Yungh Sim Dajndaem, Yungh Rengz Aeundaej

来源：广西民族报网

作者：□ Lij Sunfwnh/李顺芬

发布时间：2026-08-20

Vahsug naeuz “faen dajndaem ndeu, faen souhaeuj ndeu”, coenz hauq neix naeuz raeuz yungh rengz caeuq souhaeuj doxheux doxriengz. Youh miz vunz ciuhnduj naeuz “gaej cam souhaeuj, danh cam dajndaem”, coenz gangj neix naeuz raeuz guh vunz aeu yawj gyae yawj gvangq, gaej cij yawj doiqnaj. Song coenz vah neix yawj daeuj lumjbaenz doiqdingj, danh dauhleix doxheux doxlienz, son raeuz guhlawz guh vunz guh saeh, guhlawz guh gwn guh daenj.

Faen dajndaem ndeu, faen souhaeuj ndeu, hawj raeuz miz saenqsim giendingh byaij baenaj. Lajmbwn gwnzdeih mbouj miz gaiqmaz dwg mbouj yungh rengz cix gag ndaej gag baenz, sojmiz souhaeuj cungj dwg ngoenz dam ngoenz dingj baenaj, ngaem gyaeuj mbaetmbaet guh caengj ndaej. Lwgsaw doegsaw, yaek doeg ndaej baenz gauj ndaej ndei, cix aeu yunghsim maeq, dingq lauxsae gangj, guh ndei cozyez, hag ngoenz dam ngoenz. Danghnaeuz ngoenzngoenz liuhlah, lujlaj gvaq ngoenz, cix nanz ndaej hai va baenz mak. Guh gwn gvaq ndwenngoenz, raeuz guh vunz sim ndei sim soh, yienghneix bouxwnq caemh doiq raeuz ndei; raeuz guh saeh maenhsaed, mbouj luenh guh luenh hoed, bouxwnq cix aeueiq raeuz. Gij dauhleix neix naeuz raeuz, yungh rengz mbouj lau begsai, yamq maenh menhmenh byaij baenaj, couh miz ngoenz maqmuengh baenz mak baenz aen, gaiq neix cixdwg rengz goekraemx byaij bae gyae baenaj raeuz lo.

Gaej cam souhaeuj, danh cam dajndaem, dwg son raeuz guh vunz aeu yawj gyae yawj gvangq. Ciuhvunz miz ndaej miz ndwi, miz loem miz leih, miz hwnj miz roengz, yungh rengz mbangjbaez mbouj doq raen byaibaenz, okrengz mbangjbaez goj mbouj sikhaek habhoz. Doegsaw gaujsi saekseiz rox ndaej faen noix, ndwenngoenz saekseiz bungz okrengz mbouj raen byaibaenz. Danghnaeuz raeuz da cim byaibaenz, nyapnyuk seiz ndeu ndaejndwi, cix hawj vunz baenz foz baenz naiq, mbangjbaez lij hawj vunz swhgeij simnyap. Danh boux yawjnaek dajndaem, cix mbouj rox ngaiz ndaejndwi doiqnaj luenh sim, gyoengqde dingh sim guh ndei saeh doiqnaj, byaij ndei roen lajdin, mbouj vih seiz ndeu ndaejndwi doeknaiq, mbouj vih byaibaenz doeklaeng gwnheiq. Guh ndei “dajndaem”, duenhlienh swhgeij, youq gij “dajndaem” neix baenz fagcax swhgeij raehrwd, lienh sim lienh ndang, ngoenzlaeng ngoenzmoq gag rox aeundaej gaiqndei.

Dajndaem caeuq souhaeuj doxbouj doxbang, noix gaiqlawz cungj mbouj ndei. Vit dajndaem yawjnaek souhaeuj, daengz laeng cungjdwg da sang gvaq gyaeuj, saeh mbouj baenz saeh; cij rox ngaem gyaeuj dajndaem, mbouj leixlangh loeng deng, mbouj yawj swix gvaz, goj hawj vunz mwnhsaengsaeng, lauq ciuhvunz. Vunz raeuz guh vunz, saenq okrengz cix miz hoizyaem, cingcuj swhgeij yaek aeu gaiqmaz cix roengzrengz bae guh; goj aeu sim gvangq sim langh yawjmbaeu ndaejndwi, dinghsim “dajndaem”, daezswng swhgeij, mbouj vih baez saetleih ndeu luenh sim.

Roen gyae youh gumzgamx, byaij bae cix daengz. Ngoenzlaeng ngoenzmoq, raeuz wngdang dawz ndei simnduj “faen dajndaem ndeu, faen souhaeuj ndeu”, dawz ndei coenz “gaej cam souhaeuj, danh cam dajndaem”, okrengz gaenx guh, yamq maenh baenaj, hawj maqmuengh hai va baenz mak.

编辑：实习生廖小凤复审：黄慧华终审：蒙树起