Raemxrongz Fouz Cingz Vunz Miz Cingz

来源：广西民族报网

作者：□ Cungh Hihcwngh/钟希增

发布时间：2026-08-20

Mboengqgonq, Gvangjsih Hwngz- couh raeuz deng cai raemxdumh youqgaenj, daengx guek gak dieg doxcanj yungh mbouj doengz fuengsik daeuj bangcoengh bouxdengcai, gij saehcik gig gamjdoengh vunz. Gou gaengawq gij baudauj gwnz muengx, cingjleix guh baenz di fwen neix, faenyiengj hawj daihgya yawj.

It、Daengx Guek Daeuj Gvaqsim

Raemxrongz dumh Hwngzcouh,

Daengx guek daeuj gvaqsim,

Raemxda doek byaidin,

Cungj sim’in simget.

Baihdoeng rox baihsae,

Gizgyae naeuz gizgyaej(gyawj),

Doxcanj gej bakdaeh,

Gien haej(hawj) ngaenz lailai.

Hanz Hungz Gihginhvei,

Seiq bak fanh ok fwngz,

Vwnzyi cibbet vunz,

Caemh iet fwngz daeuj coengh.

“Nungzfuh Sanhcenz” baenz,

Gien ngaenz hawj cienfanh,

“Mizsez Bingh” lauxbanj,

Sangjswt hai daehbau.

Ngeih、Yinghyungz Daeuj Diegcai

Caicingz dwg minghlingh,

Yinghyungz daeuj diegcai,

Cisiuhfangz lailai,

Soh hai daengz Hwngzcouh.

Sinhcin “Doih Gunghyangz”，

Gangz ruz bae ciengjgouq,

Ngamq senj buek okdaeuj,

Youh dauq vad haeujbae.

Fuzsanh “Nanzswhdui”,

Rox miz geij saeqsim,

Umj ok laeq lwgnding,

Youh bae cing bouxgeq.

Vuzyinzgih “Yilungz”,

Ndaej fukdoeng saenqhauh,

Bouxak sam daegmbauq,

Seih “lauxbiuj Gvangjdungh”.

Vuzyinzgih gvidingh,

Mbouj cinj aeu dap vunz,

Sengmingh hung gvaq mbwn,

Gouq vunz gonq caiq gangj.

Gyoengq “yigungh” Candouz,

Sim you dieg cainanh,

Daeuj Gvangjsih roengzmbanj,

Doxcanj bae gouq vunz.

Vacouh aen dangzcangj,

Soqlaiz gangj ngeihcingz,

Senq bangnungz okmingz,

Youh naeksim gien huq.

Gveicouh Hoz Yuisiengz,

Cien hai gezdujgih,

De daeuj daengz Gvangjsih,

Coih gij roen diegcai.

Cidaehhuq hoj byaij,

Gyolaih gyoengq bouxcoz,

Ciyencej doengzhoz,

Aeu mohdoz daeh soengq.

Mbanj dumh noix gaiqgwn,

Bak geij vunz deng iek,

Ciyencej caemciek,

Yungh mbaq gwed soengq bae.

Sam、Cwt Dem Cwt Caencingz

Liengz cihsuh caen nyaengq,

Gyaep gizdaemq senjheiz,

Goenggeq nyangq mbouj ei,

Nyengh bae ram de byaij.

Dangjyenz Cinz Vanbingz,

Caenh gvaqsim vunzmbanj,

Daemzbya deuz geij fanh,

De cij ganj ma laengz.

Cug ranz roq dou hemq,

Heuh senj giz ancienz,

Caengz ndaej gvaq ci yieng,

Baenz cien vunz senj liux.

Feihsouj Liengz Yaucwngz,

Fwngz loengh vuzyinzgih,

Doeklaeng it gunghlij,

Daeh gijyungh gijgwn.

Gwnzmbwn vuzyinzgih,

Gwnzdeih cix mohdoz,

Gvaq geuq gij roen goz,

Bouxcoz mbaq gwed byaij.

Ndoi lak mbouj doeng roen,

Dangh boengz cij byaij gvaq,

Doenghyiengh gwed gwnz mbaq,

Gavaq cungjdwg naez.

Ahlijmuz Sinhgyangh,

Daeuj ndaw gvangx Luzlanz,

Fat ngaenz hawj gak ranz,

De bang boux daengz boux.

Bonjdieg bak lai vunz,

Hwnz ndeu comz itheij,

Camgya Liengz Veizleij,

“Giuyenzdui gwnzmbwn”.

Cizswngh feihgih daeuj,

Daeh huq haeuj mbanj bae,

Hemq coenz dinj coenz raez,

Faenh gyaez soengq daengz doh.

