Cukhaeuxyangz Ranzmbanj - 广西民族报网

Cukhaeuxyangz Ranzmbanj

来源：广西民族报网

作者：□ Liengz Sinhyungj/梁新勇

发布时间：2026-08-19

“Ningznyienh sam ngoenz mbouj gwn noh, mbouj nyienh ngoenz ndeu mbouj miz cukhaeuxyangz.” Neix dwg coenzvah gyoengq beixnuengx ranzmbanj ciengz hoij youq gwnz bak ndeu, daj neix yawj ndaej ok cukhaeuxyangz dwg yiengh gijgwn gig youqgaenj ranzmbanj gou.

Ranzmbanj gou dwg Fuzsuih Yen, aenyienh youq baih saenamz Gvangjsih, Dahcojgyangh raez- rangrang ngutngut ngeujngeuj lae gvaq dingqgyang. Daj ciuhgeq daeuj, haeuxyangz cungjdwg gij haeuxgwn youqgaenj dangdieg, gyoengqvunz cungj maij gwn, ngoenz ndeu mbouj gwn cungj mbouj ndaej.

Gij cukhaeuxyangz ranzmbanj dou, yienznaeuz heuhguh cuk- haeuxyangz, gizsaed ndawde lijdwg haeuxsan ciemq lai, haeuxyangz ciemq haemq noix. Dawz haeuxyangz muh baenz naed iq lumj lwgraz nei, naednaed henjgim, vunz dangdieg heuhguh “gyaeuj haeuxyangz”. Mwh cawj, coq haeuzsan、“gyaeuj haeuxyangz” caeuq raemx roengz gu bae hai feiz cawj, raemx goenj le, haeuxsan、haeuxyangz riengz raemx ndaw gu goenj hwnj goenj roengz, sing yiengj “gulu gulu”, ndeidingq dangqmaz. Youq ndaw raemx goenjbyoegbyoeg neix, haeuxsan caeuq haeuxyangz gyaux bae gyaux dauq, feihhom oemq youq ndaw gu, menhmenh sanq doh daengx ranz, iemq haeuj sim haeuj bwt. Seizhah mbwn hwngq, ndaej gwn geij duix cukhaeuxyangz roengz dungx, sikhaek roxnyinh liengzsisi, daengx ndang heiq sangj, cwxcaih dangqmaz.

Youq yienhsingz dou, gij bouq gai cukhaeuxyangz de seiqlengz cungj miz. Moix ngoenz doengxhaet mbwn ngamq rongh, gwnz gai song mbiengj gij bouq gai cukhaeuxyangz hainduj nauhyied hwnjdaeuj lo, boux gai cukhaeuxyangz nyaengqfoedfoed, ndaw diemq geij aen buenz hung cang rim cukhaeuxyangz hoenzngau- ngau, feihhom gyuemluemz, lox dwk vunz myaiz yaek rih. Gou hix ciengz- seiz haeuj ndaw bouq bae gwn cuk.

Youq ndaw singz gak aen bouqcuk, aenduix daek cuk miz hung miz iq, hawj vunz gwn lai gwn noix cungj ndaej, duix hung seiq maenz ngaenz, duix iq song maenz ngaenz. Ceiq ciuyinx vunz dwg geij cib yiengh byaek baij rim aen daizraez ndaw bouq haenx. Cawzliux cauj lwgmanh、rangzsoemj、lauxbaeg soemj、byaekhamz、byaekcaqcaiq doengh gij- neix, lij miz gak cungj byaekheu dem, lumjbaenz byaekgat cawj duhgaeuj、gyaeujsuenq cauj byaekmbungj byaekmaenz、lwggwz cauj duhgak、gaemgaet cawj daeuhfouh daengj, vanzlij miz di byaeknoh, lumjbaenz cien bya iq、gyaeqgaeq cauj coenggep daengj. Gak loih byaek coux youq ndaw buenz hung, baiz baenz geij hangz cingjcingj caezcaez, caj bouxhek daeuj gwn. Neix gizlawz dwg byaek baenz dauq gai cuk ha, cungj ndaej naeuz dwg “aen cauhsi gai byaek soengq cuk” ndeu lo.

Caiq naeuz, gij byaek neix caih mwngz genj, gwn geijlai cungj ndaej. Haet ndeu, swnh miz di hoengq, gou cam boux lauxbanj bouqcuk heuhguh Siujmoz haenx naeuz:“Duixcuk ngamq geij maenz ngaenz, gij byaek caih gwn, mbouj lau siedbonj ha?” Siujmoz dwg boux mehmbwk gaenh seiqcib bi he. De doq nyaengq guh hong, doq riu dwk han naeuz:“Baengh daihgya daeuj bangcoengh, seng’eiq bouqcuk dwg canh noix gai lai, vanzlij gvaq ndaej bae.” Gij vah saedcaih neix, hawj vunz mbouj ndaej mbouj baiq- fug de daihfueng、cingmingz rox guh.

Bae bouqcuk mbouj dwg dandan bae gwn cuk, hix dwg bae yiengjsouh faenh simsoeng ndeu. Doengxhaet caet bet diemj cung, cingqdwg seiz bouxhek gwn cuk, ndaw bouq vunz lai vunz daih, bouxboux naengh henz daizraez, couh lumj youq ranz swhgeij nei, gwn gwd gwn saw, gwn lai gwn noix, caih swhgeij. Gij byaek soengq cuk, maij gwn maz couh aeu maz, ndaej gwn imq bae. Gwn sat le, gag saujmaj hawj ngaenz le cix biek bae. Boux lauxbanj hix mbouj cam, hix mbouj ndaejhoengq bae cam, gag bouxdog youq bakcauq nyaengq cauj byaek、cawj faenj, rox okdaeuj beuj duix、swiq duix.

Bouqcuk hixdwg gizdieg vunz bonjdieg gangjgoj gig nanzndaej he. Ciengzseiz bungz daengz saek boux vunzsug roxnaeuz baengzyoux, bingzseiz daihgya gag nyaengq hong bonjfaenh, mbouj daih ndaej raennaj, couh baengh mwh gwn cuk ndaej gangjgangj geij coenz, camcam mwhneix ndwenngoenz baenzlawz yiengh, ndangdaej lij ndei mbouj ndei. Mwh gwn yaek sat, cungj cam doiqfueng:“Lij dem saek yiengh byaek lwi? Gou swnh fwngz saujmaj hai cienz lo.” Baengzyoux gwn gonq haenx cungj doxciengj hai cienz. Doiqfueng hix doi yaep he, hoeng dingj mbouj gvaq gij cingzeiq baengzyoux, gag geiq youq ndaw sim: Baezlaeng lwnz daengz gou cingj. Couh yienghndeix, mbouj yungh bya’bya nohnoh, mbouj yungh laeuj bengz lailai, duix cukhaeuxyangz caemh ndaej henhoh ndei gij cingzeiq baengzyoux.

Baenzneix, duix cukhaeuxyangz bingzciengz he, caeux couh yungz haeuj vwnzva gijgwn dieg dou lo, baenz le aen fouzhauh vwnzva youqgaenj he. Bae bouqcuk gwn cuk, youq ndaw hoenzngaungau ndatfwdfwd gyuemluemz haenx, youq ndaw heiqfaenh caensaed ndawbiengz roxnyinh raeujrubrub.

编辑：实习生廖小凤复审：黄慧华终审：蒙树起