Yienzfaenh - 广西民族报网

Yienzfaenh

来源：广西民族报网

作者：□ Danz Hijvah / 谭喜花

发布时间：2026-09-04

Bihaenx, gou ngamq ndaej roek bi buenq, raen ndaw mbanj gij doengzdoih iq cungj cawx daehsaw moq, naeuz caj daengz gouj nyied haihag le, bae hagdangz doegsaw. Gou raen le, gig hozhaenz, cam daxboh daxmeh, gou ndaej caeuq ndaw mbanj gij doih iq guhdoih bae hagdangz doegsaw lwi?

Daxmeh dingq le, baenq gyaeuj muengh coh daxboh. Daxboh muenghmuengh gou, ngaem gyaeuj naemj yaep he le, naeuz:“Mwngz bineix ngamq ndaej roek bi buenq, caengz bae doeg gonq. Dingqnaeuz bimoq hagdangz yaek son Sawcuengh, bimoq mwngz bae doegsaw ba, banhaenx mwngz hix ngamq ndaej caet bi buenq, caengz geq geijlai ne.”

Geq lwgfwngz ngoenz muengh hwnz muengh, bi he gig vaiq gvaqbae, gou cungjsuenq ndaej aemq daehsaw angqfwngfwng caeuq gyoengqdoih iq bae hagdangz doegsaw lo.

Lauxsae ngoenznaengz son dou hag Sawgun caeuq Sawcuengh. Lauxsae son dou hag Sawcuengh, sien hag doeg singmeh yinhmeh, hag gyoeb doeg baenz cih, caiq hag dawz cih daeuj cujcwz, hag doeg vahgawq, doeg vahduenh, doeklaeng couh hag rox cuengqsing doeg govwnz lo.

Hwnjdangz seiz, lauxsae heuh dou dawz bonj Sawcuengh caeuq bonj Sawgun caez baij youq gwnz daizsaw, caez dox doiqciuq, dawz gij cih、gij swz、gij vahgawq、gij vahduenh ndaw gobwnj, Sawgun Sawcuengh doxgyaux caez son. Song cungj sawcih doengzseiz hag, dou roxnyinh yienghneix hag gig mizyinx, gig nyinhcaen bae hag.

Gij lauxsae ban wnq cij son Sawgun ndwi. Lauxsae dou son dou Sawcuengh caeuq Sawgun, gij sawbonj dou beij gij ban wnq lai boix he, aen daehsaw hix beij bouxwnq naek boix he, aemq youq gwnz ndang gwq duiq doxroengz, naekgywggywg, hawj aen ndang daemq iq gou yaek dingj mbouj ndaej. Hoeng gou cix roxnyinh gig sim’angq, beij bouxwnq lai hag yiengh saw ndeu, yienznaeuz miz di sinhoj, hoeng gou rox lauxsae son dou baenz sinhoj, gou mbouj hawj lauxsae sinhoj ndwi, aeu laemxsim nyinhcaen bae hag Sawcuengh.

Ngeih

Gou bingzseiz beij bouxwnq gaenx hag di, cingzcik youq ndaw ban dingzlai cungj dwg baizmingz daih’it, ndaej lauxsae haenh, gyoengq doengzhag hozhaenz. Gaujsi seiz, saeklaeuq baiz mingz daihngeih, ndaw sim cungj miz di mbouj onj, engqgya roengzrengz bae hag.

Doeg ngeih nienzgaep seiz, ndaw mbanj guh aen doxdax doeg Sawcuengh, lauxsae heuh gou caeuq ndaw ban dah doengzhag he, caez bae camgya aen doxdax neix. Mwhhaenx doxdax doeg Sawcuengh, dwg youq aen seizgan hanh ndawde, doeg duenh saw he, doeg ndaej doengswnh mbouj gazgwd, caiq yawj doeg ndaej cihsoq lai noix daeuj dingh sawhingz.

Gou caeuq gyoengq boux lwgnyez naengh youq giz he, ndaw sim miz di gaenjcieng. Youq gyoengq lauxsae cimyawj baihlaj, raen bouxwnq doeg ndaej gazgaz gwdgwd, aen sim gou diuqbubbub, naemj: Lwnz daengz cihgeij seiz, mbouj rox doeg ndaej baenzlawz yiengh lo.

Sawqmwh, dingqnyi boux lauxsae he heuh aen mingzcoh gou, lwnz daengz gou lo, gou yamq hung byaij gvaqbae.

Gou byaij gvaqbae, yaengyaeng naengh ndei. Boux lauxsae de vix duenh saw he, naeuz:“Mwngz daj gizneix doeg roengzbae.” Baez daih’it youq baihnaj gyoengq lauxsae cuengqsing doegsaw, gou miz di mbouj cwxcaih, hoeng gig vaiq couh caemdingh lo. Gou sing hung doeg roengzbae, doeg ndaej gig swnh, mbouj gazgwd saekdi, cig daengz gyoengq lauxsae hemq dingz, naeuz seizgan daengz lo.

Geiq mbouj ndaej baez doxdax doeg Sawcuengh neix ndaej daihgeij mingz, fanjcingq dwg ndaej ciengj, miz ciengjsang miz ngaenz ciengj dem.

Sam

Camgya aen doxdax neix le, gou caeuq ndaw hagdangz geij boux doengzdoih youh ndaej bae ndaw yen camgya aen doxdax doeg sawcuengh.

Mwhde gaenq haeuj seizcou, dienheiq liengzsisi. Daxboh rox gou ndaej bae ndaw yen camgya doxdax, de gig angq, naeuz yaek daiq gou bae haw Dangzhungz cawx dauq buhvaq moq he, naeuz dahlwg de baenz ak, ndangdaenj mbouj hawj lotdoih.

