Gij Sing Ndaw Sim - 广西民族报网

Gij Sing Ndaw Sim

来源：广西民族报网

作者：□Liuz Haijgyah raiz Vangz Gyanghmyauz hoiz

发布时间：2026-08-18

▲Sauhli Cujhoz. Doz vangjloz

Rumzcin ci gvaq gwnz biengz Bazgvei, fwen “sam nyied sam” rwenz doh lajmbanj ndaw doengh, daj ndaw hagdangz cienz okdaeuj, unqnem ndeidingq, hawj vunz simdoengh. Baezbaez dingq daengz gij fwen sugseg, gou cungj ngeix daengz duenh ndwenngoenz dingq fwen hag fwen haenx. Daj boux lwghag dingq loq rox saek di、simmuengh rox eu, daengz bungzraen lauxsae maenhndei、bouxyenzgiu minzgoh akrem, caiq daengz boux lauxsae daihhag ndwn hwnj gwnz gyangjdaiz、cienzswnj vwnzva, youq gwnz roen neix, ndiepgyaez senq cix bienqbaenz dawzmaenh, simnduj mbouj caengz gaij gvaq.

Baeznduj dingq minzgoh Gvangjsih, dwg youq ndaw hagdangz doegsaw. Gou youq mwhhaenx, dwg boux hagseng Bouxgun simmaez fwen ndaw biengz ndeu, dingq gvenq gij go riuzhengz gyaqciq haenx, caiq dingq gij fwen mbouj miz baenzlai banjdaeuz haenx, hix hawj gou simdoengh dangqmaz. Mbouj miz bien banj fukcab ciuyinx vunz, dan aeu bak ciengq, ciengq ok gij hongsaeh ndaw doengh, ciengq ok gij cingz naek vunzmbanj, ciengq ok gij ndwenngoenz raezrangh benq diegdeih neix. Gou ciengzseiz maez youq gwnz godangz minzgoh, geizheih caeuq ndiepgyaez raixcaix, dandan dwg aenvih lai dingq saek duenh fwen. Hoeng gou seizhaenx cij rox fwen ndeidingq, mbouj rox gij hamzeiq laegna de, cijndaej daj gizgyaez muenghyawj, mbouj rox baenzlawz cij hag rox fwen.

Caeklaiq ciuhvunz gou miz seizheiq bungzraen lauxsae maenhndei, Ciz Hanzmeiz gyausou raen gou haengj hag maij dingq, couh son gou ciengq gij minzgoh Gvangjsih. Youq rog godangz, hawfwen aenmbanj、ndaw ranz canghfwen ndawbiengz, cungj dwg gij godangz fwen dou yaek bae gyaepra haenx. Lauxsae daiq gou bin bya benz ndoi bae soucomz gij fwen gak dieg, baiqcunz canghfwen laux doengh aen minzcuz Cuengh、Dung、Myauz、Yauz、Gingh haenx, son gou bae nyinhrox gij diuh mbouj doengz, gejdoeg gij fungcingz fungsug ndaw gohswz, hawj gou roxdaengz fwen mbouj dwg gij yaem diuh genjdanh, de gangj ok gij vandiemz haemzhoj vunz siujsoq minzcuz gaek youq ndaw goetlwed haenx, dwg gij goekrag vwnzva daih cienz daih. De buenx gou byaij hwnj gwnz daizheiq baez dem baez, daj saindaet ndang saenz daengz simdingh soengswt bae ciengq, gou menhmenh gaij bae dan guh boux youq henz yawj ndwi, hawj swhgeij dangbaenz bouxvunz ndaw fwen haenx. Lauxsae baenzneix naemj hix baenzneix guh, de lwnh gou nyi, cienzswnj vwnzva coengzlaiz mbouj faen minzcuz, sim ndiepgyaez caeuq gingqlau, bouxboux cungj ndaej baenz bouxhenhoh. Youq mboengqde, mboujdan son gou eu fwen、rox fwen, engq youq ndaw sim gou doek naed ceh cienzswnj haenx.

Ngoenz dem ngoenz gvaqbae, lwghag bihaenx gyaepgouz fwen, seizneix ndwn youq gwnz gyangjdaiz daihhag, baenz boux lauxsae minzcuz yinhyoz ndeu. Saenfaenh cienjbienq, hawj gou mboujdan ndiepgyaez fwen engq roxnyinh daengz gij rapdawz naekgywggywg. Gou cungj geiqmaenh gij son’gyauq lauxsae, hix lumj de nei, daiq hagseng bae dingq bae hag vahdeihfueng, gangj gij goj fwen hawj hagseng, hawj gyoengqde roxdaengz fwen ndawbiengz geijlai maezvunz. Hwnjdangz gvaqlaeng, gou daiq hagseng lingh bae soucomz fwen, byaij haeuj hawfwen, daengz gyawj canghfwen, hawj gij yaem diuh gaeuqgeq haenx youq ndaw sim daih bouxcoz doek rag did nyez.

