Ranz Dou - 广西民族报网

Ranz Dou

来源：广西民族报

作者：　□ Vangz Hungzvei raiz Cwz Fanghdingz hoiz

发布时间：2024-08-28

　　Dangguh dungjswcangj gunghswh, de siengj vwndiz ciengzseiz cienzmienh daengzdoh gvaq gou, “byoem raez rox noix” youq gwnz ndang de cungj mbouj miz. Ndaej yungh gij vah Mung Huzswj haenh cunhcujyin Dayingh ndaw《Raemxbauj》 bouh cozbinj Gyauzyez aeundaej Mauzdun Vwnzyoz- ciengj neix daeuj bingzgyaq de: “Coemj ndaej, sou ndaej, wngqfouq ndaej baihgwnz, guenjleix ndaej baihlaj, saeh hung mingzbeg, saeh iq cingcuj……”

　　Yah gou naeuz ciuhvunz miz geijlai baez ndaej buek, cingznyienh guh gyaeuj gaeq hix mbouj guh rieng fungh. Bi 2007 de swz hong dauqma couzbwh hwnqguh Gvangjsih Duh’anh Hungzvei Vangzciuj Youjhan Cwzyin Gunghswh caemhcaiq guh boux daibyauj fazyinz. Daj sezgi baucang gij bingz cang laeuj daengz gij caizliuh yungh daeuj hwnq cangj caeuq gamyawj gunghcwngz, gizgiz cungj yawj ndaej raen aen ndang ndokndekndek de. Vihliux sezgi baucang gij bingz cang laeuj, hix vihliux mbaet cienz, yah gou caengz ok dou gyae gvaq youz dahlwg doeg cuhcungh it nienzgaep buenx bae Liujcouh ra bouxsezgi aeu yiengh bingz, liux le cij cienj bae Gveilinz Yangzsoz ra cangjgyah swnghcanj bingz- meng, cazyawj bingzmeng ndei mbouj ndei, caeuq doiqfueng gangj gyaq、ciem habdoengz……Baez neix okcai dauqma, de mbouj roxnyinh bonjfaenh guh ndaej geijlai ndei, cix gvi goenglauz hawj dahlwg, naeuz:“Caeklaiq miz dahlwg buenx, saeh- cingz cij baenzneix swnhleih.”

　　Dah lwg gou bi 1995 seng, daeglwg bi 2012 seng, song boux doxca cibcaet bi. Mwh seng daeglwg, yah gou nienzgeij hung lo. Aiq miz vunz naeuz, dangnienz mwh caephengz gij cwngcwz sengciengx giva, gij cizgungh roengzgangj guekmiz giyez sou seng song lwg hix hab diuzgienh. Gij vah neix mbouj loek, hoeng seizhaenx dahlwg dou mbouj hawj seng. Dahlwg naeuz: “Danghnaeuz sou lij seng, gou couh liz ranz bae liuzlangh!” Gij vah dahlwg hawj dou lau lo, seng lwg daihngeih hix mbouj gamj siengj lo.

　　Itcig daengz bi 2011 gvaq cieng, gou caeuq yah gou daiq dahlwg bae Hah’wjbinh Yabuliz lijyouz, gij doxgaiq daiq bae haenx haujlai yah gou cungj hawj dahlwg aemq. Dahlwg ienq naeuz: “Vihmaz hawj gou aemq baenzlai?” Yah gou riu naeuz: “Danghnaeuz miz dah nuengx roxnaeuz daeg nuengx ndeu, couh miz vunz bang mwngz aemq lo.” Dahlwg hujdengdeng naeuz: “Sou ak sou couh seng!” Yah gou doiq dahlwg naeuz: “Gou mizndang lo.” Dahlwg dingq le couh vuenheij dwk ciepsouh lo. Daeglwg seng okdaeuj, dahlwg dwg daengx ranz boux ceiq cungh de.

