Geiq Liebbyaij(8) - 广西民族报网

Geiq Liebbyaij(8)

来源：广西民族报

作者：Lij Yozyez sij Luz Yaujli hoiz

发布时间：2020-08-14

　　Youq riengzlaeng duenh seizgan raezrangrang ndeu, cijaeu de simnyap, naengh ndwn mbouj onj seiz, de couh ngeiz bonjfaenh baenz binghmabag, couh sikhaek buet daengz henz Dahyizgyangh yawj raemxdah. De dingqnyi vunz naeuz, vunz baenz binghmabag yawj mbouj ndaej raemx, danghnaeuz raen raemx le, couh lumj duzbangq yawjraen ronghndwen nei, raeuq bae raeuq dauq raeuq mbouj dingz. De naemj, danghnaeuz bonjfaenh miz ngoenz ndeu yawj mbouj ndaej raemx, aeu vaiq guh gienh saeh ndeu gonq, couh dwg youq gwnz gen Du Vaz haenqrengz haeb gaemz ndeu. (Du Vaz caj mbouj daengz Cinz Lieng haeb de gaemz ndeu, de aenvih yiemq cienzdoj mbouj miz banhfap boiz le, couh buet daengz Gvangjdungh dajgoeng, deng ngauq ciensuijniz ndeu dub raek diuz ga ndeu, ma daengz Yizgyangh le, baengh maenz ndeu song maenz guhdoj iq gvaq saedceij, neix dwg vahlaeng.)

　　Seizneix de aeu bae ndaw ranz Vangz Ci, ciuhvunz de ngoenzneix baez daih’it caencingq guhdoj.

　　Seizneix youq gwnz ndang Cinz Lieng, cawz miz bak maenz ngaenz le, lij miz diuz saivaq hoengz ndeu, neix dwg de daj ndaw haw gwnz geizlaisaek Angqhoh Yenzdan laeglemx sik roengzdaeuj. De gaenq ndaej cibngeih bi lo, gij yaemhoz de youq haemh ndeu couh beij bingzseiz lai yiengj boix ndeu, gij hohndok fwngz ga de hix youq haemh ndeu couh maj hung haujlai, couhlienz youq ndaw fangzhwnzloq de, hix hainduj miz gij ngaeuz moengzloengz mehmbwk lo. De gaenbonj mbouj rox gij gangjfap gijmaz bibonjmingh aeu cug saivaq hoengz haenx, cijdwg de raen vunz ndaw haw cawx danci、cawx dohlahgih, couhlienz cawx heiqci seiz, cungj youq gwnz cimoq cug diuz cag hoengz ndeu, yungh daeuj gyaep fangz, de roxnyinh bonjfaenh hix aeu gyaepgyaep duzfangz cijndaej, yienghneix de couh gag ra diuz ndeu ma hawj bonjfaenh. Gij saek diuz saivaq haenx mbouj gaeuq ronghsien, yawj yienghceij, de gaenq deng yungh daeuj angqhoh gvaq haujlai aen bimoq lo, yienh ndaej mong gaeuq raixcaix. Youq sik geizlaisaek seiz, Cinz Lieng miz gvaq di ngeizvaeg he, de mbouj rox diuz saivaq saek mong gaeuq neix ndaej mbouj ndaej baujyouh bonjfaenh, doeklaeng de naemj, miz cungj beij mbouj miz ndei. Ci sing ndeu, youq Yizgyangh, de couh baenz bouxvunz miz saivaq ndeu lo.

　　Vangz Ci gyoengqde dwk mazciengq cingq noix boux ndeu, Cinz Lieng daeujdaengz lij mbouj ndaej hawj gyoengqde sim’angq, gyoengqde mbouj dwg cingq caj de, cix dwg caj Du Vaz hane— Moix baez Du Vaz cungj dwg daeuj ndaej menhyebyeb, aenvih de maezsaenq raixcaix, daeuj guhdoj gaxgonq, cungj aeu youq baihnaj lingzbaiz cojcoeng diemj yieng sax baiq, okdou le, lij aeu heux bae heux dauq ndoj gvaq gwnz gai sojmiz vunzbaz, ndigah yungh bae seizgan haemq lai.

　　Cinz Lieng naengh youq gwnz vih Du Vaz daeb baiz. Yawjraen bouxvunz gwnz vih neix iq bae haujlai, caezgya cungj mbouj sibgvenq, cungj mbouj siengj dwk mazciengq lo. Cinz Lieng gouz caezgya vaiqdi dwk, lij daj ndaw daeh mbon ok bak maenz ngaenz, doenghgij ngaenzdih neix, daj ndaw geh lwgfwngz de laeuh roengzdaeuj, yiengj dwk dingdang dingdang. Fanjcingq youqndwi hix mbouj miz gijmaz saeh, caezgya couh doengzeiq Cinz Lieng camhseiz dingjlawh Du Vaz, diuzgienh dwg: Cijaeu Du Vaz baez daeujdaengz, Cinz Lieng sikhaek couh aeu veq deuz. Aensim Cinz Lieng yiengj dwk budung budung, de youq ndawsim maqmuengh Du Vaz caiq menh di cij daeuj, hawj de ndeindei huz baez ndeu.

