Gou Youq Ndawsingz Caj Mwngz - 广西民族报网

Gou Youq Ndawsingz Caj Mwngz

来源：广西民族报网

作者：□ Danz Hijvah/谭喜花

发布时间：2026-07-07

Geij sing singdaej goksad daj ndaw ranzvax gaeuqnaeuh cienz daeuj, dah lwgnding he doekfag lo, fajnaj de hoengzfefe.

Dah lwgnding neix iqetet. Ndaw ranz dem lan iq, gyoengq beixnuengx angqfofo, gaem aen caengh daeuj, naeuz yaek caengh dahlan iq neix miz geijlai naek.

Mehmbwk yawjyawj dahlwg, naeuz:“De baenz iq, ceiqlai miz saek song sam gaen naek, mbouj caengh lo.”

Dahnding neix iq dwg iq di, hoeng song da ronghrikrik, seiq guengq ndei caez, menhmenh ciengx, cungj miz ngoenz he majhung. Daxmeh hawj dahlwg neix an coh heuh “Dahmaj”, maqmuengh de ngoenz beij ngoenz majhung, maj ndaej youh mboeng youh cangq.

Gvaqlaeng, daxmeh Dahmaj youh seng dahnuengx he caeuq daegnuengx he. Lwgnyez lai, gwn yungh hix lai, raen bohmeh ngoenzngoenz dak ndit soemh fwn guhhong, Dahmaj gig sim’in, doeg sat cuhcungh couh gaen vunz bae Gvangjdungh dajgoeng.

Gij ngaenz Gvangjdungh mbouj ndei aeu, daj doengxhaet bet diemj cung guhhong daengz banhaemh bet diemj cung, cawz bae diengzhaex, roxnaeuz bae gwn ngaiz, gizyawz seizgan cungjdwg guhhong mbouj dingz. Daengz haemh roengzban, Dahmaj roxnyinh daengx ndang ndok yaek sanq bae, boemz ninz gwnz congz mbouj siengj doengh.

Gyoengq lwgsau doih, moix ndwen ndaej cienz, dingzlai cungjdwg bae cawx buhvaq moq, cawx vacanghbinj daeuj cat naj, Dahmaj moix ndwen cij ce di cienz he yungh, gizyawz cienzbouh geiq dauq ranz, de rox ndaw ranz gungzhoj, haemz mbouj ndaej faen ngaenz mbek guh song daeuj yungh.

Dahmaj doekfag seiz iqet, seizneix aen ndang de sangsiu reuxred, naj maeq, gig baenzsau, vunz raen cungj haenh. Roxnaeuz youq rog guhhong ninz mbouj gaeuq, gwn mbouj ndei, Dahmaj song mbiengj gemj miz di raizlaej, de hix gig siengj cawz gij raizlaej neix bae, hawj cihgeij gyaeu di. Hoeng baez naemj daengz aen gyaranz cihgeij, Dahmaj gig mbaet yungh cienz, gwnz ndang baedauq cungjdwg daenj song sam dauq buhvaq gaeuq haenx, gwnz naj raizlaej hix mbouj guenj, de saedcaih mbouj sij dawz cienz vanq gwnz naj bae.

Ngoenz singhgiz he, Dahmaj okbae youzbyaij. Sawqmwh, myaeg raen henz gai miz aen bouq ingjsiengq he, aen bouq baihrog nem miz haujlai dozsiengq, gij dahsau gwnz dozsiengq haenx, gyaeundei dwk vunz baez yawj couh yaek lumh.

Dahmaj muengh gij dozsiengq gyaeundei haenx, hozhaenz dangqmaz, mbouj rox mbouj nyinh couh byaij haeujbae.

“Dahsau, mwngz seizneix daeuj cingq ngamj lo, yaek daengz ciet gozging, ndaw bouq dou guh hozdung, 399 maenz ndaej ingj bak mbaw siengq, lij guh baenz bonjsiengq gyaeu he soengq hawj mwngz dem.” Bouxcawjdiemq naeuz.

Dahmaj dingq le naemj: Seizneix cingqdwg aen nienzgeij lumj dujva ngamq hai nei, mbouj ingj geij mbaw siengq daeuj louzniemh, uengj gvaq lo.

Geij boux vunzhong ndaw diemq mbangj hawj Dahmaj cat naj, veh bwnda；mbangj bang Dahmaj senj ndangdaenj.

Youq baihnaj gingqdaeuz cangh- ingjsiengq, Dahmaj gyaeundei youh dwggyaez, de ngeng ndang、mbit gyaeuj、cienq dauq, baij ok gak yiengh, loengh baenz buenq ngoenz, cungj suenq ingj ndaej lo.

