Dwk Hingz Mbat Ciengq Dingj Raemxrongz

来源：广西民族报网

作者：□ Cinz Siengzcouh/覃祥周

发布时间：2026-08-18

Rumz hung bongj daeuj mbwn doek fwn,

Guhlumj dah mbwn dek roengzdaeuj;

Hwngzcouh Gveigangj raemxrongz haeuj,

Gizgiz da gaeuj(yawj) raemx baenz benq.

Loeglamz Suijgu haenz hung lak,

Raemxrongz raemx yak bongh lai daih;

Gai hung mbanj iq baenz dahhaij,

Ranz vunz doxgaiq raemx ceh liux.

Fanh moux maedleih deng dumh caez,

Naz ndei reih ndei goemq namhboengz;

Cinlungz loh goenq dienhvah hoengq,

Bienq baenz ndaw ndoeng aen mbanj dog.

Aen mbanj Duzdenz ceiq boihseiz(vijsij),

Ranz loemq namhnaez guenq daengx mbanj;

Daengx ciuh souhaeuj cungj seuqsanq,

Haeuxgwn ranzranz cung roengz dah.

Caicingz sikhaek cienz okbae,

Gij vunz Guengjsae doengzcaez hengz;

Cibseiq disi doengz okrengz,

Daihgya caez hengz gouq vunz gonq.

Vujgingj minzbingh cung baenaj,

Buet gwnz buet laj mbouj lau laemx;

Ndang lumj gocoengz ndwn gyang raemx,

Yungh ndangnoh daemj gij raemxrongz.

Bo bya loemqlak loh mbouj doeng,

Gizgiz namhboengz yawj da raiz;

Mbaq gwed fwngz dawz buen doxgaiq,

Yamqyamq hoj byaij gangj mbouj caez.

Bingzsiengz gak cuz beixnuengx caen,

Gien huq gien ngaenz raeuj sim vunz;

Bouxcangh dwk giuz hix caemh hwnj,

Guhlumj gyanghwnz miz feiz rongh.

Sanhgyangh Mbanjdung soengq cingz raeuj,

Youq gyae hix daeuj bang beixnuengx;

Mbouj faen minzcuz doengz soujmuengh,

Daihdeih Diegcuengh miz saenzheiq.

Vwnconh lwglan geiq cingz aen,

Doenghbaez de gaenq ndaej bangcoh;

Ngoenzneix byaij daeuj cien leix loh,

Vihliux bangcoh beixnuengx raeuz.

Guengjdoeng beixnuengx youq doxgyawj,

Byonghhwnz de lawj(hix) soemh fwn daeuj;

Bak doih vunz bang mauh yiemj haeuj,

Hai ruz haeujdaeuj gouq vunz gonq.

Daengx singz cibaiz dwg Guengjdoeng,

Mbouj lau fwn boengj(rwed) hai gvaqdaeuj;

Coenzcoenz beixnuengx vunz sim raeuj,

Lumj rumzcin daeuj va hai rang.

Yinznanz cien leix daeuj soengq rongh,

Fatdienhgih hongz(yiengj) buq haemh caem;

Roek leix namhboengz yungh din saemj(raih),

Aen mbanj deng humx ndaej gouq nanh.

Haijnanz hai ruz gvaq haij daeuj,

Gek haij sim raeuj daeuj doxcoh;

Mbouj lau rumzlangh cien leix doh,

Vihliux daeuj goq vunz deng cai.

Dieg gyawj beixnuengx daeuj ceiq riuz(vaiq),

Ceng faen dued miux gip gouq vunz;

Couh lumj seizcin mbwn doek fwn,

Rwed dumz Hwngzcouh doenghgo maj.

Cezgyangh “roegmbin” hwnj gwnz huj(fwj),

Vuzyinzgih “fu” daeuj baenz gyoengq;

Doxgaiq cien gaen daj mbwn soengq,

Gohgi daiqdoengh doh gvan yiemj.

Cezgyangh meizdij fat sing bae,

Vunz biengz doengzcaez bang gaij you;

Docih bit maeg gyoengq boux sou,

Sim ndei bang dou gej hojnanh.

Bouxgyawj bouxgyae cungj sim ndei,

Bya dah aij(yienznaeuz) gyae doengz diuz rag;

Cien leix daeuj bang giet diuzcag,

Mbouj hawj doengz rag beixnuengx gvi(souhgvi).

Lwglan Cunghyenz miz cingzeiq,

Hai ci cien leix dingj fwnrumz;

Vanj mienh soengq daeuj raeuj sim vunz,

Diegcai hoenz hwnj miz maqmuengh.

Lwgcoz dieggyae hix hwnj loh,

Vihliux bangcoh boux deng nanh;

Sim de gyaez guek youh gyaez mbanj,

Mbouj lau deng anj(baeg) caeuq deng sieng.

Anhveih lauxbing caen miz sim,

Dinghdan cien gim de mbouj gyoh;

Nyig rumz cien leix daeuj ganj loh,

Vihliux bangcoh vunz deng cai.

Cuzcouh bouxak soengq byaek haeux,

Cien leix buet daeuj dawz hawj vunz;

Ngaiz raeuj dang ndat bouxlaux gwn,

Sim ndei sawj vunz ndaej raeujrub.

