来源：广西民族报网
发布时间：2026-07-07
Mbanjluegvaz doengxhaet mok mbouj rox sanq, lumj rek raemxraez deng hoed gvaq nei, geuj hwnj dingjranz, byaifaex. Luz Yungjsiengz maeuq youq rog dou cit ien babbab, lwgda dinghdingh yawj diuz roennamh gumzgamx doeng ok bakmbanj haenx.
De ndaej ndij diuz roen neix angqfwngfwng soengq song daeg lwg de bae hagdangz gwnz haw doegsaw, doeklaeng songde hix dwg cimh diuz roen neix doeknaiq dwk dauqma.
Song daeg lwg youq haw Nazheuj doeg cuhcungh, daegdaih ngamq beix daegngeih bi ndeu, mwh doeg siujyoz deng louzgaep baez ndeu, cimhlaeng song beixnuengx couh ndaej caemh gaep caemh ban lo. Moix aen singgeiz roek dauq ranz, cungj mbouj raen song daeg de daiq saw ma yawj gvaq. Doeklaeng lauxsae daengq vah daeuj naeuz, song lwg neix hwnjdangz haengj baiqninz, gingciengz mbouj guh cozyez.
Haemhhaenx, Luz Yungjsiengz naengh youq henz mbonq cit ien hwnz ndeu, hoenz ien geujnaunau ndaw rug. De bonjfaenh youq mwh “vwnzgwz” ngamq ndaej doeg daengz siujyoz haj nienzgaep, cix rox yawj habdoengz, rox yawj ciengqmoeg lo. De nyinhdingh doegsaw ndaej gaijbienq minghyinh bouxvunz, couh dajsuenq roengzrengz soengq lwg doegsaw, bu diuz roen ndei hawj lwg.
Mwh song daeg lwg cuhcungh bizyez, dahlwg iq de Dahyinz siujyoz hix bizyez gauj hwnj Nazheuj Cunghyoz. Ngoenzde Luz Yungjsiengz daiq dahlwg bae Nazheuj, yaek hawj dahlwg bae yawjyawj hagdangz moq. Youq gwnz haw dingqnyi vunz lwnhyaeyae: “Nazheuj Cunghyoz bineix yaez lo, gingqyienz mbouj miz saek boux gauj ndaej hwnj gauhcungh.”
Luz Yungjsiengz caiq hix mbouj miz simgei daiq dahlwg bae yawj hagdangz moq.
Luz Yungjsiengz laeglemx bae haw nden Gyaeujgiuz baez ndeu, mwh dauqma ronghndwen gaenq hwnj sangsad lo. De coh yah de naeuz: “Gaej hawj Dahyinz bae Nazheuj doeg lo, aen hagdangz de son mbouj baenz.”
Yah de baez anj: “Mbouj bae gizde, ndaej bae gizlawz?”
“Bae Gyaeujgiuz Cunghyoz.” Luz Yungjsiengz hanhak naeuz, “gou cam gvaq lo, aen hagdangz de guenj ndaej yiemz, bibi cungj miz geij boux gauj ndaej hwnj cunghconh.”
“Bae gyaenx dwg doeg ‘ngeihgyaq’ bw, deng gyau ngaenz cancu cijndaej!” Yah de miz di sim’in ngaenz, “bae gyawz aeu baenzlai ngaenz? Soengq dah lwgmbwk ndeu sai baenzlai ngaenz……”
Luz Yungjsiengz ndwn youq gizde mbouj ning mbouj doengh, ronghndwen ciuq dwk ngumhngaeuz de raezrangh, iet daengz bangx dourug dahlwg bae. Ndaw rug, Dahyinz cingq naengh youq henz aen daengyouzhaeu yawj saw, aen ndang byombyang de yienh ndaej daegbied reuxred.
“Ngaenz, gou bae ra ciq.” Luz Yungjsiengz naeuz, “lwgmbwk youh baenzlawz yiengh? Ngawz gvaq lwgsai ha?”
Ndaw mbanj siusik cienz ndaej vaiq, yaepyet, gak gyaeujhongh、luengqranz cungj miz doengh boux maij guh fwen haenx doq fwen daeuj gae de.
