Gaugyaeq Ndaem - 广西民族报网

Gaugyaeq Ndaem

来源：广西民族报网

作者：□Dauz Liginz raiz Lingz Siuyangh hoiz

发布时间：2025-02-20

Diuz gai haenx gig laeg, gig gaeb, najroen dwg aeu rinndaek bu baenz, deng yamqdin vunz baedauq muz ndaej ngaeuznyub、ndongqrik, diuzgai song mbiengj cungj dwg aen bouqdiemq iqet lumj fajfwngz nei, naj doiq naj caenx youq gizhaenx, gai saejdaeuzsoemj、gaiqyungh hagseng lwgmbwk、huqsoujgoeng、buhvaq minzcuz、 huqhoijnengq、huqcangngaenz、 huqsuijcingh、huqsiuqveh daengjdaengj. Byaigai baihgvaz geq doxdauq aen bouq daihngeih dwg gai gaugyaeq、cazcij, coh de heuhguh “Bwnhyez”, ndawde miz cungj gaugyaeq feihcaujmeiz heuhguh gaugyaeq ndaem he, neix dwg gaiqgwn hawj gou venj sim daengz ndok haenx. Baeznduj gwn cungj gaugyaeq neix dwg youq siujyoz seiq nienzgaep haggeiz laeng, ngoenz singgeiz roek banringzgvaq ndeu, daj baezde hwnj, itcig daengz gauhcungh bizyez, cijaeu mbouj miz maz loeklak, moix ndwen gou bae gwn song baez, baez diebhaeuj gyaeujgai couh cigsoh buet bae coh “Bwnhyez”, cawx gaiq gaugyaeq feihmakdumh ndeu, gaiq neix hung lumj buenq fajfwngz nei, miz seiq lwgfwngz na, ndaw bouq cij miz song aen congz luenziq, gou naengh henz aen ndeu, siujsim riri youh caj mbouj gib dwk gwn hwnjdaeuj, feihmakdumh yienznaeuz van caemh miz di soemj, neix hawj gou lumj ngaiz dwkmaij nei, maij gwn mbouj rox mbwq.

Gauhcungh bizyez le, gou caiq mbouj bae diuz gai de gvaq lo, lienz ndaw gai aenbouq gai gij goenhsoij hagseng lwgmbwk cuhcungh、gauhcungh cungj maij bae haenx gou hix mbouj bae lo. Ndawsim gou mumjgyumq miz di ienqhaenz, mbouj dwg ienq diuz gai neix, gangj vahsaed, miz geij baez, miz eiq fouz eiq lohgvaq gyaeujgai seiz, gou ca di yaek byaij haeujbae lo, hoeng, dauqdaej mbouj haeujbae, cienq ndang couh deuz, seizde gij gwnvi caeuq ienqhaenz saek rim simdaeuz gou. Couh dwg youq seizhaenx hwnj, gou caiq mbouj raennaj daxboh gvaq lo. Gou ndoj de, mbouj raen de, gwnvi、ienqhaenz cungj dwg aenvih de biek gou bae.

Swhfan bizyez caemh gunghcoz ndaej bi lai le, daxboh cienq bae cienq dauq dauqdaej ndaej cienz mbaw saw ndeu daengz fwngz gou (de baez dajdingq ndaejrox soujgih haumaj gou, baeznduj hawj gou dwk denva gvaq le, gou couh ganjgip vuenh haumaj, vihneix gou gaenq vuenh gvaq seiq baez haumaj), de naeuz gig siengj raen gou, iu gou youq“Bwnhyez”bouqgaugyaeq diuz gai haenx raennaj. Mbouj loek, mwhgonq daeuj“Bwnhyez”cungj dwg de buenx gou, mbouj rox de baenzlawz fatyienh diuz gai bienbik、gaeuqgeq ndawsingz neix.

Gou cingq guhyoux, gij raeujrub diemzsub guhyoux haenx hawj gou roxnyinh daengx seiqgyaiq cungj ndei, neix hawj gou soengyungz yienzliengh sojmiz liux. Gou dawz mbaw saw yawj baez moq, de doeg gvaq gauhcungh, raiz saw ngwn. Gou hawj de fat diuz dinjsaenq ndeu, doengzeiq raennaj. Haumaj de itcig mbouj vuenh gvaq, aiqdwg lau gou ra mbouj raen de ba.

