbouj raen Laujcinz, gou sawqmwh naemj daengz gou wnggai camcam de youq gizlawz youq. Gou aeu rox aen gojgaeq caezcingj ndeu. Youq aen hawsingz neix, de youq gizlawz youq？Ranzco gaebgeb, aencang feiqgaeuq, aenbungz laemzseiz guh, gizlawz cij dwg diegyouq de? Gizlawz cij dwg ranz de? De ngoenznaengz soengq mbonq bae hawj baenzlai vunz, yienzhaeuh nda maenh, hoeng aenmbonq de miz mbouj miz dieg cuengq?

Banngoenz Laujcinz bang gou cang mbonq ndei le, haemhhaenx gou couh youq aen ranz lajmbanj haenx youq. Haenx dwg gou baez daih’it youq gizhaenx. Aen ranz haenx co haujlai ndwen le, gaxgonq gou youq gizhaenx ndaem gva ndaem byaek, youq gizhaenx yawj saw, youq gizhaenx gwn caz, youq gizhaenx youqndwi, baez daengz banhaemh, gou youh hai ci dauq daengz ranz ndaw singz. Laujcinz bang gou cang mbonq ndei le, gou dauqdaej ndaej sawq yawj banhaemh lajmbanj lo. Banhaemh lajmbanj caeuq banhaemh ndaw singz caen mbouj doxdoengz. Daihgya cungj naeuz banhaemh lajmbanj caemrwd, neix mbouj cinjdeng geijlai. Lauheiq vunz ndaw singz mbouj rox, banhaemh lajmbanj hix nauhyied raixcaix, mboujgvaq de nauhyied caeuq hawsingz nauhyied dwg song cungj nauhyied mbouj doxdoengz, hawsingz nauhyied dwg vunz nauhyied, dwg ci nauhyied, dwg gihgi nauhyied, hoeng lajmbanj nauhyied, dwg gyangdoengh nauhyied, dwg non swenj goep hemq nauhyied, de mbouj dwg caen caemrwd. Danghnaeuz mwngz aeu non swenj goep hemq dangguh souj dem souj go, yienghhaenx de caen dwg caem dahraix.（3）

让我更想不到的是，在经过我院子里那些种得稀稀拉拉的蔬菜时，老陈的脚步突然停了下来，嘴里突然冒出一句：我也要像你这样！

像我怎样？像我哪样？看到我一脸蒙，老陈忙解释说，过几年他也想回老家像我一样搞个院子。老陈用手指了指我院子里刚种下不久的南瓜苗和刚刚爬上架的青瓜花，指了指阳光下那张我特意从城里搬来的藤编摇摇椅。

过两年等我赚了点钱，我就回老家。老陈好像在对我说，又好像在自言自语。

在城里不好吗？还回去干吗？

城里好是好，可我还是想回去。我也该回去了，我离开家已经好多年了。

你老家还有房子吗？

老房子还在，修一修还能住。

老陈的老家，我略有耳闻。那是这座城市周边县城的一个小村庄，那里盛产稻谷。每年秋收的时候，本地的一些传统媒体和自媒体，还有朋友圈，都在转发那里的稻田美景。当地的企业或者是有关部门在大片大片的稻田上设计了一些诸如“五谷丰登”的文字和彩旗飘飘的图案，谓之“稻田艺术”。

谈起老家的米，老陈面露得色：我儿子小时候去外婆家住了半个月，回来后一直嚷嚷说外婆家的米饭没有自己家里的米饭好吃。

老陈好像已经下定决心，他说，过两年我就回去种我那一亩田。我已经有好多年没有吃到自己种的大米了。

说完老陈就启动了他那辆经过改装的三轮车，他要赶去另一个地方送床。

老陈一面往后倒车，一面往后瞧。进我小院的路宽度不够，他掉不了头，只能依着来时的路慢慢倒车出去。进来容易，倒回去难，这有点像老陈跟这座城市的关系。有些人进到这个城市，是为了进入；有些人进到这个城市，是为了回去。我不知道老陈到底是怎么想的，我也不知道老陈回不回得去。我不知道老陈回去以后是否还能适应现在的村子。如果时光也能一直往后倒，就像老旧的录像机倒带一样，我不知道他要倒到哪里。倒到他离家之前的村子，待在自己的村里面，种瓜种豆，春种秋收，两只脚深深地陷入地里？倒到干活的工地，在眼睛被弄坏之前起身离开？倒到立交桥下等待一个雇主挑挑拣拣？

我的目光一直跟着老陈移动，看着那一头花白的头发跟来时一样在风中凌乱地飞舞，直至消失在路的尽头。

当老陈彻底消失在我的视线后，我突然想起我应该问问他住在哪里。我需要一个完整的故事。在这座城市，他住在哪里？逼仄的出租房，废旧的仓库，临时的工棚，哪里才是他的住处？哪里才是他的家？他每天给那么多的人送去一张床，然后安装平稳，那他的床可有地方安放？

在老陈白天为我铺装好床后，当天晚上我就住在了那间乡村的房子里。那是我第一次住在那里。那房子租了好几个月了，之前我在那里种瓜种菜，在那里看书，在那里喝茶，在那里打发时间，一到晚上，我又驱车回到城里的家。老陈为我铺装好床后，我终于可以体验乡村的夜晚了。乡村的夜晚和城里的夜晚是完全不一样的。大家都说乡村的夜晚是寂静的，这不是十分准确。也许城里人不知道，乡村的夜晚也是热闹的，不过它的热闹跟城市的热闹是两种截然不同的热闹，城市的热闹是人的热闹，是车的热闹，是机器的热闹，而乡村的热闹，是大自然的热闹，是虫鸣蛙叫的热闹，它不是绝对的寂静。如果你把虫鸣蛙叫当作一首首协奏曲，那它确实是安静的。

编辑：实习生冯慧琴复审：黄慧华终审：蒙树起