Yaepyet Raeujsim - 广西民族报网

Yaepyet Raeujsim

来源：广西民族报网

作者：□ Luz Gingfungh/陆庆峰

发布时间：2026-08-18

Daj bizyez guhhong daengz bineix, faenh hong guh lauxsae lajmbanj neix, gou laebdaeb guh 25 bi lo, haemh daengz caengz ninzndaek, gou couh laeglemx siengj: Gou guh baenzlai bi, ngoenzngoenz haet ok haemh ma, gou rox son vunz lwi? Hagseng gou ngoenznaengz youh hag ndaej gijmaz? Saedceij ngoenz gvaq ngoenz, hagseng gou hix ngoenz beij ngoenz majhung, roxnaeuz youh vuenh baenz lingh bang vunz, gou youh byaij yiengq gizlawz?

Aenvih guh banhcujyin, ngoenznaengz gyanghaet, gou 7:20 couh daengz yozyau, caeuq hagseng caez baet ranz, yawj hagseng gwn ngaizromh, bungz daengz haet aeu hwnj daih’it、daihngeih dangz go, couh aeu laebdaeb ndwn baenz geij diemj cung, yienghneix song bi gvaqdaeuj, gou ciengz baenz bingh hwet in ga naet. Haet ndeu, aenvih boux doengzsaeh caemh ban okbae hagsib lo, gou youh laeddaeb ndwn baenz sam diemj lai cung, nyaenx mbouj ndaej aeu fwngz dubdub aen hwet, boux hagseng bingzseiz vah daegbied lai ndeu sikhaek naeuz:“Lauxsae mwngz naengh roengzdaeuj gangj, dou nyinhcaen dingq mwngz gangj.” Miz boux hagseng hix sikhaek gaen naeuz:“Dwg ha, lauxsae, mwngz naengh roengzdaeuj gangj, dou nyinhcaen dingq.” Gizyawz hagseng hix gaendwk naeuz. Yienghneix, dangz go neix couh soengsed vuenheij gvaq liux.

Roengzdangz le, youh daiq gyoengqde bae hawj goyw cawz rum, boux hagseng cabheiq ndeu naeuz:“Lauxsae, caj gou ndaej ra ngaenz le, gou cawx cieng eij soeng ndang hawj mwngz.” Lingh boux hagseng lwgmbwk naeuz:“Lauxsae, daxbuz gou miz cieng eij soeng ndang, daengz haemh mwngz bae ranz gou naenghnaengh.” Youh miz boux hagseng naeuz:“Cawz rum sat le, gou bang mwngz dubdub hwet.”“Gou hix ndaej bang mwngz dubdub……”

Dingq daengz gij vah neix, ndaw sim gou raeujrubrub, gou dwg boux vunz yungzheih gamjdoengh, gou gamjdoengh mbouj dwg aenvih hagseng gou gvansim gou, dwg aenvih gou roxnyinh gij gyauyuz gou miz yiyi, gij sinhoj gou miz cingzcik, hagseng gou rox aen dauhleix guhvunz, gyoengqde rox gamjaen, caeuq vunz seiqlengq gyausim doxndei, ndaw sim doiq ngoenzlaeng miz maqmuengh, neix mbouj cingq dwg aen muzbyauh son vunz ma?

Gou gyaez hagseng gou, gou gvansim gyoengqde, rox gyoengqde, swnh seiq dazyinx gyoengqde, mbouj aeu cingzcik ndei rwix daeuj dag gyoengqde, hawj gyoengqde ngoenznaengz hagsib miz soundaej, gou son vunz hix miz cingzcik, moix ngoenz guhhong gou cungj miz saenqsim, miz maqmuengh, doiq guh faenh hong neix gamjdaengz vuenyungz, neix dwg aen haidaeuz ndei ndeu.

编辑：实习生廖小凤复审：黄慧华终审：蒙树起