Canghfwen - 广西民族报网

Canghfwen

来源：广西民族报网

作者：□ Guj Gyah/古佳

发布时间：2026-09-04

Ndwenbet, song go maknganx najranz, maknganx hoij rim gwnz go, nanz mbouj nanz ci daeuj raqraq rang mak, hawj vunz roxnyinh sim yaek fiz bae.

Haetromh daengngoenz ngamq hwnj, ndit oemqruprup daj gehbya ciuq okdaeuj, gyang mbanj lij raemhrwdrwd, hoengheiq ciemhciemh bienq hwng.

Vangz Gvanghbinh gaem aen daengq seiq ga ndeu, daeuj daengz naj aendaiz laj go maknganx, de youq gwnz daiz bu cieng bauqceij ndeu, aj bak boq geij baez, raen gwnz bauqceij mbouj miz saek di faenx, cij dawz bonj sawfwen cuengq gwnz daiz, haiheij raiz fwen:

Aen banneix seiqgyaiq,

Caeuzngaiz hix miz noh,

Mbouj lwnh vunz mbouj rox,

Seizhoj mbouj ndaej lumz.

Gaxgonq gou lij iq,

Ciengzsiz(seiz) deng dungx iek,

Haeuj ndoeng bae ra biek,

Gej dungx iek dungx manh.

Seizde gou lij iq,

Ciengzsiz(seiz) daej gwn nyeq(noh),

Yaek daengz cieng nden de,

Gaiq nyeq(noh) hix mbouj miz.

Seizde gou lij iq,

Cix ngah gwn haeuxguenq,

Haeux mbouj miz guhdonq,

Haeuxguenq engq nanz raen.

“Goeng ha, dauq ranz gwn ngaizromh lo.” Mehyah guh ndei ngaizromh, daeuj daengz bak douranz heuh Vangz Gvanghbinh

Vangz Gvanghbinh betcib bi, vunz sang, naj loq raez, nohhau gyaeujndoq, miz vah naeuz: Bouxvunz sim hai siengq mbouj geq, garoen bingz ndei aen ceq(ci) mbouj vaih. Vangz Gvanghbinh gaenq daengz aen nienzgeij neix, cim gij siengq de, boux mbouj rox laihnaeuz de ngamq ndaej roekcib lai bi dem.

Vangz Gvanghbinh dang lauxsae samcib geij bi, duiyouh le, couh youq ranz caeuq mehyah guhdoih daiq lan, seizneix lan hung lo, de hix geq lo. Lwglan hauqgingq de, mbouj you gwndaenj, ndaejhoengq de couh raizraiz fwen, mizseiz son gyoengq vunzmbanj eu fwenleux.

Fwenleux, dwg yiengh fwen riuzcienz youq ranghdieg Bouxcuengh ndeu, aenvih eu seiz moix coenz fwen ndawde cungj miz gij sing “leux——leux——”, gyoengqvunz couh heuhguh Fwenleux, “leux” caeuq “liuh” doengzyaem, Fwenleux eiqsei couhdwg bae youz eu fwen guh’angq.

Fwenleux daih bouhfaenh dwg haj cih seiq gawq, miz hahleux、swhgwzleux、digwzleux、yoyileux、fwenraez、nazhaijleux roek aen diuh. Song sai song mbwk doxdoiq, singdaemq singsang doxhab.

Gij diuh Fwenleux neix Vangz Gvanghbinh cungj rox liux. Seizneix de raiz ndaej cingq meih, mbouj sij dingz roengzdaeuj.

（1）

编辑：实习生廖小凤复审：黄慧华终审：蒙树起