“Song daeg ndi cengheiq, mbouj doeg ndaej baenz saw, rox de ngeix yiengh lawz, dawz ngaenz oet dahlwg.”
“Daengzcog sau haq vunz, nanz baengh gwn saek donq, guh seng’eiq siedbonj, gonh dah mbouj raen bya!”
……
Luz Yungjsiengz mbouj leixlangh gij vah haenx, ciuqyiengh ra ngaenz soengq Dahyinz bae Gyaeujgiuz Cunghyoz doeg cuhcungh.
Sam bi gvaqbae, cunghgauj cingzcik okbuengj, Dahyinz gauj ndaej daengx yienh daih’it. Mwh siusik cienz ma daengz Mbanjluegvaz, Luz Yungjsiengz cingq youq gaiq reih bakmbanj haenx dwkbwnh lumx haeuxyangz. Nuengxau de bae haw dauqma daengz bakmbanj cix hemq: “Gosiengz, Dahyinz gauj ndaej ‘canghyienz’ lo!”
Luz Yungjsiengz angq dwk sikhaek cuengqcak faggvak gwnz fwngz, buet bae ranz naeuz hawj dahlwg nyi.
Vunz baez bungz caijsoq, diuzdiuz loh cix doeng. Rog gih aen hagdangz cunghconh ndeu geiq luzcij dunghcihsuh daeuj hawj Dahyinz. Seizhaenx dwg aen sigij gonq betcib nienzdaih satbyai, gauj ndaej cunghconh miz guekgya faenboiq, miz cwngzcin hugouj, gangj liux bae, couhdwg ndaej gwn haeux goenggya lo. Daengx mbanj fwtfwh goenjoo hwnjdaeuj, bouxboux haenh naeuz cojsan (mohcoj) ranz de rengzfeiz.
Luz Yungjsiengz guh geij daiz byaek daengq caencik beixnuengx daeuj caez angq, daegnuengxbiuj de youq ndaw yienh guhsaeh haenx caemh daeuj. Ngoenzde daegdaengq daenj dauq buh moq ndeu, de baez boux baez boux bae coh beixnuengx gingqlaeuj. Geij cenj laeuj mazmet le, daegnuengxbiuj laeglemx naeuz de nyi: “Dahyinz cungj cingzcik neix bae doeg cunghconh caen saivaih ha. Banneix hingzsi bienq ndaej vaiq, daengzcog daihhagseng cij gwn ndaej hom bw. Lau hawj de bae doeg gauhcungh, gauj daihhag cungj lai ndei gvaq!”
Luz Yungjsiengz sim baez saenqdaenh, gij sing cauz goenjo gyoengq beixnuengx de lumj naeuz caeuq de mbouj miz nanangq lo, caiq hix dingq mbouj roengzbae. De baenq naj bae yawj dahlwg, raen Dahyinz cingq naengh youq daiz lwgmbwk haenx gejgangj diuzdaez suyoz hawj nuengxdangz nyi, gij saenzcingz de dwggyaez dangqmaz.
Haemhhaenx, seiqlengq caem- rwgrwg. Luz Yungjsiengz gag naengh naj bakcueng, cit ien ci dam ci, byaiien diemj feiz ndongqngeuj, ciuq raen yienghsiengq lumj dwg ngeix dwk uk yaek mboek.
“Gaej sieng’uk nyaenxlai lo, hawj de doeg cunghconh suenq lo.” Yah de byaij daeuj gyawj naeuz, “ndaej caeux di miz hong guh, dawz onj duix haeux ndeu.”
Luz Yungjsiengz mbouj guhsing, de yawj baih conghcueng dahlwg, daeng lij rongh, Dahyinz lij yawj saw. De ngeix hwnj mwh coz bin bya raemj fwnz, caenh maij bin hwnj giz sang bae, aenvih giz sang yawj ndaej engq gyae roxnyinh sim engq sangj.
Gaeq haen lo, Luz Yungjsiengz yungh fwngz nu ci ien de roengz gwnz namh bae ndaep feiz. De vaehvaeh ndwn hwnjdaeuj, haeb heuj naeuz: “Bae doeg gauhcungh.”
