Gij Goj Dahlanz - 广西民族报网

Gij Goj Dahlanz

来源：广西民族报网

作者：□Vangz Yimeiz/黄玉梅

发布时间：2026-08-18

Lanz roxnaj Yungj dwg youq Haijnanz aen cangj guh muengx dwkbya ndeu. Yungj youq aen cangj muengx dajgoeng gaenq 3 bi lo, hoeng Lanz dwg ngamq ciu haeujbae. Yungj caeuq Lanz cungjdwg daj diegwnq daeuj, baez dingq sing gangj, couh rox doiqfueng dwg vunz ranzmbanj.

Vahsug gangj “doengzyieng raen doengzyieng, raemxda rihnangnang”, liz ranzmbanj cienleix, ndaej roxnaj geijlai boux doengzyieng? Lanz caeuq Yungj couh yienghneix dox ciuqgoq lo, mbouj miz maz vah mbouj gangj. Seizgan nanz le, Lanz couh deng gij ngaiqhoh Yungj gamjdoengh lo.

Youq ngoenz rumz unq mbwn ndei ndeu banhaemh, Yungj caeuq Lanz daeuj daengz henz haij, yawj daengngoenz menhmenh doek roengzbae, Yungj doiq Lanz naeuz:“Danghnaeuz mwngz ndaej baenz ciuhvunz buenx gou yawj daeng- ngoenz, geijlai ndei ha!” Lanz rox gij eiqsei Yungj, hoeng Lanz baenzlawz cungj gangj mbouj ok bak.

Baez ndeu hwnjban, Lanz deng gihgi dub sieng lwgfwngz. Yungj boux daih’it ganj bae yihyen yawj de.

Geij ngoenz de, Yungj cingjgyaj daeuj ciuqgoq Lanz. Dang mwh lwgfwngz Lanz doengh mbouj ndaej, Yungj couh lumj doiq lwgnyez nei bang Lanz swiq naj; youq mwh Lanz mbouj ndaej aeu fwngz gwn haeux, Yungj couh aeu beuzgeng amq dem amq bwnq. Sieng ndei le, Lanz coemj daengz ndaw rungj Yungj bae gamjdoengh daej hwnjdaeuj, Yungj naeuz:“Haq hawj gou ba, ciuhvunz gou cungj in mwngz.” Lanz deng de caencingz gamjdoengh le, gietdingh aeu baenz ciuh daeuj doxbuenx daengz geq.

Bi daihngeih, Yungj daiq Lanz ma ranz gezvwnh lo. Mizseiz gij yienghsiengq Lanz hawj bohmeh Yungj mbouj dwg baenzlai muenxeiq. Hoeng Yungj gyaez Lanz, bohmeh cix mbouj ndaej laengz. Gvaq bi ndeu le, Lanz seng daeg lwgsai ndeu, Yungj bae caeuq boh de hai gaiq diegrin ndeu. Lanz youq ranz ciuqgoq lwgnyez, youh nyaengq gij hongnaz ndaw naz.

Sam nyied dwg seiz ndaem naz, Lanz aemq lwgnyez daengz ndaw naz bae ndaem naz. Aenvih siengj guh aen ranzlaeuz bonjfaenh, Yungj bae diegrin doz cienz lo. Haidaeuz, Yungj gvaq ndwen ndeu couh dauqma mbat ndeu, gvaqlaeng byongh bi hix mbouj dauqma baez he.

Liggaeuq ngux nyied co’ngux banringz, Lanz gaj duz gaeq ndeu le, nyinhnaeuz cietheiq Yungj ndaej dauqma. Hoeng Lanz doq caj doq muengh, cigdaengz ndaundeiq rim mbwn, Yungj lij caengz dauq. Lanz saetmuengh lo, umj boux lwg siengsim daej hwnjdaeuj. Lanz baenzlawz hix siengj mbouj doeng, Yungj vihmaz yienghneix ne? Lanz aemq lwg byaij le ngoenz ndeu bae daengz diegrin ra Yungj. Boh Daegyungj naeuz:“Baenzlawz mbouj youq ranz hen, caen dwg yawj loek mwngz lo.” Lanz naeuz:“Nanzdauh gou daeuj riengz Yungj miz loek ma?” Yungj mbouj gangj vah, boh de ciep cix naeuz:“Mwngz gojyij bae, ndaw sim bouxlaux dou mbouj miz mwngz.” Yungj mbouj vih Lanz ceng saek coenz vah.

Lanz vit lwgnyez hawj Yungj, haetnyah yaek bae Bwzswz dajgoeng. Lanz nyinhnaeuz yienghneix guh, Yungj rox rag de dauqlaeng. Hoeng Yungj yawj gij saeknaj daxboh de cix mbouj miz damjliengh bae laengz Lanz dauq. Lanz dauqdaej bae Bwzswz lo, lizgyae le gij vah unq vah van Yungj gaenq doiq de gangj haenx.

Cungj naeuz aen sim mehmbwk dwg aeu daeuhfouh guh baenz, Lanz ngamq daengz Bwzswz 3 ndwen, ranznden couh denva hawj Lanz, naeuz boux lwgnyez Lanz fat ndat dangqmaz, heuh de caenhliengh dauqma vaiq di. Lanz bonjlaiz dwg vih heiq Yungj cij okdaeuj, seizneix dingqnyi naeuz lwgnyez bingh lo, sim de gig vaiq soiq lo. Lanz gaenj lumj feiz gig vaiq ma daengz ranz, cix raen lwgnyez ninz youq ndaw rungj mehbaj ranznden. Lanz cam Yungj vihmaz mbouj daiq lwgnyez bae yihyen, mehbaj naeuz Yungj gaenq daiq lingh dah lwgsau bae yienhsingz guhcaemz haujlai ngoenz lo. Lanz daej lo, de doq daej doq umj lwgnyez buet bae coh veiswnghyen……

Lwgnyez yaek ok yihyen lo, Yungj cix daiq dah lwgsau ndeu ndwn youq bakdou veiswnghyen. Lanz coenz vah ndeu cungj mbouj gangj, nyaenx gij haemz ndaw sim cien gaen naek haenx, umj boux lwgnyez couh buet ok douhung yihyen.

Doeklaeng, Yungj caeuq Lanz doxliz lo. Lanz daiq lwg ma ranzdaiq, lwgnyez caeuq daxdaiq dox ingbaengh, Lanz daengz dieg gig gyae bae dajgoeng lo. Mboengqgonq, Lanz youq ndaw veizsin de sij naeuz:“Ciengz vwnhyinh indot ndeu, caen hawj gou doeknaiq dwk byoeksaej coegsim. Bouxsai caeuq mehmbwk gezvwnh le, vihmaz mbouj lumj ngamq lienh doxgyaez daengz ciengxlwenx? Gijmaz doiq haij doiq bya fat vahmieng, gijmaz haij hawq rin nyug sim mbouj bienq cungj gaenq baenz fwj hoenz gvaq da. Boux sim’in gou mbouj dwg bouxgvan, cix dwg bohmeh gou, cix dwg vunzmbanj gou.” Baez doeg le, hawj vunz siengj bae siengj dauq.

编辑：实习生廖小凤复审：黄慧华终审：蒙树起