Loh Dauq Bet Diemj Buenq - 广西民族报网

Loh Dauq Bet Diemj Buenq

来源：广西民族报网

作者：□ Cinz Lisinh / 覃丽新

发布时间：2026-08-18

Cib diemj buenq baedauq, Vangz Dwzmingz ndiu lo. De ndang soeng saenz sangj, hoeng aenhoz rauj ndaej nyapnyatnyat. De menhmenh hwnj ndang bae ndaw ding dauj raemx gwn. Ndaw ding cij rongh aen daengdaiz gyaeuj sahfaz, maexyah Cwnz Hungz ngengndang youq gwnz sahfaz lij cinghcingh yawj saw dem. Gwnz daiz lij cuengq bonj saw govai daeglwg lij caengz yawj sat haenx……Baihndaw gab mbaw ceijdiuz, cih daeglwg oiqepep yienh haeuj dangqnaj:“Caj daxboh ndaej hoengq……”

“Mwngz ndiu la?” Cwnz Hungz raen miz singyiengj, de cuengq saw roengzdaeuj, ndaw da cungj dwg gvansim.

“Hozhawq lo!” Vangz Dwzmingz doq gangj doq byaij bae henz daiz dauj raemx, nuj hai fa boi baujvwnh, fatyienh dwg raemx diengzrwi raeujrub youh vansub. De gamjdoengh aen sim doxndei maexyah, baenzlai bi cungj ndaej raeujrub de. Vangz Dwzmingz swnh fwngz youh giet aen fa gu, raen ndaw gu lij miz gij ngaizremj caeuq gyaeqgaeq cen ndaej henjgim caj de, rangngaungau hawj vunz naiz rih. De menhmenh naengh roengzbae, ndwt le song gaemz raemx diengzrwi, youh cwxcaih dwk gwn can ngaiz gig miz feih ndeu.

Rog cueng, aen singz iqet gaenq ninz ndaek, cijmiz gwnz loh gizgyae seiz mbouj seiz hai gvaq saek gyaq hoceh, gij rongh daengci lumj ndaundeiq baefinz nei ved gvaq aen mbwn laepngaungau ndaw singz banhaemh.

“Coenz vah daeglwg ngoenzneix……”Vangz Dwzmingz gwn imq youh got aen boiraemx byaij daengz henz ndang maexyah, vwnhdu ndaw boi con gvaq gyangfwngz, lah haeuj ndaw sim, youh van youh raeuj. De ciep dwk youh naeuz: “Gou ndaw sim caen miz di nanzsouh.”

Cwnz Hungz riunyumj dwk, gvaq le yaep he, de riu dwk han:“Mwngz naemj lai lo, daeglwg wnggai dwg daiq naemj mwngz lo. Mwngz wnggai ndi rox ne, baez haenx ngoenzseng mwngz, daeglwg daegdaengq yunghsim veh fuk veh ndeu hoh ngoenzseng mwngz……De sijsaeq veh daengz cib diemj geij cung, veh daengz da baiq raninz, de lij cengqgengz aeu veh sat bae. Dou sam mehlwg caj daengz 11 diemj cung, song boux lwg da cengq mbouj hai cij haeuj rug bae ninz lo. Gou lij geiq ndaej seizhaenx daeglwg haeuj rug bae doq nu da doq mumjgyumq gangj:“Caj daxboh dauqma, gou caeuq de caiq bouj fuk veh neix sat bae.” Dangseiz gou mbouj daiq cingcuj dwg baenzlawz yiengh, caj gou beuj daiz seiz cij fatyienh gwnz veh daeglwg lij vangq miz aen gak ndeu.”

Aen sim Vangz Dwzmingz baez doeksaet: Geiq ndaej ngoenzhaenx, ndaw yienh sawqmwh daeuj haedcaz dungjgi, gyoengqde aeu lienzhaemh haeddoiq dungjgi soqgawq, ndigah de caeuq gyoengq doengzsaeh nyaengq daengz byonghhwnz cij ndaej dauq ranz. Caj ma daengz ranz, song boux lwg gaenq ninz ndaek lo. Fuk veh mbe youq gwnz daiz, aen gak lij louz hoengq haenx couh lumj giz vangq gyaez daxboh mbouj daengz vih nei. De mbaeu din mbaeu fwngz byaij haeuj rug, youq henz congz daeglwg naengh le haemq nanz, yawj dwk faj naj daeglwg ninz ndaek dwggyaez, de sugsik youh najseng, ndaw sim youh miz haujlai ienqhoij——De siengj guh ndei gij hong gihcwngz, hawj vunzranz gvaq ndaej engq ndei, hoeng mbouj siujsim youh lauqgvaq haujlai seiz dijbauj buenx lwg majhung.

“Ngoenzlwenz dahlwg youq hagdangz veh fuk veh 《Daxboh Gou》.” Maexyah laebdaeb gangj, “de cij veh aen ngaeuzndang cingq yawj vwnzgen ndeu. Lauxsae cam naj boh mwngz ne? De han naeuz ‘naj daxboh youq baihlaeng vwnzgen ne’.” Sing maexyah gig mbaeu, hoeng coenzcoenz cungj coeg haeuj ndaw sim Vangz Dwzmingz. “Gizsaed song boux lwg hix mbouj dam’aeu lai, cij siengj ndaej caeuq bohmeh itheij gwn ngaiz、gangjgoj、 guh’angq…… Mizseiz caiq ndaej buenx dwk hagsib guh cozyez.”

