Gaemh Yahnoix - 广西民族报网

Gaemh Yahnoix

来源：广西民族报网

作者：□ Lij Yungzcangh/李雄章

发布时间：2026-09-04

Gvaq ndaej aen cung ndeu baedauq, Cangh Vaz cij dauq daengz ranz, de riengz Fangh Li dongx coenz he couh haeuj fuengz swhgeij bae. Fangh Li nyaenxhoz mbouj fatheiq, caj daengz Cangh Vaz bae caemxndang seiz, Fangh Li haeuj fuengz bae dawz soujgih de daeuj yaek yawj de riengz dah hagseng haenx gangj gijmaz, hoeng soujgih miz mizmaj yawj mbouj ndaej, cijndei cuengq dauqbae.

Haemhde, Fangh Li hwnz he ninz mbouj ndaek.

Ngoenz daihngeih haetromh, Cangh Vaz gwn ngaizromh le naeuz miz gunghcoz bae lajmbanj couh hai ci ok dou lo. Neix hawj Fangh Li ngeizvaeg: Ngoenzgonq ngamq riengz dah hagseng gangjgoj baenzlai nanz, ngoenzlaeng couh bae lajmbanj, ndawde mbouj miz gvij byawz saenq?

Fangh Li naemjnaemj couh dwk aen ci he gaenlaeng bae. Ci Cangh Vaz itcig hai coh lajmbanj, buenq aen cung gvaqbae, de daengx ci ndonj haeuj suen makit henzloh bae. Ndei ha, Cangh Vaz, mwngz naeuz daeuj gunghcoz laxlawz dwg daeuj suenmak raen lwgsau! Fangh Li ca di deng ndaenq ngunh.

Fangh Li heuh bouxhaici youq giz gyae daengx ci, swhgeij gag byaij gvaqbae hix ndonj haeuj ndaw suen makit bae. Youh byaij yaep he, Fangh Li raen ndaw suenmak miz aen bungzmak he, miz dahsau he youq ndawde cingq baijloengh gijmaz. Yawjraen dahsau neix, Fangh Li couh roxnaj de dwg Veiz Siujyingh, dahsau youq veizsin caeuq Cangh Vaz gangjgoj haenx, yawj daeuj Cangh Vaz caen muenz swhgeij youq rog riengz lwgsau ndei lo!

Fangh Li nyaenx le youh nyaenx, fwngz saenz dwk ndoj youq caz makit baihlaeng, aeu soujgih ciuq coh dahsau haenx, yawjraen bouxgvan swhgeij guhcaeg doxiu dahsau, Fangh Li hozbaengq dangqmaz. Hoeng Cangh Vaz byaij gvaqbae le mbouj raen song boux doxgot, dauq dwg riengz baijloengh hwnjdaeuj, neix hawj Fangh Li miz di geizheih.

Youq seizde, baihlaeng miz vunz heuh sing he:“Fangh Li, dwg mwngz ha, mwngz daeuj neix guh maz ne?” Fangh Li baez doeksaet, soujgih doek roengz gwnznamh bae.

Fangh Li nyeux gyaeuj baez yawj laxlawz dwg dah doengzhag gauhcungh mwhgonq, seizneix youq ndaw yienh banggungz bangunghsiz guh gunghcoz, heuhguh Linz Yingj.

Linz Yingj raen Fangh Li lij ngaezngwdngwd couh riu naeuz:“Mwngz dwg mbouj dwg daeuj bang Cangh Vaz cengqnaj ha, caen dwg gvan gangj yah riengz ha, caen hozhaenz songsou ha, haha.”

Bang cengqnaj? Gijmaz saeh? Fangh Li engq ngaez lo.

“Lij ngaez maz, bae bang guhhong lo.” Linz Yingj nengh Fangh Li byaij haeuj bungzmak bae.

Yawjraen Fangh Li haeujdaeuj, Cangh Vaz riu naeuz:“Mwngz baenz- lawz hix daeuj ne? O, dwg raen gij cigboq gou, daeuj bang gou cengqnaj luba, haha, docih lingjdauj gvansim.”

Dahsau haenx hix gvaqdaeuj dongx naeuz:“Mehsae, mwngz caemh daeuj lo, sinhoj mwngz caeuq lauxsae lo.”

Raen Fangh Li lij ngaez, Linz Yingj bongxbongx mbaq de naeuz:“Cangh lauxsae daengz lajmbanj banggungz seiz, raen gij makit ndaw mbanj siu mbouj bae, couh siengj ok guh cigboq gai mak caeuq bouxyouz gag mbaet mak song cungj fuengfap neix, seizneix makit mbouj you siu lo. Neix dwg Veiz Siujyingh, dwg hagseng Cangh lauxsae gaxgonq, doeg dayoz bizyez le dauq ndaw mbanj dang cunhcujyin.”

“Dwg ha, gyo’ndaej lauxsae baez daengz cuengqhag cungj caeuq gou maeuzveh ndei gij saeh ngoenzlaeng cigboq, haet singhgiz roek lij romhromh daeuj riengz guh cigboq dem, caen sinhoj lo, daiq gyo’mbaiq lauxsae lo.” Veiz Siujyingh gaem fwngz Fangh Li naeuz.

Laxlawz dwg yienghneix! Fangh Li soeng liux gaemz heiq he.

“Lij ngaez maz, dawz soujgih, bang dou ingj.” Cangh Vaz ndenq soujgih haeuj fwngz Fangh Li bae.

Fangh Li dawz gingqdaeuz ciuq coh Cangh Vaz caeuq Veiz Siujyingh song boux, hawj songde senhconz makit, leuxcih ciuq coh bouxyouz mbaet makit yied daeuj yied lai haenx ……

Miz hoengq seiz, Fangh Li yawj gij gangjgoj veizsin songde, caen dwg lumj songde gangj nei, rox swhgeij loenggvaiq bouxgvan lo, Fangh Li menhmenh bok aen makit he oet haeuj bak de bae……（2 sat）

编辑：实习生廖小凤复审：黄慧华终审：蒙树起