Geiq Liebbyaij(6) - 广西民族报网

Geiq Liebbyaij(6)

来源：广西民族报

作者：Lij Yozyez sij Luz Yaujli hoiz

发布时间：2020-07-31

　　Doeklaeng gou rox lo, youq Yizgyangh, boux seiqcib bi lau boux samcib bi, boux samcib bi lau boux ngeihcib bi, caemhcaiq boux Cinz Lieng neix, ngamq ndaej ngeihcib bi.

　　Gou lwnh gij saeh banhaet Cinz Lieng hoenx daxboh de hawj Cinz Naijgvei nyi lo, Cinz Naijgvei naeuz: “Neix couh dwg bauqwngq, Cinz Lieng lij iq seiz, daxmeh couh dai lo, Cinz Cangfeih gveng Cinz Lieng mboujguenj, riengz mehmbwk youzlangh gwnzbiengz bae ra gijmaz ‘caet liengx ngeih’ (20 sigij 80 nienzdaih cogeiz cungj vueddoengh ‘ra bauj’ ndeu), dawz gyacanj cungj baih liux lo, Cinz Lieng gwn mbouj miz gwn, daenj mbouj miz daenj, baengh doenghboux guhdoj mwngz geij gak gou geij gak gouqbang, cij lix ndaej roengzdaeuj, ndigah Cinz Lieng ciuhvunz hab gwn vanjhaeux guhdoj neix. De cib geij bi couh yungh gij cienz doj ndaej haenx hwnj ranz, ranz hwnj ndei le, daxboh de couh dauqma lo, baenz ndang bingh, vunz Yizgyangh cungj riu de, naeuz de ma ranz ciengxlaux lo.”

　　Gou siengj daengz banhaet Cinz Lieng faek cam Cinz Cangfeih “dwg mwngz ciengx gou la?” seiz, gij yienghceij Cinz Cangfeih suk aen gyaeuj, ndawsim gou gag naemj, doiq bohlwg neix caendwg doiq ien’gya ndeu lo.

　　Cinz Naijgvei naeuz:“Goengmbwn goengbingz raixcaix, Cinz Lieng ciengzseiz hingz cienz, hoeng Cinz Cangfeih cungj dwg saw cienz, de saw cienz mbouj suenq, lij yiemq cienzdoj, de baez yiemq caiq, bouxwnq couh mbouj hawj de byaij deuz, Cinz Lieng ciengzseiz aeu cienz bae lingx de dauqma. Gvaiq mbouj ndaej Cinz Lieng hoenx de, haengjdingh dwg haemhlwenz youh deng gaeuat lo.” Cinz Naijgvei naeuz:“Vunz Yizgyangh gyaez guhdoj, couh hawj gyoengqde doj ba, doj bae doj dauq, cienz cungj dwg youq ndawfwngz gyoengqde cienq bae cienq dauq, gou dingh diuz gvigawj hawj gyoengqde, gaej caeuq vunzrog guhdoj. Baezlaeng mwngz bae liebbyaij, raen miz vunzseng caeuqfaenh guhdoj, couh cug de hwnjdaeuj, fad de haenq di, gij cienz Yizgyangh, mbouj ndaej lae ok Yizgyangh.”

　　Goeng Cinz Naijgvei neix, laxlawz dwg henhoh gij cienz Yizgyangh mbouj deng vunzrog guhdoj aeu bae hane. Gou fan yawj gij geiqloeg banh’anq gaxgonq, raen doenghboux aenvih guhdoj deng cawqfad haenx, cungj dwg vunzrog, mbouj miz saek boux dwg vunz Yizgyangh. Baenzneix ndawsim gou couh miz soq lo, gij ndwenngoenz riengz laeng, lwgda gou cij cazyawj vunz najseng. Cijaeu raen gyoengqde youq Yizgyangh, gou couh gaen youq baihlaeng gyoengqde, yawj gyoengqde dwg mbouj dwg yiengq Cuhmuzlangjmaj byaij bae, danghnaeuz gyoengqde bae Cuhmuzlangjmaj, gou couh hat sing hung ndeu:“Sou yaek guh gijmaz?”Couh dwg yienghneix, doenghboux siengj daeuj Yizgyangh fatcaiz haenx, haujlai vunz cungj deng gou hwk deuz lo.

　　Dangyienz hix miz boux lauq he, miz mbangj bouxdoj diegrog mbwnlaep le cij hai mozdozceh daeuj Yizgyangh, ndoj youq ndaw ranz Cinz Lieng roxnaeuz ranz bouxwnq guhdoj, hoeng, gig vaiq couh miz vunz bauqnaeuz Cinz Naijgvei nyi, Cinz Naijgvei couh daiq gou bae gaemh gyoengqde. Dou dik hai dou, Cinz Naijgvei fwngz gaem cungqdinj, gou gaemdawz gingjgun, yaepyet couh cug dawz doengh bouxdoj diegrog haenx, daiq gyoengqde ma baicuzsoj gyaeng hwnjdaeuj, lij muedsou gij cienz gwnz ndang gyoengqde liux bae.

　　Gyoengqde mboujfug, naeuz: “Caezgya cungj guhdoj, vihmaz cij gaemh dou mbouj gaemh gyoengqde?” Cinz Naijgvei naeuz: “Bouxlawz heuh sou hwnjdou guhdoj, hwnjdou guhdoj caeuq hwnjdou doxhoenx、hwnjdou ciengjhuq doxlumj, mbouj gaemh sou gaemh bouxlawz!”

