Geiq Liebbyaij(10) - 广西民族报网

Geiq Liebbyaij(10)

来源：广西民族报

作者：Lij Yozyez sij Luz Yaujli hoiz

发布时间：2020-09-04

　　Gou cam naeuz: “Vih gijmaz gaxgonq roengz bak maenz daengz song bak, seizneix cij roengz saek maenz song maenz?” Gou ngamq gangj sat, sojmiz vunz sikhaek doiq gou sing hung geqnaeuz, gij singyaem gyoengqde lumj naed dem naed sa nei, yaepyet moek gou liux, dujrwz gou dit lumj duzdoq nei, lau laeuq gij saenqsik youqgaenj lawz bae.

　　Youq ndaw vahgangj bak lai bouxvunz, gou gaemdawz coenz ceiq youqgaenj de: Doxgaiq hwnj- gyaq、seng’eiq hoj guh、lwgnyez hwnjhag、bohmeh baenz bingh、aen ranz loemqlak、reihnaz bienq fwzfwd、fungsij mbouj ndei daengjdaengj. Gou daej riu mbouj ndaej, miz mbangj mehmbwk engqgya doq geq doq raemxda ndiksogsog, couh lumj lwgnyez de deng vunz ciengj deuz nei, Cuhmuzlangjmaj sikhaek fwjndaem nyapnyuk hwnjfoedfoed. Seiz- haenx, gyoengqde gaenq dawz guhdoj dangguh rin’gvangq dijbauj yawj mbouj raen haenx, gijmaz gwn daenj ranz youq、lwgnyez hwnjhag、bohmeh yawj bingh daengj, cungj yaek baengh gij rin- gvangq dijbauj haenx, seizneix aen rin’gvangq dijbauj neix gaenq deng vat liux lo, hawj gyoengqde siliengz raixcaix. Ceiq yaek aeu mingh dwg, daj ndaw vah gyoengqde, gou lij dingq ok gij vah ienq baicuzsoj dem, lumjnaeuz vat liux rin’gvangq dijbauj dwg Cinz Naijgvei caeuq gou guh nei, seizneix gyoengqde humx gou youq cungqgyang, yienghceij couh lumj haihoih daeuq gou nei, aeu gou doiq dangqnaj gij yiengh caemdingh mbouj hoengh neix fucwz. Doenghgij myaiz gyoengqde cungj sinz gou baenz ndang.

　　Gou nyaenx heiq raixcaix, caj gyoengqde bouxboux gangj vah liux bae. Neix dwg mboengq seizgan raezrangrang ndeu, youq mboengq seizgan nei, gou doq dingq doq naemj aen vwndiz ndeu, doengh gyoengqvunz neix, vunzsai mbouj caerauq, vunzbaz mbouj daemjrok, lwgnyez mbouj doegsaw, vunzlaux mbouj an’onj, gyoengqde dauqdaej guh gijmaz la? Gij vwndiz neix hawj gou naemj ndaej ngeizvaeg bae, sojmiz vunz cungj mbouj gangjvah le, ndaw uk gou lij dwg yiengj- vaengvaeng.

　　“Gangj vei, mwngz gangjvah vei.” Miz vunz baenzneix heuh gou, hoenz gou hoiz gvaqdaeuj. Gou yawjraen sojmiz vunz cungj cimyawj gou, gyoengqde cungj caj gou baenzlawz gangj. Gou ndaej gangj gijmaz, seizneix gou cawzbae siengj doiq gyoengqde daih sing hemq “sou vaiq ringx deuz”, gou lij ndaej guh gijmaz? Hoeng gou mbouj ndaej yienghneix hemq, danghnaeuz gou baenzneix hemq le, gyoengqde haengjdingh engqgya siengsim, caemh- caiq hujheiq raixcaix bae. Gou seizneix itdingh aeu lumj boux yinzda daibyauj yienghhaenx, sijsaeq dingq gij eiqsei lwgminz, mbaq rap sawjmingh、naj daiq riunyumj dwk daeujdaengz doenghnaz gyaeuj reih, lai dingq vahndei, baema sij ndei yi’anq daibyauj, vih hwnqguh lajmbanj moq ok rengz.

　　“Yienghhaenx gyoengqsou naeuz yaek baenz- lawz guh ne?” Gou dauq cam gyoengqde.

　　Vunzlai youh hemqcaca, gou youh diemjdawz raq singyaem ndeu. Raq singyaem neix beij raq gaxgonq lij haenqrem, gou roxnyinh gij ndat raq singyaem neix lo. Boux gangjvah okhanh subsub, boux dingq gangj hix okhanh subsub. Gij haedsim bouhfaenh raq singyaem neix couh dwg: Hawj vunz baihrog hix daeuj Cuhmuzlangjmaj guhdoj, yiengh- haenx, gij saedceij gyoengqde youh hainduj ndaej vunz angq max hemq lo. Gyoengqde hawj gou vehsij gij saedceij gyaeundei ngoenzlaeng Yizgyangh, gwnz naj moix boux vunz cungj venj hoengz liux. Gou cungjgez gij vah gyoengqde le fatyienh, mboujguenj baenzlawz gangj cungj liz mbouj ndaej sam cih saw, sam cih saw neix couh dwg: Mbouj aeunaj.

　　Cinz Lieng naeuz: “Moix ngoenz mwngz couh cuengq ngeihcib boux vunz haeujdaeuj, dangyienz lo, boux cienz noix mbouj ndaej haeujdaeuj.”

　　“Gou baenzlawz rox bouxlawz miz cienz bouxlawz mbouj miz cienz?” Gou naeuz.