Gyoengq vunzmbanj youh miz fwen moq lo: “Yungjsiengz diuzmingh cienh, caenh siengj hawj lwg ndei, yiemz doeg cunghconh yaez, coi bae gauj daihhag”
Luz Yungjsiengz mbouj leixlangh bouxwnq baenzlawz gangj. De haenqrengz guhhong, lai ndaem le geij moux oij geij moux lwgfaeg, lij hwnj ndoi bae haifwz ndaem benq faexnganqciq ndeu.
Youh gvaqbae sam bi, Dahyinz swnhleih doenggvaq gauhgauj, gauj hwnj le Dunghbwz Dayoz.
Baezneix, Luz Yungjsiengz mbouj cingj laeuj. De gaem bonj daihhag luzcij dunghcihsuh dahlwg gag yawj gag ngeix, mwh dahlwg lij iq cungj haengj cam: “Gvaq goengq ndoi neix bae baihhaenx miz gijmaz?” De cungj han naeuz: “Baihhaenx caemh dwg ndoi.” Dahlwg youh cam: “Baih ndoi haenx caiq okbae ne?” De youh han: “Lij dwg ndoi.”
“Mbatneix dahde caen ndaej raen gij ndoi baihrog lo.” Luz Yungjsiengz gag mboen naeuz.
Dahyinz daihhag bizyez le, youh gauj sozsw、bozsw, doeklaeng ndaej louz youq hagdangz sonsaw. De dwksaenq baema naeuz bohmeh, caj baen ndaej ranzyouq couh ciep bohmeh bae yiengjfuk. Luz Yungjsiengz cix hoizsaenq naeuz “mbouj yungh gip”, ciuqyiengh ngoenzngoenz bae naz bae reih, lumj gofaex geq rag con roengz namhlaeg nei.
Cig daengz cawz gvej haeux, Luz Yungjsiengz umj umj haeuxgaem ndeu yaek coq haeuj gyoi bae rap, sawqmwh baez saemxsax laemx roengz gwnz dieg. Umj haeuxgaem henjrwg de sanq ndaej daengx dieg, lumj bwnz denz na’noeknoek ndeu.
Mwh yaek gatheiq, de gaenq uk mbouj lingz lo, caenh yawj coh baihbaek, fwijbak vaehvaeh ningdoengh. Yah de daep rwz bae dingq, cij nyi de singyaem unqnyieg naeuz mbouj baenz coenz: “Gij ndoi……baihrog……”
Mwh Dahyinz cingjgyaj dauq daengz ranz, daxboh gaenq deng vunz ndaw ranz soengq hwnj ndoi lo. De gvih youq naj lingzbaiz daxboh, daej saekwk bae.
Haujlai bi gvaqbae, Dahyinz baenz le gyausou, de hwnjdangz gangj gij bienqvaq sonhag lajmbanj guek raeuz, lij haengj dwen daengz boh de. De naeuz, boux vunzguhnaz ngamq ndaej doeg siujhag haj nienzgaep ndeu, yawj ndaej gig gyae, bang lwg bu diuzroen soh ndeu, hoeng de cix mbouj ndaej yamq din byaij gvaq.
Ndaw gyausiz caemrwgrwg, baihrog dwg daengrongh ndawsingz vava loegloeg migmyanmyan. Miz lwghag cam: “Gyausou, boh mwngz rox ienqhoij gvaq lwi?”
Dahyinz mbouj cigsoh han, yawj ok rog cueng bae. De lumjnaeuz youh yawjraen gij ciengzmienh seiz lij iq daengx ranz doxcomz gwn caeuz haenx, boh de haengj lwnh mbanj lawz lwg lawz doegsaw ak, gauj ndaej okbae gwn haeux goenggya, ndaej angjnaj bohmeh, angjnaj cojcoeng. Gij rongh daengyouzhaeu myoxmyadmyad, ingj ndaej gij byoemhau de henj baenz gimsei.
“Miz di doenghyiengh byawz cungj gangj mbouj cingcuj.” De danq gaemz heiq raez he naeuz, “aen daeng baihnaj yied yaengx okbae gyae, ngumhngaeuz laep baihlaeng cix iet ndaej yied raez!”
编辑：实习生 蒙宁霜 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291
汉文版电子邮箱：gxmzbzb@163.com 壮文版电子邮箱：gxmzb2@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com