Gizanceiq vunzlai,

Byaekngaiz ndatfwdfwd,

“Doih Huznanz” nyaengqnywt,

Cwt(cit) dem cwt caencingz.

Seiq、Mbouj Ndaej Soeng Saek Yaep

Laeq lwgnyez cimh daeuj,

Bang yaeuj hwnj yaeuj roengz,

Mwngz yawj Lij Yinhmungz,

Doengz bouxlaux roxsaeh.

Cwngfuj anceiq ndei,

Huq yungh caezcupcup,

Congzcipdoeb moqsup,

Ndaej hup ndaej hai ninz.

Gouhgih hwnzngoenz nyaengq,

Cagaenj coih loh doeng,

Gyuek daengx ndang cungj boengz.

Mbouj ndaej soeng saek yaep.

Vuzyinzgih “Yilungz”,

Ndaej ciepdoeng saenqhauh,

Mied “saenqsik guhdauj”,

Baujciz ndaej lienzhaeh.

Gwnz mbaq gwed gaiq naek,

Baegnaiq byaij baenz hwnz,

Seiz mbouj seiz raq fwn,

Bwn’gyaeuj dumzsubsub.

Mohdoz byaij diegcai,

Hai roenboengz raeuzrad,

Ci gyuek naez rimsad,

Loek doq vat doxbae.

Canjci yiengjhumhum,

Lumj saenzsien hai roen,

Canj boengz youh vat doem,

Coih roen mbouj ndaej yiet.

Boux Cunghgung dangjyenz,

Dangjsing hen ndaej onj,

Ciengjyiemj goq vunz gonq,

Bonjfaenh goq cimhlaeng.

Haj、Ciengzmienh Gamjdoengh Vunz

Ndaem roengz giz raemxlaeg,

Laez bingz aek bingz gangz,

Gaex ruz hemq sing sang,

Cug ranz bae saeujgouq.

Bouxgeq cik ga in,

Yamq din mbouj fuengbienh,

Boux siuhfangz cienzsienq,

Menhmenh aemq hwnj ruz.

Bungz boux niuhdoegcingq (niuduzcwng),

Ruzgvaidingj daeuj doz,

Lau binghcingz fazcoz,

Soh doz bae yihyen.

Sam vunz gyaeng ndaw ranz,

Siuhfangz haeujbae gouq,

Ndaej ancienz okdaeuj,

Bouxboux angq lailai,

Naihlaux gvaq goujcib,

Saenzdigdig ndaw ranz,

Gyoengq siuhfangz daeuj ram,

Ndaej bingzan duetyiemj.

Dieg anceiq donqgwn,

Rox miz vunz soengq daeuj,

Yienznaeuz ndi noh laeuj,

Cix ndaej raeuj sim vunz.

Baez fukdoeng saenqhauh,

Seiqlengq bauq bingzan,

Mehyah ra bouxgvan,

Lwglan ra buzgeq.

Roek、Gyaranz Dauqcungz Caux

Ngoenz raemxrongz doiq bae,

Boengznaez cwk rimrad,

Canjci yiengjcadcad,

Vunzhong mad riengzlaeng.

Hong bae hong youh daeuj,

Raemx roengz haeuj fangzyiz,

“Buhhau” daeuj cezliz(cieplig),

Gizgiz guh siudoeg.

Cing boengz le saj yw,

Mbouj hawj lw saek gak,

Hagdangz fuk haihag,

Daklaih gyoengq yinghyungz.

Roen vaih giuz youh doemq,

Gihgai coemj daeuj bang,

Dauq coih caen seih nanz,

Doxbang guh ndaej ak.

Raeuz mbouj lau hojnanz,

Gyaranz dauqcungz caux,

Miz cwngfuj baenghgauq,

Itdingh dauq guh baenz.

Caet、Fwn Gvaq Raen Duzdoengz

Song Gvangj caemh diuz dah,

Cingzngeih dij gvaq gim,

Song dieg vunz naeksim,

Fai doemq cingz mbouj doemq.

Gveicouh gouhgih bang,

Huznanz guh cawjhaeux,

Daengx guek caez doxcaeuq,

Cingz raeuj doh Cunghvaz.

Geiq haeuj uk haeuj gyaeuj,

Hwngzcouh mbouj rox lumz,

Langh biengz gipyungh vunz,

Yaek nyigrumz bae gonq.

Fwn gvaq raen duzdoengz,

Raemx roengz raen hamqdah,

Caihaih youqgaenj gvaq,

Baenaj dingh dauq hwng.

Fwenhaenh duenh doek duenh,

Gyonj gyaeb coenz ndeu naeuz,

Gyo’mbaiq dangj guh daeuz,

Coengh raeuz dingj caihaih.

编辑：实习生石喜丹复审：黄慧华终审：蒙树起