Youq Henz Hawsingz - 广西民族报网

Youq Henz Hawsingz

来源：广西民族报网

作者：□ Hoz Hwngzcingh raiz Cau Dwzfeih hoiz

发布时间：2026-07-08

doz dwg AI guh

Gou caeuq Laujcinz dan raen gvaq baez ndeu, hoeng gou geiq ndaej de lo.

Haujhauj lailai vunz, youq ndaw gyoengqvunz raennaj gvaq, couh mbouj caiq doxrox lo. Mwngz mbouj caiq geiq ndaej gou, gou mbouj caiq geiq ndaej mwngz, hoeng Laujcinz mbouj doxdoengz.

“Danghnaeuz lauxbanj caeuq mwngz naeuz caeux couh haidin lo, yienghneix dwg de yaeuh mwngz.” Dienhvah baihhaenx, boux vunzsai ndeu sing sang caeuq gou naeuz. Boux vunzsai neix couhdwg Laujcinz, youq aen singz gyasei ndeu baengh soengq gyasei gvaq ngoenz. Lauxbanj singz gyasei caeuq gou dingh ndei seiz soengq huq haeuj ranz, hoeng de aiq dwg nyaengq lai lumz lo, cijndei seizbienh naeuz boux soengq huq caeux couh okdou lo, vut rap hawj Laujcinz. Hoeng seizneix Laujcinz cingq cang ci. De mboujdan mbouj lawh lauxbanj dawzrap, fanjdauq gamj cigsoh naeuz “lauxbanj dwg yaeuh mwngz”, boux baenzneix seizneix ca mbouj lai mbouj miz lo, gou youq ndawsim gag naemj de caeuxlaeng deng gwnvi.

Gou itcig laihnaeuz Laujcinz dwg daeg mbauq byoemhenj ngamq haeuj singz dajgoeng ndeu, aenvih ndaw dienhvah de giepnoix gingniemh, hoeng aen cisamloek gaijcang ndeu “dududu” hai haeuj gyanghongh gou youq lajmbanj co haenx, gou yawjraen dwg boux vunzsai cungnienz byoem hausag ndeu. Laujcinz yawj hwnjdaeuj nienzgeij mbouj iq lo, gij nyaeuq nienzgeij youq gwnz ndang de lumjnaeuz lai gvaq bouxwnq, fajnaj cocwdcwd, gwnz ndang daenj geu buhgvangjgau hozluenz doiq saek ndeu, ginggvaq haujlai bi raemxhanh myaexnduk caeuq muzhed le, gaenq yawj mbouj ok yienzlaiz dwg yaenq cih saw maz lo, fanjdauq muz byoengq ok aencongh, aen dem aen, ciuyinx gou yawj.

Soengq gyasei dwg hongrengz, hoeng Laujcinz yawj hwnjdaeuj mbouj lumj boux guh hongrengz nei maengh, de byombyangq, lumj mbaw naengfaex geq, dan mwh gaem gyasei hwnjdaeuj, song fwngz lumj ragfaex geq nei cij rox aen cizyez de. Byom dwg byom, hoeng dauqdaej dwg gwn vanj haeux neix, aen ndang Laujcinz byombyangq neix yo miz cungj rengz ndeu.