Gij vah maexyah lumj doek fwnmoenq, mbouj hung, hoeng ndaej laebdaeb doek mbouj dingz, hix ndaej menhmenh cimqdoh gizdieg raujrat ndaw sim Vangz Dwzmingz.

Doengh gij saeh hawj vunz naemj le mienx mbouj ndaej aeu sim fanz eiq luenh, doenghgij cingzgingj haujlai aen byonghhwnz dauq ranz youh yienh youq dangqnaj: Yienznaeuz moix haemh dauq ranz cungj nyinh ndaej ndang naet ga unq, hoeng yamq din haeuj ranz, Vangz Dwzmingz cungj geiq ndaej sien mbaeu din mbaeu fwngz byaij haeuj ndaw rug song boux lwg, yawjyawj gij yiengh ninz ndaek vansub songde. Mboujguenj yienghlawz, aen gu gwnz daiz cungj miz gij byaek gij ngaiz habbak caj de; lijmiz gij buhvaq swiq seuq daeb ndei daiq gij feih rangngeu youq gwnz gyaq……De moix ngoenz cij caenh rox youq rog nyaengqnyatnyat, aen ranz iq raeujrub youh vuenyungz baihlaeng, maexyah cungj gagboux dajleix ndaej seuqseuq cinghcingh、anan onjonj. Yunghsim naemj daengz gijneix, ndaw sim Vangz Dwzmingz cawz le ienqhoij couhdwg sim- in, de sawqmwh nyinh ndaej cihgeij gaenbonj mbouj dwg bouxcawj aen ranz neix, cij dwg bouxhek banhaemh loenglak daeuj ninz nei.

De naemj hwnj diuz loh raezrangh seiz hai ci: Loh mbanj gyaegyang youh ngutngeuj、seiz fwn loh dumz youh raeuz, hoeng diuz loh dauq ranz cixdwg sohrwd youh bingzbwd. Seiz gyaban dauq singz, aen maxloh hoengqhanghang, caemrikrik, hoeng song hangz lohdaeng cinghcingh rongh dwk buenx de itloh hai bae ranz. Ndaw fwngz aen buenz fueng- yiengq gaem ndaw fwngz ndaej fatndat, gij yinhyoz gwnz ci sing daemq rwenzrwz, aengingq yawj dauqlaeng hix ndaej caegcaeg daengq de hai ci aeu haeujsim siujsim. Gij loh loekci gyanx gvaq haenx, ndaej rau ok gij riz diuz loh hong gihcwngz, hoeng cix dawz de caeuq aen ranz yied rag yied gyae, cij lw doenghgij ienqhoij caeuq fouznaih hawj vunzranz——Lumj lauqgvaq gyahcangjvei daeglwg; lauqgvaq seiz daiq daxmeh bae yihyen genjcaz……

“Gou dwg mbouj dwg……” De youq ndaw uk caemciek aeu swz daeuj gangj, “bienqbaenz aen banj beigingj ranz raeuz lo? Gou siengj guh bouxgvan ndei, siengj guh bouxboh ndei, hix siengj guh bouxlwg ndei……Hoeng gou lumj dwg gijmaz cungj mbouj guh ndaej ndei, cij lw gij ienqhoij ngoenz dem ngoenz?”

Cwnz Hungz gaem ndaet song fwngz de: “Huk lai, mwngz dwg giekranz genggywd ranz raeuz. Yienznaeuz mbouj gingciengz youq ranz, hoeng dou geij mehlwg cungj rox, mwngz moix ngoenz youq rog nyaengq hwnjban mbouj yungzheih, dwg mwngz haenqrengz cengq aen ranz hwnjdaeuj. Vih aen ranz neix, mwngz dwgrengz lai lo, aenvih miz mwngz haenqrengz guh hong, dou cij gvaq ndaej baenzneix onjdangq, vuenyungz, mwngz couh lumj boh mwngz doenghbaez yienghhaenx……”

Vangz Dwzmingz dingq dwk mbouj guhsing. Ngoenzneix diuyenz sat, boux suhgi ndaw yangh byaij gvaqdaeuj bongx aen mbaq de naeuz:“Dwzmingz ha, gij hong guh mbouj ndaej caez ne, vunzranz caeuq gij hong baenz youqgaenj, ndaej hoengq couh lai buenx vunzranz, vunzranz gvaq ndaej ndei, hong raeuz cix guh ndaej sim’an lai ne.” De naemj hwnj gij ienqhoij seizlaux daxboh, naemj hwnj gij maqmuengh gyoengq lwg, youh naemj hwnj maexyah vih aen ranz caegcaeg guh le haujlai haujlai……De lumj fwt dwk couh naemj doeng lo: Guh ndei hong gihcwngz, mbouj dwg aen laizyouz mbouj buenx vunzranz; aen buenz fuengyiengq gaem youq ndaw fwngz, baez caij youzmwnz, cawz hai bae gizdieg hwnjban, lij aeu geiq ndaej hai dauq daengz aenranz raeujrub vuenyungz cihgeij.

