Gaej Dangq Gou Guh Lwgnyez - 广西民族报网

Gaej Dangq Gou Guh Lwgnyez

来源：广西民族报网

作者：□ Vangz Ciuhgiz/黄秋琪

发布时间：2026-08-18

“Lwg ha, mbouj ndaej caemz dennauj baenzlai nanz, lwgda vaih bw, vaiq di hwnjndang yietnaiq yaep he, gwn raemxdang gonq.” Daxheiz coh ndaw rug heuh.

“Mwngz rox gou geijlai caengz mwngz lwi?” Dahlanz bwnda nyaeuq dwk naeuz.

Daxheiz haq daengz ranz Dahlanz guh mehlaeng haujlai bi lo, doiq Dahlanz ndei lumj lwg caen nei, hoeng Dahlanz cungj yiemz daxheiz yienghneix mbouj baenz yienghde mbouj ndei, coenz vah doeg neix couh lumj midsoem coeg sim de, hawj de siengsim yaek dai bae, mbouj miz vah gangj lo.

Couhdwg gaiq rin gyoetcaep he, caemh youq aen ranz haet haemh doxraen, caemh youq aen rek daek haeux gwn, seizneix gvaqbae baenzlai bi lo, cungj oep ndaej raeujrub lu ba? Mehlaeng hix dwg meh, de goqhoh Dahlanz lumj lwg caen de manz nei，yaepyet couh lumz gij saeh simnyaep lo. Daxheiz ngamq haq hawj bohlanz bide dwg seizdoeng. De baez yamq din haeuj bakdou ranz, couh yawjraen Dahlanz cingq lohdin daenj buhbeu mbangfetfet naengh youq gwnz namh unq daejnge’nge, aen naj cungj dwg raemxda, uq lumj naj duzmeuz nei. Daxheiz sim’in dangqmaz, cacoemj got ndangbyom Dahlanz haeuj ndaw rumj singunq nai, aeu mak bingj doj Dahlanz riu, cawj byaek noh ndei gwn hawj Dahlanz gwn dungx imq le, youh bang Dahlanz swiq naj swiq din, caj Dahlanz guhcaemz baeg le cij got Dahlanz bae mbonq ninz. Daxheiz mbouj miz lwgnyez, de dangq Dahlanz dwg lwg caen de. Bouxlawz liuh ndaej daengz, Dahlanz majhung le dingq bouxwnq gangj sam gangj seiq, gingqyienz dangq daxheiz dwg boux vunzrwix, mbat raen de couh byaij liz gyae’gyae bae, mbouj miz maz cingzfaenh. Couh yienghneix bi dem bi, daxheiz laihnaeuz Dahlanz lij iq beizheiq ngwn dwg cingqciengz, menhmenh cix roxsoq lo, cungj mbouj haeujsim.

Ngoenzhaenx, daxboh siujsim riri cam Dahlanz gienh daihsaeh ndeu:“Gou caeuq daxheiz mwngz doxyaeng ndei lo, yaek hawj mwngz lai boux nuengx he, mwngz angq lwi?”

“Gij saeh neix dwg saeh sou, gven gou gijmaz saeh ne?” Dahlanz bakgeng, gangj coenz vah mbaeumbengmbeng, aen da mbouj ngiengx saek mbat, aen naj caemdingh, mbouj miz saek faen cingz. Dahlanz gyangq gvenq lo, aen bak gangj mbouj miz ma, ndaw sim gizsaed soemjsetset.

Dahlanz ngamq ndaej haj bi, meh caen de couh bingh dai lo, Dahlanz gig lau daxboh miz lwg iq couh mbouj maij de lo, de beizheiq cibfaen gyangq, lau boux baihrog rox gij sim- unq de, de lumj duzcenh nei, gwnz ndang cungj daengj oen, bouxlawz famh de couh coeg bouxlawz. Daxboh raen Dahlanz mbouj fanjdui, soeng gaemz heiq raezraez he, sim’angq dangqmaz.

Daxboh Dahlanz youq baihrog guhhong nyaengqnyatnyat, daengz ciet cij dauq ranz geij ngoenz. Boux vunzsai simco, mbouj rox in yah in lwgnyez. Dahlanz doiq de cix lumj raen boux au ranz wnq nei, liz gyae’gyae. Seizneix cwngcwz hawj aeu boux lwg daihngeih le, de cij roxnyinh ndaw ranz vunz noix caemrwgrwg. Danghnaeuz ndaej lai seng boux lwgnyez he, ndaej swnj coj dam ciuh, youh ndaej hawj Dahlanz miz boux beixnuengx ndeu, cungj beij ce ngaenz hawj Dahlanz ndei lai lo.

Gvaq geij ndwen le, daxheiz couh mizndang lo, daxboh angqhoho, naeuz daxheiz goenglauz sang, ngoenz daengz haemh saeh iq saeh laux de cungj dawzhaeujsim, mbouj ndaej goq Dahlanz baenzlai, Dahlanz ndaw sim gig vei, gvaiq daxboh yaek dai. Daxboh gizsaed miz siengjfap, de maqmuengh daxheiz seng ndaek lwgsai he, aen lozyieng ranz de couh miz vunz ciep lo.