Mwh yaek ok dou seiz, gou ngeix haemq nanz, dauqdaej dawz yienghsiengq lawz okyienh youq dangqnaj de, cij ndaej hawj de aenvih biek gou bae cix najnyaenq simluenh. Youq naj gingq, gou sawq yaq geij geu buh, ciemhciemh, gou yawjraen gij cingzgingj ngoenzde daxboh biekbae haenx. Seizhaenx gou gauhgauj ngamq sat, faensoq caengz rox, daxboh daxmeh couh gietsat aen vwnhyinh cibgouj bi songde. Daxboh dwg gwizhwnjcoemq, daj ndawrungh lajmbanj daeuj daengz hawgaeuq ndawyienh hwnjcoemq. Gizsaed hawgaeuq gig rwix, ranzyouq beij mbanj daxboh lij rwix, funghranz gaebgeb caemh laeg, byaij haeujbae, laepngaungau, gyoetladlad, aeu hai daeng cij yawjraen doxgaiq ndaw ranz. Hoeng, gyangngoenz hai daeng doiq vunz hawgaeuq daeuj gangj ndwi gvaq, ronghdaeng cijnaengz mbwnlaep cijmiz, mwngz naeuz de ged hix ndaej, naeuz de hanq hix baenz, fanjcingq couh yienghneix. Ranz dwg ranzvax, song caengz fiengj roxnaeuz sam caengz fiengj, ranzfiengj caengzdingj hoemq vax. Moix bi seizfwn yaek daengz, ranzranz cungj aeu coih vax dingjranz baez ndeu, mienxndaej fwn soemz laeuh raemx. Ranz haemq baenzmiz haenx, youq rog ciengz daz caengz hoigau he, ranzhoj haenx couh lohlanglang. Aen laeuziq gaebgeb caeuq ranznden ciengz doxnem haenx, baeznaengz caenx youq sam seiq daih vunz.

Hawgaeuq aiq dwg dieg ndei ba, bouxgeq daegbied naihsouh, ca mbouj geijlai ranzranz miz bouxgeq goujcib daengz bak bi, bouxlaux caet betcib bi lij ndaej bae haw baij dan guh gaicawx haenx lairaeuh, mwh seizdoeng banringz ndit raeujrub seiz, gyoengq bouxgeq goujcib、bak bi daenj buhvaq mienz nanok saekfonx haenx, couh daj conghdou laepngau okdaeuj, comzyouq giz diegbingz haemq gvangq haenx dak ndit. Raq heiq gau dingj in fungcaemx coeg ndaeng he daj gwnz ndang gyoengqde biu okdaeuj. Gyoengqde mbouj gangjvah, cij dwg dinghdingh naengh dwk dak ndit, daj gizgyae yawj bae, lumj bang roegga fonxndaem nei. Ranz gou hix miz goengcoj ndeu, gou bet bi seiz, de gaenq goujcib seiq bi. Gyoengq bouxcoz lwglan cungj mbouj nyienh depgaenh bang “huqlaux” neix, cijmiz gyoengqlaenj mbouj roxyiuj haenx nyienh depgaenh gyoengqde, neix mbouj dwg naeuz gyoengqlaenj gyaez cojgeq, cix dwg maeh gij cienzlingz nyaeuqnyat yo youq ndaw buhgoeb gyoengqde ndwi, cam aeu sam gak haj gak, cawx di saejdaeuz gaij bakgvij. Moiz baez seizneix, “huqlaux” couh menhmenh doengh lo, ngiengx gyaeuj dawz ronghda maezmuenh cim mwngz, caj de dinghcinj dwg laenj swhgeij le caiq mo daeh buhgoeb, fwngz saenzdedded mo baenz ngoenz cij mo ndaej ok geij nbaw ngaenzsa unqnem roxnaeuz geij naed ngaenzdaej, baenz mbaw roxnaeuz baenz naed geq hawj mwngz, ndenq hawj mwngz, cim mwngz, baez ndenq baez doekdingh.