Song boux de doiqnaj naengh dwk, riunyumj dwk mbouj caiq gangjvah. Songde gietvaen ndaej cib bi, miz mbangj vah mbouj yungh gangj ok bak, ndaw sim cix gag rox gag yiuj.

“Daj cou baihlaj.” Vangz Dwzmingz dwk byoengq seiz caemrwg, “gou moix cou caenhliengh aeu miz ngoenz ndeu cinjseiz roengzban dauq ranz, raeuz daengx ranz vunz guhdoih gwn caeuz, gou aeu buenx daeglwg hagsib, caeuq dahlwg doeg gojgaeq. Mbouj, mbouj dwg caenhliengh, dwg itdingh…… Bietdingh……” Gij vah gangj ndaej gazdwd, hoeng gig giendingh.

Maexyah Cwnz Hungz roxyiuj dwk hoihhoih ngaekgyaeuj: “Mboujyungh cengqgengz cihgeij, dou cungj caj mwngz, hoihhoih daeuj guh.” Ciep dwk youh naeuz: “Gou rox gij hong mwngz……”

“Bae ninz ba.” Cwnz Hungz soengz hwnj ndang, ndaw da gamz miz di ronghrib, “ngoengzcog lij aeu hwnjban ne.”

Vangz Dwzmingz gaen dwk soengz hwnjdaeuj, byaij coh aenrug. De mbouj lumz cienq haeuj ndaw rug daeglwg bae yawjyawj: Daeglwg raeuj ndaej dik denz lo, de mbaeu fwngz bang dawz denz cw ndei; dahlwg umj duz douqbaengz ninz ndaej diemzsisi, de cix diemzsisi cup hwnj najbyak bae.

“Daxboh itcig youq ne.” De singsaeq lwnh dwk, mboujdan dwg gangj hawj song boux lwg dingq, caemh dwg gangj hawj cihgeij dingq.

Byaij daengz ndaw rug, Vangz Dwzmingz mbouj dwg sikhaek ninz roengzbae. De soengz dwk muengh coh rog cueng, yawj aen singz cingq ninz ndaej caemrwgrwg neix ngaezngwd: Gizgyae lingzding raen geij aen daeng myoxmyadmyad, lumj mbouj haengj laep da ninz nei. Laj daeng, lauheiq miz doengh boux caeuq de ityiengh, moix haemh nyaengq daengz byonghhwnz dauq ranz……

Sawqmwh，aen soujgih saenqdoengh baez he, bingzmu gaendwk rongh lo, dwg siusik ndaw ginz gunghcoz lawhmoq, daezsingj gij hong diuyenz baihlaj aeu guh haenx. De nyaenj ndaep aen soujgih——Ndaw sim de rox: Baez ndaej buenx vunzranz nanzndaej, aeu ndeindei bae insik, ndeindei bae gamjsouh gij seiz doxbuenx.

Cuengq roengz soujgih, Vangz Dwzmingz ninz hwnj gwnz congz bae. Ndang soeng sim soeng, gij naetnaiq caeuq sinhoj daengx ndang hix sikhaek lumj rumz ci fwj nei, yaepda couh sanq bae liux lo……Mbouj geij nanz, Vangz Dwzmingz riunyumnyum dwk guh loq hwnjdaeuj lo: De song fwngz gaem buenz fuengyiengq, cinjseiz dawz ci hai dauq ranz, caeuq vunzranz itheij gwn caeuz, daengx ranz miz gangj miz riu, simvuen angqyangz. Ndaw loq de buenx daeglwg hagsib, caeuq dahlwg doeg gojgaeq……Fajnaj daxboh gwnz veh dahlwg caemh ndaej cienq ndang gvaqdaeuj riunyumnyum lo……

Rog cueng cinghrwgrwg, mumjgyumq cienz daeuj gij sing boux cinghgezgungh haihij baet loh: Gaiq sauqbaet baet gvaq gwnz loh yiengj “sasasa……” Lumj nonsei cingq gwn mbaw gosangh, hix lumj gij sing ndaw sim Dwzmingz cingq youq ndaw loq menhmenh dawz gij ienqhoij rub bae rub dauq. Aen singz iqet neix, itdingh miz haujlai caeuq Vangz Dwzmingz ityiengh——Doenghboux haenqrengz guh gij hong gihcwngz bingzciengz, gak boux de souj ndei gij hong gak boux, hix gak boux miz gij gvaqniemh cihgeij, gak boux miz gij ienqhoij cihgeij……Hoeng gyoengqde dauqdaej cungj wngdang rox daengz, doenghgij souj ndei, cungj dwg vih le souj ndei aenranz baihlaeng cihgeij, doenghgij dauqcawq buet bae buet dauq, doeklaeng cungj aeu miz gij lohdauq unqswnh、raeujrub.

(2 sat)

编辑：实习生廖小凤复审：黄慧华终审：蒙树起