来源：广西民族报网
发布时间：2026-07-07
Seiq
Seizgan lumj mbin nei, Dahnuengx daegnuengx Dahmaj gaenq doeg daihhag bizyez, bouxboux miz faenh hong miznaj he guh, hoeng cix liz ranz gyae, mbouj ndaej ciengzseiz dauq ranz. Seizneix bohmeh geq le, aeu miz vunz youq henz ndang, Dahmaj naemj dauq mbanjranz buenx bohmeh.
Sug hangz lawz couh guh hangz de, Dahmaj youq yienhsingz hai aen bouq gai vacanghbinj he, swnhbienh lij bang vunz ingj siengq.
Dahmaj hozswnh, gyaez riu, gyoengqvunz cungj gyaez daeuj ndaw bouq Dahmaj cawx vacanghbinj roxnaeuz ingj siengq, seng’eiq ndei, miz cienz coq daeh simcingz sangj, Dahmaj najhai lo.
Ngoenzhaenx, Dahmaj roxnyinh miz di fuengx, couh naengh youq gwnz daengq laepda yietnaiq.
“Lauxbanj, mwngz gizneix miz maz yw hawj bouxgeq cat fwngz cat din lwi? ” Miz vunz byaij haeujdaeuj naeuz.
Dahmaj rubrub lwgda, raen daegcoz he caeuq naihlaux he byaij haeuj ndaw bouq daeuj.
Dahmaj byaij gvaqbae, riu naeuz: “Gou gizneix miz haujlai cungj vacanghbinj, sou yawjyawj cungj lawz hab cat.”
Daegcoz naeuz: “Lauxbanj, mwngz yawj fajfwngz meh gou, cungj dek ok lwed lo, fajdin de hix dwg yienghneix. ”
“Dienheiq ciemh nit, cat di yw couh mbouj dek lo.” Dahmaj riu naeuz.
“Gou daj iq couh guhhong, naengnoh co, geq le, baez daengz seiznit couh dek.” Naihlaux naeuz.
“Gou miz sam daeglwg, cij daeg neix saeqnaeh lumj lwgsau nei, maz saeh cungj dawzhaeujsim.” Naihlaux riu dwk naeuz.
Dahmaj daiq daegcoz song mehlwg yawj gak cungj yw cat naj. Daegcoz naeuz: “Lauxbanj, gou cawx cungj yw ceiq bengz hawj meh gou cat din cat fwngz.”
“Cat din cat fwngz mbouj yungh cawx baenz bengz, mwngz yawj cungj neix, ngamq gouj maenz ngaenz, cat naj、cat fwngz、 cat din cungj ndaej, bienzngeiz youh ndeiyungh.” Dahmaj doiq daegcoz caeuq meh de naeuz.
Daegcoz cengqhung lwgda muengh Dahmaj, sim naemj: Vunzwnq guh seng’eiq, cungj dwg gaisau gij doxgaiq gig bengz haenx hawj bouxhek, boux lauxbanj neix vunz saedcaih youh ndeigangj, bouxsai aeu ndaej yah baenzneix, ninz gwnz oen cungj ndaek.
Muengh daegcoz neix, Dahmaj naemj: Lwgmbauq neix hauqswnh youh saeqnaeh, dahsau lawz haq hawj de, geijlai vuenyungz ho.
Haj
Daegcoz nanz mbouj nanz couh daeuj ndaw bouq caeuq Dahmaj gangjgoj, bang de baij doxgaiq roxnaeuz ingj siengq, song boux hix ciemh sug lo.
Daegcoz heuhguh Cangh Hungzyungz, daihhag bizyez le, de dauq mbanjranz, youq yienhsingz dang lauxsae.
Cangh Hungzyungz doiq Dahmaj naeuz: “Maj, gou baeznduj raen mwngz, couh roxnyinh mwngz dwg dahsau ndei he, gou ndaej hoengq couh daeuj bang mwngz, mwngz mbouj gvaiq gou ba. ”
“Ndei ha, gou cingq ra boux bangfwngz he ne.” Dahmaj riu naeuz.
Cangh Hungzyungz roxnyinh Dahmaj doiq cihgeij hix miz cingzeiq, cix mbouj rox de vihmaz mbouj gamj gangj, mbouj gamj nyinh.
Miz ngoenz he ndaw diemq mbouj miz hek, Dahmaj lwnh gij saeh gaxgonq hawj Cangh Hungzyungz nyi.
Cangh Hungzyungz naeuz: “Maj, lumz gaxgonq gij saeh haenx bae, daj neix hwnj, miz gou, mwngz gaej lau.”
Dahmaj mbouj guhsing, Cangh Hungzyungz youh naeuz: “Maj, mwngz mbouj saenq gou? ”
“Gou rox mwngz dwg boux vunz ndei he, couhsuenq raeuz mizsim, lauheiq gij vunz ranz mwngz mbouj nyienh.” Dahmaj gangj le, song da mbouj gamj muengh coh Cangh Hungzyungz.
