Sangswh Dwg Souj Go - 广西民族报网

Sangswh Dwg Souj Go

来源：广西民族报网

作者：□ Vangz Civeij/黄志伟

发布时间：2026-07-07

Bineix youq mboengq “haj it”, gou riengz Bingzgoj Si Canghraiz Sawcuengh Hezvei bae daengz Fangzcwngzgangj Si Sangswh Yen caijfungh, youq aen singz bya raemx doxheux ndawde, Sangswh lumj souj go nei, youq Sizvandasanh cienz ciengq mbouj dingz.

Youq Sangswh, Liuz Haijdungh dwg boux ciengq go dijyuz ndeu. Ndaw sing fwen de, dwg gij loqsiengj daeuzmingz aen doih de, gyoengqde yungh lwedhanh bae gyaepgouz, dwg yamqdin hongzsatsat Sangswh gak minzcuz lwgnyez caezsim gyaep loqsiengj.

Liuz Haijdungh dwg Sangswh Yen Yezyiz Dijyuz Yozyau yaucangj. 1999 nienz, Liuz Haijdungh ciepfwngz gij hong son- gyauq gijcung. Seizhaenx aen dijyuz yozyau neix youh gungz youh hoj, mbouj miz giz dieg conhyez lienh dijyuz, mbouj miz gij hongdawz ndei, cij miz geij diuz guenjdiet gaeuq guh gyaqdingj. Hoeng aen swhsiengj de coengzlaiz mbouj suksaenq, de rox gij lwgnyez ndaw bya miz gij rengz nyangqnywtnywt mbouj fug saw. Dijyuz gawq dwg boekfeiz diemj rongh ciuhvunz, hix dwg diuz sai gietcomz gak minzcuz beixnuengx. Sangswh dwg dieg Bouxcuengh、Yauzcuz、Bouxgun lai minzcuz comzyouq, Liuz Haijdungh itcig saenq, dijyuz mbouj faen minzcuz, fwndou mbouj faen mwngz gou, cijmiz doengzsim habrengz, cijndaej hawj gij lwgnyez lajmbanj byaij ok ndaw bya, ndwn youq gwnz daizheiq engq sang.

Daj mwhhaenx hwnj, mbwn ngamq rongh, gwnz cauhcangz Liuz Haijdungh sien daiq gyoengq duiyenz lienh, daengz mwh mbwn fuemx, laj daeng ciuqyiengh lij raen gij ngaeuz de son lwgnyez、gij sing gujli lwgnyez. De gawq dwg boux lauxsae yiemzsuk, youh dwg boux boh vunz unq, giemgoq gij swnghhoz gak cuz duiyenz caeuq lienh majsang, de yawj vunz daeuj son’gyauq、naihsim bae buenx, yungh genhciz gwzfuz hojnanz, aeu gujli diemj dawz gij eiqsik buekguh. Ndaw duivuj dijyau, Bouxcuengh、Yauzcuz、Bouxgun doengz gotmbaq bae lienh, mbouj miz minzcuz faenbied, dan vih doengz aen muzbyauh bae lae hanh, dawz minzcuz doxgiet cungj cingzngeih neix, yungz haeuj moix baez okrengz、moix baez genhciz、 moix baez gotmbaq caez byaij baenaj.

Ngeihcib lai bi rumz fwn byaij gvaqdaeuj, Liuz Haijdungh daiq- lingx aen doih saedyienh le daj mbouj miz daengz miz、daj nyieg daengz ak. Seizneix Sangswh yezyiz dijyau, gaenq dwg aen giekdeih cungdenj lienh dijyuz hanghmoeg cungdenj, gonqlaeng vih guekgya caeuq swcigih soengq ok daihbuek yindungyenz maenhndei, byaij ok 36 boux daeuzmingz ndaw guek caeuq gozci, youq daengx guek doxdax ndawde ndaej geij cib aen ginhbaiz, hawj gij mingz Sizvandasanh yiengj doh daengx guek. Moix gaiq ciengjbaiz cwngqmingz lwgnyez ndaw bya haenqrengz ciemhciemh majhung; moix baez ndaej daeuzmingz, cungj dwg aen cienzgeiz Sangswh. Hoeng giz ceiq bengz de, dwg youq dieg doxdax mbouj faen minzcuz caemh mbaq hoenxciengq.