　　Ngamq mo ndei baiz, Du Vaz couh daeujdaengz lo, de yawjraen Cinz Lieng naengh youq gwnz vih bonjfaenh, de heuh sing ndeu, eiqsei dwg heuh Cinz Lieng hwnjdaeuj. Cinz Lieng yungh fwngz henhoh gij baiz, doiq Du Vaz naeuz: “Hawj gou dwk buenz neix liux bae, ndei mbouj ndei?” Gij baiz Cinz Lieng ndei dangqmaz, de ca mbouj geijlai couh ndaej coux daeuj ciuhvunz baez daih’it ndaejhingz lo, vih yienghneix, de daengx naj ronghhoengz, daengx ndang ok hanh. Hoeng Du Vaz mboujguenj doenghgij neix, gij fwngz de baez iet, vala, gij baiz Cinz Lieng couh deng doi laemx lo. Yawjraen gij baiz Cinz Lieng le, linghvaih sam boux vunz cungj hemq hwnjdaeuj: “Meh mwngz ho, duz gaeqbouxlwg neix, baiz baenzneix ndei.” Du Vaz naeuz: “Baiz ndei hix mbouj ndaej, hwnjdaeuj!” Doq gangj doq bekbek aen gyaeuj Cinz Lieng, Cinz Lieng cijndaej gvaigvai ndwn hwnjdaeuj.

　　Cinz Lieng gig mbouj cingznyienh, de lumj aen cimoq maxlig cibcuk ngamqngamq hwnj roen nei, mbouj sijndaej dingz roengzdaeuj. Yawj dwk bet cik fwngz cingq swiq baiz haenx, de simgip dangqmaz, ndaw bak gag gangj gag naeuz. Vangz Ci sawqmwh yawjraen naengbak Cinz Lieng doenghyebyeb, de dingz roengzdaeuj mbouj swiq baiz lo. “Cinz Lieng, mwngz cingq gangj gijmaz?” De cam.

　　Seizneix ndaw uk Cinz Lieng cungj dwg gij siengjfap guhdoj, gij siengjfap bienqbaenz bouxdoj maenh’ak yied daeuj yied gaenjgip, de ngoenzneix itdingh aeu guhbaenz gienh saeh neix, de gaenq ndaej cibngeih bi, mbouj ndaej caiq caj dem lo. De heux byaij daengz henz ndang Vangz Ci, bek gwnz mbaq Vangz Ci, naeuz: “Gou bang mwngz dwk, danghnaeuz saw lo, cienz youz gou ok, danghnaeuz hingz lo, cienz gvi mwngz.”

　　Seiq boux vunz mo baiz haenx cungj doeksaetyat, neix dwg haujlai bi doxdaeuj, Cinz Lieng youq dangqnaj gyoengqde gangj coenz vah ceiq raez ndeu. Caemhcaiq singyaem sang raixcaix, couh lumj daj ndaw ganghaeux cienz okdaeuj nei. Aen uk seiq boux vunzhung neix, cungj ngeizvaeg lawq yaep ndeu. Boux lwggyax ciengzseiz youq henz ndang gyoengqde cienq bae cienq dauq neix, sawqmwh bienqbaenz lingh boux vunz lo, neix dwg gyoengqde liuh mbouj daengz ho.

　　“Danghnaeuz saw lo, cienz youz gou ok, danghnaeuz hingz lo, cienz gvi mwngz.” Cinz Lieng youh gangj baez ndeu.

　　Ciep roengzdaeuj sam bi, de dangguh boux lwgsae Vangz Ci, haeujhaeuj okok youq gak giz hunghung iqiq diegciengz guhdoj, bang Vangz Ci dwk baiz. Vangz Ci couh lumj lingh boux daxboh de, Vangz Ci byaij daengz gizlawz, de couh byaij daengz gizlawz. Byaij bae byaij dauq, gij buhvaq de ronghsien lo, saeknaj hix hoengzfetfet hwnjdaeuj, song cik fwngz dwk mazciengq haenx hix maj le haujlai noh, lij ciengzseiz boemz mbaw baiz youq gwnz daiz, miz rengz raixcaix.

　　Gyoengqde haeujok baenz sueng baenz doiq, bouxlawz seizheiq ndei couh bouxlawz guhdoj. Youq Yizgyangh, menhmenh dwk, mbouj miz saek boux hingz ndaej gyoengqde lo. Boux Du Vaz haenx, couh dwg yiemq Vangz Ci haujlai cienzdoj, mbouj miz cienz boiz le, cij buet bae Gvangjdungh dajgoeng, gij fwngz mo gvenq mazciengq de, mo mbouj gvenq gij ciensuijniz Gvangjdungh, deng ciensuijniz dub dawz le, gaca sing ndeu, diuz ga couh raek lo.

　　Yawjraen de baez vej baez gvez ma daengz Yizgyangh, ndaw sim Cinz Lieng angq raixcaix, de youh dauqma daengz haemhhaenx, vih song maenz ngaenz, de deng Du Vaz haenqrengz fak baj fwngz ndeu, in dangqmaz.

　　Haujlai bi doxdaeuj, de lumj cungj dwg vih mbat faj fwngz in raixcaix haenx lix roengzdaeuj. Du Vaz bienq gvez le, de ok gaemz heiq raezrangrang ndeu lo, danghnaeuz de ngoenzlawz baenz bingh- mabag, de mbouj cung gvaqbae haenqrengz haeb Du Vaz gaemz ndeu lo, raek diuz ga ndeu, gaeuq de souh lo.

　　Vangz Ci muenxeiq Cinz Lieng raixcaix, haidaeuz lij bang Cinz Lieng damqdingq Cinz Cangfeih bohcaenz youq gizlawz, doeklaeng yawj- raen Cinz Lieng yied hingz yied lai, de couh gik bae damqdingq Cinz Cangfeih lo, de youq ndawsim caegcaeg naeuz: “Boux Cinz Cangfeih neix, miz fuk mbouj rox yiengjsouh, miz daeglwg baenz ndei lij okbae louzlangh.”

　　（8）

编辑：韦亦玮