Aen Rum Daxbuz - 广西民族报网

Aen Rum Daxbuz

来源：广西民族报网

作者：□ Luz Lilanz/陆丽兰

发布时间：2026-08-19

Youq bakdou rug daxbuz, miz aen rum iq ndeu itcig cuengq youq gizde.

Aen rum neix aiq miz 20 goengfaen gvangq, 30 goengfaen sang, 30 lai gaen naek baedauq.

Moix bi haeuxdaeq ndaw reih baenz dumq le, daxbuz couh bae aeu geij faek haeuxdaeq dauq ranz dumq gwn. Dumq baenz couh byaet baenz naed baenz naed dwk roengz ndaw rum bae daem. Daem soiq le caiq daek roengz ndaw duix bae, mizseiz fwngz mbouj swiq couh rax roengz ndaw duix bae aeu haeuxdaeq gwn lo.

Daxbuz naeuz aen rum neix dwg daxmeh de youq ranzmeh daiq daeuj, suenq dwg gyaqcang lo. Seizgonq gwndaenj hoj, ndaej daiq yiengh doxgaiq he riengz okhaq suenq mbouj loek lo. Gaxgonq byawz ndaw ranz miz aen rum couh fuengbienh lai bw, daem haeux, daem duh, daem ceiz, guh haujlai hong cungj aeu yungh aen rum cij ndaej.

Doeklaeng daxbuz okhaq le, daxmeh de youh soengq aen rum neix gaen daxbuz okhaq. Ndigah aen rum neix daj daxbuz haq daeuj seizde couh cuengq youq dourug de, mbouj miz vunz bae doengh, hix itcig mbouj senj deuz.

Daxbuz geq le, heuj mbouj baenz lo, gwn gijmaz geng di cungj mbouj ndaej, daegbied dwg haeuxdaeq.

Daxbuz gig gyaez gwn haeuxdaeq cauj caeuq haeuxdaeq dumq. Moix bi haeuxdaeq yaek baenz sou le, de couh ciengzciengz ok reih bae aeu daeuj dumq, moix baez cungj ndaej gwn song sam faek.

Hoeng, nienzgeij geq le heuj mbouj baenz lo, hix naemj gwn haeuxdaeq, yienghlawz guh? Gwn caeuz le geij boux lwglan doiq daxbuz gangj vahriu naeuz:“Yienghlawz guh lo, yaek dai ngah cij dai.” Gagboux gangj le riuhaha, hoeng daxbuz mbouj leixlangh dou. Yaep he, de naeuz:“Yaek gwn cungj miz banhfap, duzvaiz mbouj rox dai iek ndaw reih, sou gaej you.”

Haeuxdaeq baenz dumq le de ciuqgaeuq bae aeu, dumq baenz couh heuh dou geij boux lwgnyez bang de byaet baenz naed baenz naed dwk roengz ndaw duix bae cuengq hawj de. Dou laihnaeuz de yaek menhmenh gyanndwnj baenz naed gwn lo. Hoeng dou raen daxbuz dawz duix haeuxdaeq bok roengz aen rum iq bakdou rug de bae, aeu diuz sak daem geij faen cung le naed haeuxdaeq youq ndaw rum soiq caez lo. De raix okdaeuj, aeu fwngz rax gwn dwk angq dangqmaz.

Seizde dou geij boux miz di iu, daxbuz mbouj youq ranz le, dou geij boux couh aeu lwgmanh dwk roengz ndaw rum bae guhcaemz. Daxbuz moix baez daem haeuxdaeq gwn le couh deng manh dwk raemxda rihnangnang.

Moix baez de deng manh couh aeu diuz faex ndeu gyaep dou ok ranz bae, doq gyaep doq ndaq:“Geij lwg fangzbyaiz sou, iu lai lo, hawj gou gyaep dawz baez ndeu ne, dwk sou fwngz raek bae.” Hoeng de yied ndaq dou yied mbouj dingq.

Seizneix daxbuz mbouj youq lo, hoeng aen rum iq lumj souj bouxcawj de ityiengh itcig souj youq bakdou rug, daxmeh mizseiz lij aeu daeuj daem hamh guh faengx……

编辑：实习生廖小凤复审：黄慧华终审：蒙树起