Geiq Liebbyaij(11) - 广西民族报网

Geiq Liebbyaij(11)

来源：广西民族报

作者：Lij Yozyez sij Luz Yaujli hoiz

发布时间：2020-09-04

　　Gou naeuz: “Cinz Lieng, mwngz naemj gvaq lwi, danghnaeuz mbouj dwg Cinz sojcangj youq gizneix dang sojcangj, cix dwg bouxwnq youq gizneix dang sojcangj, sou wnggai baenzlawz guh?”

　　Gawq vah neix gou gaxgonq caeuq Cinz Naijgvei gangj gvaq, Cinz Naijgvei naeuz: “Hoj gangj lai lo, ndaw ranzlauz aiq rox lai cib geij ngeihcib boux vunzfamh, Yizgyangh hix aiq lai miz di vunzguhnaz ndei, hagdangz aiq rox lai miz hagseng ndei, cungj gangj mboujcinj.” Seizneix gou youh dawz gij vah doxdoengz haenx daeuj cam Cinz Lieng. Cinz Lieng dap naeuz: “Bouxlawz dang sojcangj cungj doxdoengz, bouxlawz dang sojcangj raeuz cungj ityiengh aeu gwn haeux, mwngz nyinhnaeuz bouxwnq daeuj gizneix dang sojcangj le, gij reihnaz gizneix couh rox maj ok haeuxyangz、duhhenj、moegsawz、byaekheu daeuj ha? Doengh gyoengqvunz neix (Cinz Lieng vixvix doengh boux nyezrauh iet hoz iet gyaeuj haenx) couh gag rox bae doegsaw? Dwg siengj loek luba!” Gwnz naj Cinz Lieng couh lumj mboujsaenq gwnzmbwn rox doek roengz bingjnoh nei.

　　Cuhmuzlangjmaj gizsaed dwg doengh reihnaz gveng fwz ndeu, seizneix gizneix maj rim nywjheu. Yizgyangh haujlai vunz gig nanz cungj mbouj ndaem haeuxgwn lo, gyoengqde roxnaeuz gveng fwz, roxnaeuz bau reihnaz hawj vunz ndaem mak, nienz- daej sou di cienzco ndeu. Aenvih Cuhmuzlangjmaj youq giz sang lai, ndaem mak hix mbouj ndei dwk raemx, couh mbouj miz vunz bau, ndigah couh gveng fwz lo. Doengh boux vunzguhnaz mbouj ndaem haeuxgwn haenx, cijaeu dawz cienz guhdoj liux le, couh buet bae Gvangjdungh guh hongdwgrengz.

　　“Fanjcingq bouxlawz daeuj cungj doxdoengz, mwngz yawjraen Yizgyangh miz vunz dai iek ha?” Cinz Lieng naeuz: “Fanjcingq youh mbouj miz vunz dai iek, mwngz guenj baenzlai guh gijmaz?”

　　Gou naeuz: “Aenvih gou dwg gingjcaz, doengj- gij saeh yienghneix gou itdingh aeu guenj. Cinz Lieng, cijaeu mwngz mbouj daiq vunz baihrog haeujdaeuj, seizbienh mwngz baenzlawz guhdoj cungj ndaej, danghnaeuz mwngz daiq vunz baihrog haeujdaeuj, mwngz gaej gvaiq gou mbouj guhhek bw.”

　　“Gou mboujsaenq mwngz guenj ndaej gvaq- daeuj, sou cij miz song boux vunz, lij aeu gwn haeux、ninz dalaep. Nyienh guhdoj couh fugsaw, daj ciuhgeq doxdaeuj couh dwg yienghneix, mwngz dawz doengh boux vunzrog daeuj gizneix guhdoj haenx dangguh vunz Yizgyangh suenq lo, gyoengqde cungj dwg nohsaek henj lwgda ndaem bwn’gyaeuj ndaem, cungj caeuq raeuz gangj vahdoj doxlumj, seizneix, daihmonz guekgya cungj hai gvangq lo, doumonz aen cwngfuj mwngz baenzlawz cungj aeu hai dihe ba, ngoenznaengz cuengq ngeihcib boux vunz haeuj- daeuj mbouj ndaej dai vunz law, yienghneix guh le, mwngz couh mbouj ndaej baenz naetnaiq lo, raeuz hix mbouj yungh ndoj bae ndoj dauq lo, song mbiengj ndaejhingz ho.” Cinz Lieng gienq gou naeuz, hawj gou guh ok doenghgij gietdingh ciuq de daeuj yawj dwg cingqdeng、 doiq de mizleih haenx daeuj. Gou caen siengj fak de faj fwngz ndeu, doengzseiz roxnyinh caiq caeuq de gangj gijmaz vah cungj dwg mbouj miz yungh lo.

　　“Cinz Lieng, daxboh mwngz saw lo, vaiqdi gvaqbae.” Doengh boux nyezrauh haenx heuh Cinz Lieng.

　　Cinz Lieng ndwn hwnjdaeuj, naeuz gawq “duz fangzlaux neix, youh aeu gou bae baijbingz” ndeu, yawj cungj mbouj yawj gou, couh byaij deuz lo.

　　Yawj gij ngaeuzndang de byaij bae gyae, gou simfanz dangqmaz, ndaek Cinz Lieng neix yawj hwnjdaeuj aiq caeuq dou doxdingj lo. Cinz Naijgvei gangj ndaej mbouj loek, gij saedceij mbouj bingzdingh Yizgyangh yaek daeujdaengz lo. Gou roxyiuj, seiz gaujniemh gou daengz lo.

