Cawz Doegsaw Gou - 广西民族报网

Cawz Doegsaw Gou

来源：广西民族报网

作者：□ Lij Sunfwnh/李顺芬

发布时间：2026-08-17

Cawz doegsaw gou, buenq ndeu dwg haet bae haemh dauq, raemxraiz ndij fwjhaemh guhbuenx, buenq ndeu dwg youq hagdangz ninz, ndaundeiq ndij ronghndwen guhdoih.

It ngeih nienzgaep gou dwg youq ndaw mbanj doeg, hagdangz daengj youq gyangndoi, dwg aeu namh cuk guh, hagdangz miz gag aen rug ndeu, baihndaw cuengq song baiz, baiz ndeu dwg it nienzgaep, baiz ndeu dwg ngeih nienzgaep, boux lauxsae ndeu son daengxlai hagseng ndij daengxlai goqcingz. Ranz gou dwg youq baihgwnz hagdangz, hagdangz liz ranz gou geij bak mij. Ngoenzngoenz gyanghaet, gou cix aemq aen daehsaw okdou, aen daehsaw de dwg mehbaj guh hawj cejbiuj, cejbiuj mbouj yungh cix aeu hawj gou yungh, go’nya henzroen miz raemxraiz, hawj gavaq ndij haizbaengz cumx liux. Cawzde, hagdangz lij hawj hagseng gyau geij gaen makyouz, ngoenzsinggeiz gvaq suenggangq, dou guhdoih bae gyangbo rax makyouz fwx lauq, dawz dauq ranz dak sauj liux dawz bae gyau. Daengz cawznit, lauxsae cix cuengqgyaj hawj dou bae bo aeu fwnz gwed bae hagdangz, roengzdangz cix coemh daeuj byoq, hagseng bouxboux byoq dwk naj nding naj ndat liux. Cawzde hwnj dangzdijyuz, saekcawz lauxsae daiq dou buet, saekcawz heuh dou loenghfoux, saekcawz vad cag hawj dou diuq, hagseng baizcece haeujbae diuq, gyoengq hagseng mbouj diuq de gag bae liuh goj miz, boux bae dub mbaq hawj lauxsae goj miz, gou cix dwg rapraq bae cam lauxsae ndaej mbouj ndaej swng hwnjbae doeg ngeih nienzgaep……

Sam seiq nienzgaep gou bae mbanj henz liz ranz gou song goengleix de doeg, gyanghaet cawznit, mbwn ngamq wenj, dou cix aeu hwnq lo, doxciuz bouxbuenx guhdoih bae, dou dangq boux dangq gag dawz roengqfeiz gag guh, doq byaij doq byoq bae hagdangz, danghnaeuz cawz laepmok laux, gek cib lai mij cungj mbouj raen vunz, raen gag roengqfeiz oq ndinglitlit. Cawznit bi 2002, daeuj mbat nae lauxlaux ndeu, aj da cix raen deihdeih haumbapmbap, cawzde mbouj miz soujgih mbouj miz biuj, mbouj rox dwg geijlai diemj, raen mbwn rongh liux, laih lotdangz lo, ndawsim heiqbupbup, gyoet geijlai goj yaemh nae bae hagdangz, bae daengz caengh rox nae daeuj cuengqgyaj lo.

Aenvih gaijgwz, hagdangz mbanj henz doeknduj ndaej doeg daengz siujyoz bizyez goj mbouj miz haj roek nienzgaep ya, hawj bae Bakdah doeg, Bakdah liz ranz haj roek goengleix, yienghneix, haj nienzgaep gou cix ngaiz youq hagdangz ninz lo. Gyoengq lwgsau daj dangq deih dangq mbanj daeuj comz youq aen rug ndeu, gou geiq mbouj ndaej daengxlai miz geijlai vunz lo, mbonq gwnz mbonq laj rim vunz liux. Henz rugninz dou dwg ranzyw, rugninz liz diengzhaex sam seiq bak mij, ceiq lau dwg byonghhwnz baenzdungx, byaij baenzlai gyae bae goj lau dangq dai, yienghneix, henz rugninz cawz mbouj raq cix miz vunz dwkhaex……

Hawj gou nanz lumz dwg cawzndat guhdoih guhcaeg bae gadah henz hagdangz guhcaemz, deihde dwg deih caemz deih liuh dou. Cawzndat ninzringz, dou cix guhcaeg bae henzdah liuh, youq deih raemxmboek de, miz vunz vit raemx guhcaemz, miz vunz dawz buenz ra sae. Nditndat ciuq daengz gwnz raemx ndongq- ndiengndieng, sing riu dou hongz bae daengz gyae’gyae. Yaek daengz cawz hwnjdangz, dou caengh faengzfwgfwg dauqdaeuj. Ngoenzsinggeiz hwnjdangz duzhaemh liux, danghnaeuz bungq dwg haemh miz ronghndwen, gyoengq lwgbeix cuhcungh cix daeuj ciep dou dauq ranz, roek caet boux vunz dou cix domh hwnz doxdoih angqangq faengzfaengz dauq ranz.

Daengzlaeng, gou bae Ndawdaux doeg gauhcungh, bae Gunhmingz doeg dayoz, daengzlaeng dem, gou daeuj Guengjsae guhhong. Gij hagdangz de, aen lauq cix lauq, aen daengj gvangq cix daengj gvangq, saekbaez gvaq hagdangz yaek haeujbae yawj cungj ngaiz bouxdawzdou heuh dauq, gyoengq hagseng bizyez gvaq de cix lumj vunz dawz biuqci gvaqgeiz, hwnj mbouj ndaej ci cawzneix lo.

Dauq naemj daengz cawz doegsaw, cawz byaij bae doeg haethaet miz meh raeb, cawz ninz hagdangz ngoenzngoenz miz lwgbuenx doxbuenx, geij bi de, gou ceiq angqfaengz, dauq mbouj bae goj lumz mbouj ndaej.

编辑：实习生石喜丹复审：黄慧华终审：蒙树起