Geiq Liebbyaij(9) - 广西民族报网

Geiq Liebbyaij(9)

来源：广西民族报

作者：Lij Yozyez sij Luz Yaujli hoiz

发布时间：2020-08-19

　　Doeklaeng, de mbouj guhhek saek di, daujdak aen ranzgaeuq bonjfaenh, youq dieggonq hwnq ranzmoq, ranzmoq guhbaenz ngoenzhaenx, dandan bauqva couh coemh bae geij loz.

　　Gvaqlaeng miz ngoenz ndeu, Cinz Lieng simgip siengj lizhai Vangz Ci, couh daiq bang lwgnyez deuzhag haenx youq gizgyae yinx aen ranz Vangz Ci, naeuz: “Yawj, aen laeuzhung ranz Vangz Ci, dwg gou bang de hingz ndaej bw. Sou saenq mbouj saenq, ngoenz wnq, gou itdingh hingz de dauqma.”

　　Gyoengqde Lumj Dujraet

　　Gou lwnh gij vah Cinz Lieng hawj Cinz Naijgvei nyi.

　　Cinz Naijgvei caemdingh yaep ndeu le, naeuz: “Yizgyangh aiq yaek oksaeh lo.” Cinz Naijgvei youq dangqnaj gou coengzlaiz mboujcaengz yienghneix caemdingh gvaq, dang gou fatyienh gij daegdiemj de seiz, gou miz di saetmuengh he, boux gingjcaz mbouj ciengzseiz naemj vwndiz ndeu, baenzlawz gaemh vunzvaih? Aiq dwg youq ndaw lwgda Cinz Naijgvei, Yizgyangh coengzlaiz couh mbouj miz vunzvaih, ndigah mbouj miz maz aeu naemj lai. Hoeng seizneix, de youq dangqnaj gou naemj yaep ndeu, gou couh mbouj sibgvenq lo, ndawsim gou gaz yaep ndeu, Yizgyangh hainduj miz vunzvaih lo.

　　Gou roxnyinh vwndiz miz di youqgaenj he, couh cam: “Vihmaz naeuz Yizgyangh aiq yaek oksaeh ne?”

　　Cinz Naijgvei naeuz: “Daj ngoenzneix hwnj, couh aiq miz haujlai vunz daeuj Yizgyangh guhdoj lo, daengz seizhaenx, raeuz gaemh cungj gaemh mbouj liux, daeg Cinz Lieng neix, hainduj hawj gou ra saeh lo.”

　　“Gij vah mwngz de hix mbouj dingq ha?” Gou cam.

　　“De cij dingq gij vah ngaenz, gij vah bouxlawz de cungj mbouj dingq.” De han naeuz.

　　“Ra baez seizgei ndeu gaemh de hwnjdaeuj, hawj de rox gij leihhaih raeuz, de couh gvaigvai dingq vah lo.” Gou naeuz. Gizsaed ndawsim gou itcig maqmuengh gaemh Cinz Lieng, baijbingz de le, Yizgyangh couh an’onj lo, Yizgyangh yawj hwnj- daeuj bingzdingh, gizsaed doenghgij saeh mwngz caeg doxgaiq ndaw ranz gou、gou caeg doxgaiq ndaw ranz mwngz lij dwg ciengzseiz miz, yienzaen genjdanh raixcaix, vunz guhdoj daiq lai, boux deng saw, couh caeg doxgaiq gaij hozndat. Cijdwg doenghgij saeh neix miz daiq lai, cungj bienq ndaej gaenq mbouj dwg “saeh” lo.

　　Cinz Naijgvei naeuz: “Danghnaeuz gaemh vunz ndaej gaijgez vwndiz, gou senq couh gaemh lo, Cinz Lieng gou lij gaemh noix dem ha? Lumj bouxvunz Cinz Lieng yienghneix, couh dwg gyaeng youq ndaw ranzlauz, de hix gaij mbouj ndaej, miz baez ndeu gyaeng de haeuj gihliuzsoj, de couh ciuheuh doengh gyoengqvunz ndaw gihliuzsoj guhdoj, doj gij haeux ndaw gihliuzsoj, baezbaez cungj dwg de hingz, gizsaed de hix gwn mbouj ndaej baenzlai haeux, couh hawj gij haeux saeu youq gizhaenx, miz geij boux vunz cungj deng iek ngunh liux.”

　　Gou naeuz: “Yienghneix yaek baenzlawz guh?”

　　“Yawj gonq caiq gangj.” De heuh gou mboengq saedceij neix lai sinhoj di, seizseiz haeujsim gij rizdin Cinz Lieng. Ndawsim gou naemj, saehcingz aiq mbouj lumj Cinz Naijgvei siengj baenzhaenx youqgaenj ba, mboujgvaq dwg Cinz Lieng ra gou gangj baez ndeu hawj bouxdoj baihrog daeuj Yizgyangh, hawj de hingz gij ngaenz gyoengqde gvaqdaeuj hane, Cinz Naijgvei couh bienq ndaej simnyap subsub, caen miz baenzneix youqgaenj ha? Couhsuenq vwndiz youqgaenj raixcaix, gou mbouj- saenq raeuz doiqfouq mbouj ndaej Cinz Lieng. De suenq gijmaz? Gou gietdingh gag bae ra Cinz Lieng.

　　Gizsaed gou mbouj siengj caeuq Cinz Lieng gangj gijmaz, gou dajsuenq ra raen de le, couh deq youq gizgyae, cijaeu mbouj miz vunz baihrog caeuqfaenh guhdoj, gij hong gou couh suenq guhbaenz lo.

