Raemxrongz Dumh Mbwn Hix Mbouj You

来源：广西民族报网

作者：□ Yiz Ciz/余执

发布时间：2026-08-20

Bineix bi duzmax,

Byajraez fwn cix daeuj,

Geij giz Guengjsae raeuz,

Raemx dumh gyaeuj dumh rieng.

Meijsahgwz Daizfungh,

Cung daengz Guengjsae daeuj,

Rumz gap fwn soen gyaeuj,

Lwgminz raeuz bungz nanh.

Ngoenz roek hauh banhaet,

Fwn doek naek doek na,

Seiqlengq hemqcaca,

Lumj farek goemz deih.

Doek geij ngoenz geij hwnz,

Aen mbwn lumj hai congh,

Banngoenz mbouj raen rongh,

Byonghhwnz fwn mbouj dingz.

Fwn doek lumj dauj raemx,

Doxgaiq laemx roengz namh,

Hai dou mbouj ndaej yamq,

Miz ci mbouj gamj hai.

Fwn bongx gofaex raek,

Rumz baet gomak laemx,

Gizsang caeuq gizdaemq,

Raemx seiqlengq seiq dumh.

Ranzdaemq mbouj raen maeuz(dingj),

Laeuzsang mbouj raen dingj,

Bouxgeq caeuq lwgnding,

Aen sim cieglele.

Raemxrongz daeujhumhum,

Cung gvaq rungh gvaq mbanj,

Doenghgo deng cung sanq,

Gyaranz deng bongj bae.

Raemxrongz daeujhumhum,

Cung gvaq ndoi gvaq bya,

Ndaw lueg bienq baenz dah,

Ndaw bya bienz baenz haij.

Raemxrongz daeujhumhum,

Cung gvaq roen gvaq gai,

Gizgiz deng cung vaih,

Gaigai deng dumh caez.

Raemxrongz yak lailai,

Cung gvaq gai gvaq loh,

Sengqlengq dengj lumj mboq,

Raemx dumh doh ndaw singz.

Mizmbangj boux ninzndaek,

Haet hwnq raemx dumh ranz,

Gyanggai raemxrongz fan,

Simfanz mbouj miz vah.

Mou fouz lumj mbawfaex,

Gaeq bae lumj namhsa,

Daengz duzbit duzma,

Caiq ra mbouj ndaej dauq.

Cihung ceh ndaw raemx,

Ciiq laemx ndaw fwn,

Namhsaeq caeuq rinhung,

Cung daeuj lumj mbwn doemq.

Ranziq hix deng cung,

Ranzhung hix deng doemq,

Yied yawj sim yied soemj,

Ra oemj(souh) gwn mbouj miz.

Doxra saenq mbouj doeng,

Fwen roengz byaj youh raez,

Gizgiz raemxrongz lae,

Okbae couh ce mingh.

Raemx dumh daengz ndaw mbanj,

Gizgiz fan daihlangh,

Raeuz caiq miz laeuzsang,

Ndoj ndang sim hix diuq.

Raemxrongz gvaq lajdin,

Sim’in lumj mid heh,

Doxgaiq deng raemx ceh,

Heuh meh mbouj ok sing.

Gohaeux ngamq ok faen,

Gomaenz ngamq roengz rag,

Raemxrongz bonghcagcag,

Ciengx bak mbouj miz haeux.

Gunghcangj deng raemxdumh,

Lumh mbouj ndaej yiengh maz,

Naemj buekmingh bae ra,

Raemx dumh bya dumh rungh.

Reihnaz deng cung vaih,

Gyang haw ndaej hai ruz,

Mbouj gangj naeuz doihduz,

Bak huq mbouj lw yiengh.

Ra haeux ngaiz mbouj cawq,

Hozhawq fouz raemx gwn,

Ngoenzneix youq lajmbwn,

Miz vunz nanz baenz mingh.

Fwn yied doek yied lai,

Fai suijgu deng lak,

Raemx hung baez hai bak,

Bonghcagcag okbae.

Go faexhung boed rag,

Ranzlaeuz lak roengz bingz,

Daengx bouxmbanj bouxsingz,

Sengmingh hix nanz hoh.

Raemx dumh daengz hagdangz,

Bouxboux nanz ok dou,

Hagseng simdaeuz byouq,

Lauxsae youq mbouj onj.