Sanhdungh soqlaiz vunz sim sienh,

Cien fanh ngaenzcienz dawz daeuj gyau;

Cungfung ciengj yiemj mbouj lau nauq,

Ndang guh rin laux(hung) dangj raemxlangh.

Gyoengqde bouxboux dieb namhnaez,

Aemq bouxlaux bae umj lwgnyez;

Caen cix docih gyoengq bouxde,

Bouxboux sim eq(hoengz) gouq vunz nanh.

Gveicouh lwgmak soengq daengz liux,

Cib fanh byaekheu ceiq cix bengz;

Ndaw mbanj cauhsi caez caemh rengz,

Beixnuengx sim bengz lumj ndit rongh.

Gij vunz Gveicouh ceiq simsoh,

Cungj haengj bangcoh boux deng nanh;

Saeh hung saeh iq guh cien fanh,

Ndaw singz ndaw mbanj cungj riuzmingz.

Sinhgyangh max ak nyig fwn rumz,

Haj ngoenz haj hwnz buet Guengjsae;

Duzmax doz daeuj doxgaiq ndei,

Beixnuengx sim maez(angq) bae fanh ciuh.

Gveigangj Hwngzcouh vunz cungj geiq,

Sinhgyangh vunz ndei Ahlijmuz;

Hamj gvaq cien bya daeuj bangfuz,

Cunghvaz Minzcuz ranz caen ndeu.

Ndit ndatfofo de coemh feiz,

Cawj ok ngaiz ndei soujcahfan(ngaizfwngzvax);

Bouxhek dieg gyae sim ceiq van,

Vih raeuz mbanjranz doh hojnanh.

Sinhgyangh liz raeuz fanh leix roen,

Minzcuz mbouj doengz sim doxdoengz;

Hojnanh doxbaengh dox bangcoengh,

Neix dwg vunz gyoengq ndaw Cunghvaz.

Yanghgyangh raemx bik lienz Diegcuengh,

Gangj Au beixnuengx hix sim ndat;

Cien fanh ngaenzcienz rom cingzak,

Goekgaen diuzrag fanh daih raez.

Laj Byasaeceij cingzeiq lai,

Lienz sim hamj haij bang vunz ndei;

Lwed noengz gvaq raemx fanh daih geiq,

Cunghvaz goek ndei daihdaih cienz.

Miz haujlai vunz comz Guengjsae,

Mbouj aeu mingzleih mbouj aeu ngaenz;

Din byaij roen bya dieb roengz raemx,

Hung iq caez caemh gouq caiminz.

Mohdoz bin hwnj ndaw rin luenh,

Ci mbin doh yiemj soengq haeux ngaiz;

Bet fueng ciyoux caez comz vaiq,

Lahbah sing hai bae gouq vunz.

Cizswngh feihgih mbin hwnj soh,

Gyangmbwn diuhdoh bae gouq cai;

Bouxminz sengmingh youqgaenj lai,

Simnduj couh hai youq gwnzmbwn.

Ndaw mbanj bouxak sien hwnjdaeuj,

Ciyencej haeuj hwnzngoenz nyaengq;

Raemxhanh dumz buh hix mbouj daengx(dingz),

Sing heuh lumj gaeng doengh ndaw bya.

Lwgnyez bouxiq hix hwnj guh,

Bangcoh dawz huq mbouj doiq dingz;

Nyezoiq gwnz mbaq rap caencingz,

Guhlumj feiz nding rongh gyangmbwn.

Gij boux doeg saw youq hagdangz,

Caemh daeuj doxbang buen doxgaiq;

Mbouj lau sinhoj caeuq naetnaiq,

Cij nyienh seiqbaih vunz an’onj.

Nanzlumz doengh boux ciyencej,

Bouxboux ndawde miz gungyen;

Denjhingz saehcingz haujlai gienh,

Gij vunz sim sienh ceiq dwggyaez.

Ciengq fwen daeuj niemh Dangj Sinhruij,

Hawj vunz dungxsaej cungj yaek honz;

De dwg lwgcoz vunz Swconh,

Mbatneix mingh sonj youq Guengjsae.

Youhsiu cinghnenz daeuj gouq cai,

Doeklaeng mingh dai youq dieg raeuz;

Song baih mbiengjmbaq gwed rumz raeuj,

Daiq rongh gvaqdaeuj hawj vunz biengz.

Raemxrongz fouzcingz vunz miz cingz,

De yungh sengmingh bang gouq cai;

Gij aencingz de naek lailai,

Cien bi fanh daih vunz mbouj lumz.

Dangjgeiz biu mbin raemx doiq ciengz,

Sousib gwnz biengz caiq hai luengq;

Doengzsim ndaem roengz faex maqmuengh,

Ngoenzlaeng Diegcuengh va youh rang.

Vunz biengz doxgyaez miz lijsiengj,

Dwk hingz mbat ciengq dingj raemxrongz;

Gyae gyawj beixnuengx siengj doxdoengz,

Bouxboux sim hoengz byaij doxcoh.

Eu fwen docih dangj aencingz,

Bouxminz bouxbing mbaq deb mbaq;

Raemxrongz yakrwix gaenq dingj gvaq,

Guengjsae moqnaj dauq vuenyungz.

编辑：实习生石喜丹复审：黄慧华终审：蒙树起