Miz Yienz

来源:广西民族报网

作者:□ Veiz Vwnzgauh/韦文高

发布时间:2026-08-24

Sai:

Gyang daihloh raen va,

Lajbya nyangz raen nuengx;

Guh maz sim nyaenx vueng,

Nuengx dwg fuenglawz vunz.


Sau:

Nuengx dwg vunz baih dah,

Bae dajgoeng dauqma;

Hai ci daengz lajbya,

Ci duj gaz gyang loh.


Ranz yienznaeuz mbouj gyae,

Hai ci bae ndi ndaej;

Byaij loh dauq yungzheih,

Ci youq neix simfanz.


Sai:

Gawqyienz dwg yienghneix,

Hai ci bae ranz gou;

Dieg cuengq ci miz raeuh,

Fuengbienh youh ancienz.


Langh nuengx mbouj yiemz eiq,

Youq ranz beix yiet din;

Ranz beix miz dieg ninz,

Nuengx cuengqsim haemhneix.


Sau:

Beix mwngz gangj yiengh neix,

Nuengx saeq cix angq lai;

Nuengx dauq cam beix gvai,

Geijlai vunz ndaw ranz.


Sai:

Nuengx cam daengz ranz beix,

Caen saedseih mingh hoj;

Daj iq guh gya boh,

Itloh daeuj song vunz.


Sau:

Daekcoih lai le beix,

Nuengx saeq vah daiq lai;

Ngoenzneix mbouj wnggai,

Muengh beix gvai gaej gvaiq.


Sai:

Nuengx gaej yienghneix gangj,

Suenq mwngz cam ndaej deng;

Raen mbat it najseng,

Vah bak bengz hix doiq.


Sau:

Beix mwngz gangj yienghneix,

Nuengx saeq youh caiq cam;

Mehlaux mwngz ndaw ranz,

Angqcoux hek daeuj lwi.


Sai:

Gangj daengz daxmeh gou,

Mwngz couh mbouj yungh heiq;

Bak hom sim engq gyaez,

Mwngz bae daengz couh rox.


Sau:

Nuengx bae cix siengj bae,

Youh lauheiq vunz gangj;

Naeuz gou boux liuzlangh,

Laih raeuz ndang mbouj seuq.


Sai:

Nuengx mwngz mbouj yungh heiq,

Miz gou beix gangj vah;

Naeuz mwngz vunz baih dah,

Lwg mehbaj ranz Lamz.


Sau:

Docih mwngz beix gvai,

Nuengx simhai dangqmaz;

Raen ranz mwngz gwnz laj,

Nuengx naj na youh cam.


Mwngz ndaej geijlai bi,

Miz naeuz caengz miz youx;

Ranz mwngz baenzneix fouq,

Byawz daeuj raen mbouj maez.


Sai:

Nuengx gaej yienghneix gangj,

Yied gangj gou yied lau;

Miz haujlai dahsau,

Naeuz gou mbaeu vunzbaz.


Cib lai bi neix daeuj,

Gou ngaem gyaeuj guhhong;

Raen vunz ndi gamj dongx,

Najmong gvaq ndwenngoenz.


Sau:

Beix mwngz mbouj yungh yuenq,

Caenhguenj cuengq diuz sim;

Namhhenj bienq baenz gim,

Ndoi rin bienq baenz bauj.


Sai:

Gou rox nuengx simndei,

Siengj loengh beix sim’angq;

Saedvah doiq mwngz gangj,

Dai baenz fangz hix cienh.


Sau:

Gangj bae youh gangj dauq,

Vah youh gangj dauqma;

Beix ndi siengj guhgyaj,

Dangqnaj nuengx gangj mingz.


Sai:

Gou gaenq lwnh mwngz gvaq,

Dahdah cungj yiemz gou;

Cienh baenz duz gungqsou,

Gyawz dwg gou yiemz vunz.


Sau:

Dingq gangj daengz gizneix,

Couh rox beix simndei;

Cingznyienh cihgeij vei,

Mbouj siengj bae haih vunz.


Docih mwngz beix gvai,

Nuengx simhai lumj va;

Lwnh mwngz nem mehbaj,

Gou siengj haq ranz mwngz.


Meh:

Bouxcoz gaej luenh gangj,

Gij vah sam mbouj seiq;

Ranz baj hoj baenz neix,

Mwngz youh gyaez gijmaz.


Sau:

Gou gyaez baj simndei,

Gou gyaez beix simsoh;

Gangj vah ndi goemqndoj,

Gwj cigsoh gangj mingz.


Caiq gyaez gyoengq yiengzmbej,

Sanq geh bya laeng mbanj;

Engq gyaez gyoengq bit hanq,

Sanj rim doenghnaz laux.


Meh:

Gou caen ngeix mbouj doeng,

Coengzlaiz caengz raen gvaq;

Mwngz youq mbanj baih dah,

Guh maz mwngz youh rox.


Sau:

Nyuenz hoj vunz cungj raen,

Neix baenz fouq vunz rox;

Baj gungzhoj bienq fox,

Neix gyae gyawj riuzmingz.


Meh:

Gawqyienz mwngz rox neix,

Song sou caez doxyaeng;

Neix dwg sou yienzfaenh,

Ngoenzlaeng caux seiqgyaiq.


Sai:

Daxmeh gangj yienghneix,

Heuh raeuz caez doxyaeng;

Beix cam mwngz nuengx ngaenz,

Mwngz naeuz baenzlawz yiengh.


Sau:

Vahsaed lwnh mwngz beix,

Nuengx saeq senq fangzhwnz;

Siengj nem mwngz beix lwnz,

Lajmbwn caux seiqgyaiq.


Sai:

Docih dien caeuq deih,

Bang raeuz daz maehoengz;

Boux youq sae youq doeng,

Ngoenzneix ndaej baenz doiq.


Sau:

Daj ngoenzneix doxbae,

Raeuz couh seih gvanbaz;

Beij baenz doiq mbungqmbaj,

Mbin gvaq biengz gvaq gyaiq.


Sai:

Daj ngoenzneix doxbae,

Mbouj caiq heiq caiq fanz;

Song raeuz baenz gyaranz,

Gvaq gvanbaz saedceij.


Meh:

Raen daengz sou ngoenzneix,

Daxmeh ceiq sim’angq;

Gwn raemxheu hix van,

Deqcaj lan rim ranz.


Sau:

Miz yienz le miz yienz,

Raeuz cienz ranz sim’angq;

Miz riuriu gangjgangj,

Fwen danq dangj aencingz.


Sai:

Docih dangj cwngfuj,

Bangfuz raeuz ranzhoj;

Dangq fangzhwnz guh loq,

Neix bienq fox vutgungz.


Sau:

Docih dangj cwngfuj,

Fuzbinz cing youh cunj(cinj);

Neix cienzbouh duetgungz,

Buet gwnz loh siujgangh.


Hab ciengq:

Gyo’mbaiq dangj cwngfuj,

Guh gaijgwz hailangh;

Dangj daiq bae diendangz,

Gyang mbwn gwnz ndaundeiq.


编辑:实习生 廖小凤  复审:黄慧华  终审:蒙树起