Daj Byalangzyaz Daengz Byamax——Faenzcieng 《Byasang Ndawsim》 Daz Gou Byaij Haeuj Gojgaeq Yinghyungz Bonjdieg

来源：广西民族报网

作者：□ Sung Ginhlez/宋君烈

发布时间：2026-08-18

Doeg bien faenzcieng Sawcuengh《Byasang Ndawsim》（daeng youq《Gvangjsih Minzcuz Bau》bi 2026 ndwen 1 ngoenz 14 banj daih 6）Yiz Ciz gvaq le, lumj miz ndaek rin ndeu dimz youq ndaw sim gou, naekdumdum. De dwg gangj aen gojsaeh caensaed ndeu, aen gojsaeh boux gwzming yinghyungz ndeu.

Faenzcieng gangj daengz “gou” seiz iq doegsaw 《Haj Boux Cangsw Byalangzyaz》le couh siengj bae yawj Byalangzyaz, ndaw hoz daegbied cungzbaiq boux gwzming yinghyungz gizgyae. Gvaq haujlai bi le, aenvih guh gij hong nangq daengz son’gyauq senhconz swhsiengj gyaez guek gyaez biengz, “gou” ndaej bae cimhra gij rizdin boux gwzming yinghyungz bonjdieg, cimhra gij saehcik doenghbaez boux Hungzginh cansw dingjhoenx bingcaeg youq gwnz Byacaetsing Bingzgoj Si Bangjhih Cin Lozhih Cunh. Gij gojsaeh de caeuq《Haj Boux Cangsw Byalangzyaz》gig doxlumj. Canghraiz Yiz Ciz yungh gij sawvah dojdatdat raeuz daz raeuz ndonj gvaq seizgan raezrangh, mbin dauq daengz bi 1930 hoenxciengq mokmok mekmek haenx.

“Gou” caeuq geij boux doengzdoih riengz boux daiq roen Luz Divaz byaij haeuj diuz roenbya nya- nyatnyat, deng nyungz haeb、deng gaeu gat、deng oen coeg、buhvaq ndaek hanh…… Gij saeqciet neix raiz ndaej gig caensaed, hawj vunz yawj roengzbae lumj bonjfaenh cingqcaen ndaej bae ginglig gvaq nei. Mwh bin daengz gwnz dingjbya, raen baihgwnz cungjdwg rinroujgaeq youh soem youh raeh, laj din dat haumyagmyag geij ciengh sang sawj vunz daraiz vivi, rumz geujfefe, sawj vunz mbouj ndaej mbouj ngeix hwnj gij ciengzmienh hoenxciengq doenghbaez.

Faenzcieng giz ndaej gamjdoengh vunz de, dwg raiz caet boux cansw hungzcizginh hoenxciengq yaek doeksat haenx. Caet boux de vih hoh gyoengq vunzlai senjdeuz, yaeuh vunzdig byaij hwnj roengud bae. Lwgyienz dwk sat, gij rin ndaej yungh gingj roengz bya moeb vunzdig hix yungh liux lo, gyoengqde fad cungq raek le couh haenq hemq “Hungzginh fanhbi! Gungcanjdangj fanhbi!”, saetdiuq roengz dat bae dai. Mbouj miz saek coenz fwen ndei haenh, dan dwg vaehvaeh geqlwnh, Senj Cauzwnh、Yangz Gojcangh、Sung Laujdwz、Lij Givwnz、Loz Dingdwz、Bangz Yozngwnh、 Vangz Hizci, aen’aen mingzcoh raiz ndaej cingcing cujcuj, lumj gij saw gaek hwnj gwnz bangx rindat nei.

Giz ceiq coi ndaej vunz raemxda doek dwg faenzcieng satbyai: Naihlaux Veiz Yilenz Bangjhih doenghbaez ngamq ndaej 10 bi haenx dauqngeix, ngoenzde banringz miz sing cungq caeuq sing hemq daj mbanj nden cienz daeuj, vunzmbanj rox doxhoenx lo, bouxgeq lwgnyez muengzfoedfoed deuz haeuj ndaw gamj gwnz byalaeng bae ndoj. Yienghneix raiz, sikhaek dawz gij lizsij doenghbaez rag daeuj daengz dangqnaj. Caet boux yinghyungz yienznaeuz deng dai lo, hoeng gyoengqde baujhoh ndaej Hungzginh daihdoih ancienz senjdeuz, louzce ndaej gij cehfeiz gwzming roengzdaeuj, vih doeklaeng dingj- hoenx Yizbwnj、moeb gozminzdangj fanjdungbai gaijfang biengz Cungguek guh ok gungyen.

Bien faenzcieng neix ndaej gamjdoengh vunz, mbouj dandan dwg de gangj gij gojsaeh “bouxak”, engq youqgaenj dwg de ndaej gangj ok gamjcingz. De ndaej dawz seiziq ngeixmuengh caeuq seiz majhung cimhra doxlienz hwnjdaeuj, ndaej dawz gij gojsaeh cienzgeiz baihgyae caeuq gij gojsaeh bonjdieg doxlienz hwnjdaeuj, dawz boux yinghyungz vutmingh caeuq boux beksingq gwnzbiengz doxlienz hwnjdaeuj. Mwh caet boux Hungzginh cansw yinghyungz diuq roengz dat bae, diuz mingh gyoengqde sikhaek bienqbaenz aen cingsaenz ndeu, ciengxlwenx ce youq gyangsim gyoengq beksingq.

Doeg sat faenzcieng, roxnyinh “Byasang Ndawsim” miz geij cungj hamzeiq: De dwg goengq Byamax lingqlanglang ndeu, dwg aen dat dai caeuq lix doxbiek gwnz lizsij ndeu, hix dwg aen saenqniemh vunz raeuz gingqcungh boux yinghyungz gaenriengz Cunghgoz Gungcanjdangj haenx.

Rumz lij laebdaeb ci gvaq gwnzdingj Byamax, aiq beij gij sing hemq doenghbaez cienz ndaej engq gyae. Bien faenzcieng neix, cix dwg linghvaih cungj “rumz”, ci haeuj gyangsim gyoengqvunz, sawj vunz ndaej nyi daengz gij sing doxhap gwnz lizsij.

编辑：实习生石喜丹复审：黄慧华终审：蒙树起