Doengh bi neix, gou caeuq gyoengqdoih doengz sim caez eiq haenx laebbaenz “Sauhli Cujhoz”(梢丽组合). Sawgun “梢丽” youq ndaw Vahcuengh eiqsei dwg “dahsau gyaeundei”, dou geij boux minzcuz mbouj doxdoengz, miz Bouxcuengh、Bouxgun、Dungcuz、Bouxyaej, cij aenvih ndiepgyaez doxcomz guhdoih. Dou dawzmaenh gij daejsaek minzgoh, hix damjlaux damqra diuzroen cauhmoq. Dou dawz Fwenleux Bouxcuengh caeuq denswjyoz yungzhab, dajcauh ok souj go 《Aihei》, mboujdan hwnj daengz Cietminzgoh Yenzswngh Cungguek, lij yamq haeuj ndaw denging youzheiq gozci bae, hawj gij yinhyoz saw vah siujsoq minzcuz Gvangjsih byaij coh daengx seiqgyaiq; dou daiq dwk soujgo aendingzdingj ndaek ciengq 《Ciengq Ranzmbanj》, youq Aen Vanjvei Ndwencieng Yanghsi biujyienj, ndaej daujyenj haenhndei seuqcingh gaugaep; dou camgya loegguh bien Gvangjsih《Cungguek Youq Ndaw Feihyiz》 Yanghsi, hawj bouxyawj daengx guek yawjraen gij yinxdaeuz minzgoh lai minzcuz Gvangjsih, caiqlij youq mwh liz cigboq Aen Vanjvei Ndwencieng Yanghsi Bi 2024 ngamq lw 4 ngoenz, loeklak ciep ndaej iucingj, ganjgip ganj bae Bwzgingh, daiq aendingzdingj bae ciengq 《Fwen Couh Lumjbaenz Raemxdah Seizcin》, youq dangqnaj ik fanh bouxyawj baijok gij fwen Gvangjsih ndeidingq maezvunz.

Daj gwnz daizheiq Yanghsi daengz guh ciet deihfueng, daj hawfwen conzdungj daengz gizdieg doxdax seizhwng, dou buekguh mbouj dingz, hix soundaej gig lai. Camgya “Singgok·Minzgoh Moq Diuhcan Doxdax”, yungh 《Fwen Aendom》 daj ginghdenj gaijbien haenx gejnaeuz fungcingz Bouxcuengh, youq ndaw sing seizhwng seizcoz cienzswnj minzcuz vwnzva; youq gwnz Aen Vanjvei “Cieng Nyied Cibngux Fwen Goksad”, hot 《Ciengq Daengz Va Hai Nuengx Couh Daeuj》, ciengq ok gij diuh daegbied Gvangjsih gag miz. Youq gwnz roen baenaj, dou caemh deng vunz gangjbaeh caeuq camngeiz, miz vunz nyinhnaeuz minzgoh yenzswngh cigsoh bak ciengq mbouj gaeuq dawzbanj, miz vunz nyinhnaeuz minzgoh ciuhgonq mbouj habngamj seizhwng, hoeng dou cungj mbouj cuengqfwngz. Cingq dwg aenvih baenzneix dawzmaenh, dou baez yamq baez yamq byaij ok Gvangjsih, byaij coh gwnz daizheiq gvangqlangh. Seizneix, gou caeuq gyoengq doengzdoih gou byaij hwnj gwnz gyangjdaiz, baenz bouxguhhong son- gyauq ndeu, son gij cihsiz swhgeij hagrox haenx hawj engq lai hagseng. Gou gig sim’angq yawjraen, gij lwghag nienzcoz yied daeuj yied lai haenx daj najseng daengz ndiepgyaez, daj bouxdingq bienqbaenz boux- cienzciengq, yungh gij fuengsik daih- neix gaijbien minzgoh、cienzboq minzgoh, hawj gij yaemdiuh gaeuqgeq bienq ndaej moqsak. Godangz caeuq ndawbiengz doxlienz, conzdungj caeuq seizhwng yungzhab, cienzswnj mbouj caiq dandan dwg mbiengj ndeu dawz- maenh, cix dwg cieprengz hoenghhwd.

Yienghyiengh rox bienq hoeng simnduj mbouj bienq, dingj guh baenaj cungj miz soundaej, youq gwnz roen cienzswnj minzcuz yinhyoz Gvangjsih ndwn maenh, daj bouxvunz gyaepgouz fwen、baiq sae haglienh, daengz hwnjdaiz biujyienj、son saw ganq vunz, caiq daengz daiqlingx aendoih byaij coh daengx guek、byaij coh seiqgyaiq, gij sing fwen ndaw sim gou, itcig sawdik ronghgywg.

Fwen rwenzru, cienz ciengq cien bi; vwnzva cienzswnj mbouj dingz mbouj duenh. Gou nyienh ciengxlwenx guh bouxhenhoh caeuq bouxcienzswnj minzgoh Gvangjsih, simnduj mbouj bienq, dawz gij yaemdiuh fwen doenghsim Bazgvei, ciengq hawj engq lai vunz dingq, hawj faenh minzcuz vwnzva ronghsag neix, daih dem daih ciengxlwenx singjsien、cienz gyae cienz gvangq.

编辑：实习生石喜丹复审：黄慧华终审：蒙树起