Mwngz Daeuj Gou Bae - 广西民族报网

Mwngz Daeuj Gou Bae

来源：广西民族报网

作者：□ Lingz Siuyangh/凌秀香

发布时间：2026-08-26

Yienznaeuz faex gaenq baenz ruz, hoeng song baih bohmeh lij gig fanjdui. It dwg dwkbyoengq fungsug, lau ngaiz cojcoeng gvaiq; ngeih dwg song baih bohmeh gag miz coenzdoi.

Bohmeh baih caeuzyah ndaq dahlwg: “Boux ndaw rungh maq- muengh haq bae diegbingz; boux diegbingz maqmuengh haq bae yienhsingz. Mwngz cix dauqfanj, boux diegbingz haq bae diegbo. Vunz mbanj de maeuq cingjhaex lij aeu gaem ragfaex cij ndaej(eiqsei dwg naeuz mbouj gaem ragfaex couh ngaiz ringx roengz bo bae). Aen bo cij maj goyid haenx, cijnaengz fungj ok gij ndwenngoenz lumj makyid nei youh soemj youh saep! Mwngz haq bae ha, ngoenzlaeng daej cungj mbouj miz raemxda!”

Dai lo, Vunzhoeng rah mbanj dou mbouj dij saek faen ngaenz. Mbanj dou yienznaeuz youq gwnz bo, neix mbouj suenq dwg bo, cix dwg aen ndoi daemq ndeu. Najmbanj dwg diegbingz gvangqlangh he, yawj ndaej raen yienhsingz youq gizgyae. Laengmbanj ing megbo. Ndaejnaeuz, mbanj dou dwg dieg gapgyaiq diegbingz caeuq megbo. Vunz mbanj dou ceiq haemz vunzwnq naeuz dou dwg bouxrungh, neix dwg yawjsiuj mbanj dou. Sou rox lwi, aen mbanj cij maj goyid neix, gungganq ndaej baenzbang mbauqlengj saulengj, lij dwg ciuh dam ciuh miz dem. Neix mbouj dwg gangjboq, mbauqlengj saulengj mbanj dou caen lai dahraix.

Bohmeh baih bouxsai fanjdui, leixyouz dwg daeggo gwn haeux- guekgya, maqmuengh de hix aeu dahsau gwn haeuxguekgya ndeu, yienghneix ndwenngoenz gvaq ndaej soeng di.

Hoeng, maz cungj laengz mbouj ndaej aicingz, haeuxsan gaenq cawj baenz haeuxcug. Gienhnduj song gyog doxaeu couh yienghneix “bauqcaq” lo, gingdoengh seiqhenz cib lai aen mbanj.

Saeh doxaeu daeggo, lumj ndaekrin vut roengz najhuz bae nei, yinxhwnj cien caengz raemxfoebfeb. Bouxcuengh dopfwngz angq baenz- lawz, laihnaeuz gyog hung ndaej ciemq bienzngeiz gyog iq, cix roxnyinh sim sangj. Mbauqcuengh faenfaen ciuqguh, nyoengx haeuj Mbanjhoeng bae liuh sau. Vunzhoeng cix hozndat dangqmaz: Gyog iq、vunz noix cixbah, bouxrog lij daeuj vat lwgsau bae dem, byawz gamsim ne? Riengzlaeng, Mbauqhoeng singjuk lo, hix haeuj Mbanjcuengh bae liuh sau. Dinjdinj geij bi ndawde, miz cib lai dah Sauhoeng haq daeuj mbanj dou. Mbanj dou hix miz seiq dahsau haq bae Mbanjhoeng. Gyaiqhanh gyog ngaiz aicingz hoenxbaih lo.

Mboujdan Bouxcuengh Vunz- hoeng song gyog vunz dox baedauq, Vunzruz hix ganjcawq daeuj caeuq Bouxcuengh gap caencik.

Dahnuengx ndaw gyog gou, couh dwg dahlwg aucaet, deng ndaek mbauq Vunzruz ndeu “yaemz”, yaemz daengz ndaej couh gamsim dem. Saeh neix youq ndaw mbanj lumj cauq oenjgoenj nei cauzhuhu. Vunzmbanj naeuz: Ranzlingz cungj ok gij saeh singjsien. Dangseiz, daengx gyog vunz cungj fanjdui, mwngz coenz gou coenz gienq dahnuengx “bae gwnz ruz gvaq ndwenngoenz, miz mwngz ngoenz daej bw.” “Vunzruz daengx ndang cungj haeusing, lienz roet lij haeu, mwngz souh ndaej ha.” “Cangruz lumj hab habfeiz nei, ninz lij aeu gutgungq, mwngz haq gvaqbae mbouj geij nanz couh laenggungq bw.”