　　Gou lij dwg baez daih’it dingqnyi coenz “hwnjdou guhdoj” neix, gou roxnyinh baenzneix gangj daiq ndei lo. De saedcaih couh dwg fagmid caeuq fagnangx nyingz yiengq gyoengq bouxdoj siengj daeuj Yizgyangh fatcaiz haenx. Baenzneix gangj geij baez le, bouxdoj diegrog cungj mbouj gamj daeuj Yizgyangh lo. Yienghneix le, gou couh youqndwi mbouj miz saeh guh. Baez ndaejhoengq le, gou couh siengj sij sei lo.

　　Seizneix, gou gaenq mbouj yungh bek cien daengz aen gyaeuj bonjfaenh daeuj cwngmingz gij naengzlig gou lo, daengx aen Yizgyangh, cungj rox baicuzsoj daeuj boux gingjcaz mingzcoh heuhguh Veiz Cunghsiengz bonjsaeh ak raixcaix ndeu, youq Yizgyangh ndaw gyoengqvunz baebae dauqdauq haenx, de baez yawj couh rox bouxlawz dwg daeuj guhdoj. Caemhcaiq, de ndaej hawj diuz gingjgun ndeu fatok gij vilig lumj cungqdinj nei, gyoengq bouxdoj yawjraen diuz gingjgun de, couh lumjnaeuz yawjraen ci cungqdinj Cinz Naijgvei nei, gvaigvai yaengxfwngz, neix miz haujlai vunz cungj ndaej cwngmingz, Cinz Lieng caeuq doenghboux nyezrauh cibngeih cibsam bi de couh youq ndawde— Seiz- neix, gyoengqde gyae’gyae yawjraen de, couh ngaek gyaeuj riunyumj, gij yienghceij baenzmbauq de fwngz gaem gingjgun baedauq liebbyaij gaenq cap youq ndawsim gyoengqde, cijaeu yawjraen de youq, gyoengqde couh roxnyinh bonjfaenh ancienz raixcaix.

　　Yizgyangh bingzdingh dangqmaz, youq cungj yienghceij neix, gou youh siengj daengz sij sei, gig nanz mbouj sij sei lo, mbouj sij sei hawj gou mizseiz roxnyinh bonjfaenh dwg sai saedceij, ndawsim gou miz di vah cungj siengj diuq ok rog daeuj. Danghnaeuz gou seizneix lij dwg boux hagseng gingjyau ndeu, gou haengjdingh cacaca sij mboujdingz mboujduenh, hoeng gou naemj, gou seizneix lij mbouj ndaej sij, danghnaeuz seizneix sij sei okdaeuj, haengjdingh caeuq doenghgij cozbinj canghsei seibakgangj doxlumj. Seizneix gou dwg boux gingjcaz Yizgyangh ndeu, gij sei boux gingjcaz Yizgyangh ndeu, wnggai engqgya ndei cij deng. Doenghgij vahgawq neix, gyoengqde mbouj dwg seiz okdaeuj, gou mbouj ndaej hawj gyoengqde yaeuh lo. Couh yienghneix, gou aeu gij siengjfap sij sei gou mbaet youq seiz did nyaz. Mbouj lau sou riu gou, gou miz aen loqsiengj hungmbwk gvendaengz sij sei ndeu, cijmiz de cijndaej hawj gyaeujhoq gou gvih roengz gwnznamh.

　　Seizneix, ndawuk gou cij fouz miz gij fugfauz sei, caeuq ndawsim gou gij loqsiengj hungmbwk gvendaengz sei haenx beij hwnjdaeuj, doenghgij fugfauz sei neix mbouj dij dwen daengz, danghnaeuz siengj caenh banhfap hawj gyoengqde mauh okdaeuj, mboujyawx lai bae gaemh geij boux vunzvaih yaek daengz Yizgyangh guhdoj haenx.

　　Gou liebbyaij ndaej engqgya gaenx lo, mboujguenj doengxngoenz lijdwg doengxhaemh. Gou roxnyinh mbouj loek, seizneix, gou caeuq Cinz Lieng ciengzseiz doxraennaj.

　　Youq Yizgyangh, boux seiqcib bi lau boux samcib bi, boux samcib bi lau boux ngeihcib bi, bouxvunz daibyauj ndaw ngeihci bi couh dwg Cinz Lieng lo. Cijaeu gou gaenlaeng Cinz Lieng, youq Yizgyangh couh mbouj miz gijmaz saeh banh mbouj baenz. Ndigah youq ndaw seizgan raez- rangrang haenx, ndawuk gou cungj caeng miz bouxcoz yienghceij yakyawj neix, de baez byaij baez doengh, cungj yiendoengh diuznyinz gou, dingzlai seizhaeuh, gou lumj boux vunzak soucomz gojgaeq nei, mboujdingz mboujduenh bae cam bouxwnq gvendaengz gij saeh iqiq hunghung Cinz Lieng, mbouj nanz, gou couh bienqbaenz bouxvunz ceiq roxyiuj Cinz Lieng ndeu lo.

　　Bihaenx seizdoeng miz ngoenz ndeu banringzgvaq, Cinz Lieng ndaej bet bi youq henz daiz mazciengq ndeu, cingq caj gij haeuxcaeuz de ne, ndaw fungh gij ienhoenz hoenzloedloed hawj de diemheiq cungj hoj, doenghgij vunz dwk mazciengq haenx dwk baez dem baez, lumz laeq lwgnyez iekngaungau bang gyoengqde cawx ien cawx haeux vuenh ngaenzlingz neix lo.

　　（6）

编辑：韦亦玮