　　Gou youh daeujdaengz Cuhmuzlangjmaj. Giz- haenx ciuqyiengh dwg giz diegangq vunz Yizgyangh, vunzsai vunzbaz bouxlaux lwgnyez humx comz youq giz ndeu, dwk bej “sam goeng”. Yawjraen gou, gyoengqde dingz roengzdaeuj. Gou yawj gvaqbae, mbouj raen miz vunz diegrog, couh cuengqsim haujlai.

　　Cinz Lieng yawjraen gou le, ngauz gyaeuj caeuq riumbwng mboujdingz. Gou byaij daengz henzndang de, cam naeuz: “Cinz Lieng, mwngz riu gijmaz?” Cinz Lieng han naeuz: “Dwk ngoenz ndeu lo, mbouj hingz saek faen ngaenz, hix mbouj saw saek faen ngaenz. Begbeg guh lo.” Gyoengqvunz youq henz ndang de hix cungj riengz naeuz: “Mbouj yinxdaeuz, mbouj yinxdaeuz.”

　　“Mbouj yinxdaeuz lij youq gizneix guhcaemz, baema ranz lo, haih gou ngoenzsinghgiz lij aeu okdaeuj liebbyaij.” Gou naeuz.

　　“Baema ranz guh gijmaz? Mwngz naeuz bae- ma ranz guh gijmaz?” Gyoengqde naeuz, ndawde miz vunz ngamq ndaej cib lai bi、miz ngeihcib lai bi、samcib bi, hix miz seiq hajcib bi, ca mbouj geijlai sojmiz vunz cungj gangj gij vah doxdoengz: “Baema ranz guh gijmaz?” Meh mwngz ya, guhdoj dauqfanj miz leix la? Guhdoj mbouj ndaej hingz cienz dauqfanj miz leix bw? Guhdoj mbouj miz eiqsei, nanzdauh gaj vunz cij miz eiqsei ha? Dingq gij eiqsei gyoengqde, gyoengqde “mbouj yinxdaeuz” lumj caeuq gou miz gvanhaeh nei.

　　Gou miz di hujheiq he, hoeng youh mbouj ndei fat okdaeuj, seizneix youh mbouj miz vunz diegrog, gou fatheiq guh gijmaz. Gyoengqde baenz bang vunz youq dangqnaj gou doeknaiq dangqmaz, lienz guhdoj cungj mbouj ndaej hawj gyoengqde cingsaenz hwnjdaeuj, mwngz naeuz gou lij miz gijmaz banhfap dem? Mboujgvaq gou caen siengj rox, dauqdaej dwg gijmaz yienzaen, hawj gyoengqde couh dwg youq seiz guhdoj cungj mbouj miz cingsaenz ne.

　　“Roengz cienzdoj yied daeuj yied noix, mbouj miz saek boux vunz gamj doj hung,” Cinz Lieng naeuz: “Bi’gvaq lij miz bak song bak roengz cienzdoj, bineix roengz hajcib samcib cungj suenq hung lo, roengz haj maenz cib maenz dwg saeh bingzciengz, ngoenzneix lij miz vunz roengz song maenz ne! Ciuq yienghneix roengzbae, baenzlawz ndaej ha! Gwnz ndoi neix, ngoenzlaeng aiq mbouj miz vunz daeuj lo, danghnaeuz caiq mbouj siengj banhfap, mbouj ndei guh bw.” Cinz Lieng lumj boux vunzguhnaz bungzdaengz raemxrongz mbwnrengx nei, doiq gou heuh haemz heuh hoj.

　　Yawjraen gij yienghceij de lumj souh haemz souh hoj raixcaix nei, ndawsim gou ienq Cinz Naijgvei, sojcangj ya sojcangj, mwngz yawjyawj baenzneix caih de, gijmaz vunz bonjdieg caeuq vunz bonjdieg guhdoj mbouj suenq doj, seizneix, gyoengqde lumj bang vunznanh nei, daeuj gaen raeuz aeu gijgwn lo.

　　Gizsaed gou rox ndawsim Cinz Lieng naemj gijmaz, de siengj hawj gou hai ceh lwgda laep ceh lwgda, ndei hawj gyoengq bouxdoj diegrog daeuj Cuhmuzlangjmaj, de couh ndaej caeuq gyoengqde buek dailix baez ndeu lo. Neix ciengeiz guh mbouj ndaej, couhsuenq Cinz Naijgvei dapwngq, gou hix mbouj dapwngq. Seizneix daengx yienh gungh’anh hidungj couh miz vunz doeng gangj sae gangj, naeuz raeuz Yizgyangh Baicuzsoj sou cienzbaujhoh, doiq hangznieb guhdoj hai ceh lwgda laep ceh lwgda. Ndigah, gou daengz ndaw yienh haihoih seiz, ciengzseiz deng gyoengqde naeuz ndaej gyaeuj cungj ngiengx mbouj ndaej. Baihgonq gangj gvaq, gou dwg bouxvunz maqmuengh miz mingzdaeuj、siengjmuengh ndaej baenzgoeng ndeu, miz cungj cingzgvang neix, gou cijndaej naj mongmet lo. Ndigah, moix baez gou youq dangqnaj Cinz Lieng, ndawsim gou couh miz raq heiqienq ndeu, mizseiz gou lij maqmuengh gyoengqde daeuj nyex huj gou, gou couh miz leixyouz ndei bae sousib gyoengqde.

　　Hoeng gou mbouj ndaej yiengheix guh, gou mbouj ndaej doiq mbouj gvaq Cinz Naijgvei, de caen dwg gyaez lwgminz lumj lwg bonjfaenh nei. Mboujgvaq, cungj yienghsiengq neix ndaej bauj- maenh geijlai nanz ne, gou dawz mbouj cinj, aenvih gyoengqvunz gwnz Cuhmuzlangjmaj yied daeuj yied mbouj habhoz gij cingzgvang seizneix.

　　（9）

编辑：韦亦玮