　　Ngoenz ndeu gwn ngaiz, dahlwg nip gaiq nohhungzsauh ndeu, gaet gwn naeng caeuq nohcing le couh vut roengz mbouj gwn lo. Gou yawj mbouj gvenq cungj guhfap saisaengq neix, couh minghlingh de gwn liux bae. Dahlwg baenzlawz cungj mbouj gwn, mboen naeuz: “Gaiq noh neix biz lai!” Gou yiemzsuk naeuz de: “Gawqyienz biz lai, mwngz couh gaej nip aeu!” Dahlwg siengsim naeuz: “Gou youh mbouj rox gaiq noh gou nip neix miz geijlai biz geijlai cing, caemhcaiq mwngz youh mbouj hawj gou genj bae genj dauq!” Raen gou caeuq dahlwg doxeuq, yah gou mboujdan mbouj haeujhoz gou, lij naeuz: “Mwngz couh dangq daengx gaiq noh de cungj gwn liux lo, neix mbouj couh ndaej la?” Ndigah gou mbouj gangj lo.

　　Ngoenz daihngeih banhaet, dingjlingz dingz raemx dingz dienh. Gou hwnq le couh yungh gij gvangcenzsuij doengj cang ndaw ding riengxbak, yah gou raen le, hemqvauvau: “Ndaw gangraemx bwh yungh ranzdajcawj mbouj dwg miz raemx ha, mwngz vihmaz baenzneix saisaengq?” Gou riu naeuz: “Mwngz couh dangq sam cenj raemx neix gou cungj gag ndoet roengz dungx bae liux mbouj couh ndaej luma?” Yah gou rox gou lij vih gij saeh noh- hungzsauh hozgaek, couh mbouj gangj lo.

　　Youq gwndaenj fuengmienh, yah gou mbouj yawjnaek geijlai, aen haeuxyangz gangq ndeu gya cenj gahfeih ndeu couh gaijgez ndaej donq ndeu lo. Yienznaeuz mbouj yawjnaek bonjfaenh daenj gijmaz buhvaq, hoeng de bibi cungj hwnj muengx cawx buhvaq hawj bohmeh gou, hawj song boux laux sawq daenj le, danghnaeuz mbouj hab couh doiq bae cawx moq, baebae dauqdauq mbouj raen mbwq lij angqvauvau dem. Gij saeh hawj gou gamjdoengh dwg haujlai bi daeuj de cungj genhciz yungh aen gihgi muh giengh muh giengh namzgva caeuq giengh lwgraz guh ngaizhaet hawj bohmeh gou, hawj song boux laux heuj vauq gwn ndei ndoet ndei、sim sangj dangqmaz, baenzngoenz riunyumnyum, bungz vunz couh haenh yah gou vunz geijlai ndei……

　　Gou bae gvaq haujlai aen guekgya, yah gou caeuq dahlwg、daeglwg dan riengz gou bae gvaq baez Yindunizsihya Bahlizdauj ndeu. Yah gou gangj riu naeuz: “Vaiz bae Baekging dauqma lij dwg vaiz!” Gou naeuz: “Vunz mbouj okdou ndang mbouj bengz, feiz mbouj coemh bya reih mbouj biz.” Byaij ok douguek, mboujdan yawjraen lai, lij hag ndaej haujlai doxgaiq dem. Aen dauhleix neix yah gou mbouj dwg mbouj rox, de dan dwg you geij boux vunz doxcaez bae youz sai haujlai ngaenz cij daegdaengq baenzneix gangj.

　　Yah gou mbangjseiz hix mbouj gangj dauhleix. Miz bi ndeu ndwencieng, daengx ranz gou hai ci bae Yinznanz Yanghgwzlijlah youz. Dahlwg hai ci, gou youq henz mbouj dingz mbouj duenh daezsingj de aeu baenzneix baenzneix. Yah gou doiq de naeuz: “Gaej dingq boh mwngz, song raeuz gyayau gaujsi cungj dwg baez dog couh gvaq lo, boh mwngz lij aeu boujgauj ne.”

