Gij Ndiepgyaez Gaenq Bae Gyae - 广西民族报网

Gij Ndiepgyaez Gaenq Bae Gyae

来源：

作者：□ Lingz Siuyangh/凌秀香

发布时间：2026-07-07

Moix bi liggaeuq caet nyied cibseiq caeuq cieng co’ngeih dwg ngoenzciet ma ranzmeh dieg dou, neix dwg ciuhgeq cienz roengzdaeuj. Song ngoenz neix, gyoengq lwgmbwk haq bae baihrog haenx cungj daiq gvan yien lwg, dawz laex dauq damqcaen. Bingzciengz hix ndaej caezbienh ma, hoeng, cijmiz song ngoenz neix daegbied, bouxboux mehranz dawz haeujsim, laihnaeuz song ngoenz neix doxcomz cijdwg caencingq doxcomz, aenvih song ngoenz neix, ranzranz lwgmbwk dauq caez, daengx ranz vunz doxraen, nauhyied dangqmaz. Youq ndaw nauhyied neix, gou engq muengh gij ndiepgyaez bohmeh.

Bingzciengz gak boux beixnuengx gag nyaengq ragwn, caencingz aenvih fwnz、haeux、gyu、haj ce gvaq wnq bae, cijmiz song ngoenz neix, ndaej hawj daengx ranz vunz doxcomz, lwgmbwk haq baihrog haenx ndaej youq henzndang bohmeh gangjgoj, hix ndaej caeuq gyoengq hujgeiq mwh iq lwnhgoj, baenzneix lungzcung、baenzneix nauhyied, bingzciengz noix raen cungj angq neix.

Haemhndaep yawj densi seiz, gou dwk denva hawj cejdaih, caeuq de doxyaeng cieng co’ngeih yaek cawx maz laex dauq ranzmeh, seizde caen muengh ngoenz co’ngeih vaiq di daengz.

Baez yaepda couh muengh daeuj ngoenz co’ngeih lo, gyanghaet cib’it diemj cung, cejdaih ranzvunz de daengz ranzmeh gonq gou yamq ndeu. Lumj bingzciengz nei, seizneix gosauj cingq youq ranzdajcawj boenq cawjgwn, cauq、duix、rok、bat doxbungq yiengj “dingding dang- dang”, sing neix dwg gij swi hoenzfeiz ndaw ranz, gaxgonq dingq le roxnyinh sim onjwt, ngoenzneix dingq le, cix roxnyinh sim hoengqvauvau.

Beixnuengx mbwk dou lumj aenbaez nei, byaij haeuj ranzdajcawj bae, cam gosauj miz maz baenz guh? Gosauj cungj dwg coenz vah haenx: Mboujcaeq sou guhmaz, sou yietnaiq ba. Aenbaez dou sim’onj cwxcaih dwk deq gwn, angq ndaej yiengjsouh gaiq fukheiq“buh daeuj iet fwngz, haeux daeuj aj bak” neix, hoeng ngoenzneix mbouj miz bohmeh youq henzndang, vangq dwk dou youq lawz mbouj baenz lawz.

Song laeq lan cejdaih caen manz, youq laj roqranz neb meuz, dauqma youh gyaep gaeq, bang gaeq deng gyaep haenx dauqcawq mbin deuz, songde buet naiq le couh daengx roengzdaeuj cuengq bauqva. Singhemq singcauz dienzrim ndaw- hongh, cix dienz mbouj rim hoengqvau ndawsim gou caeuq cejdaih. Geij boux nyezhung lauxbiuj cix gvaengz lozfeiz gangq noh gwn, naijcaz soengq nohgangq cungjdwg gaiq gwn gyoengqde ceiq maij haenx. Singgangj singriu baenzneix nauhyied, neix engq hawj gou caeuq cejdaih caemrwd.

Aenbaez ma ranzmeh, gou caeuq cejdaih cungjdwg naengh henzndang bohmeh, boux youq mbiengjswix boux youq mbiengjgvaz, neix dwg dieg ceiq an’onj ma ranzmeh. Moix baez seizneix, daxmeh senq gaem fwngz gou, fajfwngz coyad de mbat dem mbat rubluh laengfwngz gou, sijsaeq cazyawj fwngz gou, haiq miz mbouj miz diegsieng, gaenriengz youh cim naj gou, ndaw da de cungjdwg gvaq- niemh, ciepdwk youh cam coenzva de mbouj rox cam gvaq geijlai baez haenx: “De mbouj hangz mwngz ba?” Baezbaez gou cungj riunyumj dap de: “Mbouj miz ne.” Daxboh youq henz cix gvaiq daxmeh naeuz: “De ngamq baez ndeu, mwngz dangq de baenz gvenq la?” Daxmeh coengzlaiz mbouj soengbak, lij giengh naeuz: “W, nanzgangj, duzma gaij mbouj ndaej gwn haex!”

Daeggvan gou beizheiq gaek, dwg boux yungzheih gvaqmauh ndeu, mbouj siujsim sieng loeng gou gvaq. Youq ndaw da daxmeh, haenx mbouj dwg sieng loeng, dwg cingzgvang de ciengxlwenx cuengqsim mbouj ndaej haenx. Faenh gvaqniemh neix yo youq ndaw vah bakcam de.

Humx congz gwn caeuz seiz, daxmeh cungjdwg mizeiq fouzeiq maij gangj coenzvah——Lwgmbwk gou miz ranzmeh, byawz gamj hangz, vunz ranzmeh haengjdingh mbouj cuengq gvaq de. Dou bouxboux cungj rox, coenz vah neix dwg gangj hawj song lwggwiz ranz dou dingq.