“Meh gou daj baezhaenx raen mwngz le, seiz mbouj seiz couh dwen daengz mwngz ne, yawj daeuj de hix maij mwngz.” Cangh Hungzyungz naeuz.
Dahmaj dingq le, gumzgyaeuj riunyaenq lo.
Roek
“Maj, Maj.” Haetromh, Dahmaj ngamq daengz ndaw bouq, dingqnyi miz vunz heuh naeuz.
Dingq sing miz di sug, Dahmaj baenqndang baezyawj, doeksaet yat, cij raen Vuz Yenj sohnoengnoeng ndwn youq bakdou.
Baenzlai bi mbouj raen, Vuz Yenj mbouj raen bienq yiengh geijlai, lijdwg yienghhaenx mbauqndei, cij dwg gwnz naj de loq raen miz di fuengx.
Vuz Yenj naj hoengz- gyoenggyoeng naeuz: “Maj, gaxgonq dwg gou doiq mbouj gvaq mwngz.”
“Gou caeux couh lumz lo.” Dahmaj damzdwddwd naeuz.
Laxlawz, Vuz Yenj daj baezde caeuq Dahmaj doxbiek le, mbouj nanz couh caeuq dah lauxsae yienhsingz doxaeu lo.
Mehyah Vuz Yenj miz cienz, de gig dasang. Doxaeu mbouj geij nanz, de couh yiemz Vuz Yenj gizneix mbouj ndei, gizhaenx mbouj ngamj, yienghyiengh yawj mbouj swnhda, seizseiz ra saeh doxceng. Naeuz Vuz Yenj rox gwn mbouj rox suenq, dwg de dafangz cij yawj hwnj de bouxvunz neix…… Song boux yied ceng yied haenq, mizseiz lij doengh fwngz dem. Vuz Yenj ciengzciengz deng mehyah aeu ribfwngz raehrumrum nyaj ndaej diuzhoz miz haujlai rizlwed, de bae hagdangz hwnjdangz, ciengzciengz daep lwggaet giubuh daengz gwnz bae. Fouz yienz gaemh fwngz gvaq ciuh, mbouj nanz Vuz Yenj couh caeuq mehyah doxliz lo.
“Gaxgonq gij vunz ranz mwngz mbouj dwg hix naeuz gou gizneix mbouj ndei, gizhaenx mbouj ngamj ma? Baenzlawz vunzwnq hix yienghneix naeuz mwngz? Vunz gangj maz vah, couh dauqma coh de.” Dahmaj cungjsuenq hai bak lo.
“Maj, gou rox gou doiq mbouj gvaq mwngz, ngoenzneix gou daeuj gizneix, gangj gijneix, hix mbouj lau mwngz riu gou, gou cijdwg daeuj yawjyawj mwngz, yawjyawj mwngz gvaq ndaej baenzlawz yiengh, ngeix mbouj daengz, mwngz gaenq baenz boux lauxbanj he lo, mwngz caen ak……”
Vuz Yenj caengz gangj sat, sawqmwh dingqnyi miz vunz swenj naeuz: “Vuz Siujhuj, baenznanz mbouj raen mwngz lo. ”
Boux neix cingqdwg Cangh Hungzyungz. Cangh Hungzyungz byaij coh Vuz Yenj, riu naeuz: “Siujhuj, raeuz baenz nanz mbouj raen lo.”
“De heuh Dahmaj, seizneix gou caeuq de guhdoih hai diemq.” Cangh Hungzyungz youh riu dwk doiq Vuz Yenj naeuz.
Dahmaj ngeizvaeg dwk muenghmuengh Cangh Hungzyungz caeuq Vuz Yenj, mbouj rox maz saeh. Vuz Yenj caemh muengh dwk Dahmaj caeuq Cangh Hungzyungz, caemh mbouj rox maz saeh.
Laxlawz, Cangh Hungzyungz caeuq Vuz Yenj dwg gauhcungh doengzhag, mwhhaenx, Vuz Yenj heuh Vuz Siujhuj. Gauhgauj seiz, Cangh Hungzyungz gauj ndaej daihhag, Vuz Yenj gauj mbouj ndei geijlai, doeklaeng mbouj ndaej mbouj bae doeg daconh. Bohmeh Vuz Siujhuj nyinhnaeuz diuz mingzcoh neix mbouj ndei, mingh hix mbouj ndei, doeklaeng couh lingh an coh, heuh Vuz Yenj.