Ngeih

Youq Sangswh, Moz Ginhmeiz dwg souj go vwnzyoz ceiq unqswnh、ceiq miz seieiq ndeu. Sing go ndawde, dwg Moz Ginhmeiz aeu sim dangq bit, aeu cingzngeih dangq sa daeuj sij gij gojgeq ranzmbanj, dwg gij yinhlwd Sizvandasanh cienzciep roengz- daeuj haenx.

Moz Ginhmeiz dwg vwnzlenz cujsiz Sangswh Yen, de doekrag youq bonjdeih sij faenzcieng, dazyinx bonjdeih vwnzyoz hwngfat, yungh saw daeuj geiq gij funghgingj lajmbanj, sij minzcuz cingzngeih, hawj gij raemx gij bya、 gij vunz gij hoenz、 gij yinh minzcuz Sangswh youq ndaw vwnzyoz gwnz seiqgyaiq lwenq- yamyam, vih aen hawsingz iq neix ciengq le souj go vwnzyoz ndei dingq ndeu.

Youq ndaw faenzcieng Moz Ginhmeiz, gij ndiep gij gyaez ranzmbanj cungj ndimq mbouj youq lae okdaeuj. De ciengzseiz byaij youq ndaw bya ndaw raemx Sizvandasanh, ndonj gvaq gak aen mbanj minzcuz bae dingq vunzlai gangj gojgeq, gamjsouh gij fungsug sibgvenq ndawbiengz, gamjsouh gij minzcuz vwnzva, vaq baenz gij faenzcieng laj bit de. Moz Ginhmeiz lai bi sij mbouj dingz, gij cozbinj de gaenq doekrag youq Sangswh, gig miz gij cingz ranzmbanj raeujrub caeuq minzcuz doxgyaez, mboujlwnh dwg gij sanjvwnz saeqnaeh, roxnaeuz dwg lwgnyez vwnzyoz gvaigvet, hix roxnaeuz dwg gij faenzcieng minz- cuz geiqsaed haenx, cungj daiq miz gij yaenqgeiq Sangswh, cungj hawj vunz geiq youq ndaw sim.

Dangguh boux dazyinx vwnzyoz bonjdeih, Moz Ginhmeiz mboujdan guh ndei bonjfaenh de, engq gwed hwnj diuz rap naek cienzciep、gungganq vwnzva moq. 2016 nienz, de guhdaeuz laebhwnj Sizvandasanh Vwnzyoz Cangcosiz, gyonjcomz boux maijgyaez vwnzyoz bonjdeih, doengzcaez vat ok gij lizsij vwnzva、gij gojgaeq minzcuz caeuq gij raemxraemx bya’bya, hawj gij saw sanqdoek youq ranzmbanj ndawbiengz singj dauq.

De cizgiz dap hwnj aen bingzdaiz vwnzyoz gyauhliuz, gawjbanh hozdung lwnhgangj vwnzyoz、cingj bouxcanghraiz haeuj hagdangz、okbae caijfungh daengj, dawz gij ceh vwnzyoz vanq roengz ndaw hagdangz caeuq doenghnaz bae, gungganq le buek vunz moq vwnzyoz bonjdeih ndeu, hawj gij vwnzyoz diegnamh Sangswh engq biz. De haeuj daengz ndaw mbanj bae guh diucaz yenzgiu, cingjleix gij fungsug sibgvenq minzcuz, dawz gij vwnzva dijbauj bonjdeih cienjvaq baenz vwnzyoz cozbinj, hawj gij goj minzcuz Sangswh haenx byaij ok ndaw bya hung daeuj, hawj engq lai vunz yawjraen caeuq doeg rox.