Cejfou maij dojcienz, vihneix gvanbaz ciengz doxceng, miz geij baez cejdaih hozhwnj dauq ranzmeh youq, hemqcaca naeuz ndwenngoenz gvaq mbouj roengzbae lo, mbouj dauqbae lo, da mbouj raen sim mbouj fanz, youq ranzmeh daengznauq. Hoeng, ngamq youq song ngoenz, cix youq mbouj onj lo, hongdoengh、hongranz、doenghduz ndaw ranz hawj de youq mbouj onj, vunz youq sim mbouj youq. Bohmeh yawj youq ndaw da in youq ndaw sim, cix gienq naeuz: “Bi daengz haemh nyaengqnyatnyat, dangq yietnaiq geij ngoenz lo, vut rap hawj de, haiq de lij miz seizgan bae dwkdoj mbouj?” Yienznaeuz yienghneix gangj, hoeng, raen gij yiengh cejdaih ndwn naengh mbouj onj、hoenz mbouj youq ndang haenx, cix sim’unq lo, naeuz, mboujcix dauqbae ba.

Cejdaih couh riengz coenz vah neix dauqbae lo, dauq daengz ranz swhgeij youh lij raeksim bohmeh. Gvaqlaeng cejdaih baez dauq ranz, bohmeh cungj dungxmbouq simdiuq dwk cam: “Youh doxceng le?” Cejdaih dingq le daej riu mbouj baenz, naeuz: “Mbouj doxceng, gou mbouj ndaej dauq ranzmeh ya?” Daxboh daxmeh nyengh yaep he le, cix doxcim, riu lo, ndaw da gyaeng rim gij in’gyaez.

Gou caeuq cejdaih ma ranzmeh, haiciengz gangjgoj seiz, song coenz vahnduj bohmeh cungjdwg: “De mbouj hangz mwngz ba?” “De lij dwkdoj lwi?” Cijmiz ndaej daengz gij hoizdap habhoz le, songde cij cuengqsim, cij onjsim caeuq dou raemhraex saehranz, itcig mboensaex daengz baenz gwn caeuz, dou roxnyinh maedsaed, faenh sim’onj neix dwg bohmeh hawj ne.

Hoeng bineix bohmeh doxgaen gvaqseiq, baez cieng co’ngeih neix dwg baeznduj ma ranzmeh mbouj miz songde. Mbouj miz bohmeh youq henzndang raemhraex; mbouj miz coenz vah faekcam haenx; mbouj miz faenh gvaqniemh haenx, gou caeuq cejdaih gingqyienz dinfwngz luenhlab, ndwn naengh mbouj baenz, byaij haeuj ranzdajcawj bae youh fandauq, siengj bangfwngz cawj gwn, cungj ngaiz gosauj gyaep okdaeuj, gyaep daengz gyangdangq heuh dou ndeindei yietnaiq. Dou sim hoengqvauvau, youq lawz mbouj baenz lawz.

Baez luqlawq, gou caeuq cejdaih mbouj rox mbouj nyinh doengzseiz hwnqndang, gak boux gag gaem mbaw siengqlouz bohmeh, sijsaeq uet bae gij moekmoenq gwnz siengqgvaengh, gizsaed. gwnzde gaenbonj mbouj miz moekmoenq, byaifwngz mo gvaq aennaj bohmeh, aen naj neix baenzneix sugda, gij raemhraex、mboensaex、gvaqniemh、daengq、gvaiq、ienq daengjdaengj bingzciengz fwt nyoenx hwnj simdaeuz, gij siengjniemh bohmeh ngoenz beij ngoenz naek haenx, seizneix lumj raemxgyaeng ngaiz baengq nei bongh daeuj bauqfoenfoen, raemxda dou loenqbyoegbyoeg, hainduj dwg daejsaekwk, doeklaeng singdaej cix loh ok bak daeuj lo.

Singcauz ndawhongh fwt dingz roengzdaeuj, bouxhung bouxiq riengz singdaej buet haeuj gyangdangq daeuj yawj, raen gou caeuq cejdaih gak boux gag gaem mbaw siengqlouz ndeu, youq de daej, vunzranz cungj caem lo. Mehsauj gvaqdaeuj mbaeumbaeu bongx mbaq dou, naeuz, ndwencieng bimoq gaej daej, bohmeh raen le hix sim’in.

Singdaej ciemhciemh mbaet lo, hoeng ndawsim gij hoengqvau caeuq siengjniemh engq naek. Laizlawz gij raeujrub ma ranzmeh mbouj dwg gij nauhyied doxcomz, cix dwg miz bohmeh youq henzndang, miz vunz muengh, miz vunz in, miz vunz gvaqniemh, cungj onjwt neix cijdwg gij raeujrub ma ranzmeh. Ngoenzneix ranzmeh mbouj miz bohmeh, de lij dwg ranzmeh, hoeng gaiq ingbaengh ceiq maenh haenx mbouj miz lo, hix noix le faenh gvaqniemh ciemh haeuj ndok haeuj ngviz haenx. Gij ndiepgyaez bohmeh dou ciengxlwenx lumz mbouj ndaej haenx gaenq bae gyae. Boh ha, meh ha, ciuhlaeng raeuz lij guh ranz vunz ndeu!

编辑：实习生蒙宁霜复审：黄慧华终审：蒙树起