Sangswh Dwg Souj Go - 广西民族报网

Sangswh Dwg Souj Go

来源：广西民族报网

作者：□ Vangz Civeij/黄志伟

发布时间：2026-07-07

De daiq aen donzdui youq ndaw ranzbanhgoeng yunghsim bae yenzgiu, biensij gij gobwnj song cungj saw vah、muz aen godangz ndei、guh gyauhliuz yenzgiu daujlun、gujli guzgan lauxsae, doidoengh Cuengh Gun song cungj saw vah gyauyuz hwngfat gveihfanva、dijhiva. De sonhag song cungj saw vah, lai baez ndaej swcigih daih ciengj, hagseng gig maij, doengzhangz caez nyinh; guhgoek coihgaij haifat gij godangz song cungj saw vah, fatbiuj lai bien faenzcieng sonhag yenzgiu lunvwnz caeuq gij vwnzyoz cozbinj song cungj saw vah, aeu conhyez naengzlig doidoengh song cungj saw vah gyauyuz swnggaep cizlieng. Doengzseiz, de dajcauh aen sedonz “Cuengh” vwnzva miz daegsaek, guh gij hozdung doegsaw Cuengh Gun song cungj saw vah, guhfwen ciengqgo、minzsug daejniemh daengj, hawj son’gyauq song cungj saw vah byaij ok godangz、 yungz haeuj ndaw hagdangz, hawj lwgnyez gyaez vahcoj、cienzswnj vwnzva, cukmaenh minzcuz vwnzva nyinhdoengz caeuq roxnyinh miznaj.

Luz Vanjcinh dwg boux cozgyah, de lij aeu song cungj saw vah sij faenzcieng, dawz vwnzyoz cangcoz caeuq gyauyuz cienzciep dox giethab, yungh Cuengh Gun song cungj saw vah sij vwnzyoz cozbinj, hawj minzcuz vwnzva youq ndaw cihsaw cienzciep, hawj gij ndei song cungj saw vah haenx youq ndaw vwnzyoz angjhai. De ciengzseiz gangj, diuz hanz ndeu rap ndaej song loz, simdingh cijndaej byaij onj, gyaeuj ndeu dwg gyauyuz bonjeiq, gyaeuj ndeu dwg vwnzva ciepswnj, ngeihcib lai bi daeuj souj aen gyangjdaiz ndaej maenh, de yungh simgyaez、naihsim caeuq canghsim, henhoh diuz meg goek minzcuz, hawj gij vwnzva Cuengh Gun song cungj saw vah doxcienz, hawj gij vwnzva gak minzcuz doxyungz ronghsaksak.

Luz Vanjcinh caeuq aen gunghcozsiz de, lumjbaenz aen daengrongh ndeu ciuq diuz roen cienzswnj minzcuz vwnzva, yungh sim sij ok souj go gyauyuz ceiq unqswnh Sangswh, hawj minzcuz vwnzva ndaej daih dem daih cienz roengzbae, hawj Sangswh vwnzmeg yied daeuj yied raez.

Seiq

Youq Sangswh, Yoz Gensiuh dwg souj go cienzciep feihyiz ceiq ndei dingq haenx. Souj go neix, de baez ciengq couh dwg ciuh vunz ndeu, eu ndaej ndaundeiq ngaem gyaeuj、ronghndwen unqswnh, hawj gij singfwen gaeuqgeq Mbanjcuengh, youq ndaw dah raez mbouj dingz mbouj duenh lae bae、haplangh haujlai haujlai nanz.

Yoz Gensiuh bineix caetcib lai bi, de daj mwh lij iq daeuj couh caeuq gij fwen “Saehlaez” miz yienz. De youq ndaw fwen lwgnyez maj sang, de yungh sim bae yenzgiu gij fwen “Saehlaez” Mbanjcuengh miz daegsaek, daj neix hwnj, haeujlaeg cauhguh gij go cienzciep miz geij cib bi. De doekrag lajmbanj, hawj de miz lingzgamj cauh sij gij fwen, de daegbied caixhangz gag bien gag ciengq, gij diuhgo gyaeundei haenx de swnhbak couh ciengq okdaeuj, youq moix hangz saw ndawde, cungjdwg miz gij hoenzoenq lajmbanj mbouj doengz.

Geij cib bi bit sij mbouj dingz、ciengq fwen mbouj duenh, de gyoeb cauh gij fwen moq yaek rim cien souj, okbanj le 《Bouxmbauq Ndaem Naz》《Gij Fwen Caet Nyied Van Lumj Dangz》《Haenh Duzrwi》daengj cozbinj moq. De yungh sing fwen geiqloeg lajmbanj bienqvaq、minzsug fungcingz caeuq swnghhoz bak yiengh, baengh gij ciengq goeng、cozbinj caeuq gij goengdaej naekna de, lai baez bingz ndaej Gvangjsih Cib Daih Canghfwen, dwg boux lauxsae guhfwen gig miz mingzdaeuz dangdieg.