　　Gou ninz ai youq gwnz nywjheu Cuhmuz- langjmaj, gwnz dingjgyaeuj gou cingqndei miz benq fwj ndeu, seizneix, doenghgij fugfauz miz seieiq ndaw uk gou youh mauh okdaeuj lo. Gou naemj, danghnaeuz lwgda gou maj youq gwnz dujfwj dingjgyaeuj gou, gou seizneix yawj ndaej raen gijmaz ne? Gou naemj, gou aiq dwg yawjraen Yizgyangh cingq reuq bae, aiq yawj ndaej raen gwnz Cuhmuzlangjmaj sangngaungau neix mbouj did saek go haeuxgwn, cij did miz baenz doi baenz doi gyoengqvunz aenvih dwkbej nyaengqfodfod haenx, gyoengqde lumj gijmaz? Gyoengqde lumj dujraet.

　　Aen Goj Daihngeih Cinz Lieng

　　Gvendaengz Cinz Lieng, gou engqgya nyienh gangj gij saeh de ndaej 15 bi seiz.

　　Bineix seizcou, de caeuq Vangz Ci bae Liuj- couh baez ndeu, youq Liujcouh “Mbanjfeihcouh” mizmingz haenx youq le buenq ndwen, youq Liujcouh de ndaej yawj seiqgyaiq gvangq. Seizneix, hozgyaenh de maj okdaeuj lo, soemsetset, conghhoz gizhaenx lumjnaeuz miz gaiq ndokgaeq ndeu baenzbaenz cungj ndwnj mbouj roengzbae nei, henz naengbak de, hix hainduj bwnnyumnyum, sawj fajnaj de bienq ndaej engqgya ndaetyaenz lo.

　　Cinz Lieng dwgcaengz gij mumh bwnnyum- nyum neix, hoeng de youh mbouj ndaej aeu fagdaeq daeuj daeq bae, yienghneix guh le, mumh couh yied maj yied maed. De lumj doenghgij vunzlaux Yizgyangh yienghhaenx, aeu ngaenzdih daeuj doiqfouq gyoengqde, song aen song faen ngaenzdih gaem youq ndaw fwngz, geb dawz mumh le, yungh rengz baez ciemz, in di hix mbouj miz gijmaz gvanhaeh. Mboengq seizgan raezrangrang ndeu, ndaw daeh de cang aen gingq iq ndeu caeuq song aen ngaenzdih, ndaej hoengq de couh ciemz mumh, song aen ngaenzdih doxbungq yiengjdingding seiz, gyoengqvunz couh naeuz lo, sou dingq, Cinz Lieng youh ciemz mumh lo.

　　Seizneix, daxboh Cinz Lieng lij youq diegrog louzlangh, hoeng de gaenq gik bae dajdingq daxboh de lo——Gij siusik gvendaengz de gak bi miz gak cungj gangjfap, miz bi ndeu, gyoengqde naeuz daxboh de dai lo, daengz cietcingmingz le, Cinz Lieng couh daiq gyoengq lwgnyez mbouj hwnjhag haenx, muemx bya rim doengh bae ra aenmoh mbouj miz bei haenx, Cinz Lieng doiq gyoengqde naeuz: “Gij vunz dai haenx wnggai miz moh, daxboh gou hix wnggai miz aen ndeu.”

　　Gyoengqde gig mbouj yungzheih ra raen aen moh mbouj miz bei ndeu, hoeng gwnzde yiengj dawzyubyub, gig mingzyienj ndawde ninz miz vunzcaen bouxwnq, hoeng Cinz Lieng mboujguenj baenzlai, de ciemh deuz gij yienglab najmoh, gveng gvaq henz bae, de doiq gyoengq lwgnyez mbouj hwnjhag haenx naeuz, couh dang ndawde ninz miz daxboh gou, raeuz hawj de saxbaiq diemjyieng, gouz de baujyouh raeuz lai hingz di ngaenz. Gyoengq lwgnyez miz yiengh miz siengq diemjyieng saxbaiq cit bauqrengh, lij youq henz moh daih gwn daih ndoet, fiz ndaej soemxsoemx saxsax liux.

　　15 bi seiz, Cinz Lieng caeuq Vangz Ci daeuj- daengz Liujcouh. Baez haenx daeuj Liujcouh, dwg bouxcihcingh Diuqmeuz gaxgonq youq Yizgyangh capdoih sij saenq heuh songde daeuj. Diuqmeuz youq Yizgyangh capdoih seiz caeuq Vangz Ci doxndei raixcaix, gyangngoenz caez guhhong, gyanghaemh caez bae caeg gaeq ranz bouxwnq, fouq mazcoz daih’it Yizgyangh couhdwg Diuqmeuz daj Liujcouh daiq daeuj, ndigah Diuqmeuz mbouj miz cenglwnh ndaej baenz boux saefouh dwk mazcoz vunz Yizgyangh.

　　Youq Vangz Ci caeuq Diuqmeuz dwk mazcoz seiz, huqguhdoj dwg gij raemx ndaw gangraemx, danghnaeuz byawz saw, byawz couh gwn gangcaz raemxsaw ndeu. Mboengq haenx, ranz Vangz Ci mboujdan sing mazcoz yiengj valala, moix gek yaep ndeu, buenxriengz sing doulaeng hai, sing oknyouh salala couh yiengj hwnjdaeuj. Baihlaeng ranz Vangz Ci dwg benq reihbyaek ndeu, doeklaeng Diuqmeuz dauqma Liujcouh le, lij sij saenq hawj Vangz Ci dauqngeix gij cingzgingj seizhaenx, de youq ndaw saenq sij naeuz: Bihaenx byaekheu Yizgyangh fungsou.

　　（11）

编辑：韦亦玮