Gij siengq Dahmaj mbawmbaw gyaeundei, de yawj bae lumh dauq, hozmaij raixcaix.

“Vunz cijaeu loq cangndang di, couh sikhaek bienq yiengh, fajnaj ceiq youqgaenj, fajnaj iqetet lumj fajfwngz nei, cungj guenjleix mbouj ndei, lij guhmaz saeh?” Boux lauxbanj riu doiq Dahmaj naeuz.

Dahmaj sim naemj: Dwg bw, aen sim youq ndaw baenzlawz yiengh, vunz mbouj rox, fajnaj loh youq rog, vunzvunz raen, aeu hoh ndei cijndaej.

Daj neix le, Dahmaj doiq vacanghbinj gij doenghyiengh neix mizyinx, de mbouj caiq youq ndaw cangj guhhong lo, de bae aen bouq gai vacanghbinj he guhhong.

Ngeih

Caet nyied cibseiq mbanjranz gvaq ciet, mbaw sinhfwncwng daengzgeiz lo, Dahmaj dauq mbanjranz gvaq ciet, swnhbienh lingh banh sinhfwncwng.

Seizhah fwnraemx lai, aen mboq gyaeujmbanj raemx rim bingz haenz, laeglumlum, raemxmboq sawdikdik dinghdingh lae bae. Dahmaj daengz henz mboq saeg buh, sawqmwh lajdin baez raeuz, vunz conj roengz mboq bae lo, de mbouj rox youzraemx, youq ndaw raemx cak dai cak lix.

Daegcoz he byaij gvaq henz mboq, raen vunz doekraemx, de buhvaq hix mbouj duet, couh diuq roengz mboq bae gouq vunz.

Daegcoz gouq Dahmaj hwnj haenz mboq daeuj, song boux ndang dumzswdswd lumj gaeq doek cingj nei. Dahmaj hix ndaej gwn geij gaemz raemx roengz dungx, caeklaiq miz vunz gouq ndaej gib, lw diuzmingh mbouj dai.

Daegcoz neix heuh Vuz Yenj, de ndangsang cangqcwt, bwnda ndaem- ndwt, song da ronghsag, baenzmbauq. Vuz Yenj dwg ngamq daj mbanj wnq daeuj ndaw mbanj son saw, ngoenzneix de miz saeh dauq hagdangz aeu doenghyiengh, cingq ngamj bungzdaengz gienh saeh neix.

“Docih mwngz lo Vuz lauxsae, ngoenzneix mbouj miz mwngz gou couh baenz fangz lo.” Dahmaj naeuz.

“Bouxlawz raen dai mbouj gouq, baezlaeng mwngz aeu haeujsim di.” Vuz Yenj naeuz.

Daj ngoenzhaenx hwnj, Dahmaj caeuq Yuz Yenj song boux mbouj caiq najseng.

Gvaq ciet le, Dahmaj youh dauqbae Gvangjdungh lo. Seizhaenx caengz miz soujgih, Vuz Yenj ciengzciengz bae haw dwk denva roxnaeuz sij saenq hawj Dahmaj, lwnhlwnh sonhag baenzlawz yiengh, daengq Dahmaj youq rog aeu ciuqgoq swhgeij, gaej saenq vunz wnq, gaej deng vunz yaeuh…… Dahmaj dingq daengz gij vah neix, ndaw sim diemzswdswd.

Bi he dauq ranz gvaq cieng, ndaw ranz miz saeh, hagdangz gaenq haihag lo, Dahmaj lij caengz ndaej okbae dajgoeng, youq ranz miz di mbwq, gwn ngaiz le, Dahmaj okbae byaijbyaij, swnhbienh daiq di byaekheu hawj Vuz Yenj.

“Vuz lauxsae.” Dahmaj ndwn youq rog cueng heuh.

“Dwg mwngz ha, gou cingq gaij cozyez ne.” Vuz Yenj byaij okdaeuj riu naeuz.

“Gou mbaet di byaekheu he hawj mwngz.” Dahmaj doq gangj doq ndenq daeh byaekheu he hawj Vuz Yenj.

“Haeujdaeuj naengh yaep he gonq.” Vuz Yenj naeuz.

“Mbouj lo, byaijbyaij yaep he, dauq ranz lijmiz hong yaek guh ne.” Dahmaj baenqndang yaek byaij.

“Vuz Yenj, de dwg bouxlawz? Dingqnaeuz mwhneix mwngz caeuq dahsau he miz bae miz dauq, dwg de lwi? Bohmeh soengq mwngz bae doegsaw mbouj yungzheih o!” Cingq youq seizneix, miz aen sing he daj baihnaj hongz naeuz.

