Aen Hawciengz Gai Byaek Seizdoeng

来源：广西民族报网

作者：□ Lanz Siujgvangh/兰小框

发布时间：2026-08-26

Haetromh, singzdoeng comz le haujlai vunzguhnaz, gyoengqde daj lajmbanj ganj daeuj hawsingz gai byaek. Dingzlai vunz yungh cisamloek rag, caemh miz vunz yungh mbaq rap, dawz gij byaek ndaw reih, gij gaeq bit ndaw suen daengz singzdoeng gai. Vunzlai doxciuz youq henz roen baij dan, bit gaeq gyaez heuh rox buet haenx cang youq ndaw loengz, byaek heuoiq singjsien baij youq gwnz daeh, nanz mbouj nanz aeu bingzraemx set raemx.

Singzdoeng dwg gih moq, hawciengz lij caengz guhbaenz, gyoengqvunz couh comz youq gwnz roen baij gai, vunz gaicawx yied daeuj yied lai, couh baenz le aen hawciengz gai byaek dangdien ndeu.

Soengq daeglwg daengz hagdangz le, daengngoenz lij caengz swng hwnjdaeuj. Aen seizgan neix, gou haengj daengz aen hawciengz gai byaek byaijbyaij. Seizdoeng aen hawciengz gai byaek, raemxfwi ndatfwdfwd. Gizhaeujok couhdwg dan youzdiuz, aen rek youz ndeu, song aen congz geij aen daengq, caiq gvaqbae dwg geij aen dan baij gai sawzcienz、lauxbaeg、byaekbau. Bangxhenz buzgeq cingq mbik duhbwn, simhoengz yiengq gou hemq naeuz:“Gij mbik ndei roek maenz, daiq byuk sam maenz, aeu di ndeu mbouj?”

Duhhenj maj ndaej menh, seizcin ndaem, mwh baenzsou gaenq dwg seizcou satbyai. Diegbya gahswhdwz, gij faex ndaw bya daengx bi cungj dwg maegheu, gij miuzhaeux ndaw reihnaz engq ndaej yienh’ok seiqgeiq bienqvaq. Seizhah ngamq sou haeuxyangz liux, ganj lij youq ndaw dieg daengj youq, miuz duhhenj couh deq mbouj gib foengx maj okdaeuj, veizciz faenh heu gwnz diegdeih haenx. Sou duhhenj aeu miz rengz hung, sien beng goekrag hwnjdaeuj, saeuj namhgyo roengzdaeuj, gyoeb hwnjdaeuj cap baenz bog, caiq rap baema. Buen daengz gwnz daiz dak, goek dauq gwnz mbaw youq laj, lumj maeuznyaenz nei daengj hwnjdaeuj dak ndit, lienz dak song sam ngoenz, duhfaek couh dek ok duhhenj daeuj. Gij lij caengz dek haenx, couh yungh faex fad, ngaz faex dwg ca hai, fad ndaej youh ndei youh vaiq. Mwh hoengq, gyoengq lwgnyez dawz faexca gaij baenz aen danzgung hungloet, youq ndaw “maeuznyaenz” doxgyaep doxlaeh, gig angqyangz.

Sou le duhhenj, couh yaek daengz gouj nyied cogouj lo. Vunz ciuhgeq gig coengmingz, gyoengqde yungzhab ndei daswyenz、 gijgwn caeuq ngoenzciet, gouj nyied cogouj gwn daxfouh, dwg gij conzdungj dangdieg dou, ngoenzde, daj gwnz bya daengz ndaw mbanj, gizgiz cungj hom duh.

Buzgeq daj laj din dawz gaem goduh ndeu hwnjdaeuj, song ga gap dwk, riengjvaiq mbaet mbaw duh, song sam baez couh rim fwngz, cang haeuj ndaw daeh henz din bae. Riengzlaeng fwngz daj laj daengz gwnz rub baez ndeu, madfwngz nyumx le mokduh, mienh ndeu maegheu, mienh ndeu haumbup, gyaiqhanh mingzbeg cingcuj. Gij duhfaek mbaet roengz- daeuj haenx, cuengq youq ndaw lamz, lingh aen lamz dauq daeh suliu, ndawde dwg duh gaenq bok ndei, gij duh heuoiq bau caengz moz mbang ndeu, miz hom youh mbaeu youh sien.

“Aeu gaen duhbwn ndeu!” “Ndei ha!”

Gou siengj ndei lo, banhaemh caeuq mehyah lwgnyez itheij bok duhbwn. Doq byaij doq yawj, ndaw sing hemq、ndaw raemxfwi, gyae’gyae yawjraen geij aen namzgva. Gva dwg gij gva geq henjgim, baenz aen baenz aen comz youq laj din daxau. Gij naeng namzgva na, fwn rwed ndit dak hix mbouj yungzheih vaih, dwg gij doxgaiq ceiq ndei cwkrom gvaq seiznit.

Namzgva maj ngaih, henz mieng、din bya, giz dieg miz namh haenx, seizbienh vat aen gumz ndeu, vut geij naed ceh roengzbae, vanq saek di daeuh, caiq gvat di namhfouz daeuj goemq ndei, couh mbouj yungh caiq leixlangh. Fwncin gvaq le, couh did geij go miuz, caiq gek geij ngoenz, gomiuz couh dauqcawq dangh, youq baihlaeng langh gij va lumj aenlingz. Nienzdaih gijgwn noix youzsij, vunzmbanj mbouj haengj gwn nyod gva, caj gij vah hung hai ndaej cingq gyaeundei seiz dawz roengzdaeuj, cauj roxnaeuz cawj, unq hom raixcaix, mbouj yungh cuengq haj couh ndaej bienqbaenz cungj gijgwn ndei ndeu. Gangj daengz vameh, aeu siujsim ganqhoh, naihsim deq va giet mak iq, bienq hung、bienq heu. Aen seizciet sou gva raez, daj iq lumj gienz, daengz hung lumj aen bat, mboujlwnh seizlawz cungj ndaej sou, dangguh gij doxgaiq gwn, cauj cawj cungj feih. Caiq hawj gyoengqde maj geij ngoenz dem, suk gaeuq ndit fwn raemxraiz, doengh gij mak miz hau miz heu haenx, doeklaeng cungj bienqbaenz aen gva hung henjrwkrwk. Gva cug gaenq mbouj doek, daiq fagliemz, gvej bae diuz gaeu reuq, gaenq lienz gva daeh baema, cungj gva geq neix, ndaej ce song sam bi, ceiq hab cawj cukgva、guh bingjgva.

Gou maeuq roengzdaeuj, iet fwngz bekbek namzgva, youh rongh youh lwenq, gij gva neix liz le namh lij sien lumj caengz mbaet. “Gij haeuxyangz ngamq mbaet haenx, gaen 5 maenz.” Aen lahbah lij cuengq bae cuengq dauq, dan haeuxyangz gaenq ngaiz humx ndaetndingnding.

Gou caenx youq ndaw vunzlai, menhmenh baenaj, ndit ciuq coh naj, ndawbiengz gizgiz hoenghhwdhwd.

编辑：实习生石喜丹复审：黄慧华终审：蒙树起