Gou roxsoq dwk cam Laujcinz coenz ndeu, aeu bang mbouj? Laujcinz guhmuengz vad fwngz naeuz mbouj yungh mbouj yungh. Mbouj rox dwg de gaenq gvenq boux dog guh gij hong neix roxnaeuz mbouj naemj mazfanz gou. Dan raen de riengjret cek benjmbonq、gyaqmbonq、demhmbonq roengz aen cisamloek gaijcang haenx, yienzhaeuh baenz gaiq baenz gaiq gwed buen haeuj ranz. Faj demhmbonq na ngeihcib lizmij, raez song bak lizmij haenx at youq gwnz ndang Laujcinz, aen ndang de bonjlaiz couh byombyangq haenx yawj hwnjdaeuj engqgya iq. Yawj ndaej okdaeuj de mbouj soeng geijlai, diemheiq naekfofo geij mbat yietnaiq yaep ndeu le, Laujcinz menhmenh daj ndaw rungj mbon ok gaiq doxgaiq ndeu. Aeu gaiq doxgaiq haenx okdaeuj yaepseiz, Laujcinz lumj bienq bouxvunz nei. Gaxgonq naiqnueknuek, yaepyet bienq cingsaenz gvaekgvaek. Dan raen de yamqdin youq ndaw rug heux gien ndeu, doq heux, doq yawj gaiq doxgaiq ndaw fwngz. Mbat heux neix, heux dwk gou ngawhngwdngwd. Yienghhaenx, gaenbonj mbouj lumj boux haici cisamloek ndeu、boux vunzhong buendaeh ndeu. Yienghhaenx, lumjnaeuz boux cienggun cunzyawj ciengz dwkciengq bonjfaenh ndeu. Cijmiz mwh boux vunz ndeu ndawsim miz daejheiq raixcaix, cij miz gij heiqciengz hung- ak haenx okdaeuj. Gaiq doxgaiq ndaw fwngz Laujcinz gizsaed dwg aen ceijnamzcim gaeuq ndeu, Laujcinz baengh de raen fuengyiengq, namz roxnaeuz baek. Youq ndaw rug heux song gien le, Laujcinz hai bak gangj lo：“Neix dwg baek, mbonq baenzneix nda.” De fwngz vix aen fuengyiengq ndaw rug ndeu, saeknaj gagsaenq raixcaix.

Gij yiengh Laujcinz hawj gou dinghcaem lo, caemhcaiq hix hawj gou geizheih. Mwh Laujcinz nda mbonq, gou naemj rox de, caeuq de gangjgoj hwnjdaeuj. Dou gangj daengz ranzlaux bonjfaenh, gangj daengz vihmaz liz ranzlaux daengz aen hawsingz neix. Gou naeuz gou daihhag bizyez le couh louz youq aen hawsingz neix, co aen ranz bouxguhnaz neix dwg vihliux seizhoengq ndaem byaek、gwn caz caeuq raiz faenzcieng. Caen hozhaenz mwngz, baenzneix ndaejhoengq, gou dwg vihliux lwgnyez doegsaw cij haeuj singz. Laujcinz naeuz dwg mbouj doegsaw gvaq mbouj rox saw, ciuhvunz couh baenzneix lo, hoeng lwg de mbouj ndaej caiq byaij loh gaeuq de. Laujcinz lwnh gou de haeuj singz haujlai bi lo, baengh guh honglingz gvaq ngoenz, hong lawz cungj guh gvaq, lumjbaenz youq dieg hwnq ranz guh hong buen caizliuh hwnq ranz, bang bouqhaeux yoek doeng guenjbaizraemx, sou huq gaeuq huq feiq geuh gij ganghginh lingzsanq youq ndaw cien rin soiq haenx doengh gij neix. Mwh mbouj miz hong guh, Laujcinz couh youq laj giuzlaebgyau caj hong, boux laemzseiz ra hong sam boux haj boux guh bang maeuq youq gwnz dieg, mbat miz vunz daeuj goq couh humx hwnjbae, hawj bouxgoq lumj senj lauxbaeg byaekheu nei senjleh. Laj giuzlaebgyau ra hong dwg, guh ngoenz hong aeu ngaenzhong ngoenz, guh buenq ngoenz hong aeu ngaenzhong buenq ngoenz. Laujcinz naeuz mwh caijsoq mbouj ndei, hix miz lienzdaemh geij ngoenz mbouj miz vunz goq, hix miz gvaq gwn donq gwnz you donq laj.（1）