（1）

那条巷子很深，也窄，大石头块铺的路面被行人的脚步磨得光滑发亮，面对面站满巴掌大的小店铺，卖酸嘢小吃、女生饰品、手工艺品、民族服饰、小挂件、小件银器和水晶饰品、刺绣等等。在小巷最里处右侧倒数第二家是卖糕点奶茶的小铺，店名叫“奔月”，里面有一种草莓口味的黑森林蛋糕，是我一直刻骨铭心的。在小学四年级下学期的一个周六下午第一次吃以后，一直到高中毕业，假如没别的意外，我每个月都会光顾两次，进入小巷就直奔“奔月”，点一块半个巴掌大、四根手指那样厚的草莓味黑森林蛋糕，坐在店里仅有的两张小圆桌中的一张，小心翼翼却又迫不及待地吃起来。那缕甜美中带点酸的草莓味，简直让我像中蛊般欲罢不能。

高中毕业后，我就再也没去过了，就连这条巷子里那家几乎所有初中高中女孩都喜欢光顾的小熊女生饰品店也不再光顾。我有种隐隐的怨恨，并非怨恨这条巷子。说实话，我有好多次无意或有意经过这条巷子口时，差一点点就要拐进去了，但最后总是决然转身离开，带着满腹的委屈和怨恨。也就是从那时候起，我再也没见过我爸。是我躲着不见他的，我的委屈和怨恨缘于他的离开。

师范毕业工作一年半后，我爸几经辗转给我递了张纸条（他一打听到我的电话号码，给我打第一个电话后我就会立刻换掉号码，我为此先后换了四次电话号码），说他非常想见我，并约我在这条小巷里的“奔月”糕点铺见面。没错，以前光顾“奔月”总是他陪我来，不知道他是如何发现这座城市里如此偏僻而老旧的小巷的。

我正在谈恋爱，恋爱的甜蜜让我觉得这世间万般美好，并产生了原谅一切的宽容。我把纸条看了一遍又一遍，他读过高中，钢笔字写得极好。我给他发了条短信，答应了。他一直没换号码，大概怕我找不到他吧。

出发之前我思忖良久，到底应该以什么面貌出现在他面前，才能让决绝离开的他产生愧疚。在镜前摆划好几件衣服，对着镜子，渐渐地，我却看见我爸离开那天的情景。那时我高考刚结束，分数还未知，我爸和我妈便结束了他们十九年的婚姻。我爸是上门女婿，从县城郊区的农村入赘到县城老区里。老区其实很破烂，房子比我爸村庄里的更破旧，门脸也窄，狭长，走进去深幽幽的，又阴又凉，通常需要点灯才能看清屋里的摆设。但白天点灯，对于老城区的人们来说是不存在的，灯火只有在天光散尽时才能亮起来，你认为抠门儿也罢，勤俭节约也成，反正事实如此。房子通常是二层半或三层半的砖瓦房，最上层那半间盖瓦片。每年临近雨水季节，家家户户都得翻修屋顶上的瓦片，以免在雨水连绵的雨季中漏水。条件稍好的人家在外墙抹上一层石灰，条件一般的就裸露着。就是这样和邻居墙壁贴墙壁的狭长的小楼房，通常挤着三四代人。

这片老区不知是不是坐落在好风水之上，老人特别长寿，几乎家家户户都有九十甚至百岁老人，七八十岁还上街摆地摊的比比皆是。一到冬天阳光温暖的午后时分，这些百岁老古董就穿着厚实的黑色棉衣棉裤，从黑洞洞的门里出来，聚集到一处宽敞地晒太阳，身上散发着强烈的风湿止痛膏气味。他们也不说话，只安静地晒太阳，远远望去，极像一群黑乎乎的老乌鸦。我也有一个祖祖，我八岁时祖祖就九十四岁了。成年的儿孙是不愿意靠近这帮老货物的，只有还不懂事的曾孙子们靠近，也并非很爱这些老家伙，而是打他们厚棉袄里藏的那几张破烂不堪的票子的主意，讨个三毛五毛，买些零嘴吃。他们往往会缓慢地动起来，抬起头拿迷茫的目光瞅你，等他确认是自家曾孙了，便摸索进黑棉袄里，哆哆嗦嗦摸出几张软塌塌的票子或陈旧的钢镚儿，一张张一枚枚数给你，递给你，每递一次就瞅你一次，不断确认。

编辑：黄誉琦