Seizneix, Dahmaj maz cungj rox lo, de naemj: Mingh gou vihmaz yienghneix gumzgamx ne? De mbouj mingzbeg, hix mbouj siengj loengh mingzbeg, seizneix, ndaw uk de youh naemj hwnj gaxgonq gij yiengh Vuz Yenj gouq de haenx, gaxgonq song boux gij najriu haenx…… Ngoenzde cihgeij doekraemx, danghnaeuz mbouj dwg Vuz Yenj daeuj gouq, caeux couh deng dumh dai lo, lawz miz ngoenzneix……Laxlawz cihgeij youq gizneix, couhdwg vih caj Vuz Yenj, caj de daeuj ra cihgeij……
Naemj daengz neix, Dahmaj gij heiq ndaw dungx hix siu bae dingzlai lo. Heux bae heux dauq, seizneix youh ma daengz goek, lumj aen mbwn daegdaengq anbaiz ndei nei, sojmiz gijneix lumj fangzhwnz, lumj yienjheiq, sawj vunz moenghmangh, sawj vunz yaek re mbouj ndaej.
Ai, Dahmaj ngiengx gyaeuj danq gaemz heiq he.
Gvaqlaeng, Cangh Hungzyungz hix maz cungj rox lo, de riu dwk doiq Dahmaj caeuq Vuz Yenj naeuz: “Goenghoh sou, goenghoh sou boux miz cingz caiq bungzraen.”
Baij laeuj ngoenzhaenx, gyoengqvunz daeuj goenghoh Dahmaj caeuq Vuz Yenj, nauhyied dangqmaz, mbangj naeuz Dahmaj miz cingz miz ngeih, hop bae heij dauq lijdwg bouxgonq cuengq mbouj ndaej. Mbangj haenh Vuz Yenj miz fukheiq, aeu ndaej Dahmaj baenz ndei baenz ak.
Dahmaj seng doiq lwg songseng ndeu, boux it dwg dahlwg, boux ngeih dwg daeglwg, daengx ranz angq.
Dahmaj caeuq Vuz Yenj gangjgoj naeuz: “Seizneix guekgya cwngcwz ndei, lwgnyez doegsaw mbouj deng ngaenz, seng lwg lij miz ngaenz ciengj, gyoengq bouxcoz cungj mbouj nyienh baenzgya, yienghneix roengzbae, ndaw mbanj gij vunz daih beij daih noix, gij ranzlaeuz ce ndwi hoengqhanghang, mbouj rox gyoengq bouxcoz baenzlawz naemj.”
“Gyoengq lwgsai cungj naeuz, seizneix hoj ra yah, mbouj yunghsim bae ra.” Vuz Yenj naeuz.
“Gou naemj gvaq lo, dajneix doxbae, miz vunz gietvaen daeuj raeuz gizneix ingj siengq, mbouj sou cienz; seng lwg ndaej bak ngoenz, umj lwgnding daeuj ingj siengq, hix mbouj sou cienz. Yienghneix guh, gyoengq bouxcoz roxnyinh geizheih youh mizyinx, haengjdingh miz haujlai bouxcoz doxaeu, caemh maij daeuj raeuz gizneix ingj siengq.” Dahmaj riu dwk naeuz.
“Dwg bw, aen siengjfap neix mbouj loek.” Vuz Yenj naeuz.
Dahmaj baez hoij baiz okbae, mbouj nanz caen miz doiq bouxcoz ndeu daeuj lo.
“Hoh sou ciengxlwenx vuenyungz vaiqvued.” Dahmaj riu dwk naeuz. Song bouxcoz haenx dingq le, seiq da doxmuengh, riunyumnyum.
Yienghneix boux cienz boux, caen miz haujlai bouxcoz daeuj ndaw bouq ingj siengq, hix miz vunz umj lwgnding daeuj ingj siengq. Raen gyoengq bouxcoz baenz sueng baenz doiq, Dahmaj caeg angq ndaw hoz.
Gyoengqvunz daeuj ndaw bouq ingj siengq le, lij swnhbienh cawx gak cungj vacanghbinj, gyoengqde yungh ndaej ndei, couh gaisau vunz daeuj cawx. Ngoenz cungj miz baenz buek baenz buek vunzhek daeuj ndaw bouq cawx vacanghbinj roxnaeuz ingj siengq, seng’eiq yied guh yied hoengh.
Gyoengqvunz cungj baenzneix naeuz: “Dahmaj vunzndei simsienh, cienzcaiz goenjfoedfoed daeuj coh, raeuz vih de miznaj, raeuz vih de ndaengndiengq.”
(2 sat)
编辑：实习生 蒙宁霜 复审：黄慧华 终审：蒙树起
广西民族报社版权所有 未经书面授权禁止复制或建立镜像，广西民族报网—广西民族报原创文章，欢迎转载，转载请注明出处。
地址：广西南宁市桂春路16号 邮政编码：530021 联系电话：0771-5528076 5559552 传真：0771-5622291
汉文版电子邮箱：gxmzbzb@163.com 壮文版电子邮箱：gxmzb2@163.com
桂ICP备13003124号-2
桂公网安备45010002450838号
中国互联网违法和不良信息举报中心 广西互联网违法和不良信息举报中心 广西互联网辟谣平台
广西民族报社违法和不良信息举报电话：0771-5622291 举报邮箱：gxmzbsbgs@163.com