Ndiepgyaez youq nduj, souj ndei youq laeng. Byaij ga roen neix geij cib bi, Yoz Gensiuh daj goek daengz byai doekrag youq gihcwngz、raeq ndei diegnamh lajmbanj, cienz ndang daeuzhaeuj gij hong cienzswnj feihyiz “Saehlaez”. Vih hawj gij vwnzva feihyiz ciuhgonq louz roengzdaeuj haenx byaij ok baihrog、doekrag youq ndaw sim vunz, hawj gij fwen Bouxcuengh daih dem daih ciep roengzbae, de ciengzseiz byaij haeuj lajmbanj ndaw naz、hagdangz cunghsiujyoz bae hwnjdangz mbouj sou cienz, ciengzseiz hai ban son vunzlai guh fwen, mbouj baujlouz saek di son gij dinfwngz caeuq gij vwnzva cihsiz guhfwen hawj vunzlai.

Ndwenngoenz doiq mbouj hwnj boux raeq reihnaz, de roxsim gungganq ok geij cib boux cienzswnj fwen moq, vih cienzswnj “Saehlaez” hwngfat le lienghdoengh moq. Yoz Gensiuh soujmaenh sing ciengq conzdungj、baujlouz gij feihdauh fwen bonjdieg, doengzseiz hix coengzlaiz mbouj dingz faj din cauhmoq de, de giethab gij yiengh ndei seizdaih moq、fungheiq seizdaih moq caeuq minzcuz vwnzva, cizgiz gaijbienq、bien gij cozbinj fwen moq, vih gij go feihyiz guenq haeuj rengz moq, hawj gij fwen cienzdoengj depgaenh swnghhoz mwhneix、 habdangq boiq gij saemj gyaeu vunzlai.

Guhfwen byongh ciuh vunz, souj ndei byongh ciuh vunz. Yoz Gensiuh ciuhvunz engqgya ndiepgyaez henhoh diuzmeg vwnzva ciuhgonq cienz roengzdaeuj haenx, yungh ngoenz dem ngoenz cienz ciengq caeuq cienz son, hawj gij fwen “Saehlaez” Bouxcuengh Sangswh hai rongh, hawj gij vwnzva ndawbiengz Mbanjcuengh gag miz daegsaek haenx, youq seizdaih moq lienzdaemh ronghrikrik.

Haj

Youq Sangswh, Sizvandasanh dwg hot fwen raemx bya doxheux、swnghdai vwnzva lijyouz caez seng. Ndaw sing fwen de, dwg Sizvandasanh hawj Sangswh raemx bya gyaeundei, bouxboux coengmingz, dwg gij sei dozveh vunz caeuq swyenz doxhuz caemhyouq haenx.

Lai bi daeuj, Sangswh souj ndei leixniemh swnghdai youq gonq、saekheu hwngfat, roengzrengz dajcauh Sizvandasanh dieg baeyouz, hawj raemx loeg bya heu bienq baenz mbaw mingzben ceiq ndei aen singz iq neix, hawj gij sing fwen yungz haeuj ndaw raemx ndaw bya bae, ciengq yiengj souj go vunz caeuq swyenz doxhuz caemhyouq.

Sangswh daj goek daengz byai cungj soujmaenh diuz daejsienq swnghdai, youq baujhoh raemx saw bya heu laj aen cenzdiz neix, haeujlaeg haivat vwnzva lijyouz swhyenz, dawz swnghdai gvanhgvangh、ganghyangj cwxcaih、minzsug daejniemh、lajmbanj dohgyaj yungzhab baenz aen cingjdaej ndeu, dawz Sizvandasanh dajcauh baenz aen mingzben vwnzva lijyouz gag miz daegsaek haenx. Youq mwh hwnqguh dieg baeyouz, haeujlaeg yungzhaeuj gij fungsug sibgvenq Bouxcuengh、gij fungsug ranzmbanj gijgwn、gij yienghsiengq reihnaz lajmbanj, hawj bouxhek youq mwh yawj swyenz funghgvangh gyaeundei, gamjsouh daengz gij yinxdaeuz minzcuz yinzvwnz Sangswh haenx, saedyienh raemx bya caeuq yinzvwnz doxhab、 swnghdai caeuq vwnzva lijyouz caez seng.

Seizneix, Sizvandasanh dieg baeyouz gizgiz cungjdwg hekyouz bet fueng, gawq miz gij ndoengfaex miz yinxdaeuz de, hix miz gij dieg dinghswd ganghyangj cwxcaih yietnaiq. Gyoengqvunz guhcaemz youq ndaw bya henz raemx, supsup amq heiq moq, dingqdingq roeg bya heuh, cimz gij feihdauh gyaeundei lajmbanj, daejniemh cungj yienghsiengq minzcuz, youq ndaw swyenz cuengqsoeng simndang, youq ndaw hoenzfeiz gamjsouh cingzunq.

Bya heu mbouj geq, sing fwen mbouj dingz. Sangswh souj go neix, dwg diuz go dijyuz haenqrengz baenaj de, dwg souj go vwnzyoz cauhmoq, dwg souj go cienzswnj gyauyuz, dwg souj go ciepswnj swnghdai, engq dwg souj go gak minzcuz doengzsim doengzdaek、 gaemfwngz doxgiet byaij baenaj.

（2 sat）

编辑：实习生蒙宁霜复审：黄慧华终审：蒙树起