Geiq Liebbyaij(7) - 广西民族报网

Geiq Liebbyaij(7)

来源：广西民族报

作者：Lij Yozyez sij Luz Yaujli hoiz

发布时间：2020-08-14

　　Seizhaenx gaenq baen reihnaz daengz hoh, gaenq gaijgwz hailangh, cungj yienghsiengq mbouj miz haeux gwn youq Yizgyangh gaenq gig noix raen lo, hoeng aenvih laeq Cinz Lieng neix mbouj miz vunz guenj, ndigah dungx iek couh lumj geu buhvaih gwnz ndang de nei, ciengzseiz daenj youq gwnz ndang de. Caeklaiq seizhaenx vunz Yizgyangh hainduj daihbaj dwk mazciengq, cijaeu sing mazciengq baez yiengj, Cinz Lieng couh lumj duz roegiq douh youq gwnz faex yiengq sing mazciengq mbin bae, de youq gizhaenx nyaengq bae nyaengq dauq, hawj gyoengqde ndenq ien soengq raemx vuenh ngaenzlingz, yungh bonjfaenh guhhong daeuj vuenh haeuxgwn. Gij haeuxgwn de lij mbouj dwg cigciep daj ndaw doemnamh okdaeuj, geiz guhdoj iqetet ndeu couh lumj aen canghaeux ranz de, aeu mbouj rox liux yungh mbouj rox caenh. De gyaez guh cungj hong neix dangqmaz, lumz bae bonjfaenh dwg laeq lwgnyez mbouj boh mbouj meh ndeu lo.

　　Cib geij bi le, haujlai lwgnyez Yizgyangh caeuq de doxlumj liuxliux bae.

　　Ngoenz banringzgvaq neix, gij hoenz ndaw fungh yied daeuj yied noengz, hoeng geizbaiz lij caezcaez mbouj rox sat, Cinz Lieng maqmuengh miz vunz sawqmwh doidak geizbaiz, naeuz sing: “Mbouj dwk lo.” Ciuq gvigawj, seizhaenx couh dwg seiz gyoengqde ciengj ngaenzlingz hawj de, hoeng cungj yienghsiengq neix caezcaez cungj mbouj daeuj- daengz, Cinz Lieng cijndei naihsim caj dwk. Gij gugmienh ngoenzneix doiq de gig mbouj mizleih, aenvih ciengzseiz hawj cienz de Vangz Ci ngoenzneix saw cienz lo, boux hingz cienz Du Vaz ged dangqmaz. Vunz daihfueng saw cienz, vunz ged hingz cienz, vunz saw cienz mbouj rox aeu cienz hawj de, vunz ged hingz cienz hix mbouj rox aeu cienz hawj de. Seizgan baez faen baez miux gvaqbae, Cinz Lieng cijndei haenq naeng gyaeuj bae cam. De cam Vangz Ci daihfueng gonq, de naeuz: “Hawj maenz ndeu gou bae gwn faenj.” Vangz Ci han naeuz: “Mwngz mbouj raen gou saw cienz ha? Cam Du Vaz ba, Du Vaz hingz ndaej lai.” Cinz Lieng mboujnyienh bae cam Du Vaz, aenvih Du Vaz ged raixcaix, hingz ngaenz le de coengzlaiz mbouj nyinh, danghnaeuz nyinh hix dwg hingz ndaej cib maenz cij nyinh hingz ndaej maenz ndeu, danghnaeuz saw bae maenz ndeu, de couh naeuz saw bae cib maenz.

　　Ngoenzneix Cinz Lieng dungx iek raixcaix lo, de mbouj ndaej mbouj cam Du Vaz: “Hawj maenz ndeu gou gwn faenj.” Vah ngamq gangj sat, Du Vaz couh cuengq bauq hawj Vangz Ci. Du Vaz hujheiq dangqmaz, nyinhnaeuz Cinz Lieng cam de aeu cienz dwg daiq heiqcuij hawj de, ba sing ndeu, de haenqrengz fak Cinz Lieng faj fwngz ndeu: “Meh mwngz, byaij gyae di.” Gangj sat, mbon song maenz ngaenz hawj Vangz Ci.

　　Seizhaenx gyoengqde doj mbouj hung, saw baez ndeu couh dwg song maenz ngaenz, vih song maenz ngaenz neix, Du Vaz haenqrengz fak Cinz Lieng faj fwngz ndeu. Sojmiz vunz cungj mbouj roxnyinh doeksaet, fak baj fwngz ndeu suenq gijmaz, aenvih Yizgyangh gaxgonq miz vunz vih gaiq nohgaeq ndeu ndaenq dai vunz ne.

　　Cinz Lieng laxlax fajnaj bonjfaenh, suk youq gokciengz, geij boux vunz neix yawj cungj mbouj yawj de. Youq ndaw sing valala mazciengq, ciuhvunz Cinz Lieng sawqmwh couh miz gij ceiqheiq youh gyae youh hung ndeu, gij ceiqheiq youh gyae youh hung neix couh dwg: Cungj miz ngoenz ndeu, de aeu yungh caenh gij rengz gwnz ndang bonjfaenh, haenqrengz fak faj fwngz yiengjgok ndeu hawj Du Vaz.

　　Haemhhaenx Cinz Lieng mbouj gwn haeux- caeuz, de couh dwg baengh gij ceiqheiq youh gyae youh hung neix dingj daengz ngoenz daihngeih banhaet sing mazciengq caiq yiengj seiz. Boux nyezrauh yienghceij yakyawj neix, daj seizhaenx hwnj couh miz simsaeh lairaeuh, conghbak ciengzseiz gag nam bae nam dauq, bouxwnq cungj mbouj rox de gag nam gijmaz vah, cijmiz bonjfaenh de gag rox.

