来源：广西民族报网
发布时间：2026-08-20
Ligliengh gunghyinz daih,
Hawj seiqgyaiq bienq ndei,
Didez caeuq feigei,
Huqndei gyoengqde caux.
Gunghyinz guh goengloh,
Sinhoj lae hanh lai,
Deng ndit dak fwn sai,
Seiqgeiq haisim dingj.
Gunghyinz guh dietloh,
Ok sojmiz ligliengh,
Caeuq seizgan doxciengj,
Loqsiengj Cungguek giengz.
Goengloh dietloh lai,
Cienz seiqgyaiq rangh doh,
Daiq lwgminz bienq fox,
Hawj guekcoj fouqgiengz.
Gunghyinz ligliengh daih,
Gwnzhaij gaq ndaej giuz,
Yienghyiengh hong gwn siu,
Ciuhvunz gwn ndaej hoj.
Gunghyinz caux giuz moq,
Ciuq gohyoz sezgi,
Caengzgwnz buet heiqci,
Hojci（hojceh） bongh baihlaj.
Ndawsingz guh giuzgyaux,
Ngauj bet fueng seiq mienh,
Vunz ci byaij fuengbienh,
Ancienz youh doxhuz.
Gunghyinz guh ranzlaeuz,
Gyaeundei youh daihfueng,
Sam mienh ndaej hai cueng,
Seiq fueng ronghsaksak.
Gunghyinz gaq dienhganj,
Hanh lae doek lajnamh,
Ngoenz guh haemh youh ganj,
Rizdin louz mbanjsingz.
Seizhah ndi lau ndit,
Seiznit mbouj lau nae,
Ngoenz doekfwn hix bae,
Hawj seiqgyaiq soengq rongh.
Ndawde boux hamh diet,
Siet gij rongh saeklamz,
Hamh ndei diet caeuq gang,
Vangraeh bingz youh maenh.
Gunghyinz bae caep dap,
Hab doz youh haeuj ceih,
Gyoengqde goengfou ndei,
Guenjgeiqniemh daengj cab.
Ndawde boux canghcaet,
Saekndei rox dapboiq,
Dwk lai roxnaeuz siuj,
Giuj nyumx doz lumj man.
Gunghyinz vat cingjyouz,
Mbouj aixlaix di ndeu,
Lae hanhhenj hanhheu,
Vihliux cienz Cungguek.
Gunghyinz vat cingjgvangq,
Sing sang deih giuz saenq,
Yied vat yied cingsaenz,
Gvangq gaen fwngz hwnjdaeuj.
Gunghyinz rox caux ci,
Lizsij beksingq sij,
Gwnzbiengz gak cungj ci,
Diddid singgo rwenz.
Seizcoz youq dieghong,
Naj mong vih ndit dak,
Lix ndaej da ronghsak,
Cikgienj dag ciuhvunz.
Najhaengz coh namhhenj,
Enj hwet coh gwnzmbwn,
Seiz bae dieg fouz vunz,
Dauqma mbwn rongh daeng.
Gunghyinz ligliengh daih,
Seiqhaij cungjdwg ranz,
Mizseiz ngoenz sam can,
Gaem vanj youq diendeih.
Daenj aen mauh ancienz,
Loqsiengj youq gwnzbiengz,
Seiqvunz aen fuengyiengq,
Hauxseng nyienh hawj dangj.
编辑：实习生 廖小凤 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291
汉文版电子邮箱：gxmzbzb@163.com 壮文版电子邮箱：gxmzb2@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com