　　“Mwngz yawj najsaek gou, gou baez yaep da, mwngz couh gyaep de deuz, mboujsaenq mwngz bae genjcaz gwnz ndang de, haengjdingh mbouj mauhgvaq haj cien maenz ngaenz, haj cien maenz hix siengj daeuj Yizgyangh, guh fangzhwnzloq, mbouj miz fanh maenz ngaenz doxhwnj, raeuz couh mbouj hawj de daeuj Yizgyangh. Moix ngoenz ngeihcib boux, couh dwg ngeih samcib fanh, moix ngoenz miz ngeih samcib fanh youq dangqnaj raeuz mbin bae mbin dauq, couh yawj bouxlawz daraeh fwngzriengj lo.”

　　Meh de, ndaek Cinz Lieng coengzlaiz mbouj doegsaw neix, gingqyienz rox yungh aen cwngzyij “daraeh fwngzriengj” yienghneix.

　　Cinz Lieng naeuz: “Boux daih’it daeuj haenx, haengjdingh dwg Liengz Aensuj, de senq couh yawjngamj gij vanzging raeuz gizneix lo, cij aeu de daeuj, couh mbouj dwg fanh ndeu, cix dwg gij soqmoeg cib fanh doxhwnj, lae youz ho; boux daihngeih daeuj haengjdingh dwg Veiz Bizgyangz, gij ngaenz de yienznaeuz beij Liengz Aensuj noix di he, hoeng de beij Liengz Aensuj mbeiloet, dwg cungj vunz lienz vaqdinj cungj gamj duet roengzdaeuj guhdoj haenx.” Cinz Lieng gangj ndaej daekeiq fwngfwng, “boux daihsam……”

　　Gou caen nyaenx mbouj ndaej lo.

　　“Dingz bak!” Gou hemq naeuz. Hoeng gou sikhaek roxnyinh bonjfaenh miz di saetyiengh lo, seizneix gou mbouj wnggai hawj gyoengqde yawj ok gou siengj gijmaz, doeklaeng gou gag naemj, couh lumj gou daih hemq “dingz bak” song cih neix, gangjmingz gou liz bienqbaenz boux gingjcaz maenh’ak ndeu lij miz duenh roen gyaenangnang dem. Seizneix gou mbouj ndaej hujheiq, mboujguenj gyoengqde gangj gijmaz, gou cij aeu henmaenh diuz ndeu, dingj mbouj hawj bouxdoj vunz diegrog daeujdaengz Yizgyangh guhdoj, mboujguenj dwg Liengz Aensuj roxnaeuz Liengz Yaekseiz, mbouj- guenj dwg Veiz Bizgiengz roxnaeuz Veiz Biznyieg, cij aeu gyoengqde mbouj daengz gwnznamh Yiz- gyangh, Yizgyangh couh mbouj ok gijmaz saeh.

　　Gou itdingh aeu caeuq Cinz Lieng song boux vunz gangj baez dem, hawj de gaej doeng naemj sae naemj. Danghnaeuz de mbeiloet ciuyinx vunz baihrog daeuj Yizgyangh guhdoj, gou sikhaek gaemh de.

　　Gou ndwn hwnjdaeuj, yiengq mbiengj Cuh- muzlangjmaj wnq byaij bae, yienzhaeuh veq gyaeuj dauqma, naeuz: “Cinz Lieng, mwngz riengz gou daeuj, gou miz saeh ra mwngz.”

　　Gou caeuq Cinz Lieng youq mbiengj Cuh- muzlangjmaj wnq gangjvah seiz, doenghboux nyezrauh cibngeih cibsam bi mbouj doegsaw youq giz liz raeuz mbouj gyae haenx iet hoz iet gyaeuj. Gyoengqde couh dwg gij ngaeuz Cinz Lieng.

　　Gij vah gou, couh dwg daj gwnz ndang doengh- boux nyezrauh haenx gangj hwnj. Gou naeuz: “Cinz Lieng, mwngz mbouj wnggai hawj gyoengqde hag mwngz, gyoengqde wnggai bae doegsaw.”

　　Cinz Lieng han naeuz: “Doenghgij saeh wnggai lai lu, mwngz vihmaz mbouj naeuz gou wnggai bae dang cincangj, cincangj banhaet baez singj gvaqdaeuj, couh miz hajcib maenz ngaenz ninz youq ndaw daeh de caj de bae yungh. Caiq gangj lo, gyoengqde baelawz dwg hag gou, guhdoj mbouj yungh hag, cij aeu rox geq ngaenz couh rox doj.”

　　Gou naeuz: “Gyoengqde cijndaej cibngeih cibsam bi, nanzdauh couh yienghneix gvaq baenz seiqvunz la?” Cinz Lieng raen gou baenzneix son’gyauq de, couh miz di mbouj angq, de naeuz: “Mwngz nyinhnaeuz mwngz dwg sojcangj ha, sojcangj cungj mbouj yungh doengh cungj vah neix daeuj son’gyauq gou, cibngeih cibsam bi youh baenzlawz yiengh? Yienghneix gvaq baenz seiqvunz youh baenzlawz yiengh? Gijmaz heuh baenz seiqvunz? Lienz gou cungj mbouj rox gijmaz heuhguh baenz seiqvunz, gyoengqde baelawz rox ne? Cij miz gyoengqvunz lingx gunghswh sou cij rox gijmaz heuhguh baenz seiqvunz, gaej caeuq gou gangj doengh cungj vah laegnaek yienghneix.”

　　（10）

编辑：韦亦玮