Dahmaj sim baez gaenj, ganjmuengz coh aen sing haenx muengh bae. Cijraen boux mehmbwk cungnienz he ndwn youq bakdou hagdangz, hujdengdeng cimyawj Dahmaj, Dahmaj rox dwg cejngeih Vuz Yenj.

“Cejngeih, dahsau neix heuh Dahmaj, dwg baengzyoux gou.” Vuz Yenj naeuz.

“Dingqnaeuz de lij yukyon mwngz bae rog dajgoeng ne, mwngz doeg baenzlai saw, baenzlawz couh naemj bae dajgoeng? Dajgoeng guh mbouj ok maz saeh daeuj!” Cejngeih fok Vuz Yenj naeuz.

“Baezlaeng mwngz gaej daeuj ra daegnuengx gou lo, de gaenq miz baengzyoux lo, youq yienhsingz dang lauxsae!” Cejngeih daengxda coh Dahmaj naeuz.

Dahmaj daj iq caengz miz vunz doiq de gangj vahhaenq gvaq, de naemj: Song boux doxlienh, mbouj miz byawz apbik byawz, danghnaeuz mbouj nyienh, gak boux gag byaij.

Dahmaj ndaw sim hojsouh, baenqndang couh deuz. Vuz Yenj youq baihlaeng doq gyaep doq swenj naeuz: “Maj, Maj, mwngz dingq gou gangj!”

Vuz Yenj gyaep daengz Dahmaj, baegfofo naeuz: “Maj, mwngz gaej dingq gij vah cejngeih gou.”

“Mwngz mbouj dwg miz vunzwnq luma? Danghnaeuz mbouj dwg caen, cejngeih mwngz vihmaz baenzneix gangj?” Dahmaj hozndat dwk naeuz.

“Ndwengonq, gyoengqde bik gou bae doxcim, hoeng ndaw sim gou cijmiz mwngz boux ndeu.” Vuz Yenj naeuz.

“Gangj seuq bae, gij vunzranz mwngz couhdwg yiemz gou dwg boux dajgoeng he.” Dahmaj naeuz.

“Cijaeu song raeuz sim doxdep, couhsuenq mbwn doemq deih boek, haij mboek rin nduk, gij cingzngeih raeuz ciengxlwenx mbouj bienq.” Vuz Yenj gaemdawz fajfwngz Dahmaj naeuz.

Dahmaj dingq le, miz di gamjdoengh, seizneix de youh fwt naemj hwnj gij vah cejngeih Vuz Yenj, gyaeuj hix mbouj nyeux youh buetdeuz lo. Dahmaj rox: Vuz Yenj doiq cihgeij caiq ndei, danghnaeuz vunzranz de mbouj nyienh, songde nanz byaij roengzbae.

Raen Dahmaj buet gyae, Vuz Yenj ndwn youq gizhaenx moenghmangh, de mboujcaiq gyaep Dahmaj, de hix mbouj rox baenzlawz guh cijndei.

Dahmaj loq roxnyinh, de caeuq Vuz Yenj cungqgyang gaenq lumj gek caengz doxgaiq he nei, gijneix hawj de ngoenz sim mbouj onj, haemh ninz mbouj ndaek, de roxnyinh lumj miz maz saehcingz yaek daeuj.

Sam

Ngoenzhaenx, Vuz Yenj dwk denva daeuj ndaw bouq, naeuz: “Maj, gou euq mbouj gvaq bohmeh, raeuz couh yienghneix gonq lo……”

Dahmaj dingq le, aen ndang saenzdwd baez he, lumj deng mid mbongq haeuj aen sim yienghhaenx in, sing iq naeuz: “Caih mwngz lo.”

“Aen haggeiz laeng gou couh lizhai gizneix lo, bae lingh giz son saw……” Vuz Yenj baihlaj gangj gijmaz, Dahmaj caiqhix dingq mbouj nyi, ndaw uk hoengqhanghang.

Gaxgonq gij vahmieng Vuz Yenj lij youq henzrwz yiengj mbouj dingz, gij saeh gyaeundei haenx cungj saetbae lo…… Dahmaj simsoiq lo.

Gij saeh ngoenzgonq hwnzngoenz youq dangqnaj Dahmaj okyienh, lumj fagmid raehrumrum he camz haeuj aen sim de, mbouj raen riz, mbouj raen lwed, cix beij raen riz raen lwed engq hojsouh.

“Lajmbwn nanz ra boux caensim, mboujlwnh yienghlawz, lwgmbwk hix aeu lumj lwgsai nei, aeu guh yiengh saehnieb he okdaeuj, cijaeu ndaw daeh miz ngaenz, maz cungj mbouj lau.” Dahmaj doiq cihgeij naeuz.

（1）

编辑：实习生蒙宁霜复审：黄慧华终审：蒙树起