Gaemh Yahnoix - 广西民族报网

Gaemh Yahnoix

来源：广西民族报网

作者：□Lij Yungzcangh/李雄章

发布时间：2026-08-26

Gvan Fangh Li heuh Cangh Vaz， dwg boux lauxsae gauhcungh ndaw yienh ndeu, baez miz doengzsaeh lwnh miz byawz byawz bae baihrog ra dahyoux seiz, Fangh Li cungj riuhoho naeuz:“Lijdwg Lauxcangh laeng gou hawj vunz cuengqsim, vunz soh, baenzngoenz mboen mbouj ok coenz vah ndeu, couhsuenq gou hawj de bae rog ra lwgsau, de hix ra mbouj ndaej.” Miz doengzsaeh bouxsai yed de naeuz:“Neix caen mbouj ndei gangj bw, baez vunz naeuz, duzma mbouj heuh cij haeb vunz.” “Deuz, mwngz cijdwg ma ne.” Fangh Li riu ndaq coenz he, lijdwg mbouj dawzhaeujsim.

Hoeng, Lanz Siujgen dwg boux hujgeiq ndei de, gvan Lanz Siujgen youq rog ra yahnoix song boux doxliz lo, ndaw sim Fangh Li cix miz di vueng——Gvan Siujgen seizgonq roxnyinh hix gig soh ha! Gvaqlaeng, Siujgen youq gwnz veizsin mbouj daengx yiengq de daejlwnh, naeuz bouxsai cungj mbouj miz vunz ndei, lij youq gwnz muengx fat aen saeh moq lauxsae youq rog riengz hagseng ndei haenx hawj de, gyoeksingj de dawzhaeujsim, Fangh Li couh ciemhciemh dungxmbouq hwnjdaeuj. De ngeixdauq gij saeh gvan swhgeij bingzseiz mbouj dawzhaeujsim haenx, ndaw sim doeksaet: Bouxgvan vihmaz bingzseiz cuengqhag le cungj dauq ranz gig haemh? Singhgiz roek caeuq ngoenzsinghgiz vihmaz cungj ciengz- seiz buet bae lajmbanj? Cam de cungj naeuz bae guh gunghcoz, caen miz baenzlai hong ha?

Ngoenzde singhgiz haj, daengz banringzgvaq cuengqhag haujlai nanz raen Cangh Vaz lij caengz dauq ranz, ndaw sim Fangh Li mbouj onj, de gietdingh bae yawjyawj Cangh Vaz lij youq hagdangz guh gijmaz.

Fangh Li gwih aen cidienh ok dou, cib lai faen cung bae daengz hagdangz gvan de. Neix de daeuj gvaq, rox ranzbanhgoeng gvan de youq gizlawz.

Haeuj daengz hagdangz, de cigsoh bae daengz laeuzbanhgoeng ngeih laeuz, de yaemj din yaemj fwngz baenq daengz baihlaeng gvan de, aendaiz de nemz conghcueng, gek conghcueng yawj haeujbae, raen gyoengq lauxsae gaenq bae ranz caez lo, lij ndei, mbouj raen hagseng dahsau youq ndaw. Hoeng caiq baez cim, ndaw sim Fangh Li youh mbouj onj hwnjdaeuj——Cangh Vaz mbouj bwh go gaij cozyez, dauq dwg youq gwnz veizsin dennauj riengz vunz gangjgoj, yawj siengqgyaeuj doiqfueng dwg dahsau lengj he. Yienznaeuz yawj mbouj cingcuj songde gangj gijmaz, hoeng Fangh Li lijdwg hozndat dangqmaz: Ndei ha Cangh Vaz, mwngz cungj naeuz miz gunghcoz, riengz lwgsau lengj gangjgoj couhdwg gij gunghcoz mwngz? Nanzgvaiq cuengq- hag le lij mbouj nyienh bae ranz! Fangh Li ndatheiq dwk caen siengj cung haeujbae ndaq Cangh Vaz ciengz he, hoeng de siengj seizneix youq hagdangz nauh hwnjdaeuj doiq byawz hix mbouj ndei, couh nyaenxhoz yomjyomj lizbae.

Dauq daengz ranz, Fangh Li roxnyinh aen siengqgyaeuj dahsau haenx miz di sugnaj, ngeix yaep he, de bae gyaqsaw Cangh Vaz fan yaep he, caen fan raen mbaw siengq hagseng bizyez he ndawde miz dah hagseng haenx, lij youq baihlaeng rox dah neix heuhguh Veiz Siujyingh. Yawj daengz neix, Fangh Li daenghnaengh roengz gwnz sahfaz bae——Nanzdauh bouxgvan caendwg riengz dah hagseng gaxgonq neix ndei ha?（1）

编辑：实习生石喜丹复审：黄慧华终审：蒙树起