Raemxrongz haenq cix haenq,

Maenj mbouj doengh Guengjsae,

Daengx vunz cungj hwnj caez,

Doxnaeuz bae ciengjgouq.

Raemxrongz naek cix naek,

Haep mbouj ndaej Guengjsae,

Daengx vunz cungj hwnjbae,

Caezsim hoenx raemxrongz.

Gyoengq siuhfangz cansw,

Mwh yiemj ndang mbouj doiq,

Gaej yawj nienzgeij oiq,

Baizdoih bae gouq vunz.

Gyoengq cansw siuhfangz,

Gwnz ndang miz ceiqheiq,

Raemxrongz dumh bingz deih,

Swhgeij cung bae gonq.

Gouq ndaej boux lwgnyez,

Mbouj ce boux mehbaj,

Ciep aeu boux baihlaj,

Lij ra boux ndaw raemx.

Dwggyaez gaijfangginh,

Buekmingh gouq lwglaenj,

Raemxrongz daeujfaenfaen,

Daraen mbouj suenqmingh.

Gaijfangginh daeuj daengz,

Raemx gyaeng mbouj ndaej de,

Cung bae gouq bouxgeq,

Lumj gouq meh ndaw ranz.

Gaijfangginh ak lai,

Raemx daih de mbouj heiq,

Beksingq bungz ngoenzneix,

De geiq ndaw simdaeuz.

Gyoengq dangjyenz ganbu,

Gangj daengz couh guh daengz,

Raemxrongz mbouj doiqlaeng,

Baengh gyoengqde ciuqgoq.

Boux dangjyenz bae gonq,

Ndonj gvaq gungx youh gungx,

Ndaw raemxrongz miz vunz,

De hwnjbae gaxgonq.

Mienh geizdangj bae gonq,

Fouz vunz ndonj dauqlaeng,

Raemxrongz baez daeuj daengz,

Mboujcaiq yaeng baez ngeih.

Ganbu mbouj doeklaeng,

Raemx daengz couh hwnjbae,

Aeu aen ndang swhgeij,

Gouq ndaej vunz couh angq.

Gyoengq canghyw mizsim,

Haidin bae doxcoengh,

Raemxrongz mbouj doiq roengz,

Mbouj doenghdin dauq dieg.

Ruzcunghfungh(冲锋舟) hai bae,

Gyae’gyae hix ndaej gvaq,

Cunz bae gwnz bae laj,

Ra gouq vunz gaxgonq.

Ruzcunghfungh hai daeuj,

Gouq vunz youh soengq gwn,

Lwgminz gyang raemx ndwn,

Gijgwn soengq daengz fwngz.

Vuzyinzgih(无人机) engq ak,

Cuengq cag bae gouq vunz,

Baenzngoenz mbin gwnzmbwn,

Gouq vunz mbouj yietnaiq.

Guengjsae raeuz bungz nanh,

Cien fanh vunz venj sim,

Geijlai vunz mbouj ninz,

Geiq beksingq ndaw dungx.

Boux miz cienz soengq cienz,

Boux miz mienh soengq mienh,

Bouxboux ndaw sim nyienh,

Muengh Guengjsae bienq ndei.

Raemxgwn cang baenz ci,

Hawj Gvangjsih soengq daeuj,

Miz mak youh miz haeux,

Raeuj ndang youh raeuj sim.

Cainanh dwg fouzcingz,

Lwgminz raeuz mizsim,

Fwngz sieng ga hix in,

Gimngaenz vuenh mbouj ndaej.

Raemxrongz dwg mbwnhaih,

Bungzdaengz couh baih caez,

Raeuz daengx guek doxgyaez,

Guengjsae raeuz mbouj you.

Raemxrongz haenq cix haenq,

Raeuz sim laenz baenz diuz,

Gyaranz liux cix liux,

Raeuz ciuq gwn ciuq guh.

Miz dangj daeuj lingjdauj,

Mbouj lau raemx dumh mbwn,

Raeuz cib geij ik vunz,

Gwndaenj mbouj youheiq.

Cungguek raeuz ak lai,

Cainanh miz boux gouq,

Giuzdungcouh(动力舟桥) hai daeuj,

Raemxrongz you gijmaz.

Aen seiq neix caen ndei,

Bouxboux dwg beixnuengx,

Bungz nanh hix miz muengh,

Cuengqsim gvaq saedceij.

编辑：实习生廖小凤复审：黄慧华终审：蒙树起