Daxheiz lumjnaeuz mbouj miz beizheiq nei, raen bouxlawz cungj riunyumnyum, ciuq bingzciengz ngoenzngoenz bae guhhong. Roxnaeuz dwg vuenyungz daeuj vaiq lai, liuh mbouj daengz daxheiz mizndang ngamq ndaej song ndwen lai, lwgnyez couh doekndang lo. Daxboh youh sim- in youh hozhwnj, laih daxheiz mbouj haeujsim, daegdaengq hawj lwgnyez mbouj miz, doi sam doi seiq mbouj bae ciemsaw hawj daxheiz guh soujsuz. Boux canghyw caen ndang oknaj le cij cengqgengz ciemsaw. Daxheiz mbouj ienq mbouj ceng, cij rox raemxda laeyoegyoeg.

Dahlanz youq henz yawj mbouj guhsing, de seizneix maj baenz lwgsau iq lo, rox lwgnyez doekndang doiq ndang mehmbwk mbouj ndei. Gyang haemh, Dahlanz ninz youq gwnz mbonq fonj bae fonj dauq lumj cen bingj nei ninz mbouj ndaek. Daxheiz mbouj youq ranz, aen ranz hoengqlangh youh fwzrwg, Dahlanz hwnjndang byaij bae byaij dauq, naengh ndwn mbouj onj.

Dahlanz yawjraen daxboh ndoj youq aen rug de ndoet laeuj fiz, siengj lumz gij nyapnyuk. Dahlanz yawj mbouj gvaq da, gig hozhwnj, baez daih’it vih daxheiz caeuq daxboh doxceng, ndat daxboh doiq daxheiz fouz cingz. De lij gag siengj, swhgeij doiq bouxwnq hix mbouj mizsim, doiq gijmaz cungj mbouj haeujsim, couhdwg nyaenx mbouj ndaej gij yienghsiengq mbouj ndei daxboh neix.

Dahlanz geiq mbouj ndaej cihgeij guh geijlai saeh vaih daeuj loengh daxheiz, hoeng daxheiz cungj dangq Dahlanz lij iq mbouj rox saeh, mbouj ndaq de roxnaeuz bae dangqnaj daxboh gangj vah vaih de.

“Lwgnyez hawj mwngz unj gvenq lo.” Daxboh ndaq daxheiz mbouj rox guenj Dahlanz. Daxheiz mbouj miz saek coenz vah yienq, riunyumnyum naeuz:“Laj mbwn miz bouxlawz guh bohmeh ndaej caeuq lwgnyez fatheiq baenz ciuhvunz ne?” Dahlanz youq baihlaeng caegcaeg dingqnyi gij vah neix, gamjdoengh dwk raemxda laegyoegyoeg, ndaw sim raeujrubrub, unq raixcaix.

Banhwnz ninz mbouj ndaek, Dahlanz haetromh gig romh couh ndiu gvaqdaeuj lo. De laeglemx dap ci daengz yihyen, byaij daengz henz ndang daxheiz cam:“Aen ndang mwngz lij in lwi?” Daxheiz baez daih- it dingq daengz coenz vah gvansim neix, daxheiz gamjdoengh raemxda laegyoegyoeg, sim raeujrubrub, riu lo. “Mwngz caen dwg gyaeuj nuk lo, boux vunz geqyetyet yaek baenz guh yahdaiq lo, lij siengj seng lwg iq, mbouj aeu mingh la?” Dahlanz mo najbyak daxheiz, lumj ndaq boux lwgnyez mbouj dingq vah bouxlaux nei.

“Gou yawj mwngz boux dog mbouj miz beixnuengx guhdoih, siengj hawj mwngz lai boux beixnuengx ndeu.” Daxheiz gaemdawz fwngz iq Dahlanz raeujrubrub haenx, dep haeuj naj de bae, lumh baenz haujlai nanz.

“Mwngz yawj, bouxlawz daeuj la?” Dahlanz raemhrwnh naj ndingndemndem, lumj bungq dienh nei yot fwngz dauq daeuj, coh daxheiz baihlaeng mbwnjbak yaep lwgda riunyunyum. Daxheiz cimmyaumyau, yawjraen bohlanz ndwn youq bakdou ranzvunzbingh.

Dahlanz dep rwz daxheiz guhcaeg naeuz:“Mwngz rox gou vihmaz mbouj maij mwngz lwi? Aenvih mwngz cungj dangq gou dwg lwgnyez mbouj rox saeh. Baezlaeng danghnaeuz daxboh caiq doiq mwngz mbouj ndei, raeuz couh mbouj hawj de haeuj ranz, neb de ok baihrog bae.” Dahlanz gangj sat couh vaiqvaiq buet deuz, gij sing riuhaha youq baihlaeng de cienz daeuj……

Ndaw ranzvunzbingh, song faj fwngz gaem ndaetndaet youq caemhdoih, daengngoenz daj rog ranzvunzbingh ciuq haeujdaeuj, raeujrubrub ciuq youq gwnz ndang gvanbaz neix.

编辑：实习生石喜丹复审：黄慧华终审：蒙树起