Geij bi neix daeuj, youq gwnz roen vwnzyoz, Moz Ginhmeiz souj ndei simnduj、fatbiuj lailai, gonqlaeng ndaej daengz Bingh Sinh lwgnyez vwnzyoz ciengj、Gvangjsih vwnzyi cangcoz dungzguj ciengj、 Gvangjsih gohbuj duzvuz itdaengjciengj.

Sam

Youq Sangswh, Luz Vanjcinh dwg soujgo gyauyuz ndeu. Youq ndaw go de, dwg Luz Vanjcinh aeu sim bae raeq gyangjdaiz, bae henhoh gij vah minzcuz, dawz Cuengh Gun song cungj vah vwnzva caez sim caez angq miznaj daeuj ciengq.

Minzcuz goekgaen dwg vwnzva, gij hoenz vwnzva youq ciepswnj. Luz Vanjcinh dwg boux veiyenz Cungguek Cozgyah Hezvei、boux lauxsae maenh’ak Sangswh Yen, doekrag youq sienq gyauyuz ceiq baihnaj ngeihcib lai bi, aeu sam cik gyangjdaiz guh cindi, yungh diuz sim ndeu guh cehfeiz, caenhrengz doigvangq Cuengh Gun song cungj saw vah, cauhbanh Cuengh、Gun song cungj saw lauxsae gunghcozsiz, dap hwnj diuz giuz gangj Vahgun caeuq Vahcuengh doxgyau, hawj minzcuz vwnzva youq ndaw hagdangz doek rag fat ngaz, youq ndaw sim lwgnyez ndaem roengz gij ceh vwnzva gagsaenq, vih Sangswh minzcuz vwnzva ciepswnj sij gij faenzcieng mbouj liux mbouj lumz.

Sangswh dwg dieg Boux- cuengh comzyouq, Vahcuengh dwg gij vahcoj Bouxcuengh, raeuz aeu daihdaih cienz roengzdaeuj. Hoeng riengz seizdaih hwngfat, Vahcuengh ciepswnj cugciemh bienq nyieg, diuz meg goek minzcuz bungzdaengz cienzswnj hoj. Luz Vanjcinh gig rox, henhoh Vahcuengh couhdwg henhoh minzcuz geiqsingq, cienzciep song vah couhdwg soujmaenh diuzmeg vwnzva. De mbouj yaemhywx saek di dawz diuz rap naek gyauyuz Cuengh、Gun song cungj saw neix, dawz ciepswnj minzcuz vwnzva, dangguh aen gyauyuz sawjmingh swhgeij baenz ciuhvunz.

2021 nienz, Luz Vanjcinh Cuengh、Gun song cungj saw lauxsae gunghcozsiz cingqsik laebbaenz, vih cienz ndang douz haeuj son’gyauq Cuengh、Gun song cungj saw vah neix bae, de cujdung swz bae gij cizvu fuyaucangj, youh dauq daengz gyangjdaiz, cienz sim bae son caeuq yenzgiu song cungj vah saw. De itcig cungj nyinhnaeuz, song cungj vah saw gyauyuz mbouj dandan dwg cungj sonhag genjdanh ndeu, dwg cienzswnj caeuq yungzhab minzcuz vwnzva, gawq aeu hawj lwgnyez hag ndei Vahbujdungh, hix aeu souj maenh diuz meggoek minzcuz, saedyienh gak minzcuz vwnzva gyauhliuz doxhag、 caemh seng caez yungz. Sonhag ndawde, de dwkbyoengq conzdungj vunqsik, dawz gij fwen Vahcuengh、gij gojgaeq minzcuz、minzsug lijyiz yungz haeuj ndaw godangz bae, hwnjdangz gangjvah sengdoengh mizyinx, hawj lwgnyez youq mwh hagsib vahcoj, doengzseiz gamjsouh gij yinxdaeuz minzcuz vwnzva daegbied haenx. （1）

编辑：实习生蒙宁霜复审：黄慧华终审：蒙树起