我与老陈只有过一面之缘，但是我记住他了。

许许多多的人，在人海中打了照面，就消失在彼此的世界里。你不再记得我，我也不再记得你，而老陈不一样。

“如果老板跟你说早就出发了，那他就是骗你的。”电话那头，一个男人大着嗓门对我说。这个男人就是老陈，在一家家具城以送家具谋生。家具城的老板跟我约定好送货上门的时间，但是他也许太忙忘了，只能搪塞说送货的师傅早就出门了，把锅甩给了老陈。而此时老陈正在装车。他不但不会替老板背锅，反而敢直接说出“老板在骗你”，这样的人现在几乎绝迹了。我在心里嘀咕他迟早会吃亏的。

我一度误以为老陈是一个刚刚进城打工的毛头小伙子，因为电话中他的不谙世故，但随着一辆改装的三轮车“突突突”地开进我在乡下租的小院，我看到的是一个一头花白的头发在风中凌乱飞舞的中年男人。老陈看起来岁数不小了，岁月之手在他身上刻下的痕迹似乎比常人更为明显，粗糙的脸上写满了风霜，身上穿了一件褪了色的圆领广告衫，在经过多年汗水的侵蚀和磨损后，已经看不出原来印的是什么字了，反倒是磨破了的洞眼，一个挨着一个，吸引了我的目光。

送家具是个体力活，但老陈看起来不像一般干体力活的人那么壮实，他干瘦干瘦的，像一张老树皮，只有在抓起家具时，那像老树根一样的双手才暴露了他的职业身份。瘦是瘦，但毕竟是吃这碗饭的，老陈单薄的身子里蕴藏着一股力道。

我礼貌性地问了老陈一句，要搭把手吗？老陈连忙挥手说不用不用。不知是他已经习惯了一个人干这些活还是不想麻烦我。只见他麻利地把床板、床架、床垫从他那辆改装的三轮车上卸下来，然后一一扛上肩膀搬进屋子。那张厚度有二十厘米，长度有两百厘米的大床垫压在老陈身上，使得本来就瘦小的他看起来显得更加瘦小。看得出来他并不轻松，在大口大口地喘了几口气休息片刻后，老陈缓缓地从怀里掏出一件器物。就在那器物掏出后的一瞬间，老陈好像换了一个人似的。一扫之前的黯淡无神，一下变得神采奕奕。只见他先是有模有样地迈开步伐在房间转了一圈，一边转，一边看着手中的器物。这一转，转得我一愣一愣的。那架势，根本不像是一个三轮车司机、一个搬运工。那架势，犹如一个将军在巡视自己的战场。只有一个人心里有着十足的底气时才会由内而外散发出那种强大的气场。老陈手中的器物其实是一个老式的指南针，老陈依靠它找到一个方向，南或者北。在房间转了两圈之后，老陈开口说话了：“这是北，床这样摆。”他用手指着房间的一个方向，神情自信而笃定。

老陈的气势在一定程度上镇住了我，同时也激发了我的好奇心。在老陈安床时，我带着目的跟他聊了起来。我们聊起了各自的老家，聊起了为什么离开老家来到这座城市。我说我大学毕业后就留在了这座城市，租这座农家小院是为了闲时种菜、喝茶和写作。真羡慕你，那么得闲，我是为了孩子读书才进城的。老陈说他没读过书没有文凭，这一辈子就这样了，但是他的孩子不能再走他的老路。老陈告诉我他进城很多年了，靠打零工为生，什么样的活都干过，诸如在建筑工地打短工搬运建筑材料，帮饭馆餐厅清理堵塞的下水道，收废旧撬那些藏在碎砖石里的零碎钢筋，等等。没有活干的时候，老陈就在立交桥下等活。临时揽活的人三三两两蹲在地上，一有雇主过来就围上去，让雇主像挑选萝卜青菜一样挑选。立交桥下揽活的规则是，干一天的活拿一天的工钱，干半天的活拿半天的工钱。老陈说运气不好时，也有连续好几天没人雇，也有过吃了上顿愁下顿的。

编辑：实习生冯慧琴复审：黄慧华终审：蒙树起