Dahnuengx naeuz:“Gwqneix Vunzruz gaenq hwnj gwnz hawq daeuj gvaq ndwenngoenz. Cwngfuj aeu dieg hawj gyoengqde, caemh guh ranz hawj gyoengqde lo.”

Simjcaet naeuz:“Couhcinj gyoengqde hwnj gwnz hawq daeuj gwnyouq, miz naz miz reih lwi? Gij nywj gij faex gwnz hawq miz nge lawz dwg gaiq gyoengqde?”

“Reihnaz mbanj raeuz dauq dwg lai, hoeng, miz byawz dawz haeujda? Bouxcoz cungj buet okbae dajgoeng, vut reihnaz fwz.” Dahnuengx naeuz.

“Ce fwz hix dwg gij caizcanj raeuz, cungj beij mbouj miz ndei.” Simjcaet naeuz.

Aen nienzdaih swyouz guhyoux, bohmeh fanjdui mbouj miz yungh. Dahnuengx dauqdaej haq gvaqbae lo. Aenbaez ma ranzmeh, de dawz gak cungj byaroz dauq hawj beixnuengx ndaw gyog cimz, lij gangjriu naeuz:“Hawj sou ndaej gaijbienq di roetfeih he.” Geij gep byaroz vuenh bae daeh dem daeh haeuxhau ranzmeh. Gyoengq auau simjsimj ndaej gwn byaroz le, lij riu naeuz de dwg “bouxcaeg gwnz raemx” dem. Haq bae geij bi le, de gangj Bwzva caen bienz, lienz lwg de cungj mbouj rox gangj Vahcuengh dem. Vihneix, gyoengq beixnuengx ndaw gyog naeuz de gai cojcoeng. De najmong dwk riuhihi. Byaroz caeuq haeuxhau doxvuenh, hix ciemhciemh siuyungz bae gij yawj- mbieng song mbiengj.

Gojgaeq ndaw gyog lij aeu laebdaeb gangj. Ranz simjsam cij miz song dah lwgmbwk, dahdaih haq ok bae lo, dahngeih aeugwiz hwnjcoemq. Bouxgwiz neix dwg vunz ndaw runghbya baihnamz bonj yienh, hix dwg Bouxcuengh. Hoeng, Vahcuengh de caeuq Vahcuengh dieg dou doxca lumj mbwn caeuq deih nei, dingq mbouj rox saek coenz, caendwg “cib leix mbouj doengz yaem, bet leix mbouj doengz diuh”. Dou heuh gyoengqde guh Vunzyaengz. Vah- yaengz dwg vah Dwzbauj. Vahyaengz doiq vunz diegbingz daeuj gangj caen najseng. Lijndei, daeggwiz neix ciengznienz youq rog dajgoeng, hag ndaej di Vahnganx diegbingz dou. Ngamq daeuj mbanj dou seiz, de couhdwg baengh di Vahnganx dingz ndip dingz cug haenx, daeuj caeuq vunzmbanj gazgwd gyauhliuz. Song bi gvaqbae, de gangj Nganx bienz lumj vunz bonjdieg nei, mbouj cab saekdi vahmeh de.

Daeglwg aungeih bae Guengj- doeng dajgoeng, riuj ndaej dah Sauhak vunz Lingzyinz ndeu dauq. Vahhak Vahcuengh mbouj doxdoengz, Boux- cuengh yaek hag Vahhak gig nanz, Vunzhak yaek hag Vahcuengh hix dwgrengz. Hainduj de cijnaengz yungh Vahbujdungh caeuq vunzmbanj gyauhliuz. Miz baez ndeu, ndaw gyog miz laeujcaz, gou dauqbae bangfwngz. Dah nuengxbawx Sauhak neix daeuj dongx gou:“Mehgux, mwngz hix ndaej dauq bangfwngz ha?” De aeu Vahcuengh daeuj dongx gou. Gou doeksaet yat, ngamq bi lai seizgan, de gangj Cuengh haemq bienz:“Ya, mwngz baenz vaiq couh rox gangj Cuengh lani, caen coengmingz!” De riunyumj naeuz rox gangj di ndeu.