　　（3）

　　作为公司董事长，她考虑问题往往比我全面周到，“头发长见识短”在她身上压根就不存在。也可用乔叶获茅盾文学奖作品《宝水》中孟胡子表扬村主任大英那样来评价她：“扑得开，收得住，能应上，能管下，大事明，小事清……”

　　爱人说人生能有几回搏，宁做鸡头不做凤尾。她于2007年辞职回来筹建广西都安宏慧黄酒有限责任公司并担任法人代表。从酒瓶的包装设计到厂房的用料及工程监工，无一不留下她那瘦小的身影。为了酒瓶的包装设计，同时也为了省钱，从没出过远门的爱人由读初一的女儿陪着先去柳州找设计师拿瓶样，之后再辗转到桂林阳朔找到生产陶瓷瓶的厂家，了解陶瓷瓶质量状况，跟对方谈价格、签合同……这趟差回来，她不觉得自己做得有多好，却归功于女儿说：“幸好有女儿陪着，才这么顺利。”

　　我女儿出生于1995年，儿子出生于2012年，两人间隔了十七年。生儿子时，我爱人算是高龄产妇了。也许有人会说当年执行计划生育政策的时候，你们国有企业的下岗职工生两胎也是完全符合条件的。此话不错，但当时我女儿不让生。女儿说：“如果你们再生，我马上离家出走！”女儿一句话就把我们夫妇俩给镇住了，也让我们打消了生二胎的念头。

　　直到2011年春节，我与爱人带女儿去哈尔滨亚布力滑雪，我爱人把随行的很多东西给女儿背着。女儿抱怨说：“怎么只给我一个人拿？”爱人笑着说：“如果再生一个妹妹或者弟弟，不就可以帮你分担了吗？”女儿边摔行囊边气冲冲地说：“你们有本事就生！”爱人对女儿说：“我怀孕了。”女儿听到后便很愉快地接受了。生下弟弟后，女儿是家里最宠爱弟弟的人。

　　一日吃饭，女儿夹了块红烧肉，吃完皮和瘦肉后便扔下不吃了。我看不惯这种浪费行为，便命令她把剩下的吃完。女儿坚决不吃，嘟囔道：“这块肉太肥了！”我严厉地训斥她：“既然是肥的，你就别夹呀！”女儿委屈地说：“我又不知道我夹的这块肉肥多瘦少，况且你又不允许我挑三拣四！”见我与女儿争执，爱人不但不支持我，还打圆场说：“你就想象整块肉都是她吃完了，不就行了吗？”于是我不再吭声。

　　次日早晨，恰好停水停电。我起床后便用客厅里的桶装矿泉水漱口，爱人见状，大声嚷嚷：“厨房备用水缸里不是有水吗，你干吗这么浪费？”我笑着说：“你就想象这三杯水我都已喝进肚子里，不就行了吗？”爱人知道我还在为红烧肉的事耿耿于怀，便不再吱声了。

　　在吃穿方面，爱人看得很淡，一棒烤玉米加一杯咖啡就可以解决一餐了。虽然自己的衣着不是很讲究，但她每年都给我父母网购衣服，让两老试穿后，如果不合身便退掉再买，不厌其烦、乐此不疲。最让我感动的是多年来她都坚持用磨浆机给两老打南瓜糊或芝麻糊做早餐，让牙齿不好的两老吃好喝好、心情舒爽，整天高兴得合不拢嘴，逢人便乐呵呵地夸我爱人心地如何如何善良……

　　我走了很多个国家，爱人及女儿、儿子只跟我去了一次印度尼西亚巴厘岛。爱人戏说：“牛去京城回来也是牛！”我说：“人不出门身不贵，火不烧山地不肥。”其实当你走出国门，不但打开了眼界，还学到了很多东西。这个道理爱人并不是不知道，其实她是担心两个人一起出去旅行花费太大而故意调侃。

　　爱人也有不讲理的时候。有一年春节，我们一家开车去云南香格里拉旅游。女儿开车，我在旁边不断提醒她该这样该那样。爱人对她说：“别听你爸，我俩参加驾校考试都是一次通过，你爸还得补考呢。”

编辑：黄誉琦复审：黄慧华终审：蒙树起