　　Gyoengqde naeuz gou nyi, Cinz Lieng doeklaeng guhdoj yied dwk yied hingz, dwg aenvih de miz bonjsaeh gagrox ak gvaq vunz, cungj bonjsaeh neix cijmiz bouxvunz ciengzseiz youq ndaw guhdoj supheiq cijndaej miz ok, cungj bonjsaeh neix naeuz de nyi, youq ndaw guhdoj seiqcawq miz yungyiemj neix, mbaw baiz lawz ndaej hawj vunz laemxdai, mbaw baiz lawz youh ndaej sawj de dai le dauq seng.

　　Aen Goj Daih’it Cinz Lieng

　　Miz ngoenz ndeu, Cinz Lieng daeuj ra gou, de naeuz: “Ndaej mbouj ndaej mbouj gaemh doengh bouxvunz daeuj Yizgyangh guhdoj haenx, hawj gyoengqde daeuj, yienzhaeuh gou dawz gij cienz gyoengqde cungj hingz gvaqdaeuj. Gyoengqde cungj dwg doenghboux goengdouz, miz cienz lai raixcaix.”

　　Gou naeuz: “Mwngz baenzlawz rox sou itdingh ndaej hingz? Gaeuvaiz mbouj soem mbouj gvaq gyaiq, riengmax mbouj raez mbouj sauq gai, bouxwnq mbouj miz di bonjsaeh he, gamj daeuj caeuq sou guhdoj?”

　　De naeuz: “Raeuz miz bajbingq, baujcwngq gyoengqde daiq geijlai ngaenz daeuj, couh gveng geijlai ngaenz youq gizneix.”

　　Gou naeuz: “Vih gijmaz?” De mbouj hoizdap, gou rox gyoengqde haengjdingh yaek ok “lauxciem”.

　　Cinz Lieng miz di gvaqmauh lo, roxyiuj raeuz hai ceh lwgda laep ceh lwgda, mizseiz lij hoh gyoengqde dwk, de couh ndaej conq siengj cik lo.

　　Gou mbouj han de, naeuz: “Cinz sojcangj naeuz lo, vunz Yizgyangh caeuq vunz Yizgyangh guhdoj mbouj suenq doj, suenq guhcaemz, vunz Yizgyangh caeuq vunz diegrog guhdoj, couh mbouj doxdoengz lubw.”

　　Cinz Lieng naeuz:“Caeuq vunz bonjdieg guhdoj cungj doj ndaej mbwq liux lu, hix hingz mbouj ndaej geijlai cienz, caemhcaiq hingz gyoengqde di cienz he, couh lumj aeu buenq diuz mingh gyoengqde nei, buenq ngoenz cungj hoiz heiq mbouj gvaqdaeuj, mwngz yawjraen cungj roxnyinh hojsouh. Hingz gij cienz gyoengqde gaenq mbouj roxnyinh miz maz sim’angq lo, hingz gij cienz vunz diegrog cij roxnyinh sangjswtswt.”

　　Gou roxyiuj de gangj vahgyaj, cijaeu hingz cienz, de couh sim’angq, baelawz guenj vunz diegrog roxnaeuz vunz bonjdieg, de cijdwg siengj doj hung hane. Seizneix, vunz Yizgyangh yienznaeuz ngah guhdoj, hoeng roengz cienzdoj mbouj suenq hung, doiq Cinz Lieng daeuj gangj, neix mbouj gaeuq gikcoi geijlai, caeuq doenghboux goengdouz roxnaeuz rin’gvangq lauxbanj guhdoj cij gikcoi raixcaix, gyoengqde cungj dwg yungh daehndaijsan daeuj caeng ngaenz.

　　Gou naeuz: “Mbouj ndaej, gyoengqde daeuj boux ndeu gou gaemh boux ndeu.”

　　Cinz Lieng miz di mbouj vuenheij lo, ndaw bak nambedbed yaep ndeu, gou mbouj rox de nam gijmaz vah, couh cam: “Mwngz gangj gijmaz?” De mbouj han.

　　Moix baez de yaek guh saehhung seiz, ndaw bak de couh gag nambedbed mbouj dingz, cungj neix gou senq rox lo, yawj gij ngaeuz baihlaeng de byaij gyae le, ndaw uk gou sikhaek yienh’ok gij goj de.

　　Gij goj de dwg daj cibngeih bi seiz haidaeuz.

　　Ngoenzhaenx fwn doek hung, raemxfwn doek youq gwnz roenrinbenj Yizgyangh, ronghliklik, lumj bu caengz nditndat ndeu nei, Cinz Lieng caij youq gwnz roenrinbenj, daengx ndang fatndat. Ndaw daeh de miz bak maenz ngaenzlingz, youq ndaw doenghgij ngaenzlingz neix, ceiq iq dwg faen ndeu, ceiq hung dwg song maenz, neix dwg de haujlai bi doxdaeuj, daj ndaw bak mbaet roengzdaeuj bw. Miz baez ndeu, gij gen de deng duzma gunghsiuhse haeb gaemz ndeu, de ca di couh dawz doenghgij ngaenz neix bae veiswnghyen dajcim yizmyauz binghmabag lo, hoeng vihliux louz doenghgij ngaenz neix roengzdaeuj, de haebhaeb heuj mbouj bae, cix dwg yungh cax iq bae gvet gij yaenqheujma oklwed gwnz gen de, in dwk de hemqvava, gvet ndaej le, de youh yungh genj bae cu, cu baez dem baez, loengh ndaej buenq diuz gai cungj dwg heiq genj.

　　（7）

编辑：韦亦玮