Gyoengq gwizhwnjcoemq、nangz- bawx diegrog haq daeuj haenx, hag coenzgangj gig vaiq, neix gou mbouj ndaej mbouj baiqfug. Mboujgvaq gou maeh, gij dungxcaiz seng daeuj couh miz haenx yienznaeuz gaenjaeu, hoeng ceiq nanzndaej dwg gyoengqde nyinh- caen gvaq ndwenngoenz. Vunz baez nyinhcaen, lij miz maz hag mbouj baenz dem?

Riengzlaeng gou hix haq hawj Vunzyaengz ndeu. Hainduj, gyoengq beixnuengx ndaw gyog hix riu gou, naeuz “oemjnaz haq hawj oemjdaeq”. Oemjnaz daibyauj boux diegbingz, oemjdaeq daibyauj boux runghbya. Naeuz gou mbouj rox “vunz coh diegsang byaij” aen dauhleix neix, gangj sat lij mbwnjbak dem. Bohmeh gou raen yienghneix cix najmong lo. Gou mingzbeg, dwg gou hawj songde saetnaj.

Hoeng boux lwggwiz deng vunz ndaw gyog mbouj yawjngamj neix, riengzlaeng baenz boux lwggwiz ceiq ndaej vunz haenh、ceiq aeu ndaej simvunz haenx. De gingq laux ndiep coz. Aenbaez ma mbanj, cungj cawx bingjdangz dauqbae faen hawj gyoengq bouxgeq lwgnyez ndaw gyog, cam ndit cam raeuj. Ndaw gyog miz laeujcaz, mboujguenj saeh hung saeh iq, de cungj bae bangfwngz, beij gou lij gaenx. Engq nanzndaej dwg de rox coih gyadienh, hix dwg baengh gaiq dinfwngz neix daeuj ciengxranz. Ndaw gyog ranz lawz miz gyadienh vaih le, denva baez daengz, de couh ganj bae, lij dwg coih ndwi dem. Mizseiz gou riu de: “Coih ndwi lij baenzneix gaenx.” De cix riuhehe mbouj miz coenz, sairiu lauxsaed youh ronghndongq. Gou rox de yienghneix guh dwg siengj hawj vunz nyinhnaeuz de ndei caeuq aeueiq de. Aenvih dinfwngz de bang ndaej caencik beixnuengx, neix hawj bohmeh gou roxnyinh miznaj. De baenz boux lwggwiz ceiq maenhndei vunz ndaw gyog goengnyinh ndeu.

Mwhneix, gyog Ranzlingz dou miz caet hoh, gyoebcomz haj cungj gyaem, mboujgvaq gaenq mbouj baen mwngz gou. Vunzruz Vunzhoeng Bouxcuengh, caeux couh lumj gaeusawz baenzneix heuxgoek heux- nye. Mwngz miz gou, gou miz mwngz, mbouj baen mwngz dwg Cuengh dwg Gun, cij baen gyawj gyae. Mbouj baen ngoenzciet mwngz, ngoenzciet gou, cix dwg caemh hoh doxcomz.

Raq rumz lajmbanj saenqhwng ci daeuj, mak rim bo, haeux rim doengh, ranzbezsu ndaw mbanj aen riengz aen guh baenz, mbanjmbanj doeng goengloh, luengqluengq bu suijniz, lij miz daiyangznwngz lohdaeng dem, banhaemh ronghsaksak, lajmbanj lumj hawsingz. Singhemq dwkgiuz doxdax、sing dopfwngz ngonz heiq、singriu ngoenzciet doxgyaux, gyoeb- baenz vwnzva swnghhoz cien gaiq fanh yiengh. Gij fungsug nduknaeuh caeux couh deng vut bae, vwnzmingz、doxbang、 gagsaenq daeuj dingjlawh.

Gou maqmuengh lwglan ranz- mbanj, ciengxlwenx geiq maenh gaiq goekrag caeuq cingzgamj minzcuz raeuz, fwngz gaem fwngz, sim lienz sim. Youq doxgiet ndawde cienzswnj minzcuz vwnzva, youq doxbang ndawde caemh maeuz fazcanj. Caemhdoih dawz ranzmbanj guh gyaeundei, caemhdoih yiengq siuj- gangh swnghhoz buet baenaj.

（2 sat）

编辑：实习生廖小凤复审：黄慧华终审：蒙树起