Ngoenzde haetromh, daxboh couh gwih danci doz gou bae haw Dangzhungz lo. Daxboh daiq gou youq ndaw hangz gai buhvaq baenq bae baenq dauq, de caengz daiq gou daeuj haw cawx buhvaq gvaq, mbouj rox cawx buhvaq lawz cij hab gou daenj.

Raen daxboh yienghneix, daxheiz gai buhvaq he riunyumnyum naeuz:“Mwngz naemj hawj dahlwg cawx buhvaq ba? Dahlwg mwngz ndaej geijlai bi lo? Gou bang mwngz senj, hawj de daenj hwnj ndang sawqsawq, yawj hab mbouj hab.”

Daxboh naeuz:“Dahlwg gou ndaej caet bi, mwngz yawj geu buh lawz hab de daenj.”

Seizneix doeg daengz ngeih nienzgaep, gou gaenq ndaej gouj bi lo, roxnaeuz aen ndang gou daemq iq lai, miz di nyaenq, mbouj lumj gij lwgnyez wnq maj ndaej baenz sang baenz mboeng, daxboh mbouj ndei eiqsei naeuz gou gaenq ndaej gouj bi.

Daxheiz gai buhvaq haenx dingq daxboh gij vah le, couh yaengx geu buh saekhoengz he, naeuz:“Sou yawjyawj, geu buh neix baenzlawz yiengh?”

Daxboh naeuz:“Geu neix dwg ndeiyawj, daenj hwnj ndang hawj de sawqsawq cij rox yienghlawz.”

Gou muengh gvaqbae, cij raen geu buhhoengz haenx, najaek siuq miz song duj va, lij miz di maegim cab ndawde, lwenqmyabmyab, gyaeundei raixcaix, gou baez raen couh maij.

Boux daxheiz de caen rox ngonz vunz, geu buhhoengz neix habndang raixcaix, gig habhoz gou.

Gaen dwk, daxboh youh caeuq daxheiz neix cawx geu vaq saeklamz he hawj gou. Gou gotdawz dauq buhvaq moq neix youq ndaw rungj, ndaw sim mbouj rox geijlai angq.

Daxboh yien fwngz gou, naeuz:“Raeuz bae bouqfaenj gwn faenj ba.”

Gou naeuz:“Boh, gou mbouj iek.”

Youq ranz cij gwn vanj souh haeuxyangz he, caeuq daxboh daeuj haw baenz buenqngoenz, caeux siu bae liux lo, hoeng baez naemj daengz ndaej bae yienhsingz doxdax, youh ndaej cawx dauq buhvaq moq neix, seizneix gou mbouj roxnyinh iek saekdi.

Daxboh lumhlumh aen gyaeuj gou, riu naeuz:“Lwg ha, mwngz ndaej bae yienhsingz doxdax, gou guh daxboh hix miznaj, ngoenzneix daiq mwngz daeuj haw cawx dauq buhvaq moq he, dwg wnggai, raeuz caez gwn vanj faenj he goenghoh, daengzseiz lij cawx saek gaen nohmou dauq ranz, daengx ranz caez goenghoh.” Daxboh gangj sat, couh yien fwngz gou haeuj bouqfaenj bae gwn faenj.

Seiq

Couh yienghneix, gou caeuq ndaw hagdangz geij boux doengzdoih, youq geij boux lauxsae daiqlingx baihlaj, bae yienhsingz camgya aen doxdax doeg sawcuengh lo.

Youq aen seizgan hanh ndawde doeg Sawcuengh, vihliux doeg ndaej miz sing miz saek, doeg ndaej sing hung youh miz gamjcingz, gou doeg ndaej miz di menh, baenzneix gij cihsoq couh mbouj dabdaengz iugouz, gou doekmingz lo, mbouj ndaej laebdaeb bae Namzningz camgya doxdax lo. Hoeng gou di he hix mbouj doeknaiq, laebdaeb roengzrengz bae hag Sawcuengh, mboujlwnh duenhgauj roxnaeuz geizbyai gaujsi, youq ndaw ban ca mbouj lai cungj dwg daih’it, lauxsae naeuz:“Mwngz nyinhcaen hag roengzbae, cungj raen rongh. Ciengeiz gaej ndaengndiengq, aeu rox cungj miz vunz beij mwngz engq ak.” Roxnyinh gij vah lauxsae gig miz dauhleix, gou engq nyinhcaen bae hag lo.

Ndaw mbanj miz vunz baez raen gou, couh riu naeuz:“Dingqnaeuz mwngz doegsaw ak lai, ndaej baenzlai ciengjcang nem rim bangxciengz, dou bouxlaux baez lwnh daengz mwngz, boh mwngz cungj angq ndaej riuhoho.”

Vunz yienghneix gangj saek mbat mbouj miz maz, hoeng baez raennaj cungj lwnh gij saeh neix, dauqfanj roxnyinh miz di mbouj ndei eiqsei, najhoengz daengz goekrwz. Cihgeij hix rox: Di cingzcik neix mbouj suenq maz, vunz naeuz rog bya miz bya, rog vunz miz vunz, mwngz naeuz mwngz ak, lij miz boux beij mwngz engq ak, guh vunz mbouj ndaej ndaengndiengq lai.

Aen ranznamh gaeuq bangxciengz haenx, cienzbouh diep rim gij ciengjcang gou, seizde, dingzlai ndaej ngaenz daeuj gujli, geij maenz ngaenz yienznaeuz mbouj suenq lai, hoeng youq seizde suenq gig hung lo. Gou mbouj gamj dawz bae luenh sawj, cienzbouh gyau hawj daxmeh, couhsuenq cawx ndaej saek gaen gyu hix baenz, cihgeij hix sim’angq.（1）

编辑：实习生石喜丹复审：黄慧华终审：蒙树起